Daily Murli for Thursday 29 January 2026

29-01-2026 praatahmurli om shanti "baapdaada"' madhuban

“meethe bachche - apne sweet baap ko yaad karo to tum satopradhaan devta ban jaayenge, saara madaar yaad ki yaatra par hai''

prashn:- jaise baap ki kashish bachchon ko hoti hai vaise kin bachchon ki kashish sabko hogi?

uttar:- jo phool bane hain। jaise chhote bachche phool hote hain, unhein vikaaron ka pata bhi nahin to woh sabko kashish karte hain na। aise tum bachche bhi jab phool arthaat pavitra ban jaayenge to sabko kashish hogi। tumhaare mein vikaaron ka koi bhi kaanta nahin hona chaahiye।

om shanti। roohaani bachche jaante hain ki yeh purushottam sangamayug hai। apna bhavishya ka purushottam mukh dekhte ho? purushottam chola dekhte ho? feel karte ho ki ham phir nai duniya satayug mein inki (lakshmi-naaraayan ki) vanshaavli mein jaayenge arthaat sukhdhaam mein jaayenge athva purushottam banenge। baithe-baithe yeh vichaar aate hain! student jo padhte hain to jo darja padhte hain, woh zaroor buddhi mein hoga na - main barrister ya phalaana banoonga। vaise tum bhi jab yahaan baithte ho to yeh jaante ho ham vishnu dynasty mein jaayenge। vishnu ke do roop hain - lakshmi-naaraayan, devi-devta। tumhaari buddhi abhi alaukik hai। aur koi manushya ki buddhi mein yeh baaten raman nahin karti hongi। tum bachchon ki buddhi mein yeh sab baaten hain। yeh koi common satsang nahin hai। yahaan baithe ho samajhte ho sat baba jisko shiv kaha jaata hai, unke sang mein baithe hain। shivbaaba hi rachta hai, vahi rachna ke aadi-madhya-ant ko jaante hain aur yeh knowledge dete hain। jaise ki kal ki baat sunaate hain। yahaan baithe ho to yeh to yaad hoga na ki ham aaye hain - rejuvenate hone arthaat yeh shareer badal devta shareer lene। aatma kehti hai hamaara yeh tamopradhaan puraana shareer hai, ise badal-kar aisa lakshmi-naaraayan banne ka hai। em object kitni shreshtha hai। padhaane vaala teacher zaroor padhne vaale student se hoshiyaar hoga na। padhaate hain, achhe karma sikhlaate hain to zaroor oonch hoga na। tum jaante ho hamko sabse oonch te oonch bhagwan padhaate hain। bhavishya mein ham so devta banenge। ham jo padhte hain so bhavishya nai duniya ke liye। aur koi ko nai duniya ka pata bhi nahin hai। tumhaari buddhi mein ab aata hai yeh lakshmi-naaraayan nai duniya ke maalik the। to zaroor phir repeat hoga। to baap samjhaate hain tumko padhaakar manushya se devta banaata hoon। devtaaon mein bhi zaroor nambarvaar honge। daivi raajdhaani hoti hai na। tumhaara saara din yahi khyaalaat chalta hoga ki ham aatma hain। hamaari aatma jo bahut patit thi, so ab paavan banne ke liye paavan baap ko yaad karti hai। yaad ka arth bhi samajhna hai। aatma yaad karti hai apne sweet baap ko। baap khud kehte hain - bachche, mujhe yaad karne se tum satopradhaan devta ban jaayenge। saara madaar yaad ki yaatra par hai। baap zaroor poochhenge na - bachche kitna samay yaad karte ho? yaad karne mein hi maaya ki ladaai hoti hai। tum khud samajhte ho yeh yaatra nahin parantu jaise ki ladaai hai, ismen vighna bahut padte hain। yaad ki yaatra mein rahne mein hi maaya vighna daalti hai arthaat yaad bhula deti hai। kehte bhi hain baba hamko aapki yaad mein rahne mein maaya ke toofaan bahut lagte hain। number one toofaan hai deh-abhimaan ka। phir hai kaam, krodh, lobh, moh…। aaj kaam ka toofaan, kal krodh ka toofaan, lobh ka toofaan aaya.... aaj hamaari avastha achhi rahi, koi bhi toofaan nahin aaya। yaad ki yaatra mein saara din rahe, badi khushi thi। baba ko bahut yaad kiya। yaad mein prem ke aansu bahte rehte hain। baap ki yaad mein rahne se tum meethe ban jaayenge।

