Daily Murli for Sunday 11 October 2026

11-10-26 praatahmurli om shanti ''avyakt-baapdaada'' revise 18-01-12 madhuban

sevaaon ke saath-saath ek do ke sahayogi ban vaayumandal mein teevra purushaartha ki lahar phailaao, manjeet ban aatmaon ki mansa seva karo

aaj vishesh sneh ka din hai। chaaron or ke bachche sneh swaroop se milan mana rahe hain। aap sabhi bhi sneh swaroop mein magan hain। aaj amritvele se chaaron taraph ke bachche amritvele se bhi pahle sneh roop se dil ke sneh ke motiyon ki maalaayen lekar pahunch gaye the। anek prakaar ke bhinna-bhinna man ke bhaavon ko baap ke aage varnan kar rahe the। aap jaante ho ki bachchon ka sneh kitna pyaara hai। bhinna-bhinna bhaashaayen, bhinna-bhinna bhaav se baapdaada ke aage apne dil ki baat bol bhi rahe the aur naynon se, mukh se apne bhaav bhi spashta kar rahe the। baapdaada chaaron or ke bachchon ke sneh ke bhaav dekh sabhi ke sneh mein sama gaye aur dil se yahi bol nikle vaah bachche vaah! aur bachchon ke mukh se vaah baba vaah! ke geet sunaai de rahe the। baapdaada har bachche ko dekh bachchon ke lav mein leen the aur bachche baap ke lav mein leen the।

aaj ka din baap bachchon ko baalak so maalik banaane ki drishti se dekh rahe the। aaj ka din bachchon ke raaj tilak ka din hai। aaj ke din baapdaada svayan pharishte roop mein rahkar bachchon ko vishwa seva arth nimitta banaaya। svayan backbone banen, bachchon ko vishwa ki stage par pratyaksha kiya aur baapdaada abhi bachchon ki seva ko dekh, jo jimmevaari di uski result ko dekh bachchon par bahut-bahut khush hai aur dil se mubaarak de rahe hain। mubaarak ho, mubaarak ho।

baapdaada ne dekha abhi bhi baap dvaara diye hue vishwa sevaadhaari ke vardaan pramaan har bachche ne ati sneh aur dil se seva ki hai aur kar bhi rahe hain। result bhi baapdaada ne dekhi, har ek bachche ke dil mein lagan hai mera baba aur baap ke dil mein sneh hai vaah mere bachche। vartamaan samay majority chhote bade centres nivaasi bachchon mein umang hai ki abhi jaldi se jaldi chaaron or baap ko pratyaksha karna hi hai। yeh umang, yeh utsaah baapdaada ne chakra lagaake dekha, chhote bade sevaakendra ke bachchon ko seva ka umang bahut-bahut-bahut achha hai aur aage bhi achha rahega। to baapdaada aaj sneh ke din chaaron or ke chaahe desh, chaahe videsh sabhi bachchon ko apne drishti se, dil se sneh aur seva ka return dil ka sneh yaadapyaar padamguna de rahe hain।

abhi samay anusaar jo umang hai ki baap ko pratyaksha karna hai, woh dheere-dheere aatmaon ke dil mein bhi aane laga hai। samajhte hain ki brahmaakumaariyon ne kuchh paaya hai, parivartan ho raha hai। pahle jo samajhte the pata nahin kya karte hain, abhi yahaan tak aaye hain ki achha kaarya kar rahe hain। jo ham nahin kar sakte woh inhonne apne sangathan mein saphalta paai hai isliye aaj baapdaada saamne baithe hue bachchon ko va chaaron or jo bhi bachche sun rahe hain, dekh rahe hain sabhi bachchon ko dil ka sneh, dil ka pyaar vishesh de rahe hain। abhi aage kya karna hai? seva ki mubaarak to baapdaada ne de di, ab baapdaada yahi chaahte hain ki abhi har ek bachche ko yeh umang-utsaah, dridh nishchay, teevra purushaartha karna hai ki ab baap samaan pharishta banna hi hai kyonki abhi sabhi ko baap ke saath return journey karni hai। samaan pharishta banna hi hai kyonki sabhi ka vaayda hai saath chalenge, saath raajya karenge। to brahma baap bhi pharishta ban gaya, to saath kaise chalenge? brahma baap ne jeevan mein hi pharishtaapan ka swaroop dikhaaya। kitni jimmevaari rahi! sabhi ko yogi banaana hi hai lekin itni jimmevaari hote bhi aap sabne dekha nyaara aur pyaara raha। sada bephikra baadshaah raha, phikar nahin bephikra baadshaah। aise hi aap bachchon ko bhi abhi baap samaan bephikra baadshaah pharishta banna hi hai। yeh dridh sankalp hai, banna hi hai! ki yeh sochte ho ban hi jaayenge!

