Daily Murli for Friday 15 November 2024

15-11-2024 praatahmurli om shanti "baapdaada"' madhuban

“meethe bachche - apni jaanch karo ki kitna samay baap ki smriti rehti hai, kyonki smriti mein hai hi phaayda, vismriti mein hai ghaata''

prashn:- is paap aatmaon ki duniya mein kaun-si baat bilkul asambhav hai aur kyon?

uttar:- yahaan koi kahe ham punya aatma hain, yeh bilkul asambhav hai kyonki duniya hi kaliyugi tamopradhaan hai। manushya jisko punya ka kaam samajhte hain woh bhi paap ho jaata hai kyonki har karma vikaaron ke vash ho karte hain।

om shanti। yeh to bachche samajhte honge ham abhi brahma ke bachche brahmaakumaar-kumaariyaan hain। phir baad mein hote hain - devi-devta। yeh to tum hi samajhte ho, doosra koi nahin samajhte। tum jaante ho ham brahmaakumaar-kumaariyaan behad ki padhaai padh rahe hain। 84 janmon ki padhaai bhi padhte, srishti chakra ki padhaai bhi padhte। phir tumko yeh shiksha milti hai ki pavitra banna hai। yahaan baithe tum bachche baap ko yaad to zaroor karte ho paavan banne ke liye। apne dil se poochho sach-sach ham baap ki yaad mein baithe the ya maaya raavan buddhi ko aur taraph le gayi। baap ne kaha hai maamekam yaad karo to paap katen। ab apne se poochhna hai ham baba ki yaad mein rahe ya buddhi kahaan chali gai? smriti rahni chaahiye - kitna samay ham baba ki yaad mein rahe? kitna samay hamaari buddhi kahaan-kahaan gai? apni avastha ko dekho। jitna time baap ko yaad karenge, usse hi paavan banenge। jama aur na ka bhi potaamel rakhna hai। aadat hogi to yaad bhi rahega। likhte rahenge। diary to sabke pocket mein rehti hi hai। jo bhi vyaapaar vaale hote hain, unhon ki hai had ki diary। tumhaari hai behad ki diary। to tumko apna chart note karna hai। baap ka pharmaan hai - dhandha aadi sab kuchh karo parantu kuchh samay nikaal mere ko yaad karo। apne potaamel ko dekh phaayda badhaate jaao। ghaata na daalo। tumhaari yuddha to hai na। second mein phaayda, second mein ghaata। jhat maaloom padta hai, hamne phaayda kiya ya ghaata? tum vyaapaari ho na। koi virla yeh vyaapaar kare। smriti se hai phaayda, vismriti se hai ghaata। yeh apni jaanch karni hai, jinko oonch pad paana hai unko to ona rehta hai - dekhen, ham kitna samay vismriti mein rahe? yeh to tum bachche jaante ho ham sab aatmaon ka baap patit-paavan hai। ham asul aatmaayen hain। apne ghar se yahaan aaye hain, yeh shareer lekar part bajaate hain। shareer vinaashi hai, aatma avinaashi hai। sanskaar bhi aatma mein rehte hain। baba poochhte hain - he aatma yaad karo, is janma ke chhotepan mein koi ulta kaam to nahin kiya hai? yaad karo। 3-4 varsha se lekar yaad to rehti hai, hamne chhotepan mein kaise bitaaya hai, kya-kya kiya hai? koi bhi baat dil andar khaati to nahin hai? yaad karo। satayug mein paap karma hote hi nahin to poochhne ki baat nahin rehti। yahaan to paap hote hi hain। manushya jisko punya ka kaam samajhte hain woh bhi paap hi hai। yeh hai hi paap aatmaon ki duniya। tumhaari len-den bhi hai paap aatmaon se। punya aatma yahaan hai hi nahin। punya aatmaon ki duniya mein phir ek bhi paap aatma nahin। paap aatmaon ki duniya mein ek bhi punya aatma nahin ho sakti। jin guruon ke charnon mein girte hain woh bhi koi punya aatma nahin hain। yeh to hai hi kaliyug so bhi tamopradhaan। to ismen koi punya aatma hona hi asambhav hai। punya aatma banne liye hi baap ko bulaate hain ki aakar hamko paavan aatma banaao। aise nahin, koi bahut daan-punya aadi karte hain, dharmashaala aadi banaate hain to woh koi punya aatma hain। nahin, shaadiyon aadi ke liye haal aadi banaate hain yeh koi punya thode hi hai। yeh samajhne ki baaten hain। yeh hai raavan raajya, paap aatmaon ki aasuri duniya। in baaton ko sivaae tumhaare aur koi nahin jaante। raavan bhal hai parantu unko pahchaante thode hi hain। shiv ka chitra bhi hai parantu pahchaante nahin hain। bade-bade shivling aadi banaate hain, phir bhi kah dete naam-roop se nyaara hai, sarvavyaapi hai isliye baap ne kaha hai yada yadaahi… bhaarat mein hi shivbaaba ki glaani hoti hai। jo baap tumko vishwa ka maalik banaate hain, tum manushya mat par chal unki kitni glaani karte ho। manushya mat aur eeshvareey mat ka kitaab bhi hai na। yeh to tum hi jaante ho aur samjhaate ho ham shreemat par devta bante hain। raavan mat par phir aasuri manushya ban jaate hain। manushya mat ko aasuri mat kaha jaayega। aasuri kartavya hi karte rehte hain। mool baat eeshvar ko sarvavyaapi kah dete। kachchha avtaar, machchha avtaar...... to kitne aasuri chhi-chhi ban gaye hain। tumhaari aatma kachchha-machchha avtaar nahin leti, manushya tan mein hi aati hai। abhi tum samajhte ho ham koi kachchha-machchha thode hi bante hain, 84 laakh yoni thode hi lete hain। abhi tumko baap ki shreemat milti hai - bachche, tum 84 janma lete ho। 84 aur 84 laakh ka kya percentage kahenge! jhooth to poora jhooth, sach ki ratti nahin। inka bhi arth samajhna chaahiye। bhaarat ka haal dekho kya hai। bhaarat sachkhanda tha, jisko heaven hi kaha jaata tha। aadhaakalpa hai raam raajya, aadhaakalpa hai raavan raajya। raavan raajya ko aasuri sampradaay kahenge। kitna kada akshar hai। aadha kalpa devtaaon ka raajya chalta hai। baap ne samjhaaya hai lakshmi-naaraayan di first, di second, di third kaha jaata hai। jaise Edward first second hota hai na। pahli peedhi, phir doosri peedhi aise chalti hai। tumhaara bhi pahle hota hai sooryavanshi raajya phir chandravanshi। baap ne aakar drama ka raaz bhi achhi reeti samjhaaya hai। tumhaare shaastron mein yeh baaten nahin thi। koi-koi shaastron mein thodi lakeeren lagaai hui hain parantu us samay jinhonne pustak banaaye hain unhonne kuchh samjha nahin hai।

