Avyakt murli du samedi 18 janvier 1969

> 18-01-69 om shanti avyakt baapdaada madhuban

"18 January 1969 – pitaashri ji ke avyakt hone ke baad – avyakt vatan se praapta divya sandesh"

(gulzaar behen dvaara)

1. aaj jab ham vatan mein gai to shivbaaba bole - saakaar brahma ki aatma mein aadi se ant tak 84 janmon ke chakra lagaane ke sanskaar hain to aaj bhi vatan se chakra lagaane gaye the। jaise science vaale rocket dvaara chandrama tak pahunche - aur jitna chandrama ke najdeek pahunchte gaye utna is dharti ki aakarshan se door hote gaye। prithvi ki aakarshan khatma ho gai। vahaan pahunchne par bahut halkaapan mahsoos hota hai। jaise tum bachche jab sookshm vatan mein aate ho to sthool aakarshan khatma ho jaati hai to vahaan bhi dharti ki aakarshan nahin rehti hai। yeh hai dhyaan dvaara aur woh hai science dvaara। aur bhi ek antar baapdaada suna rahe the - ki woh log jab rocket mein chalte hain to lautne ka connection neeche vaalon se hota hai lekin yahaan to jab chaahen,jaise chaahen apne haath mein hai। iske baad baba ne ek drishya dikhaaya - ek light ki bahut oonchi pahaadi thi। us pahaadi ke neeche shakti sena aur paandav dal tha। oopar mein baapdaada khade the। iske baad bahut bheed ho gai। ham sabhi vahaan khade aise lag rahe the jaise saakaari nahin lekin mandir ke saakshaatkaar moorta khade hain। sabhi oopar dekhne ki koshish kar rahe the lekin oopar dekh nahin sake। jaise sabhi bahut taras rahe the। phir thodi der mein ek aakaashvaani ki tarah aavaaj aai ki shaktiyon aur paandavon dvaara hi kalyaan hona hai। us samay ham sabke chahre par bahut hi merciful ka bhaav tha। uske baad phir kai logon ko shaktiyon aur paandavon se avyakt brahma ka saakshaatkaar,shivbaaba ka saakshaatkaar hone laga। phir to woh scene dekhne ki thi koi hasan raha tha, koi pakadne ki koshish kar raha tha, koi prem mein aansu baha raha tha। lekin saari shaktiyaan aag ke gole samaan tejasvi roop mein sthit thi। is par baba ne sunaaya ki ant samay mein tumhaara yeh vyakta shareer bhi bilkul sthir ho jaayega। abhi to puraana hisaab-kitaab hone ke kaaran shareer apni taraph kheenchata hai lekin ant mein bilkul sthir,shant ho jaayega। koi bhi hal- chal na man mein, na tan mein rahegi। jisko hi baba kehte hain dehi abhimaani sthiti। drishya samaapta hone ke baad baba ne kaha - sabhi bachchon ko kehna ki abhi dehi abhimaani banne ka purushaartha karo। jitna service par dhyaan hai utna hi is mukhya baat par bhi dhyaan rahe ki dehi abhimaani banna hai।