abhi baapdaada ne dekha ki abhi samay anusaar jitna seva ka umang-utsaah practical mein hai itna hi abhi teevra purushaarthi banna aur banaana, sampanna banna aur banaana, is point ke oopar bhi abhi svayan bhi umang-utsaah mein rehna aur vaayumandal mein bhi umang-utsaah dilaana। ek do ke sahayogi ban ab vaayumandal mein teevra purushaartha ki lahar phailaao। jaise ek do mein seva ka umang vaayumandal mein phailaaya hai aise abhi baapdaada bachchon mein yahi shubh aasha rakhte hain ki yeh lahar vaayumandal mein phaile। baapdaada khush hai lekin abhi bhi purushaartha hai, teevra purushaartha karna hai। abhi har bachche mein baapdaada ki yahi aash hai ki har bachcha baap ke aashaaon ka sitaara ho। aise sitaara ho? jo samajhte hain ham baap ki aashaaon ke sitaare ban yeh umang-utsaah vaayumandal mein phailaayenge woh haath uthaao। achha। haath to bahut achha uthaate hain। baapdaada haathon ko dekhke khush ho jaate hain। majority ne haath uthaaya hai, peechhe vaalon ka dikhaai nahin deta lekin aage vaalon ka dikhaai diya। abhi peechhe vaale bhi utha rahe hain, mubaarak ho, mubaarak ho। achha।

baapdaada ne dekha ki vishesh man mein koi bhi baat ka umang-utsaah aata hai to woh kaarya saakaar roop mein achha ho jaata hai isliye baapdaada is baari sneh ke din mein yeh homework de raha hai ki har ek bachcha man ke kaaran jo sankalp aur samay vyartha jaata hai, agar kabhi bhi koi vyartha sankalp aa jaata hai to sabhi ko anubhav hoga ki usmein time kitna vesta jaata hai। energy kitni vesta jaati hai। to baapdaada yeh homework dene chaahta hai ki yeh do maas har ek bachcha man ke vyartha sankalp aur vyartha samay ke bachat ki apne prati vidhi banaave। in do maas mein har ek apna chart rakhe ki vyartha samay, vyartha sankalp ke oopar kitna control kiya? kyonki abhi samay ke pramaan aap sabhi ko mansa shakti dvaara aatmaon ki mansa seva karne ka samay hoga। iske liye sada man ke oopar attention rakhna zaroori hai। kaha hua bhi hai manjeet jagatjeet। to manamnaabhav ke vaayumandal mein man ke vyartha ko samaapta karna hai। kar sakte hain? karenge? woh haath uthaao। baapdaada inaam dega। apni result aap dekhna। man khush to man ki khushi baantenge। yeh purushaartha mein number sabhi aage se aage lene ka attention rakho। sankalp, samay donon se vyartha samaapta aur samartha sankalp, samartha samay aane vaale samay mein vaayumandal mein phailega।

baapdaada ek baat par bachchon ko dekh khush hai। kaun si baat par? ki har bachche ne seva to ki hai lekin saath mein jo baapdaada ka ishaara hai ki double raaja bano। jaante ho na! ek svaraajya adhikaari aur doosra bhavishya raajya adhikaari। svaraajya adhikaari aur baap ko nasha hai ki aisa aur koi baap nahin jiska har bachcha svaraajya adhikaari ho। aap sabhi svaraajya adhikaari ho na! sva par aatma raajya karne vaali hai। karmendriyon ke vash nahin, raajya adhikaari। to baap yahi chaahte hain ki har ek bachcha svaraajya adhikaari sada rahe, kabhi kabhi nahin। ban sakte hain? yeh do maas jo diya hai, ismen note karna svaraajya adhikaari rahe? ya karmendriyon ke vash ban gaye? abhi karmaateet banna hai, samay sameep aa raha hai। to kya karna hai? chalte-phirte svaraajya adhikaari banna hi hai। yeh sanskaar aap brahman bachchon ke hi hain। double raajya, svaraajya aur phir bhavishya mein vishwa raajya। baapdaada chakra lagaate bachchon ka result note karte hain to sada svaraajya adhikaari ismen abhi attention chaahiye। to do kaarya baapdaada ne diya ek yeh do maas svaraajya adhikaari kahaan tak rehte? woh apni result dekhni hai aur saath-saath man ki controlling power, ruling power dvaara vyartha samaapta karna hai। ismen jo number lenge usko baapdaada inaam dega। pasanda hai? karna hai na! karenge? karenge na! kaandh hilaao। achha।