tum bachche yeh bhi samajhte ho ki ham maaya se haar khaate-khaate kahaan tak aakar pahunche hain। bachche hisaab nikaalte hain। kalpa mein kitne maas, kitne din.. hain। buddhi mein aata hai na। agar koi kahe laakhon varsha aayu hai to phir koi hisaab thode hi kar sake। baap samjhaate hain - yeh srishti ka chakra phirta rehta hai। is saare chakra mein ham kitne janma lete hain। kaise dynasty mein jaate hain। yeh to jaante ho na। yeh bilkul nai baaten, nai knowledge hai nai duniya ke liye। nai duniya svarga ko kaha jaata hai। tum kahenge ham abhi manushya hain, devta ban rahe hain। devta pad hai oonch। tum bachche jaante ho ham sabse nyaari knowledge le rahe hain। hamko padhaane vaala bilkul nyaara vichitra hai। unko yeh saakaar chitra nahin hai। woh hai hi niraakaar। to drama mein dekho kaisa achha part rakha hua hai। baap padhaaye kaise? to khud batlaate hain - main phalaane tan mein aata hoon। kis tan mein aata hoon, woh bhi bataate hain। manushya moonjhate hain - kya ek hi tan mein aayega! parantu yeh to drama hai na। ismen change ho nahin sakti। yeh baaten tum hi sunte ho aur dhaaran karte ho aur sunaate ho - kaise hamko shivbaaba padhaate hain? ham phir aur aatmaon ko padhaate hain। padhti aatma hai। aatma hi seekhti, sikhlaati hai। aatma most valuable hai। aatma avinaashi, amar hai। sirf shareer khatma hota hai। ham aatmaayen apne parampita paramatma se knowledge le rahi hain। rachayita aur rachna ke aadi-madhya-ant, 84 janmon ki knowledge le rahe hain। knowledge kaun lete hain? aatma। aatma avinaashi hai। moh bhi rakhna chaahiye avinaashi cheez mein, na ki vinaashi cheez mein। itna samay tum vinaashi shareer mein moh rakhte aaye ho। abhi samajhte ho - ham aatma hain, shareer ka bhaan chhodna hai। koi-koi bachche likhte bhi hain mujh aatma ne yeh kaam kiya। mujh aatma ne aaj yeh bhaashan kiya। mujh aatma ne aaj bahut baba ko yaad kiya। woh hai supreme aatma, knowledgeful। tum bachchon ko kitni knowledge dete hain। mool vatan, sookshm-vatan ko tum jaante ho। manushyon ki buddhi mein to kuchh bhi nahin hai। tumhaari buddhi mein hai rachta kaun hai? is manushya srishti ka creator gaaya jaata hai, to zaroor kartavya mein aate hain।

