Daily Murli for Tuesday 25 August 2026

25-08-26 praatahmurli om shanti ''avyakt-baapdaada'' madhuban

“meethe bachche - baap aur varse ko yaad karne mein tumhaari kamaai bhi hai to tandaroosti bhi hai, tum amar ban jaate ho''

prashn:- hriday ko shuddh banaane ki sahaj yukti kaun si hai?

uttar:- kahaan bhi raho trustee hokar raho। hamesha samjho ham shivbaaba ke bhandaare se khaate hain। shivbaaba ke bhandaare ka bhojan khaane vaalon ka hriday shuddh hota jaata hai। pravritti mein rehte agar shreemat pramaan direction par trustee bankar rehte to woh bhi shivbaaba ka bhandaara hai, man se surrender hain।

om shanti। janma-janmaantar aadhaakalpa bachchon ne satsang kiye hain, saadhu-santa, pandit aadi sab manushyon ka satsang hota hai, yeh koi bhi manushya ka satsang nahin। isko kaha jaata hai roohaani satsang। supreme rooh roohon ke saath roohrihaan arthaat satsang karte hain। yahaan tum koi manushya se nahin sunte ho, na devtaaon se sunte ho। tum sunte ho bhagwan se। bhagwan ko hamesha niraakaar kaha jaata hai aur bhagwan aate hi tab hain jab bachchon ko bhagwan-bhagavti banaane ke liye padhaana hai। bhagwan aur bhagavti ka pad sivaae bhagwan ke koi de na sake। tum bachche jaante ho kalpa-kalpa sangamayug hota hai to niraakaar bhagwan aakar hamko gyaan dete hain। yeh bhi sirf tum hi samajhte ho, doosra koi mushkil samajh sake। shivbaaba aate hain zaroor, parantu unke badle shreekrishna ko geeta ka bhagwan kah diya hai। to zaroor sabki buddhi mein manushya tan hi aata hoga। tum hi daiveegun vaale the aur ab aasuri gun vaale bane ho। phir ab daiveegun vaale bante ho। daiveegun vaalon ko eeshvareey sampradaay, aasuri gun vaalon ko aasuri sampradaay kaha jaata hai। ab niraakaar baap niraakaar sampradaay arthaat aatmaon ko padhaate hain, isliye kaha jaata hai eeshvareey sampradaay athva roohaani sampradaay, jinhen roohaani baap aakar padhaate hain। abhi tum rooh-abhimaani bante ho। ham aatma hain, baap hamko padhaate hain। kehte hain mujhe yaad karo to tumhaare vikarma vinaash honge। roohon ko hi padhaate hain, vahi knowledgeful hai aur rishi-muni aadi to sab neti-neti kehte gaye arthaat ham rooh ko nahin jaante hain। jab tak woh gyaan saagar sammukh na aaye to gyaan kaise samjhaaye। yeh achhi reeti samajhne ki baaten hain। hamko koi manushya nahin padhaate hain, hamko baap padhaate hain। woh hai behad ka baap niraakaar। yeh bhi bachchon ko samjhaaya hai, saakaar aur niraakaar do baap har ek ko hote hain। ek roohaani aur doosra jismaani। roohaani baap hi aakar roohon ko paavan banaate hain। tum jaante ho ham paavan the, patit bane phir patit se paavan kaise bante hain। chitra bhi saamne hain, baba raay dete hain ki ghadi-ghadi chakra ke saamne jaakar baitho to buddhi mein saara gyaan aa jaayega ki ham abhi sangamayug par baithe hain aur sabhi apne ko kaliyug mein samajhte hain। kaliyug ko ghor andhiyaara kaha jaata hai। abhi tum ho sangam par। abhi tumko roshni hai, satayug mein phir tumko yeh gyaan nahin milta hai। baap jab aate hain tab hi ghor sojhra hota hai। yeh sangamayug hai hi kalyaankaari yug। in jaisa yug koi hota hi nahin, jabki baap aate hain। satayug ko kalyaankaari nahin kahenge, vahaan kiska kalyaan nahin hota hai। kalyaan sangam par hi hota hai। satayug mein to hai hi kalyaan। sangam par kaliyug ko satayug, kalyaankaari banaate hain। to ab tumhaara dekho kitna kalyaan hota hai, sirf baap aur varse ko yaad karne mein kitni tumhaari kamaai hai। kamaai ki kamaai bhi hai aur tandaroosti ki tandaroosti bhi hai। tumhaara jeevan amar banta hai। tumhaari kabhi akaale mrityu nahin hoti hai। to bachchon ko kitni khushi rahni chaahiye kyonki tumhaari buddhi mein saari knowledge hai। yahaan tum bachche aate ho to purushaartha kar museum mein chitron par samjhaane ke laayak banna chaahiye। apne ko laayak banaane ke liye 7-8 roz baithkar seekho। practice hui, jhat bhaaga service par। service karke phir laut aaye। yeh seekhna to bahut sahaj hain। chitra ko saamne dekhne se hi buddhi mein aa jaata hai ki ham sangam par baithe hain। aaj ki duniya mein bahut manushya hain, kal bahut thode honge। itne yeh sab vaapas jaane hain। abhi baap svayan aaye hain, bachchon ki kitni ijjat rakhte hain। doordesh ka rahne vaala aaya desh paraaye… raavan ka desh paraaya desh hai na। raam ke desh mein to kabhi raavan aa na sake।

