Daily Murli for Monday 19 October 2026

19-10-2026 praatahmurli om shanti "baapdaada"' madhuban

“meethe bachche - ab videhi banne ka abhyaas karo, apni is vinaashi deh se pyaar nikaal ek shiv-baba ko pyaar karo''

prashn:- is behad ki puraani duniya se jinhen vairaagya aa chuka hai unki nishaani kya hogi?

uttar:- woh in aankhon se jo kuchh dekhte hain - woh dekhte hue bhi jaise nahin dekhenge। unki buddhi mein yeh hoga ki yeh sab khatma hona hai। yeh sab mare pade hain। hamko to shantidham, sukhdhaam mein jaana hai। unka mamatva mitta jaayega। yog mein rahkar kisse baat karenge to unhein bhi kashish hogi। gyaan ka nasha chadha hua hoga।

geet:- om namo shivaae…

om shanti। baap kehte hain - meethe bachche tum shivbaaba ko jaan gaye ho। phir yeh geet gaana to jaise bhakti maarga ka ho jaata hai। bhakti maarga vaale shivaae namah bhi kehte hain, maat-pita bhi kehte hain, parantu jaante nahin hain। shivbaaba se svarga ka varsa milna chaahiye। tum bachchon ko to baap mila hai, unse varsa mil raha hai isliye baap ko yaad karte ho। tumko shivbaaba mila hai, duniya ko nahin mila hai। jinko mila hai woh bhi achhi reeti chal nahin sakte। baba ke direction bade meethe hain, aatma-abhimaani bhav, dehi-abhimaani bhav। baat hi aatmaon se karte hain। dehi-abhimaani baap, dehi-abhimaani bachchon se baat karte hain। woh to ek hi hai। so to madhuban mein tum bachchon ke saath baitha hai। tum bachche jaante ho ki barobar baap aaye hi hain padhaane। yeh padhaai sivaae shivbaaba ke koi padha na sake। na brahma, na vishnu। yeh to baap hi aakar patiton ko paavan banaate hain, amraktha sunaate hain। so bhi yahaan hi sunaayenge na। amarnaath par to nahin sunaayenge na। yahi amraktha satya naaraayan ki katha hai। baap kehte hain - main tumko sunaata to yahaan hi hoon। baaki yeh sab hain bhakti maarga ke dhakke। sarva ka sadgati daata raam ek niraakaar hi hai। vahi patit-paavan, gyaan ka saagar, shanti ka saagar hai। woh aata hi tab hai jab vinaash ka samay hota hai। saare jagat ka guru to ek parampita paramatma hi ho sakta hai। woh niraakaar hai na। devtaaon ko bhi manushya kaha jaata hai। parantu woh daiveegunon vaale manushya hain isliye unko devta kaha jaata hai।

tumko abhi gyaan mila hai। gyaan maarga mein avastha badi majboot rakhni hai। jitna ho sake baap ko yaad karna hai। videhi banna hai। phir deh se pyaar hi kyon karen! baba tumko kehte hain shivbaaba ko yaad karo phir inke paas aao। manushya to samajhte hain yeh daada se milne jaate hain। yeh to tum jaante ho shivbaaba ko yaad kar ham unse milte hain। vahaan to hain hi niraakaari aatmaayen, bindi। bindi se to mil na saken। to shivbaaba se kaise milenge isliye yahaan samjhaaya jaata hai, he aatmaayen apne ko aatma samajh buddhi mein yeh rakho ki ham shivbaaba se milte hain। yeh to bada guhya raaz hai na। kaiyon ko shivbaaba ki yaad nahin rehti hai। baba samjhaate hain hamesha shivbaaba ko yaad karo। shivbaaba aapse milne aate hain। bas aapke bane hain। shivbaaba ismen aakar gyaan sunaate hain। woh bhi niraakaar aatma hai, tum bhi aatma ho। ek baap hi hai jo bachchon ko kehte hain maamekam yaad karo। so to buddhi se yaad karna hai। ham baap ke paas aaye hain। baba is patit shareer mein aaye hain। ham saamne aane se hi nishchay kar dete hain, shivbaaba ham aapke bane hain। murliyon mein bhi yahi sunte ho - maamekam yaad karo to tumhaare vikarma vinaash ho jaayenge।

