Daily Murli for Monday 24 August 2026

24-08-2026 praatahmurli om shanti "baapdaada"' madhuban

“meethe bachche - sukh dene vaale baap ko bahut-bahut pyaar se yaad karo, yaad bigar pyaar nahin ho sakta''

prashn:- baap bachchon ko roz-roz yaad ka abhyaas karne ka ishaara kyon dete hain?

uttar:- kyonki yaad se hi aatma paavan banegi। yaad se hi poora varsa le sakenge। aatma ke sab bandhan khalaas ho jaayenge। vikarmon se mukta ho jaayenge। sajaaon se chhoot jaayenge। jitna yaad karenge utna khushi rahegi। manzil sameep anubhav hogi। kabhi bhi thakenge nahin। behad ka sukh paayenge isliye yaad ka abhyaas zaroor karna hai।

geet:- bachpan ke din bhula na dena…

om shanti। meethe-meethe roohaani bachchon ne geet ki line ka arth samjha। abhi jeete ji tum behad ke baap ke bane ho। saara kalpa to had ke baap ke bane ho। satayug mein bhi had ke baap ke bante ho। abhi sirf tum brahman bachche behad ke baap ke bane ho। tum jaante ho behad ke baap se ham behad ka varsa le rahe hain। agar baap ko chhoda to behad ka varsa mil nahin sakega। bhal tum samjhaate ho parantu thode mein to koi raazi nahin hota। manushya dhan bahut chaahte hain। dhan ke sivaay sukh nahin ho sakta। dhan bhi chaahiye, shanti bhi chaahiye, nirogi kaaya bhi chaahiye। tum bachche hi jaante ho duniya mein aaj kya hai, kal kya hona hai। vinaash to saamne khada hai aur koi ki buddhi mein yeh baaten nahin hain। agar samjhen bhi vinaash saamne khada hai to kya karna hai, yeh nahin jaante। tum bachche samajhte ho, aise maaloom hota hai - kab bhi ladaai lag jaae, thodi chingaari lage to bhambhat mach jaae। deri nahin lagegi। aage bhi thodi si baat se kitni badi ladaai lag gai। bachche jaante hain ki puraani duniya khatma hui ki hui isliye ab jaldi hi baap se varsa lena hai। baap ko sadaiv yaad karte rahenge to bahut harshit rahenge। deh-abhimaan mein aane se hi woh khushi gaayab ho jaati hai। dehi-abhimaani bante ho to baap ko yaad karte ho। deh-abhimaan mein aane se baap ko bhool duhkh uthaate ho। jitna baap ko yaad karenge, utna behad ke baap se sukh uthaayenge। yahaan tum aaye hi ho aisa lakshmi-naaraayan banne। raaja-raani aur praja ka naukar-chaakar, bahut farka hai na। abhi ka purushaartha phir kalpa-kalpaantar ke liye kaayam ho jaata hai। pichhaadi mein sabko saakshaatkaar hoga - hamne kitna purushaartha kiya hai। ab bhi baap kehte hain apni avastha ko dekhte raho। meethe te meethe baba, jisse svarga ka varsa milta hai, unko ham kitna yaad karte hain। tumhaara saara madaar hai hi yaad par। jitna yaad karenge utna khushi bhi rahegi। samjhenge bas ab najdeek aakar pahunche hain। koi thak bhi jaate hain, pata nahin manzil kitna door hai, pahunche to mehnat bhi saphal ho। duniya ko yeh bhi pata nahin ki bhagwan kisko kaha jaata hai। kehte bhi hain he bhagwan phir kah dete thikkar bhittar mein hai। abhi tum bachche samajhte ho ham baap ke ban chuke hain। ab baap ki hi mat par chalna hai। bhal vilaayat mein ho vahaan rehte bhi sirf baap ko yaad karna hai। tumko shreemat to mili hai। aatma tamopradhaan se satopradhaan sivaae baap ki yaad ke ho nahin sakti। tum kehte ho - baba ham aapse poora varsa lenge। jaise hamaara baba varsa lete hain, ham bhi purushaartha kar unki gaddi par zaroor baithenge। mama baba raaj-raajeshvar, raaj-raajeshvari bante hain, to ham bhi banenge। imtahaan to sabke liye ek hi hai। tumko bahut thoda sikhaaya jaata hai, sirf baap ko yaad karo। isko kaha jaata hai sahaj raajayog bal। tum samajhte ho yog se bahut bal milta hai। ham koi vikarma karenge to saja bahut khaayenge, pad bhrashta ho padega। yaad mein hi maaya vighna daalti hai।

