Daily Murli for Tuesday 12 August 2025

12-08-2025 praatahmurli om shanti "baapdaada"' madhuban

“meethe bachche - tumhein service ki bahut uchhal aani chaahiye, gyaan aur yog hai to doosron ko bhi sikhaao, service ki vriddhi karo''

prashn:- service mein uchhal na aane ka kaaran kya hai? kis vighna ke kaaran uchhal nahin aati?

uttar:- sabse bada vighna hai criminal aai। yeh beemaari service mein uchhalne nahin deti। yeh bahut kadi beemaari hai। agar criminal aai thandi nahin hui hai, grihastha vyavhaar mein donon pahiye theek nahin chalte to grihasthi ka bojh ho jaata, phir halke ho service mein uchhal nahin sakte।

geet:- jaag sajniyaan jaag …

om shanti। meethe-meethe bachchon ne yeh geet suna। aise-aise do-chaar achhe geet hain woh sabhi ke paas hone chaahiye ya tape mein bharne chaahiye। ab yeh to geet manushyon ka banaaya hua kahenge। drama anusaar touch kiya hua hai jo phir bachchon ko kaam aa jaata hai। aise-aise geet bachchon ko sunne se nasha chadhta hai। bachchon ko to nasha chadha rehna chaahiye ki abhi ham nai raajaai sthaapan kar rahe hain। raavan se le rahe hain। jaise koi ladte hain to khyaal rehta hai na - inki raajaai hap kar leven। inka gaanv ham apne haath karen। ab woh sab had ke liye ladte hain। tum bachchon ki ladaai hai maaya se, jiska sivaae tum braahmanon ke aur koi ko pata nahin। tum jaante ho hamko is vishwa par gupta reeti raajya sthaapan karna hai athva baap se varsa lena hai। isko vaastav mein ladaai bhi nahin kahenge। drama anusaar tum jo satopradhaan se tamopradhaan bane ho so phir satopradhaan banna hai। tum apne janmon ko nahin jaante the। abhi baap ne samjhaaya hai। aur jo bhi dharma hain unko yeh knowledge milne ki hai nahin। baap tum bachchon ko hi baith samjhaate hain। gaaya bhi jaata hai dharma mein hi taakat hai। bhaaratvaasiyon ko yeh pata nahin hai ki hamaara dharma kya hai। tumko baap dvaara pata pada hai ki hamaara aadi sanaatan devi-devta dharma hai। baap aakar phir tumko us dharma mein transfer karte hain। tum jaante ho hamaara dharma kitna sukh dene vaala hai। tumko koi se ladaai aadi nahin karni hai। tumko to apne svadharma mein tikna hai aur baap ko yaad karna hai, ismen bhi time lagta hai। aise nahin ki sirf kahne se tik jaate hain। andar mein yeh smriti rahni chaahiye - main aatma shant swaroop hoon। ham aatma abhi tamopradhaan patit bani hain। ham aatma jab shantidham mein thi to pavitra thi, phir part bajaate-bajaate tamopradhaan bani hain। abhi phir pavitra ban hamko vaapis ghar jaana hai। baap se varsa lene liye apne ko aatma nishchay kar baap ko yaad karna hai। tumko nasha chadhega ham eeshvar ki santaan hain। baap ko yaad karne se hi vikarma vinaash hote hain। kitna sahaj hai - yaad se ham pavitra ban phir shantidham mein chale jaayenge। duniya is shantidham, sukhdhaam ko bhi nahin jaanti। yeh baaten koi shaastron mein nahin hain। gyaan saagar ki hai hi ek geeta, jismen sirf naam badal liya hai। sarva ka sadgati daata, gyaan ka saagar us parampita paramatma ko kaha jaata hai। aur koi ko gyaanvaan kah nahin sakte। jab woh gyaan de tab tum gyaanvaan bano। abhi sab hain bhaktivaan। tum bhi the। abhi phir gyaanvaan bante ja rahe ho। nambarvaar purushaartha anusaar gyaan koi mein hai, koi mein nahin hai। to kya kahenge? us hisaab se oonch pad pa na saken। baap service ke liye kitna uchhalte hain। bachchon mein abhi woh taakat aai nahin hai jo kisko achhi reeti samjhaayen। aisi-aisi yuktiyaan rachen। bhal bachche mehnat kar conference aadi kar rahe hain, gopon mein kuchh taakat hai, unko khyaal rehta hai ki sangathan ho jismen yuktiyaan nikaalen। service vriddhi ko kaise paaye? maatha maar rahe hain। naam bhal shakti sena hai parantu padhi likhi nahin hain। koi phir anpadh bhi padhe likhe ko achha padhaati hain। baba ne samjhaaya hai criminal aai bada nuksaan karti hai। yeh beemaari badi kadi hai isliye uchhalte nahin hain। to baba poochhte hain tum yugal donon pahiye theek chal rahe ho? us taraph kitni badi-badi senaayen hain, striyon ka bhi jhunda hai, padhe likhe hain। unhon ko madad bhi milti hai। tum to ho gupta। koi bhi nahin jaante ki yeh brahmaakumaar kumaariyaan kya karte hain। tumhaare mein bhi nambarvaar hain। grihastha vyavhaar ka bojha sir par rahne se jhuke hue hain। brahmaakumaar kumaari kahlaate hain parantu woh criminal aai thandi nahin hoti। donon pahiye ek jaise hon bada mushkil hai। baba bachchon ko service uthaane ke liye samjhaate rehte hain। koi dhanvaan hain - to bhi uchhalte nahin hain। dhan ke bhookhe hain, bachcha nahin hoga to bhi god mein lete hain। uchhal nahin aati, baba ham baithe hain। ham bada makaan lekar dete hain।

