Daily Murli for Friday 14 February 2025

14-02-2025 praatahmurli om shanti "baapdaada"' madhuban

“meethe bachche - tumhein shreemat mili hai ki aatma-abhimaani ban baap ko yaad karo, kisi bhi baat mein tumhein argue nahin karna hai''

prashn:- buddhiyog svachchha ban baap se lag sake, uski yukti kaun-si rachi hui hai?

uttar:- 7 din ki bhatthi। koi bhi naya aata hai to use 7 din ke liye bhatthi mein bithaao jisse buddhi ka kichda nikle aur gupta baap, gupta padhaai aur gupta varse ko pahchaan sake। agar aise hi baith gaye to moonjh jaayenge, samjhenge kuchh nahin।

geet:- jaag sajniyaan jaag…

om shanti। bachchon ko gyaani tu aatma banaane ke liye aise-aise jo geet hain woh sunaakar phir uska arth karna chaahiye to vaani khulegi। maaloom padega ki kahaan tak srishti ke aadi-madhya-ant ka gyaan buddhi mein hai। tum bachchon ki buddhi mein to oopar se lekar mool vatan, sookshm vatan, sthoolavtan ke aadi-madhya-ant ka saara raaz jaise ki chamakta hai। baap ke paas bhi yeh gyaan hai jo tumko sunaate hain। yeh hai bilkul naya gyaan। bhal shaastra aadi mein naam hai parantu woh naam lene se atak padenge, debate karne lag padenge। yahaan to bilkul simple reeti samjhaate hain - bhagvaanuvaach, mujhe yaad karo, main hi patit-paavan hoon। kabhi bhi shreekrishna ko va brahma, vishnu, shankar aadi ko patit-paavan nahin kahenge। sookshmavtanvaasiyon ko bhi tum patit-paavan nahin kehte ho to sthoolavtan ke manushya patit-paavan kaise ho sakte? yeh gyaan bhi tumhaari buddhi mein hi hai। shaastron ke baare mein jaasti argue karna achha nahin hai। bahut vaad-vivaad ho jaata hai। ek-do ko laathiyaan bhi maarne lag padte hain। tumko to bahut sahaj samjhaaya jaata hai। shaastron ki baaton mein tu mach nahin jaana hai। mool baat hai hi aatma-abhimaani banne ki। apne ko aatma samajhna hai aur baap ko yaad karna hai। yeh shreemat hai mukhya। baaki hai detail। beej kitna chhota hai, baaki jhaad ka vistaar hai। jaise beej mein saara gyaan samaaya hua hai vaise yeh saara gyaan bhi beej mein samaaya hua hai। tumhaari buddhi mein beej aur jhaad aa gaya hai। jis prakaar tum jaante ho aur koi samajh na sake। jhaad ki aayu hi lambi likh di hai। baap baith beej aur jhaad va drama chakra ka raaz samjhaate hain। tum ho svadarshan chakradhaari। koi naya aaye, baba mahima kare ki svadarshan chakradhaari bachchon, to koi samajh na sake। woh to apne ko bachche hi nahin samajhte hain। yeh baap bhi gupta hai to knowledge bhi gupta hai, varsa bhi gupta hai। naya koi bhi sunkar moonjh padenge isliye 7 din ki bhatthi mein bithaaya jaata hai। yeh jo 7 roj bhaagvat va raamaayan aadi rakhte hain, vaastav mein yeh is samay 7 din ke liye bhatthi mein rakha jaata hai to buddhi mein jo bhi saara kichda hai woh nikaalen aur baap se buddhiyog lag jaae। yahaan sab hain rogi। satayug mein yeh rog hote nahin। yeh aadhaakalpa ka rog hai, 5 vikaaron ka rog bada bhaari hai। vahaan to dehi-abhimaani rehte hain, jaante ho ham aatma ek shareer chhod doosra leti hain। pahle se saakshaatkaar ho jaata hai। akaale mrityu kabhi hota nahin। tumko kaal par jeet pahnaai jaati hai। kaal-kaal mahaakaal kehte hain। mahaakaal ka bhi mandir hota hai। sikkha logon ka phir akaaltakhta hai। vaastav mein akaal takhta yeh bhrikuti hai, jahaan aatma viraajmaan hoti hai। sabhi aatmaayen is akaaltakhta par baithi hain। yeh baap baith samjhaate hain। baap ko apna takhta to hai nahin। woh aakar inka yeh takhta lete hain। is takhta par baithkar tum bachchon ko taausi takhta nasheen banaate hain। tum jaante ho woh taausi takhta kaisa hoga jis par lakshmi-naaraayan viraajmaan hote honge। taausi takhta to gaaya hua hai na।