baapdaada ne aaj sabhi ka jo sneh hai woh sveekaar kiya। amritvele to vatan mein bhi bahut bachchon ki rimjhim thi। advance party bhi vatan mein aaj apne dil ka sneh dene liye, lene liye aaye the। ab woh baap se poochhte hain ki aakhir hamaara yeh part kab tak? kya javaab den? pahli line vaale bataao kya javaab den? kya kaha? (daadi jaanki ne kaha ham ready hain) aap akele jaayengi? (sabhi jaayenge) aapka pyaar hai na, aise chhodkar raajya kaise karenge। (advance party vaale hamko kyon chhodkar chale gaye) unhon ka part tha na। unhon ko jaana hi tha। abhi aap yeh koshish karo ki jaldi jaldi sangathan taiyaar karo। jo do maas kaam diya hai na, agar yeh kaam aap sabhi ko kara dengi, result nikaalengi to jaldi ho jaayega। (baba ke sneh mein kar lenge) sneh to hai, sneh mein sabhi paas hain। baapdaada bhi dekhte hain ki sneh sabka hai lekin sneh ke saath shakti bhi chaahiye। iske liye amritvele ko powerful banaao, baithte hain baapdaada baithne ki mubaarak dete hain lekin jo baithne ka vaayumandal shaktishaali chaahiye, koi kaise baithta hai, koi kaise baithta hai। agar aap photo nikaalo na, to aapko khud lagega ki aur kuchh hona chaahiye। jo baapdaada ne jvaalaamukhi yog kaha, uske oopar abhi aur gahra attention dena। purushaartha karte hain sabhi lekin purushaartha ke aage teevra shabd jodo। abhi baapdaada ne har bachche ko yeh do maas diye hain, ismen jitna attention denge to attention ke saath baapdaada bhi extra aapko sahayog dega। man ke maalik, man ko aise chalaao jaise paanv aur baanh ko chalaate ho। jo chaahte ho woh karte hain na। abhi aap chaaho yahaan nahin yahaan rakhoon to rakh sakte ho na! aise mind control, jo chaahe vahi man sankalp kare। roz raat ko result dekho aaj man ki ruling power, controlling power kahaan tak rahi? abhi vyartha ko samaapta jaldi-jaldi karna chaahiye, ab samartha ban vaayumandal mein samarthapan ki shakti phailaao। baapdaada to bachchon ka duhkh darda, pukaar sun karke bachchon dvaara abhi jaldi samaapti karaane chaahte hain। sunaaya na, purushaartha sab kar rahe hain lekin abhi add karo teevra। karna hi hai, karenge, dekhenge… yeh ge-ge nahin chalega।

sneh ka nazaara bhi aaj dekha, har ek ke dil mein kitna pyaar hai lekin jitna pyaar hai na, saath mein utna shakti bhi chaahiye। abhi shakti ko bharo। kabhi bhi koi bhi bahnen apne ko sirf shakti nahin, shivshakti samjho। shivshakti, baap saath hai। paandavon se paandavapti saath hai। to abhi kya karenge? jo baapdaada ne kaha hai purushaartha ke aage teevra shabd lagaao। vaayumandal banaao। ek do ke sahayogi ban har ek apne-apne jis sthaan par rehte ho, us sthaan ko shaktishaali banaao, saathiyon ko shaktishaali banaao। to kya karenge abhi? naveenta karenge na! jab mera baba kehte hain, to ‘mere' jaisa banna to padega na। har ek apne dil mein dridh sankalp karo, sankalp achhe-achhe karte ho, amritvele baapdaada dekhte hain ki sankalp achhe karte ho yeh karenge, yeh karenge, yeh karenge lekin jab karmayogi bante ho, sambandh-samparka mein aate ho to usmein pharka ho jaata hai। karmayogi ki sthiti usmein attention jyaada chaahiye। achha।

sabhi khush to hain na! khush hain? dekho naye-naye bhi kitne aate hain। jo naye pahli baar aaye hain woh haath uthaao। dekho kitne hain? aadha class naye aaye hain। baapdaada aaye hue naye bachchon ko dekh khush hai kyonki last samaapti ke samay se to pahle aa gaye hain। lekin jitna let aaye ho itna hi teevra purushaartha karna padega kyonki is thode time mein aapko poore 21 janmon ka bhavishya banaana hai। itna attention rakhna padega। samay ko bachaana, second bhi vyartha nahin ganvaana। teevra purushaarthi rehna, saadhaaran purushaartha se pahunchna mushkil hai। phir bhi baapdaada aaye hue bachchon ko dil se mubaarak de rahe hain। achha।

