Daily Murli for Friday 17 July 2026

17-07-2026 praatahmurli om shanti "baapdaada"' madhuban

“meethe bachche - yeh bhaarat bhoomi niraakaar baap ki janma-bhoomi hai, yahaan hi baap aate hain tumhein raajayog sikhlaakar raajaai dene, tumhaari seva karne''

prashn:- shivbaaba apne har ek bachche se kaun si pratigya karaate hain?

uttar:- meethe bachche - pratigya karo ki baba ham koi bhi vikarma nahin karenge। 5 vikaaron ka ham daan dete hain। andar mein dar rehna chaahiye - agar ham daan dekar phir vaapis lenge to bahut paap ban jaayega, jiski kadi saza khaani padegi। harishchandra ki kahaani bhi isi par bani hui hai।

om shanti। yeh bachchon ki hai godly student life। bachche jaante hain ki ham unke paas aaye hain। vahi kalpa-kalpa bhaarat-vaasi bachchon ko aakar raajya bhaagya dete hain। bhaarat mein hi aate hain na। yeh bhaarat bhoomi hai। apni bhoomi par bahut pyaar regard hota hai। jaise koi vilaayat ka bada aadmi yahaan marta hai to unko vilaayat le jaate hain athva yahaan ka koi bada aadmi vilaayat mein marta hai to unko yahaan le aate hain। apni bhoomi ka maan rakhte hain। bhaarat ko kaha jaata hai bhagwan ki janma bhoomi। yeh bhi jaante ho jisko bhagwan athva allaah, paramatma kehte hain unke saamne abhi tum baithe ho। naam to zaroor chaahiye na। allaah kehte hain to bhi ling ki pooja karte hain। eeshvar athva khuda kehte hain to zaroor unki nishaani chaahiye na। ling ko sab taraph poojte hain। chitron mein bhi aajkal devtaaon ke aage parampita paramatma ka chitra ling dikhaate hain। woh hai sabse oonch, unko apna shareer nahin hai, isliye niraakaar kaha jaata hai। saakaar nahin hai। abhi tum bachche jaante ho ham unke saamne kalpa-kalpa haazir hote hain - shiksha lene ke liye। bhagvaanuvaach hai to zaroor raajayog sikhlaate honge। student ko raajayog sikhaaya tha aur woh raaja raani bane the। ladaai aadi ki to baat hai nahin। in lakshmi-naaraayan aadi ne ladaai se thode hi baadshaahi paai hai। bilkul nahin। duniya bilkul nahin jaanti ki inhonne satayug mein raajya kaise paaya। abhi tum bachche samajhte ho ham baap se raajya le rahe hain। ham unke sammukh baithe hain। vahi baba hai, shreekrishna nahin। shreekrishna to chhota bachcha hai, woh hai rachna। abhi barobar shreekrishna apna pad le rahe hain jo phir bhavishya mein shreekrishna kahlaayenge। yeh hai saari padhaai ki baat।

tum jaante ho baba hamko raajayog sikhlaate hain। jaise manushya, manushya ko barrister, engineer aadi banaate hain। hain to manushya na। tum samajhte ho ham bhi manushya hain, parantu ham patit hain। abhi baap paavan bhi banaate hain aur humein varsa bhi dete hain। paavan duniya to nai duniya hi hogi। nai duniya mein hai hi raajaai। abhi tum baap ke sammukh baithe ho। jaise laukik baap bachchon ko pyaar se baith samjhaate hain, yeh hai paarlaukik vichitra baap। jiske liye tum gaate aaye ho tvamev maataashcha pita… is samay tum jaante ho yeh apna part bajaate hain, jo bhakti maarga mein ham gaayan karte hain। tum kehte ho ham shivbaaba ke paas aaye hain। chitthi bhi likhte ho - shivbaaba care of brahma। koi ko tum post dikhaao to wonder khaayenge - shivbaaba care of brahma aisa to kabhi suna nahin hai। shivbaaba brahma mein aakar vishnupuri ki sthaapna kar rahe hain, saamne khade hain। oopar mein hai shivbaaba। shivbaaba ne brahma dvaara sthaapna ki thi, ab phir se kar rahe hain। yeh hai pravritti maarga। raajvidya mein bhi barrister padhaate hain to mel female donon padhte hain। female bhi judge, barrister, doctor aadi banti hain। yeh bhi pravritti maarga hai। sannyaasiyon ka hai nivritti maarga, woh alag hai। yeh bhi baba ne samjhaaya hai - shankaraachaarya agar nahin aata to pavitrata ka ansh nahin rehta। bhaarat bilkul hi jal marta। yeh noondh hai - bhaarat ko thamaane liye। bhaarat bahut pavitra tha phir apvitra bana hai। abhi bhaarat kitna kangaal hai। kehte hain sone ki lanka samudra ke neeche chali gai। ab lanka to sone ki ho nahin sakti। yeh sab kahaaniyaan baith likhi hain jisse phaayda kuchh bhi nahin।