vichaar karna hai, unko bholaanaath bhagwan kyon kaha jaata hai? bholaanaath bhagwan kahne se buddhi oopar chali jaati hai। saadhu-santa aadi anguli se ishaara bhi aise dete hain na ki unko yaad karo। yathaartha reeti to koi jaan nahin sakte। abhi patit-paavan baap sammukh mein aakar kehte hain mujhe yaad karo to tumhaare vikarma vinaash ho jaaen। guarantee hai। geeta mein bhi likha hua hai parantu tum geeta ka ek misaal nikaalenge to woh 10 nikaalenge, isliye darkaar nahin hai। jo shaastra aadi padhe hue hain woh samjhenge ham lad sakenge। tum bachche jo in shaastron aadi ko jaante hi nahin ho, tumhein unka kabhi naam bhi nahin lena chaahiye। sirf bolo bhagwan kehte hain mujh apne baap ko yaad karo, unko hi patit-paavan kaha jaata hai। gaate bhi hain patit-paavan seetaaraam… sannyaasi log bhi jahaan-tahaan dhun lagaate rehte hain। aise mat-mataantar to bahut hain na। yeh geet kitna sundar hai, drama plan anusaar kalpa-kalpa aise geet bante hain, jaise ki tum bachchon ke liye hi banaaye hue hain। aise-aise achhe-achhe geet hain। jaise nayanheen ko raah dikhaao prabhu। prabhu koi shreekrishna ko thode hi kehte hain। prabhu va eeshvar niraakaar ko hi kahenge। yahaan tum kehte ho baba, parampita paramatma hai। hai to woh bhi aatma na। bhakti maarga mein bahut tu mach chale gaye hain। yahaan to bilkul simple baat hai। alpha aur be। alpha allaah, be baadshaahi - itni to simple baat hai। baap ko yaad karo to tum svarga ke maalik banenge। barobar yeh lakshmi-naaraayan svarga ke maalik, sampoorn nirvikaari the। to baap ko yaad karne se hi tum aisa sampoorn banenge। jitna jo yaad karte hain aur service karte hain utna woh oonch pad paate hain। woh samajh mein bhi aata hai, school mein student samajhte nahin hain kya ki ham kam padhte hain! jo poora attention nahin dete hain to pichhaadi mein baithe rehte hain, to zaroor fail ho jaayenge।