abhi tum bachchon ki paravrish to baap ke haath mein hai। bas tumheen se khaaoon arthaat tumhaare hi bhandaare se khaaoon... tumhaari saari paravrish yahaan hi hoti hai। jo surrender ho jaate hain unki paravrish to hoti hi hai lekin jo man se bhi samajhte hain ki yeh sab kuchh eeshvar ka (baap ka) hai, main trustee hoon, ham shreemat par hi chalkar kharcha aadi karte hain। aise jo samajhte hain woh bhi shivbaaba ke bhandaare se khaate hain। shivbaaba ke bhandaare se khaane se hriday shuddh hota hai। aise nahin ki woh shivbaaba ke bhandaare se nahin khaate hain। baap ke direction par chalne vaale bhi jaise ki baap ke bhandaare se khaate hain। jis bhandaare se khaaya, woh bhandaara bhar-poor kaal kantak door... uske baad tum kabhi bhi akaale mrityu ko nahin paayenge। is samay hi shivbaaba aate hain, unki mahima bhi gaai hui hai। shiv jayanti bhi manaate hain parantu unka bhandaara kaise hota, yeh koi bhi nahin jaante hain। baba bhi barobar aate hain na। bachche jo bhi aate hain unko shivbaaba ke bhandaare se khaana milta hai। achha mel surrender hota hai to theek hai, agar woh surrender nahin hota to maataayen kya karen? kyonki kamaai hai pati ki। woh to surrender hota nahin। woh to jab aamadni kare tab stri khaaye। haan, joda surrender hai to phir shivbaaba ke bhandaare se paravrish ho sakti hai। yeh baap bachchon ko achhi reeti samjhaate hain। buddhi mein rakhna hai ham baap ke paas baithe hain jab tak karmaateet avastha ho jaae। din-pratidin ham apne svaraajya ke najdeek aate jaate hain। samay beetta jaata hai, tum najdeek aate jaate ho। satayug ke pahle varsha mein ab kitne varsha kahenge? ab kitna najdeek aa gaye hain? baap kehte hain bachche ab tumhaara 84 ka chakra poora hota hai। tumne ab 84 janmon ke chakra ko jaana hai। chakra ko dekhne se hi kahenge ham abhi sangam par hain। is taraph hai kaliyug, us taraph hai satayug। kal ham apne sukhdhaam mein honge। duniya ko pata nahin hai, woh to bilkul hi ghor andhiyaare mein hain। tum bachchon ko bahut khushi honi chaahiye। behad ke baap se ham 21 janma ki kamaai karte hain। sada sukh ka varsa pa rahe hain - yeh khushi rehti hai। svargavaasi banna, yeh tumhaari hi takdeer mein hai। svarga ek wonderful cheez hai। jaise 7 wonders dikhaate hain na। yeh to sabse bada wonder hai। chitra bhi hain wonderful svarga ke। yeh lakshmi-naaraayan svarga ke maalik the isliye baba ne likha tha - oopar mein sooryavanshi ka likho uske neeche chandravanshi ka likho to aadhaakalpa poora ho jaayega। sooryavanshi, chandravanshi 1250 varsha। to phir laakhon varsha ki to baat hi ud jaaye। vahaan baahubal mein kitna kharcha hota hai। yahaan shuru se lekar ant tak kuchh bhi kharcha nahin hota hai। yeh to baap aur bachchon ka hisaab hai, kharche ki baat hi nahin। yahaan bachche aakar refresh hon isliye makaan aadi banaate hain। bachchon ka hi paisa hai so bhi kitne din to paas ho gaye। baaki thode din hain, kharcha kuchh bhi nahin। tum jeevanmukti paate ho, bigar kaudi kharche। ismen sirf mehnat ki baat hai। bhagwan ko to sab bhakta yaad karte hain parantu yeh nahin jaante ki bhagwan kaun hai? bhagwan ko na jaanne ke kaaran bahuton ko bhagwan maan lete hain। ab tum bachchon ko sachche baap ka parichay dena hai।