baba bhi jab banaaras gaye the us samay yeh duniya achhi nahin lagti thi, vahaan saari deevaaron par lakeer baith lagaate the। baap yeh sab karaate the parantu ham to us samay bachche the na। poora samajh mein nahin aata tha। bas koi hai jo hamse yeh karaata hai। vinaash dekha to andar mein khushi bhi thi। raat ko sote the to bhi jaise udte rehte the parantu kuchh samajh mein nahin aata tha। aise-aise lakeeren kheenchate rehte the। koi taakat hai jisne pravesh kiya hai। ham wonder khaate the। pahle to dhandha aadi karte the phir kya hua, koi ko dekhte the aur jhat dhyaan mein chale jaate the। kehta tha yeh kya hota hai jisko dekhta hoon unki okhen banda ho jaati hain। poochhte the kya dekha to kehte the vaikuntha dekha, krishna dekha। yeh bhi sab samajhne ki baaten hui na isliye sab kuchh chhodkar banaaras chale gaye samajhne liye। saara din baitha rehta tha। pencil aur deevaar aur koi dhandha hi nahin। baby the na। to aise-aise jab dekha to samjha ab yeh kuchh karna nahin hai। dhandha aadi chhodna padega। khushi thi yeh gadaai chhodni hai। raavan raajya hai na। raavan par gadhe ka sheesh dikhaate hain na, to khyaal hua yeh raajaai nahin, gadaai hai। gadha ghadi-ghadi mitti mein lathed kar dhobi ke kapde sab kharaab kar deta hai। baap bhi kehte hain tum kya the, ab tumhaari kya avastha ho gai hai। yeh baap hi baith samjhaate hain aur yeh daada bhi samjhaate hain। donon ka chalta rehta hai। gyaan mein jo achhi reeti samjhaate hain woh teekhe kahenge। nambarvaar to hain na। tum bachche bhi samjhaate ho, yeh raajdhaani sthaapan ho rahi hai। zaroor nambarvaar pad paayenge। aatma hi apna part kalpa-kalpa bajaati hai। sab ek samaan gyaan nahin uthaayenge। yeh sthaapna hi wonderful hai। doosre koi sthaapna ka gyaan thode hi dete hain। samjho sikkha dharma ki sthaapna hui। shuddh aatma ne pravesh kiya, kuchh samay ke baad sikkha dharma ki sthaapna hui। unhon ka head kaun? gurunaanak। usne aakar jap saaheb banaaya। pahle to nai aatmaayen hi hongi kyonki pavitra aatma hoti hai। pavitra ko mahaan aatma kehte hain। supreme to ek baap ko kaha jaata hai। woh bhi dharma sthaapna karte hain to mahaan kahenge। parantu nambarvaar peechhe-peechhe aate hain। 500 varsha pahle ek aatma aai, aakar sikkha dharma sthaapan kiya, us samay granth kahaan se aayega। zaroor sukhamni jap saaheb aadi baad mein banaaye honge na! kya shiksha dete hain। umang aata hai to baap ki baith mahima karte hain। baaki yeh pustak aadi to baad mein bante hain। jab bahut hon। padhne vaale bhi chaahiye na। sabke shaastra peechhe bane honge। jab bhakti maarga shuru ho tab shaastra padhe। gyaan chaahiye na। pahle satopradhaan honge phir sato, rajo, tamo mein aate hain। jab bahut vriddhi ho tab mahima ho aur shaastra aadi banen। nahin to vriddhi kaun kare। followers banen na। sikkha dharma ki aatmaayen aaven jo aakar follow karen। usmein bahut time chaahiye।

