Daily Murli for Thursday 9 January 2025

09-01-2025 praatahmurli om shanti "baapdaada"' madhuban

“meethe bachche - tumhein vikarmon ki saza se mukta hone ka purooshaartha karna hai, is antim janma mein sab hisaab-kitaab chuktu kar paavan banna hai''

prashn:- dhokhebaaj maaya kaun-si pratigya tudvaane ki koshish karti hai?

uttar:- tumne pratigya ki hai - koi bhi dehdhaari se ham dil nahin lagaayenge। aatma kehti hai ham ek baap ko hi yaad karenge, apni deh ko bhi yaad nahin karenge। baap, deh sahit sabka sannyaas karaate hain। parantu maaya yahi pratigya tudvaati hai। deh mein lagaav ho jaata hai। jo pratigya todte hain unhein sajaayen bhi bahut khaani padti hain।

geet:- tumheen ho maata-pita tumheen ho…

om shanti। oonch te oonch bhagwan ki mahima bhi ki hai aur phir glaani bhi ki hai। ab oonch te oonch baap khud aakar parichay dete hain aur phir jab raavan raajya shuru hota hai to apni oonchaai dikhaate hain। bhakti maarga mein bhakti ka hi raajya hai isliye kaha jaata hai raavan raajya। woh raam raajya, yeh raavan raajya। raam aur raavan ki hi bhent ki jaati hai। baaki woh raam to treta ka raaja hua, unke liye nahin kaha jaata। raavan hai aadhaakalpa ka raaja। aise nahin ki raam aadhaakalpa ka raaja hai। nahin, yeh detail mein samajhne ki baaten hain। baaki woh to bilkul sahaj baat hai samajhne ki। ham sab bhaai-bhaai hain। ham sabka woh baap ek niraakaar hai। baap ko maaloom hai is samay hamaare sab bachche raavan ki jel mein hain। kaam chita par baith sab kaale ho gaye hain। yeh baap jaante hain। aatma mein hi saari knowledge hai na। ismen bhi sabse jaasti mahatva dena hota hai aatma aur paramatma ko jaanne ka। chhoti-si aatma mein kitna part noondha hua hai jo bajaati rehti hai। deh-abhimaan mein aakar part bajaate hain to svadharma ko bhool jaate hain। ab baap aakar aatma abhimaani banaate hain kyonki aatma hi kehti hai ki ham paavan banen। to baap kehte hain maamekam yaad karo। aatma pukaarti hai he parampita, he patit-paavan, ham aatmaayen patit ban gaye hain, aakar humein paavan banaao। sanskaar to sab aatma mein hain na। aatma saaph kehti hai ham patit bane hain। patit unko kaha jaata hai jo vikaar mein jaate hain। patit manushya, paavan nirvikaari devtaaon ke aage jaakar mandir mein unki mahima gaate hain। baap samjhaate hain bachche tum hi poojya devta the। 84 janma lete-lete neeche zaroor utarna pade। yeh khel hi patit se paavan, paavan se patit hone ka hai। saara gyaan baap aakar ishaare mein samjhaate hain। abhi sabka antim janma hai। sabko hisaab-kitaab chuktu kar jaana hai। baba saakshaatkaar karaate hain। patit ko apne vikarmon ka danda zaroor bhogna padta hai। pichhaadi ka koi janma dekar hi saja denge। manushya tan mein hi saja khaayenge isliye shareer zaroor dhaaran karna padta hai। aatma feel karti hai, ham saja bhog rahe hain। jaise kaashi kalvat khaane samay danda bhogte hain, kiye hue paapon ka saakshaatkaar hota hai। tab to kehte hain kshama karo bhagwan, ham phir aisa nahin karenge। yeh sab saakshaatkaar mein hi kshama maangate hain। feel karte hain, duhkh bhogte hain। sabse jaasti mahatva hai aatma aur paramatma ka। aatma hi 84 janmon ka part bajaati hai। to aatma sabse powerful hui na। saare drama mein mahatva hai aatma aur paramatma ka। jisko aur koi bhi nahin jaante। ek bhi manushya nahin jaanta ki aatma kya, paramatma kya hai? drama anusaar yeh bhi hona hai। tum bachchon ko bhi gyaan hai ki yeh koi nai baat nahin, kalpa pahle bhi yeh chala tha। kehte bhi hain gyaan, bhakti, vairaagya। parantu arth nahin samajhte hain। baba ne in saadhuon aadi ka sang bahut kiya hua hai, sirf naam le lete hain। abhi tum bachche achhi reeti jaante ho ki ham puraani duniya se nai duniya mein jaate hain to puraani duniya se zaroor vairaagya karna pade। inse kya dil lagaani hai। tumne pratigya ki hai - koi bhi dehdhaari se dil nahi lagaayenge। aatma kehti hai ham ek baap ko hi yaad karenge। apni deh ko bhi yaad nahin karenge। baap deh sahit sabka sannyaas karaate hain। phir auron ki deh se ham lagaav kyon rakhen। koi se lagaav hoga to unki yaad aati rahegi। phir eeshvar yaad aa na sake। pratigya todte hain to saza bhi bahut khaani padti hai, pad bhi bhrashta ho jaata hai isliye jitna ho sake baap ko hi yaad karna hai। maaya to badi dhokhebaaj hai। koi bhi haalat mein maaya se apne ko bachaana hai। deh-abhimaan ki bahut kadi beemaari hai। baap kehte hain ab dehi-abhimaani bano। baap ko yaad karo to deh-abhimaan ki beemaari chhoot jaae। saara din deh-abhimaan mein rehte hain। baap ko yaad bada mushkil karte hain। baba ne samjhaaya hai hath kaar de dil yaar de। jaise aashik maashook dhandha aadi karte bhi apne maashook ko hi yaad karte rehte। ab tum aatmaon ko paramatma se preet rakhni hai to unko hi yaad karna chaahiye na। tumhaari em object hi hai ki hamko devi-devta banna hai, uske liye purooshaartha karna hai। maaya dhokha to zaroor degi, apne ko unse chhudaana hai। nahin to phans marenge phir glaani bhi hogi, nuksaan bhi bahut hoga।