teachers bahinen bahut aai hain:- teachers ko dekhkar to baapdaada bahut khush hote hain kyonki jo nimitta teachers bani hain, woh baapdaada ko pratyaksha karne ke nimitta bani hui hain। koi bhi teacher ko dekhte khush hote hain kyonki teachers maana hi jiske features se future dikhaai de। future aapka kya hai? future hai sada dilkhush, sada adhikaari, adheen hone vaale nahin। to teachers ke features yeh saakshaatkaar karaate hain। har ek teacher sada yahi samjhe kahaan bola, kahaan nahin bola bhale, lekin vartamaan samay ki praapti aur bhavishya ki praapti aapke features, aapki shakla dikhaati hai। sada yeh attention rakho ki hamaara chehra aisa saakshaatkaar karaane vaala ho। koi bhi teacher ke saamne aaye, teacher ko dekh ek to khushmijaaj ho jaae, khushi uske jeevan mein dikhaai de। aise khushnuma aur khushkismat ho। baap-daada ne dekha hai har ek teacher ka lakshya achha hai। karna hi hai। banna hi hai। aise hai na? lakshya kya hai? yahi lakshya hai na! to yeh lakshya lakshan mein dikhaai deta bhi hai aur jyaada dikhaai dena chaahiye। jo bhi aave khushi zaroor le jaaye kyonki khushi har manushya ko aavashyak hai। chaahte hain lekin ban nahin paate hain to teachers maana features dvaara bhi seva kare। anubhav karen ki yeh kya ban gai hai! abhi aage chal karke aapka chehra aur chalan yeh seva jyaada karega kyonki jaise samay naajuk aayega to samay kam milega lekin chaahna badhegi, kuchh mile, kuchh mile। iske liye teachers ko sada aise ever ready rehna chaahiye, jo koi aave woh kam se kam kuchh leke hi jaave। chehre aur chalan dvaara bhi kuchh na kuchh leke jaaye। daata ke bachche ho na! baapdaada to teachers ko dekhkar bahut khush hote hain। dil hi dil mein gun gaate hain vaah teachers vaah! kyonki har ek teacher seva to karte hi hain aur apni result raat ko bhi dekhte honge ki aaj ki seva kya hui! apna chart to aapehi dekhte hain। jo lakshya rakha seva ka woh hua? agar kaarne akaarne nahin hua, to doosre din double karo। khaali nahin chhodo kyonki teachers maana nimitta daata ke bachche daata। to baapdaada to khush hote hain chaahe chhote centre ki hain chaahe bade centre ki hain lekin tyaag karke seva-sthaan par aana, yeh bhi himmat hai na। to baapdaada aapki himmat par to khush hai। ab aur saathi banaao। aur bhi teachers nikaalo kyonki seva badhni hi hai। abhi thoda hangaama hoga aur sab utkantha se aapke aage aayenge। service badhne vaali hai, kam hone vaali nahin hai। achha।

vardaan:- svamaan ki seat par sthit rah maaya ko surrender karaane vaale shreshtha svamaandhaari bhav

sangamayug ka sabse shreshtha svamaan hai master sarvashaktimaan ki smriti mein rehna। jaise koi bada officer va raaja jab svamaan ki seat par sthit hota hai to doosre bhi use sammaan dete hain, agar svayan seat par nahin to uska order koi nahin maanenge, aise aap bhi svamaandhaari ban apne shreshtha svamaan ki seat par set raho to maaya aapke aage surrender ho jaayegi।

slogan:- saaksheepan ki sthi ti mein rah dilaaraam ke saath ka anubhav karne vaale hi lavleen aatma hain।

ye avyakt ishaare - paropkaar ki bhaavna se sampanna ban apkaari par bhi upkaar karo

apkaari par bhi upkaar karna, yahi gyaani tu aatma ka kartavya hai। jaise baap ne glaani ko bhi kalyaankaari drishti se dekha। upkaari par upkaar to duniya vaale bhi karte hain, bhakta aatmaayen bhi karte hain lekin gyaani tu aatma ka arth hai sarva ke prati kalyaan ki bhaavna, akalyaan sankalp maatra bhi nahin ho। apkaariyon par bhi upkaar kare tab kahenge vishwa kalyaankaari।