tum jaante ho aur koi manushya nahin jisko aatma aur paramatma baap yaad ho। baap hi knowledge dete hain ki apne ko aatma samjho। tum apne ko shareer samajh ulte latak pade ho। aatma sat chit aananda svarup hai। aatma ki sabse jaasti mahima hai। ek baap ke aatma ki kitni mahima hai। vahi duhkh harta sukh karta hai। machchhar aadi ki to mahima nahin karenge ki woh duhkh harta sukh karta hai, gyaan ka saagar hai। nahin, yeh baap ki mahima hai। tum bhi har ek khud duhkh harta sukh karta ho kyonki us baap ke bachche ho na, jo sabka duhkh harkar aur sukh dete hain। so bhi aadhaakalpa ke liye। yeh knowledge aur koi mein hai nahin। knowledgeful ek hi baap hai। hamaare mein no knowledge। ek baap ko hi nahin jaante hain to baaki phir kya knowledge hogi। abhi tum feel karte ho ham pahle knowledge lete the, kuchh bhi nahin jaante the। baby mein (chhote bachche mein) knowledge nahin hoti hai aur koi avgun bhi nahin hota hai, isliye unko mahaatma kaha jaata hai kyonki pavitra hai। jitna chhota bachcha utna number-one phool। bilkul hi jaise karmaateet avastha hai। karma vikarma ko kuchh nahin jaante। sirf apne ko hi jaante hain। woh phool hain isliye sabko kashish karte hain। jaise ab baba kashish karte hain। baap aaye hi hain tum sabko phool banaane। tumhaare mein kai bahut kharaab kaante bhi hain। 5 vikaar roopi kaante hain na। is samay tumko phoolon aur kaanton ka gyaan hain। kaanton ka jangal bhi hota hai। babool ka kaanta sabse bada hota hai। un kaanton se bhi bahut cheezen banti hain। bhent ki jaati hai manushyon ki। baap samjhaate hain, is samay bahut duhkh dene vaale manushya kaante hain isliye inko duhkh ki duniya kaha jaata hai। kehte bhi hain baap sukh-daata hai। maaya raavan duhkh daata hai। phir satayug mein maaya nahin hogi to yeh kuchh bhi baaten nahin hongi। drama mein ek part do vaari nahin ho sakta। buddhi mein hai saari duniya mein jo part bajta hai, woh sab naya। tum vichaar karo - satayug se lekar yahaan tak ke din hi badal jaate, activity badal jaati। 5 hazaar varsha ki poori activity ka record aatma mein bhara hua hai, woh badal nahin sakta। har aatma mein apna part bhara hua hai। yeh ek baat bhi koi samajh nahin sakte। abhi aadi-madhya-ant ko tum jaante ho। yeh school hai na। srishti ke aadi-madhya-ant ko jaanna hai aur phir baap ko yaad kar pavitra banne ki padhaai hai। inke pahle jaante the kya - hamko yeh banna hai। baap kitna clear kar samjhaate hain। tum pahle number mein yeh the phir tum neeche utarte-utarte ab kya ban gaye ho। duniya ko to dekho kya ban gai hai! kitne dher manushya hain। in lakshmi-naaraayan ki raajdhaani ka vichaar karo - kya hoga! yeh jahaan rehte honge kaise heere-javaahraaton ke mahal honge। buddhi mein aata hai - abhi ham svargavaasi ban rahe hain। vahaan ham apne makaan aadi banaayenge। aise nahin ki neeche se dvaarika nikal aayegi। jaise shaastron mein dikhaaya hai। shaastra naam hi chala aata hai, aur to koi naam rakh nahin sakte। aur kitaab hote hain padhaai ke। doosre novels hote hain। baaki inko pustak athva shaastra kehte hain। woh hai padhaai ke kitaab। shaastra padhne vaalon ko bhakta kaha jaata hai। bhakti aur gyaan do cheezen hain। ab vairaagya kiska? bhakti ka ya gyaan ka? zaroor kahenge bhakti ka। ab tumko gyaan mil raha hai, jisse tum itna oonch bante ho। ab baap tumko sukhdaai banaate hain। sukhdhaam ko hi svarga kaha jaata hai। sukhdhaam mein tum chalne vaale ho to tumko hi padhaate hain। yeh gyaan bhi tumhaari aatma leti hai। aatma ka koi dharma nahin hai। woh to aatma hai। phir aatma jab shareer mein aati hai to shareer ke dharma alag hote hain। aatma ka dharma kya hai? ek to aatma bindu misal hai aur shant svarup hai। shantidham, muktidhaam mein rehti hai। ab baap samjhaate hain - sab bachchon ka hak hai। bahut bachche hain jo aur aur dharmon mein convert ho gaye hain। woh phir nikalkar apne asli dharma mein aa jaayenge। jo devi-devta dharma chhod doosre dharma mein gaye hain, woh sab patte lautkar aa jaayenge, apni jagah par। in sab baaton ko aur koi samajh nahin sakenge। pahle-pahle to baap ka parichay dena hai inmen hi sab moonjh pade hain। tum bachche jaante ho abhi hamko kaun padhaate hain? baap padhaate hain। shreekrishna to dehdhaari hai। inko (brahma ko) daada kahenge। sab bhaai-bhaai hain na। phir hai martabe ke oopar। yeh bhaai ka shareer hai, yeh behen ka shareer hai। yeh bhi ab tum jaante ho। aatma to ek chhota sa sitaara hai। itni sab knowledge chhote sitaare mein hai। sitaara shareer ke sivaae baat bhi nahin kar sakta। sitaare ko part bajaane ke liye ang bhi chaahiye। sitaaron ki duniya hi alag hai। phir yahaan aakar aatma shareer dhaaran karti hai। woh hai aatmaon ka ghar। aatma chhoti bindi hai। shareer badi cheez hai। to unko kitna yaad karte hain! abhi tumko yaad karna hai - ek parampita paramatma ko। yahi satya hai jabki aatmaon aur paramatma ka mela hota hai। gaayan bhi hai aatmaayen paramatma alag rahe bahukaal... ham baba se alag hue hain na। yaad aata hai kitna samay alag hue hain! baap jo kalpa-kalpa sunaate aaye hain, vahi aakar sunaate hain। ismen zara bhi pharka nahin ho sakta। second by second jo act chalti hai woh nai। ek second paas hota hai, minute paas hota hai, unko jaise chhodte jaate hain। paas hota jaata hai taaki kahenge - itne varsha, itne din, minute, itne second paas kar aaye hain। poora 5 hazaar varsha hoga phir ek number se shuru hoga। accurate hisaab hai na। minute second sab note karte hain। abhi tumse koi poochhe - isne kab janma liya tha? tum ginti kar bataate ho। shreekrishna ne pahle number mein janma liya hai। shiv ka to minute, second kuchh bhi nahin nikaal sakte ho। shreekrishna ki tithi-taareekh poora likha hua hai। manushyon ki ghadi mein pharka pad sakta hai - minute second ka। shivbaaba ke avatran mein to bilkul pharka nahin pad sakta। pata bhi nahin padta hai ki kab aaya! aise bhi nahin saakshaatkaar hua tab aaya। nahin, andaaz se kah dete hain। baaki aise nahin us samay pravesh hua। saakshaatkaar hua ki ham phalaana banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sukhdhaam mein chalne ke liye sukhdaai banna hai। sabke duhkh harkar sukh dena hai। kabhi bhi duhkhadaai kaanta nahin banna hai।