2. aaj jab main vatan mein gai to baapdaada ham sabhi bachchon ka svaagat karne ke liye saamne upasthit the। aur jaise hi main pahunchi to jaise saakaar roop mein drishti se yaad lete the vaise hi anubhav hua lekin aaj ki drishti mein vishesh prem ke saagar ka roop emerge tha। ek-ek bachche ki yaad naynon mein samaai hui thi। baba ne kaha yaad to sabhi bachchon ne bheji hai, lekin ismen do prakaar ki yaad hai। kai bachchon ki yaad avyakt hai aur kaeeyon ki yaad mein avyakt bhaav ke saath vyakta bhaav mix hai। 75 bachchon ki yaad avyakt thi lekin 25 ki yaad mix thi। phir baba ne sabhi ko sneh aur shakti bhari drishti dete gitti khilaai। phir ek drishya emerge hua - kya dekha sabhi bachchon ka sangathan khada hai aur oopar se bahut phoolon ki varsha ho rahi hai। bilkul chaaron aur phool ke sivaae aur kuchh dekhne mein nahin aa raha tha। baba ne sunaaya - bachchi, baap- daada ne sneh aur shakti to bachchon ko di hi hai lekin saath-saath divya gun rupi phoolon ki varsha shiksha ke roop mein bhi bahut ki hai। parantu divya gunon ki shiksha ko harek bachche ne yathaashakti hi dhaaran kiya hai। iske baad phir doosra drishya dikhaaya - teen prakaar ke gulaab ke phool the ek lohe ka,doosra halka peetal ka aur teesra real gulaab tha। to baba ne kaha bachchon ki result bhi is prakaar hai। jo lohe ka phool hain - yeh bachchon ke kade sanskaar ki nishaani the। jaise lohe ko bahut thokna padta hai, jab tak garam na karo,hathodi na lagaao to mud nahin sakta। is tarah kai bachchon ke sanskaar lohe ki tarah hai jo kitna bhi bhatti mein pade rahen lekin badalte hi nahin। doosre hai jo modne se va mehnat se kuchh badalte hain। teesre woh jo natural hi gulaab hain। yeh vahi bachche hain jinhonne gulaab samaan banne mein kuchh mehnat nahin li। aise sunaate- sunaate baba ne real gulaab ke phool ko apne haath mein uthaakar thoda ghumaaya। ghumaate hi unke saare patte gir gaye। aur sirf beech ka beej rah gaya। to baba bole,dekho bachchi jaise inke patte kitna jaldi aur sahaj alag ho gaye - aise hi bachchon ko aisa purushaartha karna hai jo ekdam phat se puraane sanskaar, puraane deh ke sambandhiyon roopi patte chhat jaayen। aur phir beejroop avastha mein sthit ho jaayen। to sabhi bachchon ko yahi sandesh dena ki apne ko check karo ki agar samay aa jaae to koi bhi sanskaar roopi patte atak to nahin jaayenge,jo mehnat karni pade? karmaateet avastha sahaj hi ban jaayegi ya koi karmabandhan us samay atak daalega? agar koi kami hai to check karo aur bharne ki koshish karo।

3. aaj baba ko madhuban mein aane ke liye nimantran dene ke liye gai - to baapdaada ke eeshaaron se anubhav hua ki aaj baba ka vichaar nahin hai। itne mein hi baba bole achha bachchi sabhi bachchon ne bulaaya hai to baapdaada bachchon ka sevaadhaari hai। yeh sunkar sankalp chala ki baba ne abhi-abhi na ki aur abhi-abhi haan ki kyon? dil ke sankalp ko jaankar baba bole - yeh jaanboojh kar karma karke baba sikhla rahe hain ki tum bachchon ko bhi ek do ki raay, ek do ke vichaaron ko regard dena chaahiye। bhal samjho koi vichaar deta hai aur tumko nahin jachta hai to bhi unke vichaar ko phauran thukra nahin dena chaahiye। pahle to unko regard do ki haan, kyon nahin। bahut achha। jisse unke vichaar ka force kam ho jaaain। to phir aap jo unhein samjhaayenge woh samajh sakenge। agar seedha hi unko kat karenge to donon force takkar khaayengi aur result mein saphalta nahin niklegi। isliye ek do ke vichaar arthaat raay ko pahle regard dena aavashyak hai। isse hi aapas mein sneh aur sangathan chalta rahega।

