Daily Murli for Friday 10 January 2025

10-01-2025 praatahmurli om shanti "baapdaada"' madhuban

“meethe bachche - baap tumhein gyaan yog ki khuraak khilaakar jabardasta khaatiri karte hain, to sadaiv khushmauj mein raho aur shreemat anusaar sabki khaatiri karte chalo''

prashn:- is sangamayug par aapke paas sabse amoolya cheez kaun si hai, jiski sambhaal karni hai?

uttar:- is sarvottam brahman kul mein aapki yeh jeevan bahut amoolya hai, isliye shareer ki sambhaal zaroor karni hai। aise nahin yeh to mitti ka putla hai, kahaan yeh khalaas ho jaaye! nahin। inko jeete rakhna hai। koi beemaar hote hain to unse tang nahin hona chaahiye। unko bolo tum shivbaaba ko yaad karo। jitna yaad karenge utna paap katte jaayenge। unki service karni chaahiye, jeeta rahe, shivbaaba ko yaad karta rahe।

om shanti। gyaan ka teesra netra dene vaala roohaani baap baith roohaani bachchon ko samjhaate hain। gyaan ka teesra netra sivaae baap ke aur koi de nahin sakta। abhi tum bachchon ko gyaan ka teesra netra mila hai। abhi tum bachche jaante ho ki yeh puraani duniya badalne vaali hai। bichaare manushya nahin jaante ki kaun badlaane vaala hai aur kaise badlaate hain! kyonki unhon ko gyaan ka teesra netra hi nahin hai। tum bachchon ko abhi gyaan ka teesra netra mila hai jisse tum srishti ke aadi madhya ant ko jaan gaye ho। yeh hai gyaan ki saccharin। saccharin ki ek boond bhi kitni meethi hoti hai। gyaan ka ek hi akshar hai manmanaabhav। yeh akshar kitna meetha hai। apne ko aatma samajh baap ko yaad karo। baap shantidham aur sukhdhaam ka raasta bata rahe hain। baap aaye hain bachchon ko svarga ka varsa dene। to bachchon ko kitni khushi rahni chaahiye। kehte bhi hain khushi jaisi khuraak nahin। jo sadaiv khush-mauj mein rehte hain unke liye yeh jaise khuraak hoti hai। 21 janma mauz mein rahne ki yeh jabardasta khuraak hai। yeh khuraak sadaiv ek do ko khilaate raho। yeh hai ek do ki jabardasta khaatiri। aisi khaatiri aur koi manushya, manushya ki kar na sake।

tum bachche shreemat par sabhi ki roohaani khaatiri karte ho। sachchi-sachchi khush-khairaaphat bhi yeh hai kisko baap ka parichay dena। meethe bachche jaante hain behad ke baap dvaara hamko jeevanmukti ki saugaat milti hai। satayug mein bhaarat jeevan-mukta tha, paavan tha। baap bahut badi oonchi khuraak dete hain tab to gaayan hai ateendriy sukh poochhna ho to gop-gopiyon se poochho। yeh gyaan aur yog ki kitni first class wonderful khuraak hai aur yeh khuraak ek hi roohaani surgeon ke paas hai। aur kisko is khuraak ka maaloom hi nahin hai। baap kehte hain meethe bachchon tumhaare liye tiri (hatheli) par saugaat le aaya hoon। mukti, jeevanmukti ki yeh saugaat mere paas hi rehti hai। kalpa-kalpa main hi aakar tumko yeh saugaat deta hoon phir raavan chheen leta hai। to abhi tum bachchon ko kitna khushi ka paara chadha rehna chaahiye। tum jaante ho hamaara ek hi baap, teacher aur sachcha-sachcha sadguru hai jo hamko saath le jaate hain। most beloved baap se vishwa ki baadshaahi milti hai। yeh kam baat hai kya! bachchon ko sadaiv harshit rehna chaahiye। godly student life is the best। yeh abhi ka hi gaayan hai na। phir nai duniya mein tum sadaiv khushiyaan manaate rahenge। duniya nahin jaanti ki sachchi-sachchi khushiyaan kab manaai jaayengi। manushyon ko to satayug ka gyaan hi nahin hai to yahaan hi manaate rehte hain। parantu is puraani tamopradhaan duniya mein khushi kahaan se aai! yahaan to traahi-traahi karte rehte hain। kitna duhkh ki duniya hai।