apne aapko refresh karne ke liye gyaan ke jo achhe-achhe geet bane hue hain unhein sunna chaahiye। aise-aise geet apne ghar mein rakhne chaahiye। kisko is par samjha bhi sakenge। kaise maaya ka phir se parchhaaya padta hai। shaastron mein to yeh baaten hain nahin ki kalpa ki aayu 5 hazaar varsha hai। brahma ka din aur brahma ki raat aadha-aadha hai। yeh geet bhi koi ne to banvaaye hain। baap buddhivaanon ki buddhi hai to koi ki buddhi mein aaya hai jo baith banaaya hai। in geeton aadi par bhi tumhaare paas kitne dhyaan mein jaate the। ek din aayega jo is gyaan ke geet gaane vaale bhi tumhaare paas aayenge। baap ki mahima mein aisa geet gaayenge jo ghaayal kar denge। aise-aise aayenge। tune par bhi madaar rehta hai। gaayan vidya ka bhi bahut naam hai। abhi to aisa koi hai nahin। sirf ek geet banaaya tha kitna meetha kitna pyaara...... baap bahut hi meetha bahut hi pyaara hai tab to sab unko yaad karte hain। aise nahin ki devtaayen unko yaad karte hain। chitron mein raam ke aage bhi shiv dikhaaya hai, raam pooja kar raha hai। yeh hai wrong। devtaayen thode hi kisko yaad karte hain। yaad manushya karte hain। tum bhi abhi manushya ho phir devta banenge। devta aur manushya mein raat-din ka pharka hai। vahi devtaayen phir manushya bante hain। kaise chakra phirta rehta hai, kisko bhi pata nahin hai। tumko abhi pata pada hai ki ham sach-sach devta bante hain। abhi ham brahman hain, nai duniya mein devta kahlaayenge। abhi tum wonder khaate ho। yeh brahma khud hi jo is janma mein pahle pujaari tha, shri naaraayan ki mahima gaate the, naaraayan se bada prem tha। ab wonder lagta hai, ham so ban rahe hain। to kitna khushi ka paara chadhna chaahiye। tum ho unknown warriors, non violence। sachmuch tum double ahinsak ho। na kaam kataari, na woh ladaai। kaam alag hai, krodh alag cheez hai। to tum ho double ahinsak। non violence sena। sena akshar se unhonne phir senaayen khadi kar di hain। mahaabhaarat ladaai mein males ke naam dikhaaye hain। females nahin hain। vaastav mein tum ho shiv shaktiyaan। majority tumhaari hone kaaran shiv shakti sena kaha jaata hai। yeh baaten baap hi baith samjhaate hain।

abhi tum bachche navayug ko yaad karte ho। duniya mein koi ko bhi navayug ka maaloom nahin hai। woh to samajhte hain navayug 40 hazaar varsha baad aayega। satayug navayug hai, yeh to bada clear hai। to baba raay dete hain aise-aise achhe geet bhi sunkar refresh honge aur kisko samjhaayenge bhi। yeh sab yuktiyaan hain। inka arth bhi sirf tum hi samajh sakte ho। bahut achhe-achhe geet hain apne ko refresh karne ke liye। yeh geet bahut madad karte hain। arth karna chaahiye to mukh bhi khul jaayega, khushi bhi hogi। baaki jo jaasti dhaarna nahin kar sakte hain unke liye baap kehte hain ghar baithe baap ko yaad karte raho। grihastha vyavhaar mein rehte sirf yeh mantra yaad rakho - baap ko yaad karo aur pavitra bano। aage puroosh log patni ko kehte the bhagwan ko to ghar mein bhi yaad kar sakte hain phir mandiron aadi mein bhatakne ki kya darkaar hai? ham tumko ghar mein moorti de dete hain, yahaan baith yaad karo, dhakka khaane kyon jaati ho? aise bahut puroosh log striyon ko jaane nahin dete the। cheez to ek hi hai, pooja karna hai aur yaad karna hai। jabki ek baar dekh liya phir to aise bhi yaad kar sakte hain। shreekrishna ka chitra to common hai - mormukutdhaari। tum bachchon ne saakshaatkaar kiya hai - kaise vahaan janma hota hai, woh bhi saakshaatkaar kiya hai, parantu kya tum uska photo nikaal sakte ho? accurate koi nikaal na sake। divya drishti se sirf dekh hi sakte hain, bana nahin sakte, haan dekhkar varnan kar sakte ho, baaki woh paint aadi nahin kar sakte। bhal hoshiyaar painter ho, saakshaatkaar bhi kare to bhi accurate features nikaal na sake। to baba ne samjhaaya, koi se argue jaasti nahin karna hai। bolo, tumko paavan banne se kaam। aur shanti maangate ho to baap ko yaad karo aur pavitra bano। pavitra aatma yahaan rah na sake। woh chali jaayegi vaapis। aatmaon ko paavan banaane ki shakti ek baap mein hai, aur koi paavan bana nahin sakta। tum bachche jaante ho yeh saari stage hai, is par naatak hota hai। is samay saari stage par raavan ka raajya hai। saare samudra par srishti khadi hai। yeh behad ka taapu hai। woh hain had ke। yeh hai behad ki baat। jis par aadhaakalpa daivi raajya, aadhaakalpa aasuri raajya hota hai। yoon khanda to alag-alag hain, parantu yeh hai saari behad ki baat। tum jaante ho ham ganga jamuna nadi ke meethe paani ke kanthe par hi honge। samudra aadi par jaane ki darkaar nahin rehti। yeh jo dvaarika kehte hain, woh koi samudra ke beech hoti nahin hai। dvaarika koi doosri cheez nahin hai। tum bachchon ne sab saakshaatkaar kiye hain। shuru mein yeh sandeshi aur guljaar bahut saakshaatkaar karti thi। inhon ne bade part bajaaye hain kyonki bhatthi mein bachchon ko bahlaana tha। to saakshaatkaar se bahut-bahut bahle hain। baap kehte hain phir pichhaadi mein bahut bahlenge। woh part phir aur hai। geet bhi hai na - hamne jo dekha so tumne nahin dekha। tum jaldi-jaldi saakshaatkaar karte rahenge। jaise imtahaan ke din nazdeek hote hain to maaloom pad jaata hai ki ham kitne marks se paas honge। tumhaari bhi yeh padhaai hai। abhi tum jaise knowledgeful ho baithe ho। sabhi full to nahin hote hain। school mein hamesha nambarvaar hote hain। yeh bhi knowledge hai - mool vatan, sookshm vatan, teenon lokon ka tumko gyaan hai। is srishti ke chakra ko tum jaante ho, yeh phirta rehta hai। baap kehte hain tumko jo knowledge di hai, yeh aur koi samjha na sake। tumhaare par hai behad ki dasha। koi par brihaspati ki dasha, koi par raahu ki dasha hoti hai to jaakar chandaal aadi banenge। yeh hai behad ki dasha, woh hoti hai had ki dasha। behad ka baap behad ki baaten sunaate hain, behad ka varsa dete hain। tum bachchon ko kitni na khushi honi chaahiye। tumne anek baar baadshaahi li hai aur ganvaai hai, yeh to bilkul pakki baat hai। nothing new, tab tum sadaiv harshit rah sakenge। nahin to maaya ghutka khilaati hai।

