Daily Murli for Monday 9 December 2024

09-12-2024 praatahmurli om shanti "baapdaada"' madhuban

“meethe bachche - vinaash ke pahle sabko baap ka parichay dena hai, dhaarna kar doosron ko samjhaao tab oonch pad mil sakega''

prashn:- raajayogi students ko baap ka direction kya hai?

uttar:- tumhein direction hai ki ek baap ka bankar phir auron se dil nahin lagaani hai। pratigya kar phir patit nahin banna hai। tum aisa sampoorn paavan ban jaao jo baap aur teacher ki yaad svatah nirantar bani rahe। ek baap se hi pyaar karo, use hi yaad karo to tumhein bahut taakat milti rahegi।

om shanti। roohaani baap baith samjhaate hain। samjhaate tab hain jabki yeh shareer hai। sammukh hi samjhaana hota hai। jo sammukh samjhaaya jaata hai woh phir likhat ke dvaara sabke paas jaata hai। tum yahaan aate ho sammukh sunne ke liye। behad ka baap aatmaon ko sunaate hain। aatma hi sunti hai। sab kuchh aatma hi karti hai - is shareer dvaara isliye pahle-pahle apne ko aatma zaroor samajhna hai। gaayan hai aatmaayen-paramatma alag rahe bahukaal…। sabse pahle-pahle baap se kaun bichhudkar aate hain yahaan part bajaane? tumse poochhenge kitna samay tum baap se alag rahe ho? to tum kahenge 5 hazaar varsha। poora hisaab hai na। yeh to tum bachchon ko pata hai kaise nambarvaar aate hain। baap jo oopar mein the woh bhi abhi neeche aa gaye hain - tum sabki battery charge karne। abhi baap ko yaad karna hai। abhi to baap sammukh hai na। bhakti maarga mein to baap ke occupation ka pata hi nahin hai। naam, roop, desh, kaal ko jaante hi nahin। tumko to naam, roop, desh, kaal ka sab pata hai। tum jaante ho is rath dvaara baap hamko sab raaz samjhaate hain। rachta aur rachna ke aadi, madhya, ant ka raaz samjhaaya hai। yeh kitna sookshm hai। is manushya srishti roopi jhaad ka beejroop baap hi hai। woh yahaan aate zaroor hain। nai duniya sthaapan karna unka hi kaam hai। aise nahin ki vahaan baithe sthaapna karte hain। tum bachche jaante ho baba is tan dvaara hamko sammukh samjha rahe hain। yeh bhi baap ka pyaar karna hua na। aur koi ko bhi unki biography ka pata nahin hai। geeta hai aadi sanaatan devi-devta dharma ka shaastra। yeh bhi tum jaante ho - is gyaan ke baad hai vinaash। vinaash zaroor hona hai। aur jo bhi dharma sthaapak aate hain, unke aane par vinaash nahin hota hai। vinaash ka time hi yeh hai, isliye tumko jo gyaan milta hai woh phir khalaas ho jaata hai। tum bachchon ki buddhi mein yeh sab baaten hain। tum rachta aur rachna ko jaan gaye ho। hain donon anaadi jo chalte aate hain। baap ka part hi hai sangam par aane ka। bhakti aadhaakalpa chalti hai, gyaan nahin chalta hai। gyaan ka varsa aadhaakalpa ke liye milta hai। gyaan to ek hi baar sirf sangam par milta hai। yeh class tumhaara ek hi baar chalta hai। yeh baaten achhi reeti samajh kar phir auron ko samjhaana bhi hai। pad ka saara madaar hai service karne par। tum jaante ho purooshaartha kar ab nai duniya mein jaana hai। dhaarna kar aur doosron ko samjhaana - is par hi tumhaara pad hai। vinaash hone ke pahle sabko baap ka parichay dena hai aur rachna ke aadi, madhya, ant ka parichay dena hai। tum bhi baap ko yaad karte ho ki janma-janmaantar ke paap kat jaaen। jab tak baap padhaate rehte hain, yaad zaroor karna hai। padhaane vaale ke saath yog to rahega na। teacher padhaate hain to unke saath yog rehta hai। yog bigar padhenge kaise? yog arthaat padhaane vaale ki yaad। yeh baap bhi hai, teacher bhi hai, satguru bhi hai। teenon roop mein poora yaad karna padta hai। yeh satguru tumhein ek hi baar milta hai। gyaan se sadgati mili, bas phir guru ki rasma hi khatma। baap, teacher ki rasma chalti hai, guru ki rasma khatma ho jaati hai। sadgati mil gai na। nirvaandhaam mein tum practical mein jaate ho phir apne samay par part bajaane aayenge। mukti-jeevanmukti donon tumko mil jaati hain। mukti bhi zaroor milti hai। thode samay ke liye ghar jaakar rahenge। yahaan to shareer se part bajaana padta hai। pichhaadi mein sab paartadhaari aa jaayenge। naatak jab poora hota hai to sab actors stage par aa jaate hain। abhi bhi sab actors stage par aakar ikatthe hue hain। kitna ghor ghamsaan hai। satayug aadi mein itna ghor ghamsaan nahin tha। abhi to kitni ashaanti hai। to ab jaise baap ko srishti chakra ki knowledge hai to bachchon ko bhi knowledge hai। beej ko knowledge hai na - hamaara jhaad kaise vriddhi ko paakar phir khatma hota hai। abhi tum baithe ho nai duniya ki sapling lagaane athva aadi sanaatan devi-devta dharma ka sapling lagaane। tumko pata hai in lakshmi-naaraayan ne raajya kaise paaya? tum jaante ho ham abhi nai duniya ka prince banenge। us duniya mein rahne vaale sab apne ko maalik hi kahenge na। jaise abhi bhi sab kehte hain bhaarat hamaara desh hai। tum samajhte ho abhi ham sangam par khade hain, shivaalay mein jaane vaale hain। bas, abhi gaye ki gaye। ham jaakar shivaalay ke maalik banenge। tumhaari em object hi yeh hai। yatha raaja raani tatha praja, sab shivaalay ke maalik ban jaate hain। baaki raajdhaani mein bhinna-bhinna status to hote hi hain। vahaan vajeer to koi hota hi nahin। vajeer tab hote hain jab patit bante hain। lakshmi-naaraayan va raam-seeta ka vajeer nahin suna hoga kyonki woh khud satopradhaan paavan buddhi vaale hain। phir jab patit bante hain tab raaja-raani ek vajeer rakhte hain raay lene ke liye। abhi to dekho anekaanek vajeer hain।