tum jaante ho ham paavan duniya mein ja rahe hain। jo brahman banenge vahi nimitta banenge। brahma mukh vanshaavli brahman banne bigar tum baap se varsa le nahin sakte। baap bachchon ko rachte hi hain varsa dene ke liye। shivbaaba ke to ham hain hi। woh nai srishti rachte hain bachchon ko varsa dene liye। shareerdhaari ko hi varsa denge। aatmaayen to oopar mein rehti hain। vahaan to varse va praalabdha ki baat nahin। tum abhi purushaartha kar praalabdha le rahe ho, jo duniya ko pata nahin hai। ab samay najdeek aata jaata hai। itla karte rehte hain phalaana agar aise karega to ham ekdam unko uda denge। udaane ki taiyaari ho rahi hai। bombs aadi koi rakhne nahin hain। taiyaariyaan bahut ho rahi hain। British government ke samay paakistaan, hindustaan tha kya? likha hua hai yavnon ki ladaai। paandav aur kaurvon ki ladaai hai nahin। yavan barobar lad rahe hain। bombs bhi taiyaar ho gaye hain। abhi baap hamko pharmaan karte hain ki mujhe yaad karo, nahin to pichhaadi mein bahut rona padega। imtihaan mein naapaas hote hain to jaakar doob marte hain gusse mein। yahaan gusse ki to baat nahin। pichhaadi mein tumko bahut saakshaatkaar honge। kya-kya ham banenge - woh bhi pata pad jaayega। baap ka kaam hai purushaartha karaana। kehte hain bachche karma karte hue yaad karna bhool jaate ho va phursat nahin milti hai to achha baitho। yaad mein baithkar baap ko yaad karo। aapas mein tum milte ho to bhi yeh koshish karo ki ham baba ko yaad karen। milkar baithne se tum yaad achha karenge, madad milegi। mool baat hai baap ko yaad karna। yahaan aao va na aao। koi vilaayat jaate hain phir aa to sakenge nahin। vahaan bhi sirf ek baat yaad rakho। baap ki yaad se hi tum tamopradhaan se satopradhaan banenge। baap kehte hain sirf ek baat yaad rakho - baap ko yaad karo। baap kehte hain - manamnaabhav। mujhe yaad karo to vishwa ka maalik banenge। mool baat ho jaati hai yaad ki। kahaan bhi jaane aadi ki baat nahin। ghar mein raho sirf baap ko yaad karte raho। pavitra nahin banenge to yaad kar nahin sakenge। aise thode hi hai ki sab aakar class mein padhenge। mantra liya phir bhal kahaan bhi chale jaao। satopradhaan banne ka raasta baap ne batlaaya hai। yoon to centre par aane se nai-nai point sunte rahenge। agar kisi kaaran se nahin aa sakte hain, barsaat padti hai athva karaphyu lagta hai, koi baahar nahin nikal sakte phir kya karenge। baap kehte hain harja nahin hai। kahaan bhi rehte tum yaad mein raho। chalte-phirte yaad karo। auron ko yahi kaho ki baap ko yaad karne se vikarma vinaash honge aur devta ban jaayenge। akshar hi do hain।

