Daily Murli for Tuesday 21 April 2026

21-04-2026 praatahmurli om shanti "baapdaada"' madhuban

“meethe bachche - gyaan saagar baap aaye hain - tum bachchon ke sammukh gyaan dance karne, tum hoshiyaar serviceable bano to gyaan ki dance bhi achhi ho''

prashn:- sangamayug par tum bachche apne mein kaun-si hobby (aadat) daalte ho?

uttar:- yaad mein rahne ki। yahi hai roohaani hobby। is hobby ke saath-saath tumhein divya aur alaukik karma bhi karne hain। tum ho brahman, tumhein sabko sachchi-sachchi katha zaroor sunaani hai। service ki bhi tum bachchon mein hobby honi chaahiye।

geet:- dheeraj dhar manuva…

om shanti। jaise koi hospital mein beemaar hote hain to patient duhkh se chhootne ki aash rakhte hain। doctor se poochhte hain kya haal hai, kab yeh beemaari chhootegi? woh to sab hain had ki baaten। yeh hai behad ki baat। baap aakar bachchon ko raay dete hain। yeh to bachche jaan chuke hain ki barobar sukh aur duhkh ka khel hai। yoon to tum bachchon ko satayug mein jaane se bhi jaasti phaayda yahaan hai kyonki jaante ho ki is samay ham eeshvareey god mein hain, eeshvareey aulaad hain। is samay hamaari bahut oonch te oonch gupta mahima hai। manushya maatra baap ko shiv, eeshvar, bhagwan bhi kehte hain, parantu jaante nahin hain। bulaate rehte hain। drama anusaar hi aisa hua hai। gyaan aur agyaan, din aur raat। gaate bhi aate hain parantu tamopradhaan buddhi aise ban gaye hain jo apne ko tamopradhaan samajhte hi nahin hain। kiski takdeer mein baap ka varsa ho tab to buddhi mein baith sake। bachche jaante hain ki ham bilkul hi ghor andhiyaare mein the। ab baap aaya hai to kitna sojhra mila hai। baap jo knowledge samjhaate hain woh koi bhi ved, shaastra, granth aadi mein nahin hai। woh bhi baap siddha kar bataate hain। tum bachchon ko rachta aur rachna ke aadi-madhya-ant ki roshni deta hoon, woh phir praayahlop ho jaati hai। mere bigar phir kisko gyaan mil na sake, phir yeh gyaan praayahlop ho jaata hai। samajh mein aata hai ki kaliyug past hua phir 5 hajaar varsha baad repeat hoga। yeh hai nai baat। yeh to shaastron mein hai nahin।

baap to yeh knowledge sabhi ko ek jaisi padhaate hain, parantu dhaarna mein nambarvaar hain। koi achhe serviceable bachche aate hain to baba ka dance bhi aisa chalta hai। dancing girl ke aage dekhne vaale bahut shaukeen hote hain to woh bhi khushi se bahut achha dance karti hai। thode baithe honge to common reeti se thoda dance karegi। vaah-vaah karne vaale bahut honge to unka bhi ullaas badhega। to yahaan bhi aise hai। murli sab bachche sunte hain, lekin sammukh sunne ki baat aur hai na। yeh bhi dikhaate hain ki shreekrishna dance karta tha। dance koi woh nahin। vaastav mein hai gyaan ki dance। shivbaaba khud bataate hain ki main gyaan ki dance karne aata hoon, main gyaan ka saagar hoon। to achhi-achhi points nikalti hain। yeh hai gyaan ki murli। kaath ki murli nahin hai। patit-paavan baap aakar sahaj raajayog sikhaayenge ya lakdi ki murli bajaayenge? yeh kiske khyaal mein nahin hoga ki baap aakar aise raajayog sikhaate hain। abhi tum jaante ho baaki koi bhi manushya maatra ko yeh buddhi mein aa na sake। aane vaalon mein bhi nambarvaar pad paate hain। jaise kalpa pahle kiya hai vaise hi purushaartha karte rehte hain। tum jaante ho ki kalpa pahle muaaphik baap aate hain, aakar bachchon ko sab raaz kholkar bataate hain। kehte hain ki main bhi bandhan mein bandha hua hoon। har ek is drama ke bandhan mein bandha hua hai। jo kuchh satayug mein hua tha, vahi phir hoga। kitni anek prakaar ki yoniyaan hain। satayug mein itni yoniyaan thode hi hongi। vahaan to thodi variety hoti hai। phir vriddhi ko paate rehte hain। jaise dharma bhi badhte jaate hain na। satayug mein to the nahin। jo satayug mein the woh phir satayug mein hi dekhenge। satayug mein koi bhi chhi-chhi gand karne vaali cheez ho na sake। un devi-devtaaon ko kehte hi hain bhagwan-bhagavti। aur koi khanda mein kabhi bhi kisko god goddess kah nahin sakte। woh devtaayen zaroor heaven mein raajya karte the। unka dekho gaayan kitna hai।

