Daily Murli for Saturday 10 October 2026

10-10-2026 praatahmurli om shanti "baapdaada"' madhuban

“meethe bachche, mansa-vaacha-karmana kisi ko bhi duhkh nahin dena, kabhi kisi par gussa nahin karna, pyaar bahut meethi cheez hai, isse kisi ko bhi vash kar sakte ho''

prashn:- baap bachchon ko double sirtaaj vishwa ka maalik banne va di best banne ki kaun si yukti bataate hain?

uttar:- daiveegun dhaaran kar bahut-bahut meetha bano। ek do ko bhaai-bhaai athva bhaai behen ki drishti se dekho। apne purushaartha se apne ko raajtilak do। 2- svayan eeshvar baap tumhein padha rahe hain to padhaai mein regular bano, jitna padhenge padhaayenge, apne manners sudhaarenge utna di best banenge।

om shanti। meethe-meethe sikeeldhe bachche jaante hain ki abhi ham narka ka kinaara chhod aage ja rahe hain, yeh purushottam sangamayug bilkul alag hai beech ka। beech ke dariya (saagar) mein tumhaari boat (naav) hai। tum na satayugi ho, na kaliyugi ho। tum ho purushottam sangamayugi sarvottam brahman। sangamayug hota hi hai braahmanon ka। brahman hain choti। yeh braahmanon ka bahut chhota yug hai। yeh ek hi janma ka yug hota hai। yeh hai tumhaare khushi ka yug। khushi kis baat ki hai? bhagwan hamko padhaate hain। aise student ko kitni khushi hogi! tumko ab saare chakra ka gyaan buddhi mein hai। abhi ham so brahman hain phir ham so devta banenge। pahle apne ghar sweet home mein jaayenge phir nai duniya mein aayenge। ham brahman hi svadarshan chakradhaari hain। ham hi yeh baajoli khelte hain। is viraat roop ko bhi tum brahman bachche hi jaante ho - buddhi mein saara din yeh baaten simran honi chaahiye।

tumhaara yeh bahut-bahut lovely parivaar hai, tum har ek ko bahut-bahut lovely hona chaahiye। baap bhi meetha hai to bachchon ko bhi aisa meetha banaate hain। kabhi kisi par gussa nahin karna chaahiye। mansa, vaacha, karmana kisko duhkh nahin dena hai। baap kabhi kisko duhkh nahin dete, jitna baap ko yaad karenge utna meethe bante rahenge। bas, is yaad se hi beda paar hai - yeh hai yaad ki yaatra। yaad karte-karte via shantidham, sukhdhaam jaana hai। baap aaye hi hain bachchon ko sada sukhi banaane। bhooton ko bhagaane ki yukti baap batlaate hain mujhe yaad karo to yeh bhoot nikalte jaayenge। koi mein bhoot ho to yahaan hi mere paas chhodkar jaao। tum kehte bhi ho baba aakar hamaare bhooton ko nikaal patit se paavan banaao। to baap kitna gul-gul banaate hain। baap aur daada donon milkar tum bachchon ka shrringaar karte hain। woh hain had ke baap, yeh hai behad ka baap। to bachchon ko bahut pyaar se chalna aur chalaana hai। sab vikaaron ka daan dena chaahiye, de daan to chhoote grahan, ismen koi bahaane aadi ki baat nahin hai। pyaar se tum kisko bhi vash kar sakte ho। pyaar se samjhaani do, pyaar bahut meethi cheez hai। sher ko, haathi ko… jaanavron ko bhi manushya pyaar se vash kar lete hain। woh to phir bhi aasuri manushya hain, tum to ab devta ban rahe ho। to daiveegun dhaaran kar bahut-bahut meetha banna hai। ek do ko bhaai-bhaai athva bhaai-behen ki drishti se dekho। aatma, aatma ko kabhi duhkh nahin de sakti।

baap kehte hain meethe bachche, main tumko svarga ka raajyabhaag dene aaya hoon। ab tumko jo chaahiye so ham se lo। ham to vishwa ka maalik double sirtaaj tumko banaane aaye hain parantu mehnat tumko karni hai, main kisi par taaj nahin rakhoonga, tumko apne purushaartha se hi apne ko raajtilak dena hai। baap purushaartha ki yukti bataate hain ki aise-aise vishwa ka maalik double sirtaaj apne ko bana sakte ho। padhaai par poora dhyaan do, kabhi bhi padhaai ko na chhodo। koi bhi kaaran se roothkar padhaai ko chhod diya to bahut-bahut ghaata pad jaayega। ghaate aur phaayde ko dekhte raho। tum eeshvareey university ke student ho, eeshvar baap se padh rahe ho। padhkar poojya devta ban rahe ho। to student bhi aisa regular banna chaahiye, student life is di best। jitna padhenge padhaayenge aur manners sudhaarenge utna di best banenge।