baba ki nazar dehli par vishesh hai kyonki dehli hai capital, head office। baba kehte hain dehli mein vishesh seva ka gheraav daalo। koi ko samjhaane ke liye andar ghusna chaahiye। gaaya bhi hua hai ki paandavon ko kaurvon se 3 pair prithvi ke bhi nahin milte the। yeh kaurav akshar to geeta ka hai। bhagwan ne aakar raajayog sikhaaya, uska naam geeta rakha hai। parantu geeta ke bhagwan ko bhool gaye hain isliye baba ghadi-ghadi kehte rehte hain mukhya is point ko hi uthaana hai। aage baba kehte the banaaras ke vidut mandali vaalon ko samjhaao। baba yuktiyaan to batlaate rehte hain। phir achhi reeti koshish karni hai। baap baar-baar samjhaate rehte hain। number one dehli mein yukti racho। sangathan mein bhi yeh vichaar karo। mool baat ki bada mela aadi dehli mein kaise karen। vo log to dehli mein bahut hi bhookh hadtaal aadi karte hain। tum to aisa koi kaam nahin karte ho। ladna jhagadna kuchh nahin। tum to sirf soye hue ko jagaate ho। dehli vaalon ko hi mehnat karni hai। tum to jaante ho ham brahmaanda ke bhi maalik phir kalpa pahle muaaphik srishti ke bhi maalik banenge। yeh pakka hai zaroor। vishwa ka maalik banna hi hai। abhi tumko 3 pair prithvi ke bhi capital mein hi chaahiye, jo vahaan gyaan ke gole chhoden। nasha chaahiye na! badon ka aavaaj chaahiye na। is samay bhaarat saara gareeb hai। gareebon ki seva karne ke liye hi baap aate hain। dehli mein to bahut achhi service honi chaahiye। baba ishaara dete rehte hain। dehli vaale samajhte hain baba hamaara attention khinchavaate hain। aapas mein ksheerkhanda hona chaahiye। apna paandavon ka kila to banaayen। dehli mein hi banaana padega। ismen dimaag bada achha chaahiye। bahut kuchh kar sakte hain। vo log gaate to bahut hain bhaarat hamaara desh hai, ham aise karenge। parantu khud mein kuchh bhi dam nahin। sivaae foreign ki madad se uth nahin sakte। tumko to bahut madad mil rahi hai behad ke baap se। itni madad koi de na sake। ab jaldi kila banaana hai। tum bachchon ko baap vishwa ki baadshaahi dete hain to haunsala bahut chaahiye। jharmui jhagmui mein bahuton ki buddhi atki rehti hai। bandhanon ki aaphat hai maataaon par। males par koi bandhan nahin। maataaon ko abla kaha jaata hai। purush balvaan hote hain। purush shaadi karte hain to unko bal diya jaata hai - tum hi guru eeshvar sab kuchh ho। stri to jaise poonchh hai। pichhaadi mein latakne vaali to sachmuch poonchh hokar hi latak padti hai। pati mein moh, bachchon mein moh, purushon ko itna moh nahin rehta hai। unki to ek jutti gai to doosri teesri le lete। aadat pad gai hai। baba to samjhaate rehte hain - yeh-yeh akhbaar mein daalo। bachchon ko baap ka show karna hai। yeh samjhaana tumhaara kaam hai। baba ke saath to daada bhi hai। to yeh ja nahin sakte। kahenge shivbaaba yeh bataao, yeh hamaare oopar aaphten aai hain, ismen aap raay do। aisi-aisi baaten poochhte hain। baap to aaye hain patiton ko paavan banaane। baap kehte hain tum bachchon ko sab knowledge milti hai। koshish kar aapas mein milkar raay karo। tum bachchon ko abhi vihang maarga ki seva ka tamaasha dikhaana chaahiye। cheenti maarga ki service to chalti aa rahi hai। lekin aisa tamaasha dikhaao jo bahuton ka kalyaan ho jaae। baba ne yeh kalpa pahle bhi samjhaaya tha, ab bhi samjhaate hain। bahuton ki buddhi kahaan na kahaan phansi hui hai। umang nahin। jhat deh-abhimaan aa jaata hai। deh-abhimaan ne hi satyaanaash ki hai। ab baap satya oonch karne ki kitni sahaj baat bataate hain। baap ko yaad karo to shakti aaye। nahin to shakti aati nahin। bhal centre sambhaalte hain, parantu nasha nahin kyonki deh-abhimaan hai। dehi-abhimaani banen to nasha chadhe। ham kis baap ke bachche hain। baap kehte hain jitna tum dehi-abhimaani honge utna bal aayega। aadhaakalpa ka deh-abhimaan ka nasha hai to dehi-abhimaani banne mein badi mehnat lagti hai। aise nahin baba gyaan ka saagar hai, hamne bhi gyaan uthaaya hai, bahuton ko samjhaate hain parantu yaad ka jauhar bhi chaahiye। gyaan ki talvaar hai। yaad ki phir yaatra hai। donon alag cheez hain। gyaan mein yaad ki yaatra ka jauhar chaahiye। woh nahin hai to kaath ki talvaar ho jaati hai। sikkha log talvaar ka kitna maan rakhte hain। woh to hinsak thi, jisse ladaai ki। vaastav mein guru log ladaai thode hi kar sakte hain। guru to ahinsak chaahiye na। ladaai se thode hi sadgati hoti hai। tumhaari to hai yog ki baat। yaad ke bal bigar gyaan talvaar kaam nahin karegi। criminal aai bada nuksaan karne vaali hai। aatma kaanon se sunti hai, baap kehte hain tum yaad mein masta raho to service badhti jaayegi। kabhi-kabhi kehte hain baba sambandhi sunte nahin hain। baba kehte hain yaad ki yaatra mein kachche ho isliye gyaan talvaar kaam nahin karti hai। yaad ki mehnat karo। yeh hai gupta mehnat। murli chalaana to pratyaksha hai। yaad mein hi gupta mehnat hai, jisse shakti milti hai। gyaan se shakti nahin milti। tum patit se paavan yaad ke bal se bante ho। kamaai ka hi purushaartha karna hai।

