Daily Murli for Wednesday 18 March 2026

18-03-2026 praatahmurli om shanti "baapdaada"' madhuban

“meethe-meethe serviceable bachche - aisa koi bhi kaam nahin karna jisse service mein koi bhi vighna pade''

prashn:- sangamayug par tum bachchon ko bilkul accurate banna hai, accurate kaun ban sakte hain?

uttar:- jo sachche baap ke saath sada sachche rehte hain, andar ek, baahar doosra - aisa na ho। 2- jo shivbaaba ke sivaae aur baaton mein nahin jaate hain। 3- har kadam shreemat par chalte hain, koi bhi gaphlat nahin karte, vahi accurate bante hain।

geet:- bachpan ke din bhula na dena…

om shanti। meethe-meethe roohaani bachchon ne geet ke do akshar sune yeh to nishchay karte ho - behad ka baap abhi behad sukh ka varsa de rahe hain। aise baap ke ham aakar bachche bane hain to baap ki shreemat par bhi chalna hai। nahin to kya hoga! abhi-abhi hansate ho, kehte ho ham mahaaraaja mahaaraani banenge aur agar haath chhod diya to phir jaakar saadhaaran praja banenge। svarga mein to zaroor aayenge। aise bhi nahin sab svarga mein aane vaale hain। jo satayug treta mein aane vaale honge, vahi aayenge। satayug aur treta donon ko milaakar svarga kaha jaata hai। phir bhi jo pahle-pahle nai duniya mein aate hain woh achha sukh paate hain baaki jo baad mein aane vaale hain woh koi aakar gyaan nahin lenge। gyaan lene vaale satayug treta mein aayenge। baaki aate hi hain raavan raajya mein। woh thoda sa sukh pa sakenge। satayug treta mein to bahut sukh hai na isliye purushaartha karke baap se behad sukh ka varsa paana chaahiye aur yeh mahaan khushkhabri likho - cards jo chhapvaate hain usmein bhi yeh likhna chaahiye - oonch te oonch behad ke baap ki khushkhabri। pradarshani mein tum dikhaate ho nai duniya kaise sthaapan hoti hai। to yeh clear aur bade aksharon mein likhna chaahiye। behad ka baap gyaan ka saagar, patit-paavan, sadgati daata geeta ka bhagwan shiv kaise brahmaakumaar kumaariyon dvaara phir se kaliyugi sampoorn vikaari, bhrashtaachaari patit duniya ko satayugi sampoorn nirvikaari paavan shreshthaachaari duniya bana rahe hain। woh khushkhabri aakar suno athva samjho। government se bhi tumhaari yeh pratigya hai ki ham bhaarat mein phir se satayugi shreshthaachaari 100 pratishat pavitrata sukh-shanti ka daivi svaraajya kaise sthaapan kar rahe hain aur is vikaari duniya ka vinaash kaise hoga so aakar samjho। aisa clear likhna chaahiye। card mein aise likho jo manushya achhi reeti samajh saken। yeh prajaapita brahmaakumaar kumaariyaan kalpa pahle misal drama plan anusaar parampita paramatma shiv ki shreemat par sahaj raajayog aur pavitrata ke bal se, apne tan-man-dhan se bhaarat ko aisa shreshthaachaari paavan kaise bana rahe hain, so aakar samjho। clear karke card mein chhapaana chaahiye, jo koi bhi samajh jaae। yeh bi.ke. shivbaaba ki mat par raamraajya sthaapan kar rahe hain, jo gaandhi ji ki chaahna thi। akhbaar mein bhi aisa full nimantran pad jaae। yeh zaroor samjhaana hai ki prajaapita brahmaakumaar kumaariyaan apne tan-man-dhan se yeh kar rahe hain। to manushya aisa kabhi na samjhen ki yeh koi bheekh va donation aadi maangate hain। duniya mein to sab donation par hi chalte hain। yahaan tum kehte ho ki ham bi.ke. apne tan-man-dhan se kar rahe hain। woh khud hi svaraajya lete hain to zaroor apna hi kharcha karenge। jo mehnat karte hain unko hi 21 janmon ke liye varsa milta hai। bhaaratvaasi hi 21 janmon ke liye shreshthaachaari double sirtaaj bante hain। yeh lakshmi-naaraayan double sirtaaj hain na। abhi to koi taaj nahin raha hai। to yeh achhi reeti samjhaana pade। baap samjhaate hain aise-aise likho to bichaaron ko maaloom pade ki bi.ke. kya kar rahe hain। badon ka aavaaj hoga to phir gareebon ka bhi sunenge। nahin to gareeb ki koi baat nahin sunte। saahookaar ka aavaaj jhat hota hai। tum siddha kar batlaate ho ham khaas bhaarat ko svarga banaate hain। baaki sabko shantidham mein bhej denge। samjhaana bhi aise hai। bhaarat 5 hajaar varsha pahle aisa svarga tha। abhi to kaliyug hai, woh satayug tha। ab bataao satayug mein kitne aadmi the। abhi kaliyug ka ant hai। yeh vahi mahaabhaarat mahaabhaari ladaai hai। aur koi samay to aisi ladaai lagi hi nahin hai। yeh bhi third vaar pichhaadi ko hui hai। try karte hain na। ab to atomic bombs banaate rehte hain। kiski bhi sunte nahin hain। woh kehte hain jo bombs banaaye hue hain woh sab samudra mein daal do to ham bhi nahin banaayen। tum rakho aur ham na banaayen yeh kaise ho sakta। parantu tum bachche jaante ho yeh to bhaavi bani hui hai। kitna bhi unhon ko mat den, samjhenge nahin। vinaash na ho to raajya kaise karenge। tum bachchon ko to nishchay hai na। sanshay buddhi jo hain woh bhaaganti ho jaate hain, traitor ban jaate hain। baap ka bankar phir traitor nahin banna hai। tumko to yaad karna hai shivbaaba ko aur baaton se kya phaayda। sachche baap ke saath sachcha banna hai। andar ek baahar mein doosri rakhenge to apna pad bhrashta kar denge। apna hi nuksaan karenge। kalpa-kalpaantar ke liye kabhi bhi oonch pad pa nahin sakenge isliye is samay bahut accurate banna hai। koi gaphlat nahin karni chaahiye। jitna ho sake shreemat par rehna hai। nirantar yaad to pichhaadi mein rahegi। sivaae ek baap ke aur koi ki yaad na rahe। gaaya hua bhi hai antakaal jo stri simre... jismen moh hoga to woh yaad aa padegi। aage chal jitna tum nazdeek aate jaayenge, saakshaatkaar hota jaayega। baba har ek ko dikhaayenge tumne aisa-aisa kaam kiya hai। shuru-shuru mein bhi tumne saakshaatkaar kiye hain। sazaayen jo bhogte the vo bahut hi chillaate the। baba kehte hain tumko dikhlaane ke liye inki sauguni sazaayen katva di।