baap kehte hain - yeh bachpan bhool na jaana। aaj hansate ho kal rona padega - agar baap ko bhulaaya to। baap se varsa poora lena chaahiye। aise bahut hain kehte hain svarga mein to jaayenge na phir jo takdeer mein hoga। unko koi purushaartha karna nahin kahenge। manushya purushaartha karte hi hain oonch martaba paane ke liye। ab jabki baap ke paas oonch martaba milta hai to gaphlat kyon karni chaahiye। school mein jo nahin padhenge to padhe-likhe ke aage bhari dhoni padegi। baap ko poora yaad nahin karenge to praja ke bhi naukar chaakar jaae banenge। ismen khush thode hi hona chaahiye। to baap samjhaate hain - meethe-meethe bachchon sammukh refresh hokar jaate ho। kai baandheliyaan hain, harja nahin, ghar baithe baap ko yaad karti raho। tumko kitna sahaj samjhaate hain, maut saamne khada hai, achaanak hi ladaai shuru ho jaayegi। ek-do ko kehte hain thoda bhi gadbad kiya to ham aisa karenge। pahle se hi kah dete hain, bombs ki magroori bahut hai। baap kehte hain - bachche ajun yogbal mein hoshiyaar hue nahin hain, aisa na ho ladaai lag jaae। parantu drama anusaar aisa hoga hi nahin। bachchon ne poora varsa liya nahin hai isliye nishchay hota hai, yeh ladaai karke lagegi bhi, to bhi banda ho jaayegi kyonki abhi raajdhaani sthaapan nahin hui hai। time chaahiye। purushaartha karaate rehte hain, pata nahin kisi bhi samay kuchh bhi ho sakta hai। bas gir padti hai, aeroplane, train gir padti, maut kitna sahaj khada hai। dharti bhi hilti rehti hai। sabse jaasti kaam earthquake ko karna hai। lekin vinaash hone ke pahle baap se poora varsa lena hai isliye bahut prem se baap ko yaad karna hai। baba aapke bigar hamaara doosra koi nahin। sirf baap ko hi yaad karte raho। kitna sahaj reeti jaise chhote-chhote bachchon ko samjhaate hain aur koi takleeph nahin deta hoon, sirf yaad karo। aur kaam chita par baith jo tum jal mare ho, so ab gyaan chita par baith pavitra bano। tumse poochhte hain aapka uddeshya kya hai? bolo, jo sabka baap hai woh kehte hain maamekam yaad karo to tumhaare vikarma vinaash honge aur tum tamopradhaan se satopradhaan ban jaayenge। sarva ka sadgati daata ek baap hai। ab baap kehte hain - sirf mujhe yaad karo to kat utar jaayegi। yeh itna paigaam to de sakte ho na। khud yaad karenge tab doosre ko yaad kara sakenge। doosre ko roochi se kahenge। nahin to dil se nahin niklega। baap kehte hain - kahaan bhi ho jitna ho sake sirf yaad karo। bhal thodi khaan-paan ki takleeph aadi hoti hai। rehna to ghar mein hi hai। ghar mein rehte baap ko yaad karo, jo mile unko yahi shiksha do - maut saamne khada hai।