tum bachche jaante ho ki ham aatma bindi hain, hamaara baap bhi beejroop knowledgeful hai। yeh badi wonderful baaten hain। aatma kya hai, usmein kaise avinaashi part bhara hua hai - in guhya baaton ko achhe-achhe bachche bhi poori tarah nahin samajhte hain। apne ko yathaartha reeti aatma samjhen aur baap ko bhi bindi misal samajh yaad karen, woh gyaan ka saagar hai, beejroop hai… aisa samajh bada mushkil yaad karte hain। mote khyaalaat se nahin, ismen maheen buddhi se kaam lena hota hai - ham aatma hain, hamaara baap aaya hua hai, woh beejroop knowledgeful hai। hamko knowledge suna rahe hain। dhaarna bhi mujh chhoti-si aatma mein hoti hai। aise bahut hain jo moti reeti sirf kah dete hain - aatma aur paramatma..... lekin yathaartha reeti buddhi mein aata nahin hai। na se to moti reeti yaad karna bhi theek hai। parantu woh yathaartha yaad jaasti phaldaayak hai। woh itna oonch pad pa nahin sakenge। ismen badi mehnat hai। main aatma chhoti-si bindu hoon, baba bhi itni chhoti-si bindu hai, unmein saara gyaan hai, yeh bhi yahaan tum baithe ho to kuchh buddhi mein aata hai lekin chalte-phirte woh chintan rahe, so nahin। bhool jaate hain। saara din vahi chintan rahe - yeh hai sachchi-sachchi yaad। koi sach bataate nahin hain ki ham kaise yaad karte hain। chart bhal bhejte hain parantu yeh nahin likhte ki aise apne ko bindi samajh aur baap ko bhi bindi samajh yaad karta hoon। sachchaai se poora likhte nahin hain। bhal bahut achhi-achhi murli chalaate hain parantu yog bahut kam hai। deh-abhimaan bahut hai, is gupta baat ko poora samajhte nahin, simran nahin karte hain। yaad se hi paavan banna hai। pahle to karmaateet avastha chaahiye na। vahi oonch pad pa sakenge। baaki murli bajaane vaale to dher hain। lekin baba jaante hain yog mein rah nahin sakte। vishwa ka maalik banna koi maasi ka ghar thode hi hai। woh alpakaal ke martabe paane ke liye bhi kitna padhte hain। source oph income ab hui hai। aage thode hi barrister aadi itna kamaate the। abhi kitni kamaai ho gai hai।