tum bachchon ko abhi aisa kaam nahin karna hai jo baba ki service mein vighna pade। pichhaadi mein bhi sab tumko saakshaatkaar honge। aise-aise tumne baap ki service mein vighna bahut daal nuksaan kiya hai। aasuri sampradaay hain na। jinhonne vighna daale hain unko bahut saja milti hai। shivbaaba ki bahut badi darbaar hai। right-hand mein dharmaraaj bhi hai। woh hain had ki sajaayen। yahaan to 21 janma ka ghaata pad jaata hai, pad bhrashta ho jaata hai। har baat mein baap samjhaate rehte hain। to aise koi na kahe ki hamko pata nahin tha isliye baba sab saavdhaani dete rehte hain। dekhte hain har ek centre mein kitne bhaaganti hote hain। tang karte hain। vikaari ban jaate hain। school mein to poori reeti padhna chaahiye। nahin to kya pad paayenge। pad ka bahut pharka pad jaata hai। jaise yahaan duhkhadhaam mein koi president hai, koi saahookaar hai, koi gareeb hai vaise vahaan sukhdhaam mein bhi pad to nambarvaar honge। jo royal buddhivaan bachche honge, woh baap se poora varsa lene ki koshish karenge। maaya ki boxing hai na। maaya bahut prabal hai haar jeet hoti rehti hai। kitne aate hain phir traitor ban chale jaate hain। chalte-chalte fail ho jaate hain। bahut kehte hain yeh ho kaise sakta। yeh to kabhi nahin suna ki grihastha vyavhaar mein rehte pavitra rah sakte hain। are bhagvaanuvaach hai na - kaam mahaashatru hai। geeta mein bhi yeh akshar hai na। tum jaante ho satayug mein hain daiveegunon vaale manushya aur kaliyug mein hain aasuri avgunon vaale। aasuri gunon vaale daivi gun vaalon ki mahima gaate hain। kitna farka hai। abhi tum samajhte ho ham kya the, kya ban rahe hain। yahaan tumko sab gun dhaaran karne hain। khaan-paan aadi bhi satoguni khaana hai। dekhna hai devtaaon ko kya khilaate hain। shreenaath dvaare mein jaakar dekho - kitne maal athva shuddh bhojan banta hai। vahaan hain hi vaishnav। aur vahaan jagannaath puri mein dekho kya milta hai? chaaval। vahaan hai vaam maarga ke bahut gande chitra। jab raajaai thi to 36 prakaar ke bhojan milte the। to shreenaath dvaare mein bahut maal bante hain। puri aur shreenaath ka alag-alag hai। puri ke mandir mein bahut gande chitra hain, devtaaon ki dress mein। to bhog bhi vishesh chaaval ka lagta hai। usmein ghi bhi nahin daalte। yeh farka dikhaate hain। bhaarat kya tha phir kya ban gaya। abhi to dekho kya haalat hai। poora anna bhi nahin milta hai। unhon ke plan aur shivbaaba ke plan mein raat din ka farka hai। woh sab plan mitti mein mil jaayenge। natural calamities hogi। anaaj aadi kuchh nahin milega, barsaat kahaan dekho to bahut padti। kahaan bilkul padti nahin। kitna nuksaan kar deti hai। is samay tatva bhi tamopradhaan hain to barsaat bhi ulte sulte time par padti rehti hai। toofaan bhi tamopradhaan, soorya bhi tapat aisi karenge jo baat mat poochho। yeh natural calamities drama mein noondh hain। unhon ki hai vinaash kaale vipreet buddhi। tumhaari hai baap ke saath preet buddhi। agyaan kaal mein bhi sapoot bachchon par maa baap ka pyaar rehta hai isliye baba kehte bhi hain nambarvaar purushaartha anusaar yaadapyaar... jitna-jitna service karenge... khidmat to karni hai na। bhaarat ki khaas aur duniya ki aam, bhaarat ko svarga banaana hai। baaki sabko bhej dena hai shantidham। bhaarat ko svarga ka varsa milta hai, baaki sabko mukti ka varsa milta hai। sab chale jaayenge। haahaakaar ke baad jayjaykaar ho jaayega। kitna haahaakaar machega। yeh hai hi khoone naahek khel। natural calamities bhi aayengi। maut to sabka hona hi hai।