tum bachchon ko athaah khushi rahni chaahiye - behad ka baba hamko padhaate hain, svarga ka maalik banaane ke liye। baba aakar svarga ki sthaapna aur narka ka vinaash karaate hain isliye mahaabhaarat ladaai bhi saath mein hai। har 5 hajaar varsha baad yeh chakra phirta hai। baap bhi kalpa-kalpa, kalpa ke sangamayuge aate hain। geeta mein unhonne phir yuge-yuge likh diya hai so bhi 5 yug hai, paanch baar aaye। phir 24 avtaar, phalaana avtaar kyon likh diya hai! manushya kitne yagya, tap, teertha aadi karte hain, samajhte hain yeh sab raaste bhagwan se milne ke hain। parantu bhagwan ke paas to koi bhi ja nahin sakte hain। aadhaakalpa kitna maatha maara hai। janma-janmaantar phere lagaaye, yeh kiya... phir bhi baap nahin mila। abhi baap tum bachchon ke kitna najdeek hai। tumse baat kar rahe hain, tumko samjha rahe hain। tum samajhte ho kalpa-kalpa hoobhu ham aise milte hain jo kuchh beeta, kalpa-kalpa hoga। vahi daada jauhri hoga। phir usmein hi baba pravesh karenge, phir vahi bachche aakar baap ke banenge aur phir se svarga ka varsa lenge। yeh baap ka tum bachchon ke saath anaadi avinaashi part kalpa-kalpa aise hi repeat hota rehta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh kalyaankaari sangamayug hai, ismen har baat mein kalyaan hai, kamaai hi kamaai hai। baap aur varse ko yaad kar 21 janma ke liye jeevan ko amar banaana hai।

2) pravritti mein rehte man-buddhi se surrender hona hai। shreemat par kharcha karna hai, poora trustee hokar rehna hai।

vardaan:- sahayog ki shakti se, ashayogiyon ko sahayogi banaane vaale baap samaan paropkaari bhav

sahayogiyon ke saath sahayogi banna - yeh koi mahaaveerta nahin hai lekin jaise baap apkaariyon par upkaar karte hain aise aap bachche bhi baap samaan bano। koi kitna bhi ashayogi bane, aap apne sahayog ki shakti se ashayogi ko sahayogi bana do, aise nahin socho ki is kaaran se yeh aage nahin badhta hai। kamjor ko kamjor samajhkar chhod na do lekin use bal dekar balvaan banaao। is baat par attention do to service ke plans roopi jevron par heere chamak jaayenge arthaat sahaj pratyakshata ho jaayegi।

slogan:- krodh ka kaaran hai svaartha va eershya - yahi chidchidepan ki jad hai, pahle ise hi samaapta karo।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

pavitrata foundation hai aur foundation ka brahmacharya vrat dhaaran karna ye common baat hai lekin abhi aage badhe ho to bachpan ki stage nahin hai, abhi to vaanaprastha sthiti mein jaana hai। main brahmachaari to rehta hoon, pavitrata to hai hi, sirf ismen khush nahin ho jaao। mool foundation apne sankalp ko shuddh banaao, gyaan swaroop banaao, shakti swaroop banaao।

sampoornata ko praapta karne ke liye daadi prakaashamni ji ka gupta purushaartha

(19 ven punya smriti divas nimitta vishesh dhaarnaayen)

1- daadi ji ne sab javaabdaariyaan sambhaalte hue lakshya rakha ki mujhe sarvagun sampanna, sarva kalaaon mein sampanna, nirvikaarita mein bhi sampanna.. ban sampoornata ki manzil ko praapta karna hi hai।

2- daadi ji ne man vachan karma se double ahinsak ban, sabko sukh diya aur sukh liya। mansa se bhi kisi aatma ko na duhkh diya aur na duhkh liya।

3- daadi ji sada ek baap ki hi aakarshan mein rahi, unhein kisi bhi puraani vastu, vyakti va tatvon ne apni taraph aakarshit nahin kiya। sada ek baap ki yaad mein rah apni sookshm vrittiyon ko bhi ekaagra kiya।

4- sada saaksheepan ki stage mein rah, sada saathi ke saath ka anubhav kiya। unki drishti, vritti mein roohaaniyat aur alaukikta thi। unke sanskaaron mein itni royalty thi jo unki aankh kisi mein bhi nahin doobi।