tum jaante ho yeh vahi patit-paavan baap hai। sachcha-sachcha satguru woh hai। ab tum paandavon ki hai parampita paramatma se preet buddhi। baaki sabhi ki to koi na koi ke saath vipreet buddhi hai। shivbaaba ke jo bante hain unhon ko to khushi ka paara bada jor se chadha rehna chaahiye। jitna samay najdeek aata hai, utni khushi hoti hai। hamaare ab 84 janma poore hue। ab yeh antim janma hai। ham jaate hain apne ghar। yeh seedhi to bahut achhi hai, ismen clear hai। to bachchon ko saara din buddhi chalaani chaahiye। chitra banaane vaalon ko to bahut vichaar saagar manthan karna hai, jo heads hain unhon ka khyaal chalna chaahiye। tum to challenge dete ho - satayugi shreshthaachaari daivi raajya mein 9 laakh honge। koi bole iska kya proof hai? kaho yeh to samajh ki baat hai na। satayug mein jhaad hoga hi chhota। dharma bhi ek hai to zaroor manushya bhi thode honge। seedhi mein saari knowledge aa jaati hai। jaise yeh kumbhakran vaala chitra hai। to yeh aisa banaana chaahiye - bi.ke. gyaan amrit pilaati hain, ve vish (vikaar) maangate hain। baba murli mein sab direction dete rehte hain। har ek chitra ki samjhaani badi achhi hai। lakshmi-naaraayan ke chitra par bolo - yeh bhaarat svarga tha, ek dharma tha to kitne manushya honge। ab kitna bada jhaad ho gaya hai। ab vinaash hona hai। puraani srishti ko badalne vaala ek hi baap hai। 4-5 chitra hain mukhya - jisse kisko dhak se teer lag jaae। drama anusaar din-pratidin gyaan ki points guhya hoti jaati hain। to chitron mein bhi change hogi। bachchon ki buddhi mein bhi change hoti hai। aage yeh thode hi samajhte the ki shivbaaba bindi hai। aise thode hi kahenge ki pahle aisa kyon nahin bataaya। baap kehte hain - sab baaten pahle hi thode hi samjhaai jaati hain। baap gyaan ka saagar hai to gyaan dete hi rahenge। correction hoti rahegi। pahle se hi thode hi bata denge। phir artificial ho jaae। achaanak koi itphaak aadi hote rahenge phir kahenge drama। aise nahin yeh nahin hona chaahiye। mama ko to pichhaadi tak rehna tha, phir mama kyon chali gai। drama mein jo hua so right। baba ne bhi jo kaha so drama anusaar kaha। drama mein mera part aisa hai। baba bhi drama par rakh dete hain। manushya kehte hain eeshvar ki bhaavi। eeshvar kehte hain drama ki bhaavi। eeshvar ne bola ya isne bola, drama mein tha। koi ulta kaam hua drama mein tha, phir sulta ho jaayega। chadhti kala zaroor hai। chadhaai par jaate hain, kab dagmag ho jaate hain। yeh sab maaya ke toofaan hain। jab tak maaya hai vikalpa zaroor aayenge। satayug mein maaya hi nahin to vikalpa ki baat hi nahin। satayug mein kabhi karma vikarma nahin hote। baaki thode roz hain, khushi rehti hai। yeh hamaara antim janma hai। ab amarlok mein jaane ke liye shivbaaba se amraktha sunte hain। yeh baaten tum hi samajhte ho। vo log kahaan-kahaan amarnaath par jaakar dhakke khaate rehte hain। yeh nahin samajhte ki paarvati ko katha kisne sunaai? vahaan to shiv ka chitra dikhaate hain। achha shiv kismen baitha? shiv aur shankar dikhaate hain। kya shiv ne shankar mein baith katha sunaai? kuchh bhi samajhte nahin hain, bhakti maarga vaale abhi tak teertha karne jaate rehte hain। katha bhi vaastav mein badi nahin hai। asul hai manamnaabhav। bas, beej ko yaad karo। drama ke chakra ko yaad karo। jo gyaan baba ke paas hai woh gyaan hamaari aatma mein bhi hai। woh bhi gyaan saagar, ham aatma bhi master gyaan saagar bante hain। nasha chadhna chaahiye na। woh ham bhaaiyon (aatmaon) ko sunaate hain। sunaayenge to shareer dvaara hi। ismen sanshay nahin laana chaahiye। baap ko yaad karte-karte saara gyaan buddhi mein aa jaata hai। baap ki yaad se hi vikarma vinaash honge, mamatva mitta jaayega। koi ka naam-maatra pyaar hota hai। hamaara bhi aisa hai। abhi to ham jaate hain sukhdhaam। yeh to jaise sab mare pade hain, inse dil kya lagaani hai। shantidham mein jaakar phir sukhdhaam mein aakar raajya karenge। isko kaha jaata hai puraani duniya se vairaagya। baap kehte hain - in aankhon se jo kuchh dekhte ho woh sab khatma ho jaane ka hai। vinaash ke baad svarga ko dekhenge। ab tum bachchon ko bahut meetha banna chaahiye। yog mein rah koi baat karenge to unko badi kashish hogi। yeh gyaan aisa hai jo baaki sab bhool jaata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan maarga mein apni avastha bahut majboot banaani hai। videhi banna hai। ek baap se hi sachchi-sachchi preet rakhni hai।