baap tum bachchon ko kitna sahaj raasta bataate hain। grihastha vyavhaar mein rehte kamal phool samaan raho। dhandha-dhori aadi karte bhi mujhe yaad karte raho। jaise aashik aur maashuk hote hain, woh to ek do ko yaad karte rehte hain। woh unka aashik, woh unka maashuk hota hai। yahaan yeh baat nahin hai, yahaan to tum sabhi ek maashuk ke janma-janmaantar se aashik rahe ho। baap tumhaara kabhi aashik nahin banta। tum us maashuk ko aane liye yaad karte aaye ho। jab duhkh jaasti hota hai to jaasti sumiran karte hain, tab to gaayan bhi hai duhkh mein sumiran sab karen, sukh mein kare na koy। is samay jaise baap sarvashaktimaan hai। din-pratidin maaya bhi sarvashaktimaan, tamopradhaan hoti jaati hai isliye ab baap kehte hain meethe bachche dehi-abhimaani bano। apne ko aatma samajh mujh baap ko yaad karo aur saath-saath daiveegun bhi dhaaran karo tum aise (lakshmi-naaraayan) ban jaayenge। is padhaai mein mukhya baat hai hi yaad ki। oonch te oonch baap ko bahut pyaar, sneh se yaad karna chaahiye। woh oonch te oonch baap hi nai duniya sthaapan karne vaala hai। baap kehte hain main aaya hoon tum bachchon ko vishwa ka maalik banaane isliye ab mujhe yaad karo to tumhaare anek janmon ke paap kat jaayenge। patit-paavan baap kehte hain tum bahut patit ban gaye ho isliye ab tum mujhe yaad karo to tum paavan ban aur paavan duniya ka maalik ban jaayenge। patit-paavan baap ko hi bulaate hain na। ab baap aaye hain to zaroor paavan banna pade। baap duhkhaharta, sukhkarta hai। barobar satayug mein paavan duniya thi to sabhi sukhi hi the। ab baap phir se kehte hain bachche shantidham aur sukhdhaam ko yaad karte raho। abhi hai sangamayug। khivaiya tumko is paar se us paar le jaate hain। naeeya koi ek nahin, saari duniya jaise ek bada jahaaj hai। unko paar le jaate hain।