meethe bachche ab tumhaari return journey hai, jaise satayug se treta, dvaapar, kaliyug tak neeche utarte aaye ho vaise ab tumko iron ej se oopar golden ez tak jaana hai। jab silver ej tak pahunchenge to phir in karmendriyon ki chanchalta khatma ho jaayegi isliye jitna baap ko yaad karenge utna tum aatmaon se rajo tamo ki kat nikalti jaayegi aur jitna kat nikalti jaayegi utna baap chumbak ki taraph kashish badhti jaayegi। kashish nahin hoti hai to zaroor kat lagi hui hai, kat ekdam nikal pure sona ban jaae, woh hai antim karmaateet avastha।

mool baat meethe bachchon ko baap samjhaate hain dehi-abhimaani bano। deh sahit deh ke sabhi sambandhon ko bhool maamekam yaad karo, paavan bhi zaroor banna hai। kumaari jab pavitra hai to sab unko maatha tekte hain, shaadi karne se phir pujaari ban padti hai। sabke aage maatha jhukaana padta hai। kanya pahle piyar ghar mein hoti hai to itne jaasti sambandh yaad nahin aate। shaadi ke baad deh ke sambandh bhi badhte jaate phir pati bachchon mein moh badhta jaata। saasu-sasur aadi sab yaad aate rahenge। pahle to sirf maa-baap mein hi moh hota hai। yahaan to phir un sab sambandhon ko bhulaana padta hai kyonki yeh ek hi tumhaara sachcha-sachcha maat-pita hai na। yeh hai eeshvareey sambandh। gaate bhi hain tvamev maata cha pita tvamev.. yeh maat pita to tumko vishwa ka maalik banaate hain isliye baap kehte hain mujh behad ke baap ko nirantar yaad karo aur koi bhi dehdhaari se mamatva na rakho। yeh behad ka baap jo tumko svarga mein le jaate hain, aise meethe baap ko bahut pyaar se yaad karte aur svadarshan chakra phiraate raho। isi yaad ke bal se hi tumhaari aatma kanchan ban svarga ki maalik ban jaayegi। svarga ka naam sunkar hi dil khush ho jaati hai। jo nirantar yaad karte aur auron ko bhi yaad karaate rahenge vahi oonch pad paayenge। yeh purushaartha karte-karte ant mein tumhaari woh avastha jam jaayegi। yeh to duniya bhi puraani hai, deh bhi puraani hai, deh sahit deh ke sab sambandh bhi puraane hain, un sabse buddhiyog hataae ek baap sang jodna hai, jo antakaal bhi us ek baap ki hi yaad rahe aur koi ka sambandh yaad hoga to phir ant mein bhi woh yaad aa jaayega aur pad bhrashta ho jaayega। antakaal jo behad baap ki yaad mein rahenge vahi nar se naaraayan banenge। baap ki yaad hai to phir shivaalay door nahin।

meethe-meethe sikeeldhe bachche behad ke baap paas aate hi hain refresh hone liye kyonki bachche jaante hain behad ke baap se behad vishwa ki baadshaahi milti hai, yeh kab bhoolna nahin chaahiye। woh sadaiv yaad rahe to bhi bachchon ko apaar khushi rahe। yeh badge chalte-phirte ghadi-ghadi dekhte raho, ekdam hriday se laga do। oho! bhagwan ki shreemat se ham yeh ban rahe hain। bas badge ko dekh unko pyaar karte raho। baba, baba karte raho to sadaiv smriti rahegi। ham baap dvaara yeh bante hain।