tum bachche jaante ho barobar baba hamko bilkul sahaj yaad ke bal se kitna oonch banaate hain। baap pratigya karte hain, agar nirantar yaad karne ka purushaartha karenge to vikarma vinaash ho jaayenge। bhakti maarga mein bhi yaad karne ka purushaartha kiya hai na। kyon yaad karte hain? ki hamko saakshaatkaar ho। aise nahin yaad karte ki krishnapuri mein hamko baadshaahi mil jaaye va ham nar se naaraayan ban jaayen, nahin। tumko bhi yeh aash nahin thi ki ham manushya se devta banen। gaate bhi hain manushya se devta kiye... tum dekhte ho barobar kaliyug ke baad satayug aayega। kaliyug mein itne manushya hain। satayug mein ek dharma hoga। abhi tumko aatma aur paramatma ka bhi gyaan mila hai, duniya mein ek bhi manushya nahin jisko aatma ka gyaan ho। aatma mein 84 janmon ka part kaise noondha hua hai, yeh koi jaante nahin। yeh akshar bhi kabhi koi se nahin sune hain। baap to hai gyaan ka saagar, patit-paavan, niraakaar। tum jaante ho hamaari aatma ab paap aatma se punya aatma ban rahi hai। satayug mein to hain sab punya aatmaayen। yahaan hain paap aatmaayen। aise nahin ki bahut daan-punya karne vaalon ko punya aatma kaha jaata hai। nahin। punya aatma hote hi hain satayug mein। yahaan jo manushya daan punya karte hain, unko punya aatma samajhte hain। vahaan tumko daan punya aadi karne ki darkaar nahin rehti। vahaan gareeb koi hota hi nahin। tum vahaan sadaiv ke liye punya aatma ho hi। tum tan-man-dhan sab behad ke baap arth dete ho, jisko balihaar jaana kaha jaata hai। baap kehte hain pahle main balihaar jaata hoon va tum? baba kehte hain - pahle tum balihaar jaate ho tab phir 21 janmon ke liye balihaari milegi। yeh baaten abhi tum achhi reeti samajhte ho, direct sunte ho। ghar mein rehte ho to vahaan murli aati hai। door se sunte ho। abhi to baap ke sammukh baithe ho। baap kehte hain - bachchon, main tumhaara baap bhi hoon। yahaan andhashraddha ki koi baat nahin। baap bhi hai, teacher bhi hai। baap ka banne se woh shiksha dete hain, tumhaari buddhi mein ab saara gyaan hai। 84 ka chakra bhi tumko samjhaaya jaata hai। jo 84 janma lene vaale nahin honge woh samjhenge nahin। tum samajhte ho barobar ham 84 ka chakra lagaakar ab vaapis jaate hain। baap kehte hain - tum aatma ashareeri aai thi phir ashareeri hokar vaapis jaana hai। tum pavitra aatmaayen hokar jaati ho। pavitra banne ke liye tum purushaartha kar rahe ho। yogbal arthaat yaadbal se tum pavitra ban jaayenge। yog akshar shaastron ka hai। right akshar hai yaad। stri ko pati ki athva purush ko patni ki yaad rehti hai na। yog ka arth hi hai yaad। baap bhi kehte hain - maamekam yaad karo aur sang buddhiyog tod mujh apne baap ke saath buddhi yog jodo। yaad karo। jitna yaad karenge utna tumhaare vikarma vinaash honge। barobar bhaarat ko kalpa-kalpa varsa milta hai। shiv jayanti bhi mashhoor hai। jaise buddha, Christ aadi ki jayanti hai vaise niraakaar shiv ki jayanti hai। woh oonch te oonch ho gaya। krishna jayanti bhi mashhoor hai। parantu woh kya aakar karte hain, yeh kisko bhi pata nahin hain। shreekrishna satayug ka prince tha। zaroor unko koi ne aisa karma sikhaaya hoga, jo satayug ka prince bana hai। chhota bachcha to pavitra hi hai। vahaan vikaar ki baat nahin hoti। bachcha shuddh rehta hai। bhagwan to ek hi niraakaar hai, god is one। baaki saari hai rachna। rachna se kabhi rachna ko varsa nahin mil sakta hai। varsa baap se milega। bhaai ko bhaai se varsa nahin mil sakta। tum sab bhaai-bhaai ho। brotherhood kehte hain na। baap to ek hi hai, varsa baap se milega। sarva bhaaeeyon ka sadgati daata ek baap hai। sabhi aatmaon ko baap se varsa mil raha hai। baap kehte hain - main aatmaon ko aakar padhaata hoon, aatmaon ko sadgati deta hoon। baap baith raajayog sikhlaate hain। is padhaai ka pad tumko yahaan nahin paana hai। woh barrister aadi is janma mein bante hain, phir doosra janma lekar phir se padhenge।