tum bachchon ko abhi dheeraj aa gaya hai। tum jaante ho hamaara martaba kitna oonch hai va kam hai। ham itne marks se paas honge। har ek apne ko samajh to sakte hain na ki phalaana achhi service kar raha hai। haan, chalte-chalte toofaan bhi aa jaate hain। baap to kehte hain ki bachchon ko koi bhi grahchaari, toofaan aadi na aayen। maaya achhe-achhe bachchon ko bhi gira deti hai। to baap dheeraj dete rehte hain, baaki thoda samay hai। tumko service bhi karni hai। sthaapna ho gai phir to jaana hi hai। ismen ek second bhi aage-peechhe nahin ho sakta। yeh raaz bachche hi samajh sakte hain। ham drama ke actors hain, ismen hamaara mukhya part hai। bhaarat par hi haar aur jeet ka khel bana hua hai। bhaarat hi paavan tha। kitni pees, purity thi। yeh kal ki hi baat hai। kal hamne hi part bajaaya tha। 5 hajaar varsha ka part saara noondha hua hai। ham chakra lagaakar aaye hain। ab phir baba se yog lagaate hain, isse hi khaad nikalti hai। baap yaad aayega to varsa bhi zaroor yaad aayega। pahle-pahle alpha ko jaanna hai। baap kehte hain, tum mere ko jaanne se mere dvaara sab kuchh jaan jaayenge। gyaan to bada sahaj hai, ek second ka। phir bhi samjhaate rehte hain। points dete rehte hain। mukhya point hai manamnaabhav, ismen hi vighna padte hain। deh-abhimaan aa jaane se phir anek prakaar ke ghutke aa jaate hain, phir yog mein rahne nahin dete hain। jaise bhakti maarga mein shreekrishna ki yaad mein baithte hain to buddhi kahaan-kahaan bhaag jaati hai। bhakti ka anubhav to sabko hai। is janma ki baat hai। is janma ko jaanne se kuchh na kuchh past janma ko bhi samajh sakte hain। bachchon ko hobby ho gai hai - baap ko yaad karne ki। jitna yaad karte ho utna khushi badhti hai। saath-saath divya alaukik karma bhi karna hai। tum ho brahman। tum satya naaraayan ki katha, amraktha sunaate ho। mool baat ek hai - jismen sab kuchh aa jaata hai। yaad se hi vikarma vinaash hote hain। yeh ek hi hobby, roohaani hai। baap samjhaate hain ki knowledge to badi sahaj hai। kanyaaon ka naam bhi gaaya hua hai। adharkumaari, kunvaari kanya, kunvaari ka naam sabse jyaada baala hai। unko koi bandhan nahin hai। woh pati to vikaari bana dete। yeh baap to svarga mein le jaane ke liye shrringaarte hain। sweet saagar mein le jaate hain। baap kehte hain is puraani duniya ko, puraani deh sahit bilkul bhool jaao। aatma kehti hai ki hamne to 84 janma poore kiye hain। ab phir ham baap se poora varsa lenge। himmat rakhte hain, phir bhi maaya se ladaai to hai। aage to yeh baba hai। maaya ke toofaan jaasti inke paas aate hain। bahut aakar poochhte hain ki baba hamko yeh hota hai। baba bataate hain ki bachche - haan, yeh toofaan to zaroor aayenge। pahle to mere paas aate hain। ant mein sab karmaateet avastha ko pa lenge। yeh koi nai baat nahin hai। kalpa pahle bhi hua tha। drama mein part bajaaya, ab phir vaapas ghar jaate hain। bachche jaante hain - yeh puraani duniya narka hai। kehte bhi hain ki yeh lakshmi-naaraayan ksheersaagar mein rehte the, inhon ke mandir kitne achhe-achhe banaate hain। pahle-pahle mandir banaaya hoga to ksheer (doodh) ka hi talaab banaakar vishnu ki moorti ko bithaaya hoga। bahut achhe-achhe chitra banaakar pooja karte the। us samay to bahut hi sastaai thi। baba ka sab dekha hua hai। barobar yeh bhaarat kitna pavitra, ksheer ka saagar tha। doodh ghi ki jaise nadiyaan theen। yeh to mahima de di hai। svarga ka naam lete hi mukh paani hota hai। tum bachchon ko ab gyaan ka teesra netra mila hai। to buddhi mein samajh aai hai। buddhi chali jaati hai apne ghar, phir svarga mein aayenge। vahaan sab kuchh naya hi naya hoga। baba, shri naaraayan ki moorti dekh bahut khush hota tha, bahut pyaar se rakhta tha। yeh nahin samajhta tha ki ham hi yeh banoonga। yeh gyaan to ab