baap kehte hain - tum sab tamopradhaan patit ban pade ho, ab mujhe yaad karo aur pavitra bano। aatma hi patit bani hai, satayug mein hoti hai paavan aatma। baap ki yaad se hi aatma paavan banegi aur koi upaay nahin hai। yeh paigaam sabko dete jaao to bhi bahuton ka kalyaan karenge aur koi takleeph nahin dete hain। purushottam maas mein bhi jaakar samjhaao ki sabse purushottam kaun? satayug aadi mein yeh lakshmi-naaraayan purushottam the। inhon ko aisa purushottam banaane vaala arthaat svarga ki sthaapna karne vaala baap hai। sab aatmaon ko paavan banaane vaala patit-paavan baap hi hai। sabse uttam se uttam purush banaane vaala hai baap। jo poojya the vahi phir pujaari bane hain। raavan raajya mein ham pujaari bane hain, raamraajya mein poojya the। abhi raavan raajya ka ant hai। ham pujaari se phir poojya bante hain। baap ko yaad karne ka auron ko bhi raasta bataana hai। budhiyon ko bhi yeh service karni chaahiye। mitra-sambandhiyon ko bhi baap ka parichay do। bolo, shivbaaba kehte hain maamekam yaad karo to tum svarga ke maalik banenge। niraakaar shivbaaba sarva ka sadgati daata baba, sab aatmaon ko kehte hain mujhe yaad karo to satopradhaan ban jaayenge। yeh samjhaana to sahaj hai na। budhiya bhi yeh service kar sakti hain। mool baat hai hi yeh। shaadi muraadi kahaan bhi jaao, kaan mein yeh baat sunaao। geeta ka bhagwan kehte hain mujhe yaad karo, is baat ko sab pasanda karenge। jaasti bolne ki darkaar nahin hai। sirf baap ka paigaam dena hai ki baap kehte hain mujhe yaad karo।

achha - aise samjho, bhagwan prerna karte hain। svapna mein saakshaatkaar hota hai, aavaaj sunne mein aata hai - baap kehte hain mujhe yaad karo to satopradhaan ban jaayenge। tum khud bhi sirf yahi chintan karte raho to beda paar ho jaayega। ham practical mein behad ke baap ke bane hain aur baap se 21 janmon ka varsa le rahe hain, to khushi rahni chaahiye na। baap ko bhoolne se hi takleeph hoti hai। baap kitna sahaj batlaate hain - mujhe yaad karo to sab samjhenge inhon ko raasta to barobar right mila hai। yeh raasta kab koi bata na sake। samay aisa hoga jo tum ghar se baahar nahin nikal sakenge। baap ko yaad karte-karte shareer chhod denge। antakaal jo shivbaaba simre... phir naaraayan yoni bal-bal utre। lakshmi-naaraayan dynasty mein aayenge। ghadi-ghadi raajaai pad paayenge। bas sirf baap ko yaad karo pyaar se। yaad bigar pyaar kaise karenge। sukh milta hai tab yaad kiya jaata hai। duhkh dene vaale ko pyaar nahin kiya jaata। baap kehte hain - main tumko svarga ka maalik banaata hoon isliye mujhe pyaar karo। baap ki mat par chalna chaahiye na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai mein kabhi gaphlat nahin karni hai, ladaai ke pahle baap se poora-poora varsa lena hai।

2) shreemat par baap ko bade pyaar se yaad karna hai।

vardaan:- sankalp, vritti aur smriti se vyartha ko samaapta karne vaale sachche brahman sampoorn pavitra bhav

apne sankalp, vritti aur smriti ko check karo - aise nahin kuchh galat ho gaya, pashchaataap kar liya, maaphi maang li, chhutti ho gai। kitna bhi koi maaphi le lekin jo paap va vyartha karma hua uska nishaan nahin mitta। register saaph svachchha nahin hota। sirf is reeti-rasam ko nahin apnaao, lekin smriti rahe ki main sampoorn pavitra brahman hoon। apvitrata - sankalp, vritti va smriti ko bhi touch nahin kar sakti। iske liye kadam-kadam par saavdhaan raho।

slogan:- baap ke saath ko use karo to kabhi dilshikasta nahin honge।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

pavitrata ka rahasya practical mein laana arthaat sankalp roop se bhi paanchon vikaaron par vijayi banna। vyartha sankalp krodh bhi paida karta hai to kaam arthaat kisi aatma ke prati agar vyartha drishti bhi jaati hai to us samay pavitrata nahin maani jaayegi। to yeh vyartha sankalp baap ke pyaar ke peechhe nyochhaavar karo।