baap bachchon ko samjhaate hain poora purushaartha kar lo। baap ke saath sadaiv pharmaanbardaar, vaphaadaar banna hai। serviceable banna hai। jinhonne kalpa pahle jaisi seva ki hai, unka saakshaatkaar hota rahega। tum saakshi ho dekhte rahenge। tum abhi svadarshan chakradhaari bane ho। sadaiv buddhi mein svadarshan chakra phirta rehna chaahiye। hamne 84 janma aise-aise liye hain। abhi ham vaapis ghar jaate hain। baap bhi yaad rahe, ghar bhi yaad rahe, satayug bhi yaad rahe। saara din buddhi mein yahi chintan karna hai। abhi ham vishwa ka mahaaraajkumaar banenge। ham shri lakshmi va shri naaraayan banenge। nasha chadhna chaahiye na। baba ko nasha rehta hai। baba roz is (lakshmi-naaraayan ke) chitra ko dekhte hain, andar mein nasha rehta hai na। bas kal ham jaakar yeh shreekrishna banenge। phir svayanvar baad shreenaaraayan banenge। tattvam। tum bhi to banenge na। yeh hai hi raajayog। praja yog hai nahin। aatmaon ko phir se apna raajya bhaagya milta hai। bachchon ne raajya ganvaaya tha। ab phir raajya le rahe hain। baba yeh chitra aadi banaate hi isliye hain ki tum bachchon ko dekhkar khushi ho। 21 janma ke liye ham svarga ka raajya bhaagya pa rahe hain। kitna sahaj hai। yeh shivbaaba, yeh prajaapita brahma in dvaara yeh raajayog sikhlaate hain। phir ham yeh jaakar banenge। dekhne se hi khushi ka paara chadh jaata hai। ham baap ki yaad mein rahne se vishwa ka raajkumaar banenge। kitni khushi rahni chaahiye। ham bhi padh rahe hain, tum bhi padh rahe ho। is padhaai ke baad ham jaakar yeh banenge। saara madaar padhaai par hai। jitna padhenge utna kamaai hogi na। baba ne batlaaya hai koi surgeon to itne hoshiyaar hote hain jo laakh roopaya bhi ek case par kamaate hain। bairistarsa mein bhi aise hote hain। koi to bahut kamaate hain, koi ko dekho to kot bhi phata hua pada hoga। yeh bhi aise hai isliye baba baar-baar kehte hain bachche, koi bhi gaphlat nahin karo। sadaiv shreemat par chalo। shri shri shivbaaba se tum shreshtha bante ho। tum bachchon ne baap se anek baar varsa liya hai aur ganvaaya hai। 21 janmon ka varsa aadhaakalpa ke liye milta hai। aadhaakalpa 2500 varsha sukh paate ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) andar baahar sachcha rehna hai। padhaai mein kabhi bhi gaphlat nahin karna hai। kabhi bhi sanshay buddhi ban padhaai nahin chhodni hai। service mein vighna roop nahin banna hai।