2) is vinaashi shareer mein aatma hi most valuable hai, vahi amar avinaashi hai isliye avinaashi cheez se pyaar rakhna hai। deh ka bhaan mita dena hai।

vardaan:- apne anaadi aadi svarup ki smriti se nirbandhan banne aur banaane vaale marjeeva bhav

jaise baap loan leta hai, bandhan mein nahin aata, aise aap marjeeva janma vaale bachche shareer ke, sanskaaron ke, svabhaav ke bandhanon se mukta bano, jab chaahen jaise chaahen vaise sanskaar apne bana lo। jaise baap nirbandhan hai aise nirbandhan bano। mool vatan ki sthiti mein sthit hokar phir neeche aao। apne anaadi aadi svarup ki smriti mein raho, avatrit hui aatma samajhkar karma karo to aur bhi aapko follow karenge।

slogan:- yaad ki vritti se vaayumandal ko powerful banaana - yahi mansa seva hai।

avyakt ishaare - is avyakti maas mein bandhanmukta rah jeevanmukta sthiti ka anubhav karo

jab tak kisi bhi prakaar ka lagaav hai, chaahe woh sankalp ke roop mein ho, chaahe sambandh ke roop mein, chaahe samparka ke roop mein, chaahe apni koi visheshta ki taraph ho। koi bhi lagaav bandhan-yukta kar dega। woh lagaav ashareeri banne nahin dega aur woh vishwa-kalyaankaari bhi bana nahin sakega isliye pahle svayan lagaav mukta bano tab vishwa ko mukti va jeevanmukti ka varsa dila sakenge।