tum jaante ho is padhaai se ham 21 janma ke liye praalabdha paate hain। vahaan satayug mein doctor aadi koi hote nahin। vahaan beemaari hi nahin hoti। vahaan tum garbha mahal mein rehte ho। yahaan garbhajel mein rehte ho jahaan bahut sajaayen milti hain, tab pukaarte hain is jel se baahar nikaalo, ham phir koi bhool nahin karenge। dharmaraaj se pratigya karte hain। yahaan tumko shivbaaba se pratigya karni hai। baba ham kabhi vikarma nahin karenge। 5 vikaar ham aapko de dete hain। yeh bhi baap jaante hain ki vikaar koi aise phat se nahin chhootenge। andar dar rehna chaahiye, ham vikaaron ka daan dekar phir lenge to bada paap ho jaayega। jaise raaja harishchandra ka misaal hai। baap jaante hain aise nahin ki 5 vikaar jhat se chhoot jaate hain। nahin, time lagta hai। tumhaari karmaateet avastha hogi tab ladaai lagegi। yeh 5 vikaar hain bade dushman। usmein bhi mukhya ek hai deh-abhimaan। uska daan dena kitna mushkil hai। ghadi-ghadi baap kehte hain - apne ko aatma samajh mujh baap ko yaad karo। parantu yeh hota nahin hai। deh-abhimaani banne se phir kaam ki chot lagti hai। deh-abhimaan sabse teekha hai। dehi-abhimaani banne ki mehnat hai। mukhya deh-abhimaan aane se hi paap hue hain। 5 vikaar daan mein dena pade, ismen samay lagta hai। saajan bigar sajniyaan to ja na saken। pahle saazan ko jaana hai phir sajniyaan। saazan ko aakar sab aatmaon ko le jaana hai। jab tak karmaateet avastha ho tab tak purushaartha karna hai। deh-abhimaan aane se hi phir bhoolen hoti hain। kehte hain baba deh-abhimaan mein aakar vikaar mein gire। toofaan to bahut aayenge। vikaar ka sankalp aaye parantu karmendriyon se kabhi koi paap nahin karna। maaya ko jeetne ke liye kitni mehnat karni padti hai। baap kehte hain - agar shaadi ki hui hai to pavitra rahkar dikhaao to sannyaasi bhi dekhenge। tumko aamadni dekho kitni bhaari hai। pavitra rah dikhaaya to bahut oonch pad paayenge। tum par to sab kurbaan jaayenge। baba bhi mahima karte hain। bhal pavitra bhi rahe parantu phir yog bhi chaahiye। yog mein hi ghadi-ghadi vighna padte hain। deh-abhimaan aa jaata hai। pavitra rehte hain so to theek, pavitrata se hi pavitra duniya mein varsa paayenge। parantu phir maaya bhi jor rakhegi, maaya bahut vaar karti hai। baap samjhaate hain yeh sab hoga। bahaaduri dikhlaate hain parantu saath-saath nirantar yaad bhi rahe tab hi vikarma vinaash honge। roostam jo bante hain unko maaya bhi bahut sataati hai। yaad mein mushkil rah sakte hain। jo rah sakte hain unse anubhav poochhna chaahiye। kya samajhte hain, kaise rehte hain। yaad mein rahne se vikarma vinaash honge। yeh baat hi bilkul nyaari nai hai। yahaan baithe ho to nasha chadha hua hai। yeh bhi samajhte hain bhagwan ek hi niraakaar hai, na ki shreekrishna। vaastav mein shreekrishna ke liye shaastron mein baaten likh di hain - okhli se baandha, yeh kiya... woh koi baaten hain nahin। yeh bhi unki glaani karte hain, insult karte hain। shreekrishna mein to koi bhi avgun nahin tha। chanchalta karna yeh bhi ek avgun hai na। shreekrishna to bilkul hi maryaada purushottam hai। unki mahima gaate hain - sarvagun sampanna... gaaya jaata hai guru brahma, guru vishnu... bolo guru to hamaara hai nahin। ham inko na to guru, na eeshvar maante hain। patit-paavan to ek hi niraakaar hai na। saakaar guru koi patit-paavan ho na sake। is samay tum parampita paramatma ki saari jeevan kahaani ko jaante ho। 5 hajaar varsha mein shivbaaba ka kya part bajta hai - yeh tum jaante ho, baap dvaara। knowledgeful to baap hai na। sukh-shanti, aanand ka saagar.... yeh mahima unki hai। baap ke paas khajaana hai to zaroor bachchon ko bhi dete honge na। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) karmaateet avastha ko praapta karne ke liye in karmendriyon se koi bhi bhool nahin karni hai। pavitra rahne ke saath-saath yaad mein bhi majboot hona hai।