2) drama ki bhaavi par adol rehna hai। drama mein jo hua so right। kabhi dagmag nahin hona hai, kisi bhi baat mein sanshay nahin laana hai।

vardaan:- kamjoriyon ko fullstop dekar apne sampanna swaroop ko prakhyaat karne vaale saakshaatkaarmoorta bhav

vishwa aapke kalpa pahle vaale sampanna swaroop, poojya swaroop ka simran kar rahi hai isliye ab apne sampanna swaroop ko practical mein prakhyaat karo। beeti hui kamjoriyon ko fullstop lagaao, dridh sankalp dvaara puraane sanskaar-svabhaav ko samaapta karo, doosron ki kamjori ki nakal mat karo, avgun dhaaran karne vaali buddhi ka naash karo, divya gun dhaaran karne vaali satopradhaan buddhi dhaaran karo tab saakshaatkaar moorta banenge।

slogan:- apne anaadi aur aadi gunon ko smriti mein rakh unhein swaroop mein laao।

maateshvari ji ke anmol mahaavaakya

niraakaar paramatma ka reserve tan brahma tan hai

yeh to apne ko poora nishchay hai ki paramatma apne saakaar brahma tan dvaara aakar padha rahe hain, is point par bahut jigyaasu prashn poochhte hain ki amritvele samay niraakaar paramatma jab apne saakaar tan mein pravesh hote hain to usi samay shareer mein kya change hoti hai? vo poochhte hain kya tum us samay baith unko dekhte ho ki kaise paramatma aata hai? ab is par samjhaaya jaata hai paramatma ki praveshta hone samay aise nahin ki us shareer ke koi nayan, chayan badli ho jaate hain, nahin। parantu ham jab dhyaan mein jaate hain tab nayan, chayan badli ho jaata hai parantu is saakaar brahma ka part hi gupta hai। jab paramatma iske tan mein aata hai to koi ko bhi pata nahin chalta, uska yeh tan reserve kiya hua hai isliye second mein aata hai, second mein jaata hai, ab is raaz ko samajhna। baaki aise nahin koi point samajh mein na aave to is padhaai ka course chhod dena hai। padhaai to din pratidin guhya aur clear hoti jaati hai। saara course ekdam to nahin padh sakenge na, vaise aapko samjhaaya jaata hai। aur jo bhi dharma pitaayen aate hain unhon mein bhi apni apni pavitra aatma aae apna part bajaati hai phir un aatmaon ko sukh duhkh ke khel mein aana hai, vo vaapas nahin jaate parantu jab niraakaar supreme soul aate hain to vo sukh duhkh se nyaare hain, to vo sirf apna part bajaae phir chale jaate hain। to is hi point ko humein buddhi se samajhna hai।

aatma aur paramatma mein gunon aur taakat ka pharka

aatma aur paramatma ka antar (bhed) is par samjhaaya jaata hai ki aatma aur paramatma ka roop ek jaisa jyoti roop hai। aatma aur paramatma ki aatma ka size ek hi reeti mein hai, baaki aatma aur paramatma mein sirf gunon ki taakat ka pharka avashya hai। ab yeh jo itne gun hain vo saari mahima paramatma ki hai। paramatma duhkh sukh se nyaara hai, sarvashaktivaan hai, unki hi saari shakti kaam kar rahi hai। baaki manushya aatma ki koi shakti nahin chal sakti hai। paramatma ka hi saara part chalta hai, bhal paramatma part mein bhi aata hai, to bhi khud nyaara rehta hai। lekin aatma part mein aate bhi paartadhaari ke roop mein aa jaati hai, paramatma part mein aate bhi karmabandhan se nyaara hai। aatma part mein aate bhi karmabandhan ke vash ho jaati hai, yeh hai aatma aur paramatma mein antar, bhed। achha। om shanti।

ye avyakt ishaare - paropkaar ki bhaavna se sampanna ban apkaari par bhi upkaar karo

koi gaali bhi de, jhootha ilzaam bhi lagaaye, lekin aapko krodh na aaye। apkaari ke oopar upkaar karna, yahi aap braahmanon ka karma hai। woh gaali de aap gale lagaao, yahi hai kamaal। isko kaha jaata hai parivartan। gale lagaane vaale ko gale lagaana, yeh koi badi baat nahin lekin ninda karne vaale ko sachcha mitra man se maano, tab kahenge upkaar karne vaale।