nai aatma jo aati hai unko duhkh to ho nahin sakta। law nahin kehta। aatma satopradhaan se sato, rajo, tamo mein aave tab duhkh ho। law bhi hai na! yahaan hai mixup, raavan sampradaay bhi hai to raam sampradaay bhi hai। abhi to sampoorn bane nahin hain। sampoorn banenge to phir shareer chhod denge। karmaateet avastha vaale ko koi duhkh ho na sake। woh is chhi-chhi duniya mein rah nahin sakte। woh chale jaayenge baaki jo rahenge woh karmaateet nahin bane honge। sab to ek saath karmaateet ho nahin sakte। bhal vinaash hota hai to bhi kuchh bachenge। pralay nahin hoti। gaate bhi hain raam gayo raavan gayo... raavan ka bahut parivaar tha। hamaara parivaar to thoda hai। woh kitne dher dharma hain। vaastav mein sabse bada hamaara parivaar hona chaahiye kyonki devi-devta dharma sabse pahla hai। abhi to sab mixup hue hain to Christian bahut ban gaye hain। jahaan manushya sukh dekhte hain, position dekhte hain to us dharma ke ban jaate hain। jab-jab pope aata hai to bahut Christian bante hain। phir vriddhi bhi bahut hoti hai। satayug mein to hai hi ek bachcha, ek bachchi। aur koi dharma ki aise vriddhi nahin hoti। abhi dekho sabse Christian teekhe hain। jo bahut bachche paida karte hain unko inaam milta hai kyonki unhon ko to manushya chaahiye na। jo military lashkar kaam mein aayega। hain to sab Christian। Russia, America sab Christian hain, ek kahaani hai do bandar lade maakhan billa kha gaya। yeh bhi drama bana hua hai। aage to hindu, musalmaan ikatthe rehte the। jab alag hue tab paakistaan ki nai raajaai khadi ho gai। yeh bhi drama bana hua hai। do ladenge to baarood lenge, dhandha hoga। oonch te oonch unhon ka yeh dhandha hai। parantu drama mein vijay ki bhaavi tumhaari hai। 100 percent certain hai, tumhein koi bhi jeet nahin sakte। baaki sab khatma ho jaayenge। tum jaante ho nai duniya mein hamaara raajya hoga, jiske liye hi tum padhte ho। laayak bante ho। tum laayak the ab na laayak ban pade ho phir laayak banna hai। gaate bhi hain patit-paavan aao। parantu arth thode hi samajhte hain। yeh hai hi saara jangal। ab baap aaye hain, aakar kaanton ke jangal ko garden oph flower banaate hain। woh hai deity world। yeh hai devil world। saari manushya srishti ka raaz samjhaaya hai। tum abhi samajhte ho ham apne dharma ko bhool dharma bhrashta ho gaye hain। to sab karma vikarma hi hote hain। karma, vikarma, akarma ki gati baba tumko samjhaakar gaye the। tum samajhte ho barobar kal ham aise the phir aaj ham yeh bante hain। nazdeek hai na। baba kehte hain kal tumko devta banaaya tha। raajya-bhaagya diya tha phir sab kahaan kiya? tumko smriti aai hai - bhaktimaarga mein hamne kitna dhan ganvaaya hai। kal ki baat hai na। baap to aakar hatheli par bahishta dete hain। yeh gyaan buddhi mein rehna chaahiye।