meethe bachchon ki badi vishaal buddhi honi chaahiye। saara din service ke hi khyaalaat chalte rahen। baba ko to woh bachche chaahiye jo service bigar rah na saken। tum bachchon ko saare vishwa par gheraav daalna hai arthaat patit duniya ko paavan banaana hai। saare vishwa ko duhkhadhaam se sukhdhaam banaana hai। teacher ko bhi padhaane mein maza aata hai na। tum to ab bahut oonch teacher bane ho। jitna achha teacher, woh bahuton ko aapasmaan banaayenge। kabhi thakenge nahin। eeshvareey service mein bahut khushi rehti hai। baap ki madad milti hai। yeh bada behad ka vyaapaar bhi hai, vyaapaari log hi dhanvaan bante hain। woh is gyaan maarga mein bhi jaasti uchhalte hain। baap bhi behad ka vyaapaari hai na। sauda bada first class hai parantu ismen bada saahas dhaaran karna padta hai। naye-naye bachche puraanon se bhi purushaartha mein aage ja sakte hain। har ek ki individual takdeer hai to purushaartha bhi har ek ko individual karna hai, apni poori checking karni chaahiye। aisi checking karne vaale ekdam raat din purushaartha mein lag jaayenge, kahenge ham apna time vesta kyon karen। jitna ho sake time safe karen। apne se pakka pran kar dete hain, ham baap ko kabhi nahin bhoolenge, scholarship lekar hi chhodenge। aise bachchon ko phir madad bhi milti hai। aise bhi naye-naye purushaarthi bachche tum dekhenge, saakshaatkaar karte rahenge। jaise shuru mein hua vahi phir pichhaadi mein dekhenge, jitna nazdeek hote jaayenge utna khushi mein naachte rahenge। udhar khoone naahek khel bhi chalta rahega।

tum bachchon ki eeshvareey race chal rahi hai, jitna aage daudte jaayenge utna nai duniya ke nazaare bhi nazdeek aate jaayenge। khushi badhti jaayegi, jinko nazaare najdeek nahin dikhaai padte unko khushi bhi nahin hogi। abhi to kaliyugi duniya se vairaagya aur satayugi nai duniya se bahut pyaar hona chaahiye। shivbaaba yaad rahega to svarga ka varsa bhi yaad rahega। svarga ka varsa yaad rahega to shivbaaba bhi yaad rahega। tum bachche jaante ho abhi ham svarga taraph ja rahe hain, paanv narka taraph hain - sir svarga taraph hai। abhi to chhote-bade sabki vaanaprastha avastha hai। baba ko sadaiv yeh nasha rehta hai oho! ham jaakar yeh baal krishna banoonga, jiske liye in advance saugaaten bhi bhejte rehte hain। jinhon ko poora nishchay hai vahi gopikaayen saugaaten bhejti hain, unhein ateendriy sukh ki bhaasna aati hai। ham hi amarlok mein devta banenge। kalpa pahle bhi ham hi bane the phir hamne 84 punarjanma liye hain। yeh baajoli yaad rahe to bhi aho saubhaagya - sadaiv athaah khushi mein raho। badi lottery mil rahi hai। 5000 varsha pahle bhi hamne raajyabhaagya paaya tha phir kal paayenge, drama mein noondh hai। jaise kalpa pahle janma liya tha vaise hi lenge, vahi hamaare maa-baap honge। jo shreekrishna ka baap tha vahi phir banega। aise-aise jo saara din vichaar karte rahenge to vo bahut ramneekta mein rahenge। vichaar saagar manthan nahin karte to goya unhealthy hain। achha!

meethe-meethe sikeeldhe bachchon prati maat pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) eeshvareey service mein kabhi thakna nahin hai, achha teacher ban aap samaan banaane ki seva karni hai।

2) yaad ke bal se aatma ko kanchan banaana hai, koi bhi dehdhaari mein mamatva nahin rakhna hai।

vardaan:- silence ki shakti dvaara second mein har samasya ka hal karne vaale ekaantavaasi bhav

jab koi bhi nai va shaktishaali invention karte hain to underground karte hain। yahaan ekaantavaasi banna hi underground hai। jo bhi samay mile, kaarobaar karte bhi, sunte-sunaate, direction dete bhi is deh ki duniya aur deh ke bhaan se pare silence mein chale jaao। is abhyaas va anubhav karne karaane ki stage har samasya ka hal kar degi। isse ek second mein kisi ko bhi shanti va shakti ki anubhooti kara denge। jo bhi saamne aayega woh isi stage mein saakshaatkaar ka anubhav karega।

slogan:- vyartha sankalp va vikalpa se kinaara kar aatmik sthiti mein rehna hi yogayukta banna hai।

ye avyakt ishaare - paropkaar ki bhaavna se sampanna ban apkaari par bhi upkaar karo

brahma baap ne bachchon ko maalik banaaya aur svayan ko sevaadhaari ke roop mein rakha। maalik-pan ka maan bhi diya, shaan bhi diya, naam bhi diya। kabhi apna naam nahin kiya - mere bachche। to jaise baap ne naam, maan, shaan sabka tyaag kiya, paropkaar kiya, svayan ka sukh bachchon ke sukh mein samjha। bachchon ki vismriti ke kaaran duhkh ka anubhav so apna duhkh samjha। aise follow father kar paropkaar ki bhaavna se sampanna bano tab vishwa kalyaan ka kaarya sampanna hoga।