5- unhonne kisi ka avgun chit par nahin rakha। kisi ke avgun note nahin kiye। sada parchintan, pardarshan aur parmat se mukta rah sva-chintan mein rahi।

6- daadi ji brahma baba ke samaan sada nirmaan rahi। niraakaari aur niranhakaari sthiti mein rahne ka abhyaas kiya। sada svayan ko sevaadhaari samjha। kabhi apni mahima sveekaar nahin ki। kisi ne ninda ki to ghabraai nahin aur mahima mein khush nahin hui। har baat mein apni sthiti samaan rakhi।

7- baapdaada se mili hui divya buddhi ki saugaat ko sambhaal kar rakha। sada samartha sankalp kiye। har karma shreemat pramaan ho, usmein jara bhi manmat va parmat mix na ho, divya buddhi ke aadhaar par har sankalp bol aur karma ho yahi lakshya rakh sampoornata ko praapta kiya।

8- sada ek bal ek bharosa, ek se hi sarva sambandh, kisi taraph bhi jhukaav lagaav nahin। sadaiv bhaai-bhaai ki vritti se sabko dekha aur merciful ke gun ko dhaaran kar kamjor aatmaon mein bal bhara। apkaariyon par bhi upkaar kiya।

9- har chhoti badi paristhiti ko nothing new ki smriti se paar kiya। koi bhi drishya ko dekh kyon, kya ke prashnon mein ulajhne ke bajaae sada saakshi bhaav ko dhaaran kar, sada harshit rahi।

10- unke har bol mein royalty dikhaai deti thi। koi bhi bol saadhaaran nahin bola। unke mukh se vahi bol nikle jo hone vaale hain। aisi siddhi swaroop aatma ke sankalp bhi siddha hone kaaran sahaj hi sampoornata ko praapta kar liya।

11- daadi ji sada aatma vishvaas se bharpoor hone kaaran isi smriti mein rahi ki ham to kalpa-kalpa ki vijayi aatma hain। koi bhi puraane sanskaar-svabhaav va hisaab-kitaab ke adheen nahin rahi। aise anubhav kiya jaise aatma light ke shareer mein nivaas kar rahi hai।

12- daadi ji ki buddhi svachchha saaph aaine ki tarah thi। ve nirantar tapasveemoorta hokar rahi। sada yahi smriti rahi ki is tapasya se hi vishwa ka kalyaan hoga, sukhmay sansaar aayega।

13- daadi ji ne antim samay ko saamne dekhte hue sada sva-chintan kiya। sva-unnati ke liye roz amritvele baba se meethi meethi roohrihaan ki, baba ke mahaavaakyon ka gahraai se adhyayan kiya। baba ke saath baba ki murli se atoot pyaar raha।

14- daadi ji ne apni sampoorn sthiti banaane ke liye dehbhaan se pare rahne ka abhyaas kiya। unki buddhi mein sada yahi raha ki ham vishwa kalyaan ke nimitta hain, humein sva ki sthiti oonchi, ekaagra, ekras athva sankalpon se pare nirsankalpa banaani hai, tab ham is puraani duniya se udkar baba ke paas vatan mein jaakar baithenge।

15- sada isi lagan mein rahi ki mujhe baba ki yaadon mein rah, sabko santushta karke sabhi ki duaayen leni hai। koi bhi aatma kabhi mere se disturb hokar baddua na den, iska poora-poora dhyaan rakh sabke duaaon ki paatra bani।

16- sada ek hi lakshya saamne raha ki mujhe sampanna pharishta va karmaateet banna hai। yeh puraana tan chhod pharishta ban avyakt-vatan vaasi banna hai। yeh sevaayen to dinraat chalti rahengi। mujhe seva ke saath-saath svayan par sookshm attention rakh paas with honour banna hai।

17- daadi ji sada sarva vighnon se paar nirvighna avastha mein rahi। ekaanta mein baith apne aapko sookshm check karke, apni kami kamjoriyon ko, aatma roopi heere ke daag ko sampoorn samaapta kar, amoolya heera ban gai।

18- svayan ko sampoorn paavan, light might se sampanna banaane ke liye aantarik vairaagya vritti dvaara sab baaton se upraam rah apni sookshm drishti vritti ko sampoorn paavan banaaya। puraane sanskaaron ki prakriti ko paraajay kar prakritijeet ban baba ki god mein sama gai।

19- main baba ki hoon, mujhe baba ke samaan sampoorn banna hi hai, isliye sookshm deh abhimaan ko, svayan ke sanskaaron ko, maan-shaan va mahima ko, buddhi va aadton ko sampoorn samarpan kiya aur baap samaan ban avyaktavtan vaasi ban gai। achha - om shanti।