bachchon ko yaad jab ekras rehti hai, avastha achhi hai to bahut khushi rehti hai aur jab yaad theek nahin, kisi baat mein ghutka khaate hain to khushi gaayab ho jaati hai। kya student ko teacher yaad nahin padta hoga। yahaan to ghar mein rehte, sab kuchh karte teacher ko yaad karna hai। is teacher se to bahut-bahut oonch pad milta hai। grihastha vyavhaar mein bhi rehna hai। teacher ki yaad rahe to bhi baap aur guru yaad zaroor aayenge। kitne prakaar se samjhaate rehte hain। parantu ghar mein phir dhan-daulat, baal-bachche aadi dekh bhool jaate hain। samjhaate to bahut hain। tumko roohaani service karni hai। baap ki yaad hi hai oonch te oonch seva। mansa-vaacha-karmana buddhi mein baap ki yaad rahe। mukh se bhi gyaan ki baaten sunaao। kisko duhkh nahin dena hai। koi akartavya nahin karna hai। pahli baat alpha na samajhne se aur kuchh bhi samjhenge nahin। pahle alpha pakka karaao tab tak aage badhna nahin chaahiye। shivbaaba raajayog sikhlaakar vishwa ka maalik banaate hain। is chhi-chhi duniya mein maaya ka show bahut hai। kitna fashion ho gaya hai। chhi-chhi duniya se naphrat aani chaahiye। ek baap ko yaad karne se tumhaare vikarma vinaash honge। pavitra ban jaayenge। time vesta nahin karo। achhi reeti dhaarna karo। maaya dushman bahuton ka akla chat kar deti hai। commander gaphlat karte hain to unko dismiss bhi karte hain। khud commander ko bhi lajja aati hai phir rijaain bhi kar dete hain। yahaan bhi aise hota hai। achhe-achhe commanders kabhi phaan ho jaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad ki gupta mehnat karni hai। yaad ki masti mein rahne se service svatah hi badhti rahegi। mansa-vaacha-karmana yaad mein rahne ka purushaartha karna hai।

2) mukh se gyaan ki hi baaten sunaani hai, kisko duhkh nahin dena hai। koi bhi akartavya nahin karna hai। dehi-abhimaani banne ki mehnat karni hai।

vardaan:- lohe samaan aatma ko paaras banaane vaale master paarasnaath bhav

aap sab paarasnaath baap ke bachche master paarasnaath ho - to kaisi bhi lohe samaan aatma ho lekin aap ke sang se loha bhi paaras ban jaae। yeh loha hai - aisa kabhi nahin sochna। paaras ka kaam hi hai lohe ko paaras banaana। yahi lakshya aur lakshan sada smriti mein rakh har sankalp, har karma karna, tab anubhav hoga ki mujh aatma ke light ki kirnen anek aatmaon ko golden banaane ki shakti de rahi hain।

slogan:- har kaarya saahas se karo to sarva ka sammaan praapta hoga।

avyakt ishaare - sahajyogi banna hai to parmaatma pyaar ke anubhvi bano

parmaatma pyaar is shreshtha brahman janma ka aadhaar hai। kehte bhi hain pyaar hai to jahaan hai, jaan hai। pyaar nahin to bejaan, bejhaan hain। pyaar mila arthaat jahaan mila। duniya ek boond ki pyaasi hai aur aap bachchon ka yeh prabhu pyaar property hai। isi prabhu pyaar se palte ho arthaat brahman jeevan mein aage badhte ho। to sada pyaar ke saagar mein lavleen raho।