to tum sabhi aashik ho ek maashook ke। sab aashik us ek maashook ko hi yaad karte hain। woh aakar sabhi ko sukh dete hain। aadhaakalpa unko yaad kiya hai, ab woh mila hai to kitni khushi honi chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sadaiv harshit rahne ke liye nothing new ka paath pakka karna hai। behad ka baap humein behad ki baadshaahi de rahe hain - is khushi mein rehna hai।

2) gyaan ke achhe-achhe geet sunkar svayan ko refresh karna hai। unka arth nikaalkar doosron ko sunaana hai।

vardaan:- maaya ke sambandhon ko divorce de baap ke sambandh se sauda karne vaale maayaajeet, mohjeet bhav

ab smriti se puraana sauda cancel kar single bano। aapas mein ek do ke sahayogi bhal raho lekin companion nahin। companion ek ko banaao to maaya ke sambandhon se divorce ho jaayega। maayaajeet, mohjeet vijayi rahenge। agar jara bhi kisi mein moh hoga to teevra purooshaarthi ke bajaae purooshaarthi ban jaayenge isliye kya bhi ho, kuchh bhi ho khushi mein naachte raho, mirooa maut malooka shikaar - isko kehte hain nashtomoha। aisa nashtomoha rahne vaale hi vijay maala ke daane bante hain।

slogan:- satyata ki visheshta se diamond ki chamak ko badhaao।

avyakt-ishaare:- ekaantapriy bano ekta aur ekaagrata ko apnaao

baapdaada chaahte hain ki har bachcha ekras shreshtha sthiti ke aasandhaari, ekaantavaasi, ashareeri, ekta sthaapak, eknaami, economy ka avtaar bane। ek do ke vichaaron ko samajh, sammaan de, ek do ko ishaara de, len-den kar aapas mein sangathan ki shakti ka swaroop pratyaksha kare kyonki aapke sangathan ke ekta ki shakti saare brahman parivaar ko sangathan mein laane ke nimitta banegi।