2) sada punya aatma banne ke liye tan-man-dhan se baap par balihaar jaana hai। ek baar balihaar jaane se 21 janma ke liye punya aatma ban jaayenge।

vardaan:- sahjayog ko nature aur natural banaane vaale har subject mein perfect bhav

jaise baap ke bachche ho - ismen koi percentage nahin hai, aise nirantar sahajyogi va yogi banne ki stage mein ab percentage khatma honi chaahiye। natural aur nature ho jaani chaahiye। jaise koi ki vishesh nature hoti hai, us nature ke vash na chaahte bhi chalte rehte hain। aise yeh bhi nature ban jaae। kya karoon, kaise yog lagaaoon - yeh baaten khatma ho jaaen to har subject mein perfect ban jaayenge। perfect arthaat effect aur defect se pare।

slogan:- sahan karna hai to khushi se karo, mazboori se nahin।

ye avyakt ishaare - jvaalaasvaroop sthiti mein rah shaktishaali yaad ka anubhav karo

powerful yog arthaat lagan ki agni, jvaala roop ki yaad hi bhrashtaachaar, atyaachaar ki agni ko samaapta karegi aur sarva aatmaon ko sahayog degi, isse hi behad ki vairaagya vritti prajvalit hogi। yaad ki agni ek taraph us agni ko samaapta karegi doosri taraph aatmaon ko parmaatma sandesh ki, sheetal swaroop ki anubhooti karoygi, isse hi aatmaayen paapon ki aag se mukta ho sakengi।