tum bachche jaante ho yeh bahut maje ka khel hai। khel hamesha maje ka hi hota hai। sukh bhi hota hai, duhkh bhi hota hai। is behad ke khel ko tum bachche hi jaante ho। ismen rone-peetne aadi ki baat hi nahin। gaate bhi hain beeti so beeti dekho..... bani-banaai ban rahi। yeh naatak tumhaari buddhi mein hai। ham inke actors hain। hamaare 84 janmon ka part accurate avinaashi hai। jo jis janma mein jo act karte aaye hain vahi karte rahenge। aaj se 5 hazaar varsha pahle bhi tumko yahi kaha tha ki apne ko aatma samjho। geeta mein bhi akshar hain। tum jaante ho barobar aadi sanaatan devi-devta dharma jab sthaapan hua tha to baap ne kaha tha deh ke sab dharma chhod apne ko aatma samjho aur baap ko yaad karo। manmanaabhav ka arth to baap ne achhi reeti samjhaaya hai। bhaasha bhi yahi hai। yahaan dekho kitni dher bhaashaayen hain। bhaashaaon par bhi kitna hangaama hai। bhaasha bigar to kaam chal na sake। aisi-aisi bhaashaayen seekhkar aate hain jo mother language khalaas ho jaati hai। jo jaasti bhaashaayen seekhte hain unko inaam milta hai। jitne dharma, utni bhaashaayen hongi। vahaan to tum jaante ho apni hi raajaai hogi। bhaasha bhi ek hogi। yahaan to 100 mile par ek bhaasha hai। vahaan to ek hi bhaasha hoti hai। yeh sab baaten baap baith samjhaate hain to us baap ko hi yaad karte raho। shivbaaba samjhaate hain brahma dvaara। rath to zaroor chaahiye na। shivbaaba hamaara baap hai। baba kehte hain mere to behad ke bachche hain। baba in dvaara padhaate hain na। teacher ko kabhi gale se thode hi lagaate hain। baap to tumko padhaane aaye hain। raajayog sikhlaate hain to teacher thahra na। tum student ho। student kabhi teacher ko bhaaki pahante hain kya? ek baap ka bankar phir auron se dil nahin lagaani hai।

baap kehte hain main tumko raajayog sikhlaane aaya hoon na। tum shareerdhaari, ham ashareeri oopar mein rahne vaale। kehte ho - baba, paavan banaane aao to goya tum patit ho na? phir mere ko bhaaki kaise pahan sakte? pratigya kar phir patit ban jaate hain। jab ekdam paavan ban jaayenge, pichhaadi mein phir yaad mein bhi rahenge, teacher ko, guru ko yaad karte rahenge। abhi to chhi-chhi ban gir padte hain, aur hi sau guna danda pad jaata hai। yeh to beech mein dalaal ke roop mein mila hai, unko yaad karna hai। baba kehte hain main bhi unka murabbi bachcha hoon। phir main kahaan bhaaki pahan sakta hoon! tum phir bhi is shareer dvaara milte ho। main unko kaise bhaaki pahnoon? baap to kehte hain - bachche, tum ek baap ko hi yaad karo, pyaar karo। yaad se power bahut milti hai। baap sarvashaktimaan hai। baap se hi tumko itni power milti hai। tum kitne balvaan bante ho। tumhaari raajdhaani par koi jeet pahan na sake। raavan raajya hi khatma ho jaata hai। duhkh dene vaala koi rehta hi nahin। unko sukhdhaam kaha jaata hai। raavan saare vishwa mein sabko duhkh dene vaala hai। jaanvar bhi duhkhi hote hain। vahaan to jaanvar bhi aapas mein prem se rehte hain। yahaan to prem hai nahin।