baba se mila hai। tumko brahmaanda aur srishti chakra ke aadi-madhya-ant ka gyaan hai। jaante ho ki ham kaise chakra lagaayenge। baba hamko raajayog sikhla rahe hain। tum bachchon ko bahut khushi honi chaahiye। baaki thoda samay hai। shareer ko kuchh na kuchh to hota rehta hai। ab yeh tumhaara antim janma hai। ab tumhaare sukh ke din aate hain, drama plan anusaar। dekhte ho ki vinaash saamne khada hai। tumko teesra netra mila hai। mool vatan, sookshm vatan, sthoolavtan ko achhi reeti jaante ho। yeh svadarshan chakra tumhaari buddhi mein phirta rehta hai। khushi hoti hai। is samay hamko behad ka baap, teacher ban padhaate hain। parantu nai baat hone kaaran ghadi-ghadi bhool jaate hain। nahin to baba kahne se hi khushi ka paara chadh jaana chaahiye। raamteertha, shreekrishna ka bhakta tha। to shreekrishna ke darshan ke liye kitna karte the। usko saakshaatkaar hua aur khushi ho gai। parantu usse kya hua? mila to kuchh bhi nahin। yahaan to tum bachchon ko khushi bhi hai kyonki jaante ho ki 21 janma ke liye ham itna oonch pad paate hain। 3 hissa to tum sukhi rehte ho। agar aadha-aadha ho phir to phaayda hua nahin। tum 3 hissa sukh mein rehte ho। tumhaare jaisa sukh koi dekh na sake। tumhaare liye to sukh apaar hai। mahaan sukh mein to duhkh ka pata nahin chalta hai। sangam par tum donon ko jaan sakte ho ki abhi ham duhkh se sukh mein ja rahe hain। munh hai din taraph aur laat hai raat taraph। is duniya ko laat maarni hai arthaat buddhi se bhoolna hai। aatma jaanti hai ki ab vaapas ghar jaana hai, bahut part bajaaya। aise-aise apne saath baaten karni hoti hain। ab jitna baap ko yaad karenge utna hi kat niklegi। jitna baap ki service par rah samaan banaayenge, utna hi baap ka show karenge। buddhi mein hai ki ab ghar jaana hai। to ghar ko hi yaad karna chaahiye। puraana makaan girta rehta hai। ab kahaan naya makaan, kahaan puraana makaan। raat-din ka farka hai। yeh to hoobhu vishay-vaitarni nadi hai। ek do ko maarte, jhagadte rehte hain। baaki bhi baba aaya hai to bahut ladaai shuru ho gai hai। agar stri vikaar nahin deti to kitna tang karte hain। kitna maatha maarte hain। kalpa pahle bhi atyaachaar hue the। woh abhi ki baat gaai jaati hai। dekhte ho ki kitna pukaarti hai। vahi drama ka part baj raha hai। yeh baap jaane aur bachche jaane aur na jaane koi। aage chal sabko samajhne ka hai। gaate bhi hain - patit-paavan, sarva ka sadgati daata baap hai। tum koi ko bhi samjha sakte ho ki bhaarat svarga aur narka kaise banta hai aao to ham tumhein saare world ki history-geography samjhaayen। yeh behad ki history-geography eeshvar hi jaane aur eeshvar ke tum bachche jaano। pavitrata, sukh-shanti ki kaise sthaapna hoti hai, is history-geography ko jaanne se tum sab kuchh jaan jaayenge। behad ke baap se tum zaroor behad ka hi varsa lenge। yeh aakar samjho। topic bahut hain। tum bachchon ka to ab dimaag hi pur (bharpoor) ho gaya hai। khushi ka kitna paara chadhta hai। saari knowledge tum bachchon ke paas hai। knowledgeful baap se knowledge mil rahi hai। phir ham hi jaakar lakshmi-naaraayan banenge। vahaan phir yeh knowledge kuchh bhi nahin hogi। kitni guhya baaten samajhne ki hain। bachche seedhi ko achhi reeti samajh gaye hain na। to yeh chakra 84 ka hai। ab manushyon ko bhi clear kar samjhaana hai। isko ab svarga va paavan duniya thode hi kahenge। satayug alag hai, kaliyug alag cheez hai। yeh chakra kaise phirta hai, yeh samjhaane mein sahaj hai। samjhaani achhi lagti hai। parantu purushaartha kar yaad ki yaatra mein rahe, yeh bahuton se ho nahin sakta। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is puraani deh aur duniya ko buddhi se bhool baap aur ghar ko yaad karna hai। sada isi khushi mein rehna hai ki abhi hamaare sukh ke din aaye ki aaye।