2) sabko yahi khushkhabri sunaao ki ham pavitrata ke bal se, shreemat par apne tan-man-dhan ke sahayog se 21 janmon ke liye bhaarat ko shreshthaachaari double sirtaaj banaane ki seva kar rahe hain।

vardaan:- sada punya ka khaata jama karne aur karaane vaale master shikshak bhav

ham master shikshak hain, master kahne se baap svatah yaad aata hai। banaane vaale ki yaad aane se svayan nimitta hoon - yeh svatah smriti mein aa jaata hai। vishesh smriti rahe ki ham punya aatma hain, punya ka khaata jama karna aur karaana - yahi vishesh seva hai। punya aatma kabhi paap ka ek percent sankalp maatra bhi nahin kar sakti। master shikshak maana sada punya ka khaata jama karne aur karaane vaale, baap samaan।

slogan:- sangathan ke mahatva ke jaanne vaale sangathan mein hi svayan ki safety ka anubhav karte hain।

ye avyakt ishaare- “nishchay ke foundation ko majboot kar sada nirbhay aur nishchint raho"

jo jitna nishchaybuddhi hoga utna hi sabhi baaton mein vijayi hoga। nishchaybuddhi ki kabhi haar nahin hoti। haar hoti hai to samajhna chaahiye ki nishchay ki kami hai। nishchaybuddhi vijayi ratnon mein se ham ek ratna hain, aise apne ko samajhna hai। koi bhi vighna aae to unko paper samajh paas karna hai। baat ko nahin dekhna hai lekin paper samajh paas hona hai।