tum bachche jaante ho yeh drama kaise phirta hai। iske aadi-madhya-ant ka raaz baap hi samjhaate hain। koi achhi reeti padhte hain, koi kam padhte hain। padhte to sab hain na। saari duniya bhi padhegi arthaat baap ko yaad karegi। baap ko yaad karna - yeh bhi padhaai hai na। us baap ko sab yaad karte hain, woh sarva ka sadgati daata, sabko sukh dene vaala hai। kehte bhi hain aakar paavan banaao to zaroor patit thahre। woh to aate hi hain vikaariyon ko nirvikaari banaane। pukaarte bhi hain ki he allaah, aakar hamko paavan banaao। unka yahi dhandha hai, isliye bulaate hain।

tumhaari bhaasha bhi correct honi chaahiye। vo log kehte hain allaah, woh kehte hain god। god father bhi kehte hain। pichhaadi vaalon ki buddhi phir bhi achhi rehti hai। itna duhkh nahin uthaate। to ab tum sammukh baithe ho, kya karte ho? baba ko is bhrikuti mein dekhte ho। baba phir tumhaari bhrikuti mein dekhte hain। jismen main pravesh karta hoon, unko dekh sakta hoon? woh to baaju mein baitha hai, yeh badi samajhne ki baat hai। main inke baaju mein baitha hua hoon। yeh bhi samajhta hai, hamaare baaju mein baitha hai। tum kahenge ham saamne do ko dekhte hain। baap aur daada donon aatma ko dekhte ho। tumhaare mein gyaan hai - baapdaada kisko kehte hain? aatma saamne baithi hai। bhakti maarga mein to aankhen banda kar baith sunte hain। padhaai koi aise thode hi hoti hai। teacher ko to dekhna pade na। yeh to baap bhi hai, teacher bhi hai to saamne dekhna hota hai। saamne baithe aur aankhe banda hon, jhutka khaate rahen, aisi padhaai to hoti nahin। student teacher ko zaroor dekhta rahega। nahin to teacher kahenge yeh to jhutka khaate rehte hain। yeh koi bhaang peekar aaye hain। tumhaari buddhi mein hai baba is tan mein hai। main baba ko dekhta hoon। baap samjhaate hain yeh class common nahin hai - jo koi aankhe bandakar baithe। school mein kabhi koi aankhe banda karke baithte hain kya? aur satsangon ko school nahin kaha jaata hai। bhal geeta baith sunaate hain parantu usko school nahin kaha jaata। woh koi baap thode hi hai jisko dekhen। koi-koi shiv ke bhakta hote hain to shiv ko hi yaad karte hain, kaan se katha sunte rehte। shiv ki bhakti karne vaalon ko shiv ko hi yaad karna pade। koi bhi satsang mein prashn-uttar aadi nahin hota hai। yahaan hota hai। yahaan tumhaari aamadni bahut hai। aamadni mein kabhi ubaasi nahin aa sakti। dhan milta hai na to khushi hoti hai। ubaasi, gam ki nishaani hai। beemaar hoga va devaala nikla hoga to ubaasi aati rahegi। paisa milta rahega to kabhi ubaasi nahin aayegi। baba vyaapaari bhi hai। raat ko steamer aate the to raat ko jaagna padta tha। koi-koi begam raat ko aati hain to sirf female ke liye hi khula rehta hai। baba bhi kehte hain pradarshani aadi mein females ke liye khaas din rakho to bahut aayengi। pardensheen bhi aayengi। bahuen pardensheen rehti hain। motor mein bhi parda rehta hai। yahaan to aatma ki baat hai। gyaan mil gaya to parda bhi khul jaayega। satayug mein parda aadi hota nahin। yeh to pravritti maarga ka gyaan hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh khel bada maze ka bana hua hai, ismen sukh aur duhkh ka part noondha hua hai isliye rone peetne ki baat nahin। buddhi mein rahe bani-banaai ban rahi, beeti ka chintan nahin karna hai।

2) yeh common class nahin hai, ismen aankhe banda karke nahin baithna hai। teacher ko saamne dekhna hai। ubaasi aadi nahin leni hai। ubaasi gam (duhkh) ki nishaani hai।

vardaan:- santushtata ke teen certificate le apne yogi jeevan ka prabhaav daalne vaale sahajyogi bhav

santushtata yogi jeevan ka vishesh lakshya hai, jo sada santushta rehte aur sarva ko santushta karte hain unke yogi jeevan ka prabhaav doosron par svatah padta hai। jaise science ke saadhnon ka vaayumandal par prabhaav padta hai, aise sahajyogi jeevan ka bhi prabhaav hota hai। yogi jeevan ke teen certificate hain ek - sva se santushta, doosra - baap santushta aur teesra - laukik alaukik parivaar santushta।

slogan:- svaraajya ka tilak, vishwa kalyaan ka taaj aur sthiti ke takhta par viraajmaan rahne vaale hi raajayogi hain।