tum meethe bachchon ko kitni khushiyaan honi chaahiye। tumhaare liye to sadaiv khushi hi khushi hai। behad ka baap hamko padha rahe hain, vaah! yeh to kabhi na suna, na padha। bhagvaanuvaach main tum roohaani bachchon ko raajayog sikha raha hoon। to poori reeti seekhna chaahiye, dhaarna karni chaahiye। poori reeti padhna chaahiye। padhaai mein nambarvaar to sadaiv hote hi hain। apne ko dekhna chaahiye main uttam hoon, madhyam hoon va kanishta hoon? baap kehte hain apne ko dekho main oonch pad paane ke laayak hoon? roohaani service karta hoon? kyonki baap kehte hain bachche serviceable bano, follow karo। main aaya hi hoon service ke liye। roz service karta hoon isliye hi to yeh rath liya hai। inka rath beemaar pad jaata hai to main inmen baith murli likhta hoon। mukh se to bol nahin sakte to main likh deta hoon। taaki bachchon ke liye murli miss na ho to main bhi service par hoon na। yeh hai roohaani service। to tum bachche bhi baap ki service mein lag jaao। on god fatherly service। jo achha purushaartha karte hain, achhi service karte hain unko mahaaveer kaha jaata hai। dekha jaata hai kaun mahaaveer hain jo baba ke direction par chalte hain? baap ka pharmaan hai, apne ko aatma samajh bhaai-bhaai dekho। is shareer ko bhool jaao। baba bhi shareer ko nahin dekhte hain। baap kehte hain main aatmaon ko dekhta hoon। baaki yeh to gyaan hai ki aatma shareer bigar bol nahin sakti। main bhi is shareer mein aaya hoon, loan liya hua hai। shareer saath hi aatma padh sakti hai। baba ki baithak yahaan (bhrakuti mein) hai। yeh hai akaal takhta। aatma akaalmoorta hai। aatma kab chhoti badi nahin hoti hai। shareer chhota bada hota hai। jo bhi aatmaayen hain un sabhi ka takhta yeh bhrikuti hai। shareer to sabhi ke bhinna-bhinna hote hain। kiska akaal takhta purush ka hai, kiska akaal takhta stri ka hai, kiska akaal takhta bachche ka hai। baap baith bachchon ko roohaani drill sikhlaate hain। jab koi se baat karo to pahle apne ko aatma samjho। ham aatma phalaane bhaai se baat karte hain। baap ka paigaam dete hain ki shivbaaba ko yaad karo। yaad se hi junk utarni hai। sone mein jab alloy padti hai to sone ki value hi kam ho jaati hai। tum aatmaon mein bhi junk padne se tum valueless ho gaye ho। ab phir paavan banna hai। tum aatmaon ko ab gyaan ka teesra netra mila hai। us netra se apne bhaaeeyon ko dekho। bhaai-bhaai ko dekhne se karmendriyaan chanchal nahin hongi। raajya-bhaagya lena hai, vishwa ka maalik banna hai to yeh mehnat karo। bhaai-bhaai samajh sabhi ko gyaan do। to phir yeh tev (aadat) pakki ho jaayegi। sachche-sachche brothers tum sabhi ho। baap bhi oopar se aaye hain, tum bhi aaye ho। baap bachchon sahit service kar rahe hain। service karne ki baap himmat dete hain। himmate bachche madde baap… to yeh practice karni hai। main aatma bhaai ko padhaata hoon। aatma padhti hai na। isko spiritual knowledge kaha jaata hai, jo roohaani baap se hi milti hai। sangam par hi baap aakar yeh knowledge dete hain ki apne ko aatma samjho। tum nange aaye the phir yahaan shareer dhaaran kar tumne 84 janma part bajaaya hai। ab phir vaapis chalna hai isliye apne ko aatma samajh bhaai-bhaai ki drishti se dekhna hai। yeh mehnat karni hai। apni mehnat karni hai, doosre mein hamaara kya jaata! charity begins at hom arthaat pahle khud ko aatma samajh phir bhaaeeyon ko samjhaao। to achhi reeti teer lagega। yeh jauhar bharna hai। mehnat karenge tab hi oonch pad paayenge। ismen kuchh sahan bhi karna padta hai। jab koi ulti-sulti baat bole to tum chup raho। tum chup rahenge to phir doosra kya karega! taali do haath se bajti hai। ek ne mukh ki taali bajaai, doosra chup kar de to woh aapehi chup ho jaayenge। taali se taali bajne se aavaaj ho jaata hai। bachchon ko ek do ka kalyaan karna hai। baap samjhaate hain bachche sadaiv khushi mein rahne chaahte ho to manmanaabhav। apne ko aatma samajh baap ko yaad karo। bhaaeeyon (aatmaon) taraph dekho। to bachchon ko roohaani yaatra par rahne ki aadat daalni hai। tumhaare hi phaayde ki baat hai। baap ki shiksha bhaaeeyon ko deni hai। baap kehte hain main tum aatmaon ko gyaan de raha hoon। aatma ko hi dekhta hoon। manushya-manushya se baat karenge to unke munh ko dekhenge na। tum aatma se baat karte ho to aatma ko hi dekhna hai। bhal shareer dvaara gyaan dete ho parantu ismen shareer ka bhaan todna hota hai। tumhaari aatma samajhti hai paramatma baap hamko gyaan de rahe hain। baap bhi kehte hain aatmaon ko dekhta hoon, aatmaayen bhi kehti ham paramatma baap ko dekh rahe hain। unse knowledge le rahe hain, isko kaha jaata hai spiritual gyaan ki len-den, aatma ki aatma ke saath। aatma mein hi gyaan hai। aatma ko hi gyaan dena hai। yeh jaise jauhar hai। tumhaare gyaan mein yeh jauhar bhar jaayega। to kisko bhi samjhaane se jhat teer lag jaayega। baap kehte hain practice karke dekho, teer lagta hai na। yeh nai tev daalni hai to phir shareer ka bhaan nikal jaayega। maaya ke toofaan kam aayenge। bure sankalp nahin aayenge। criminal aai bhi nahin rahegi। ham aatma ne 84 ka chakra lagaaya। ab naatak poora hota hai। ab baba ki yaad mein rehna hai। yaad se hi tamopradhaan se satopradhaan ban, satopradhaan duniya ke maalik ban jaayenge। kitna sahaj hai। baap jaante hain bachchon ko yeh shiksha dena bhi mera part hi hai। koi nai baat nahin। har 5000 varsha baad hamko aana hota hai। main bandhaaymaan hoon। bachchon ko baith samjhaata hoon meethe bachche roohaani yaad ki yaatra mein raho to ant mate so gati ho jaayegi। yeh antakaal hai na! maamekam yaad karo to tumhaari sadgati ho jaayegi। yaad ki yaatra se paaya majboot ho jaayega। yeh dehi-abhimaani banne ki shiksha ek hi baar tum bachchon ko milti hai। kitna wonderful gyaan hai। baba wonderful hai to baba ka gyaan bhi wonderful hai। kab koi bata na sake। abhi vaapas chalna hai isliye baap kehte hain meethe bachchon yeh practice karo। apne ko aatma samajh aatma ko gyaan do। teesre netra se bhaai-bhaai ko dekhna hai। yahi badi mehnat hai।