bachchon ko apne kalyaan ke liye ek to apne ko aatma samajh yathaartha reeti baap ko yaad karna hai aur trimoorti shiv ka parichay auron ko bhi dena hai। sirf shiv kahne se samjhenge nahin। trimoorti to zaroor chaahiye। mukhya hain hi do chitra trimoorti aur jhaad। seedhi se bhi jhaad mein jaasti knowledge hai। yeh chitra to sabke paas hone chaahiye। ek taraph trimoorti gola, doosre taraph jhaad। yeh paandav sena ka flag (jhanda) hona chaahiye। drama aur jhaad ki knowledge bhi baap dete hain। lakshmi-naaraayan, vishnu aadi kaun hain? yeh koi samajhte nahin। mahaalakshmi ki pooja karte hain, samajhte hain lakshmi aayegi। ab lakshmi ko dhan kahaan se aayega? 4 bhuja vaale, 8 bhuja vaale kitne chitra bana diye hain। samajhte kuchh bhi nahin। 8-10 bhuja vaala koi manushya to hota nahin। jisko jo aaya so banaaya, bas chal pada। koi ne mat di ki hanumaan ki pooja karo bas chal pada। dikhaate hain sanjeevni booti le aaya... uska bhi arth tum bachche samajhte ho। sanjeevni booti to hai manmanaabhav! vichaar kiya jaata hai jab tak brahman na banen, baap ka parichay na mile tab tak worth not A penny hai। martabe ka manushyon ko kitna abhimaan hai। unhon ko to samjhaane mein badi mushkilaat hai। raajaai sthaapan karne mein kitni mehnat lagti hai। woh hai baahubal, yeh hai yogbal। yeh baaten shaastron mein to hain nahin। vaastav mein tum koi shaastra aadi refer nahin kar sakte ho। agar tumko kehte hain - tum shaastron ko maante ho? bolo haan yeh to sab bhakti maarga ke hain। abhi ham gyaan maarga par chal rahe hain। gyaan dene vaala gyaan ka saagar ek hi baap hai, inko roohaani gyaan kaha jaata hai। rooh baith roohon ko gyaan dete hain। woh manushya, manushya ko dete hain। manushya kabhi spiritual knowledge de na saken। gyaan ka saagar patit-paavan, liberator, sadgati daata ek hi baap hai।

baap samjhaate rehte hain yeh-yeh karo। ab dekhen shivjayanti par kitna dhamchakra machaate hain। translight ke chitra chhote bhi hon jo sabko mil jaaen। tumhaari to hai bilkul nai baat। koi samajh na sake। khoob akhbaaron mein daalna chaahiye। aavaaz karna chaahiye। centres kholne vaale bhi aise chaahiye। abhi tum bachchon ko hi itna nasha nahin chadha hua hai। nambarvaar purooshaartha anusaar samjhaate hain। itne dher brahmaakumaar-kumaariyaan hain। achha, brahma ka naam nikaal koi ka bhi naam daalo। raadhe-krishna ka naam daalo। achha phir brahmaakumaar-kumaariyaan kahaan se aayenge? koi to brahma chaahiye na, jo mukh vanshaavli bi.ke. hon। bachche aage chalkar bahut samjhenge। kharcha to karna hi padta hai। chitra to bade clear hain। lakshmi-naaraayan ka chitra bahut achha hai। achha!

meethe-meethe sikeeldhe serviceable, aagyaakaari, pharmaanbardaar, nambarvaar purooshaartha anusaar bachchon prati maat-pita baap-daada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) karmaateet banne ke liye baap ko maheen buddhi se pahchaan kar yathaartha yaad karna hai। padhaai ke saath-saath yog par poora attention dena hai।

2) svayan ko maaya ke dhokhe se bachaana hai। koi ki bhi deh mein lagaav nahin rakhna hai। sachchi preet ek baap se rakhni hai। deh-abhimaan mein nahin aana hai।

vardaan:- brahm-mahoorta ke samay vardaan lene aur daan dene vaale baap samaan vardaani, mahaadaani bhav

brahm-mahoorta ke samay vishesh brahmalok nivaasi baap gyaan soorya ki light aur might ki kirnen bachchon ko vardaan roop mein dete hain। saath-saath brahma baap bhaagya vidhaata ke roop mein bhaagya roopi amrit baantate hain sirf buddhi roopi kalash amrit dhaaran karne yogya ho। kisi bhi prakaar ka vighna ya rookaavat na ho, to saare din ke liye shreshtha sthiti va karma ka mahoorta nikaal sakte ho kyonki amritvele ka vaataavran hi vritti ko badalne vaala hota hai isliye us samay vardaan lete hue daan do arthaat vardaani aur mahaadaani bano।

slogan:- krodhi ka kaam hai krodh karna aur aapka kaam hai sneh dena।

apni shaktishaali mansa dvaara sakaash dene ki seva karo

ab sva kalyaan ka aisa shreshtha plan banaao jo vishwa seva mein sakaash aapehi milti rahe। abhi umang-utsaah se apne man mein yeh pakka vaayda karo ki ham baap samaan bankar hi dikhaayenge। brahma baap ka bhi bachchon se ati sneh hai isliye ek-ek bachche ko emerge kar vishesh samaan banne ki sakaash dete rehte hain।