2) knowledgeful baap se jo knowledge mili hai uska simran kar dimaag ko pur (bharpoor) rakhna hai। deh-abhimaan mein aakar kabhi bhi kisi prakaar ka ghutka nahin khaana hai।

vardaan:- sada ekras sthiti ke takhta par viraajmaan rahne vaale baapdaada ke diltakhta nasheen bhav

sabhi se shreshtha takhta baapdaada ke diltakhta nasheen banna hai। lekin is takhta par baithne ke liye achal, adol, ekras sthiti ka takhta chaahiye। agar is sthiti ke takhta par sthit nahin ho paate to baapdaada ke dil roopi takhta par sthiti nahin ho sakte। iske liye apne bhrikuti ke takhta par akaalmoorta ban sthit ho jaao, is takhta se baar-baar dagmag na ho to baapdaada ke dil takhta par viraajmaan ho sakenge।

slogan:- shubhchintan dvaara negative ko positive mein parivartan karo।

ye avyakt ishaare - mahaan banne ke liye madhurta aur namrata ka gun dhaaran karo

brahma baap apne har bachche ke chehre par, ek to sada roohaaniyat ki muskaraahat dekhna chaahte hain aur doosra - mukh se sada madhur bol sunna chaahte hain। ek shabd bhi madhurta ke bina nahin ho। chehre par roohaaniyat ho, mukh mein madhurta ho aur man-buddhi mein sada shubh bhaavna, merciful ki bhaavna, daataapan ki bhaavna ho। har kadam mein follow father ho, yahi paalna ka return do।