baba ne yeh bhi samjhaaya hai yeh aankhen kitna dhokha deti hain, criminal aai ko gyaan se civil banaana hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni behad ki diary mein chart note karna hai ki hamne yaad mein rahkar kitna phaayda badhaaya? ghaata to nahin pada? yaad ke samay buddhi kahaan-kahaan gai?

2) is janma mein chhotepan se hamse kaun-kaun se ulte karma athva paap hue hain, woh note karna hai। jis baat mein dil khaati hai use baap ko sunaakar halka ho jaana hai। ab koi bhi paap ka kaam nahin karna hai।

vardaan:- karmabandhan ko seva ke bandhan mein parivartan kar sarva se nyaare aur parmaatma pyaare bhav

parmaatma pyaar brahman jeevan ka aadhaar hai lekin woh tab milega jab nyaare banenge। agar pravritti mein rehte ho to seva ke liye rehte ho। kabhi bhi yeh nahin samjho ki hisaab-kitaab hai, karmabandhan hai.. lekin seva hai। seva ke bandhan mein bandhane se karmabandhan khatma ho jaata hai। sevaabhaav nahin to karmabandhan kheenchata hai। jahaan karmabandhan hai vahaan duhkh ki lahar hai, seva ke bandhan mein khushi hai isliye karmabandhan ko seva ke bandhan mein parivartan kar nyaare pyaare raho to parmaatma pyaare ban jaayenge।

slogan:- shreshtha aatma woh hai jo svasthiti dvaara har paristhiti ko paar kar le।