yeh hai tum braahmanon ka sarvottam oonch te oonch kul। is samay tumhaara jeevan amoolya hai isliye is shareer ki bhi sambhaal karni hai। tamopradhaan hone kaaran shareer ki aayu bhi kam hoti gai hai। ab tum jitna yog mein rahenge, utna aayu badhegi। tumhaari aayu badhte-badhte 150 varsha ho jaayegi satayug mein, isliye shareer ki bhi sambhaal karni hai। aise nahin yeh to mitti ka putla hai, kahaan yeh khalaas ho jaaye। nahin। inko jeete rakhna hai। yeh amoolya jeevan hai na! koi beemaar hote hain to unse tang nahin hona chaahiye। unko bhi bolo shivbaaba ko yaad karo। jitna yaad karenge utna unke paap katte jaayenge। unki service karni chaahiye। jeeta rahe, shivbaaba ko yaad karta rahe। yeh samajh to rehti hai na ham baba ko yaad karte hain। aatma yaad karti hai, baap se varsa paane ke liye। achha।

meethe-meethe sikeeldhe bachchon prati nambarvaar purushaartha anusaar maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne ko dekho main purushaartha mein uttam hoon, madhyam hoon ya kanishta hoon? main oonch pad paane ke laayak hoon? main roohaani service karta hoon?

2) teesre netra se aatma bhaai ko dekho, bhaai-bhaai samajh sabhi ko gyaan do, aatmik sthiti mein rahne ki aadat daalo to karmendriyaan chanchal nahin hongi।

vardaan:- brahma baap samaan maha tyaag se mahaan bhaagya banaane vaale pharishta so vishwa mahaaraajan bhav

pharishta so vishwa mahaaraajan banne ka vardaan unheen bachchon ko praapta hota hai jo brahma baap ke har karma roopi kadam ke peechhe kadam uthaane vaale hain, jinka man-buddhi sanskaar - sada baap ke aage samarpit hai। jaise brahma baap ne isi mahaatyaag se mahaan bhaagya praapta kiya arthaat number one sampoorn pharishta aur number one vishwa mahaaraajan banen, aise follow father karne vaale bachche bhi mahaan tyaagi va sarvasva tyaagi honge। sanskaar roop se bhi vikaaron ke vansh ka tyaag karenge।

slogan:- abhi sab aadhaar tootne hain isliye ek baap ko apna aadhaar banaao।

apni shaktishaali mansa dvaara sakaash dene ki seva karo

itni saari prakriti ko parivartan karna, tamoguni sanskaaron vaali aatmaon ke tamoguni vibrations ko badalna aur svayan ko bhi aise khoone naahek vaayumandal ke vibrations se safe rakhna tatha un aatmaon ko sahayog dena, is vishaal kaarya ke liye mansa ko shubh bhaavnaaon se sampanna shaktishaali banaao।