4. aaj jab vatan mein gai to jaise hi ham pahunchi to baapdaada saamne the hi lekin kya dekha ki brahma baba ke gale mein dher ki dher maalaayen padi hui thi। phir baba ne kaha yeh maala utaar kar dekho। maala utaari to koi badi maala thi koi chhoti। hamne kaha baba iska rahasya kya hai? baba bole bachchi,yeh sabhi ke ulhanon ki maala hai। kyonki harek bachche jab ekaanta mein baithte hain to baba ko sneh mein ulhana hi dete hain। harek bachche ne baap ko ulhanon ki maala zaroor pahnaai hai। baba ne kaha bachchon ko drama bhal yaad hai lekin pyaare te pyaari cheej to zaroor hai। to achaanak drama ko vandarphul dekh harek bachcha dil hi dil mein ulhana dete rehte hain। yoon to gyaan bachchon ko hai lekin gyaan ke saath prem ka sneh bhi hai isliye in ulhanon ko galat nahin kahenge। phir hamne poochha baba, aapne iska respond kya diya? to baba bole jaisa bachcha vaisa respond। baba ne kaha main bhi respond mein bachchon ko ulhanon ki maala hi pahnaata hoon। woh kaun si? phir baba ne sunaaya - jo baap ki aash bachchon mein thi woh saakaar roop mein baap ko nahin dikhlaai,jo ab avyakt roop mein dikhlaani hai। baba ne kaha yeh ulhana bhi meethi roohroohaan hai। yeh bhi ek khelpaal bachchon ka hai। saakaar roop mein jo baapdaada ne shrringaar karaaya woh ab avyakt vatan mein baapdaada dekhenge। yeh scene poori ho gai। phir bhog sveekaar karaaya phir mainne baba se poochha - baba aap saara din vatan mein kya karte ho? baba ne kaha chalo main tumko vatan ka museum dikhlaaoon tum to museum banaane ke pahle plan banaate ho baba ka museum to ek second mein taiyaar ho jaata hai। phir kya dekha? ek bahut bada haal tha। ek hi haal mein ham bachche dher ki dher model ke roop mein khade the। hamne kaha baba yeh to ham hi museum mein khade hain। baba ne kaha - bachchi baba ka museum yahi hai। abhi tum jaao jaakar ek model ko dekho ki baapdaada ne kya-kya sajaaya hai? jaise artist moorti ko sajaate hain to baba ne kaha dekho, baapdaada ne kya-kya sajaaya hai? ham jab model ke paas gai to hamko kuchh khaas dikhaai nahin pada। poori saji hui moorti dikhaai pad rahi thi। baba ne kaha jo mota shrringaar hai woh to saakaar mein hi bachchon ka karke aaye hain। parantu ab avyakt roop mein kya saja rahe hain?sabhi shrringaar to hai, jevar bhi hai parantu jevar mein beech mein nag laga rahe hain। baba ke kahne ke baad koi-koi mein jaise extra nag dikhaai pade। baba ne kaha bachchon ke prati mukhya shiksha yahi hai ki avyakt sthiti mein sthit rahkar vyakta bhaav mein aao। jab ekaanta mein baithte hain to avyakt sthiti rehti hai lekin vyakta mein rahkar avyakt bhaav mein sthit rahen woh miss kar lete hain is- liye ekras karmaateet sthiti ka jo nag hai, woh kam hai। to jiske jeevan mein jo kami dekhta hoon woh saja raha hoon। jaise saakaar roop mein yeh kaarya karta tha vahi phir avyakt roop mein karta hoon। to bachchon se jaakar poochhna ki saare din mein jaise baap bachchon ko sajaate hain, aise bachchon ko bhaasna aati hai? us time jo yongayukta bachche honge unko bhaasna aayegi ki baba ab mere se baat kar rahe hain, saja rahe hain। jaise main avyakt vatan mein bachchon se milta, bahalta rehta hoon। avyakt roop vaale bachche yeh anubhav kar sakte hain। main bhi khaas samay par khaas bachchon ko yaad karta hoon। aisi touching bachchon ko hoti hi hogi। mainne kaha baba aap sabhi ko avyakt vatan mein kyon nahin bula lete? - yahaan hi bada centre khol do। abhi to sabhi bachche upraam ho gaye hain। baba ne kaha yeh upraam avastha honi hi chaahiye। hamesha taiyaar rehna chaahiye। yeh bhi yaad ki yaatra ko bal milta hai। yeh upraam avastha sahaj yaad ka tareeka hai। ab bachchon ko kehna jyaada samay nahin hai। baba kabhi bhi kisko bula lenge।

5. aaj jab vatan mein gai to jaate hi anubhav ho raha tha jaise ki light ke baadlon se cross karke vatan mein ja rahi hoon। baadlon ki light aise lag rahi thi jaise sooryaasta hote samay laali dekhne mein aati hai। jaise hi vatan mein pahunchi to vahaan bhi aise hi dekha ki light ke baadlon ke beech baapdaada ka mukhda soorya-chandrama samaan chamakta hua dekhne mein aa raha tha। scene to badi sundar dikhaai de rahi thi lekin aaj ka vaayumandal bilkul shant tha। baapdaada ke mulaakaat mein bhi shanti aur shakti ki bhaasna aa rahi thi। phir to muskaraate hue baba bole - bhal tum bachche saakaar shareer mein saakaari srishti mein ho phir bhi saakaar mein rehte aise hi light might roop hokar rehna hai jo koi bhi dekhe to mahsoos kare ki yeh koi pharishte ghoom rahe hain। lekin woh avastha tab hogi jab ekaanta mein baithe antarmukh avastha mein rah apni checking karenge। aisi avastha se hi aatmaon ko aap bachchon se saakshaatkaar hoga। aaj vatan mein ek taraph to bilkul shanti thi, doosre taraph phir pyaar ka roop bahut tha। kya dekha? baba ki baanhon mein sabhi bachche samaaye hue the। saath-saath prem ka saagar to tha hi। baba ne kaha - tum shaktiyon ko bhi sarva aatmaon ko aise hi ab apne sameep laana hai। aapki drishti mein baap samaan jab prem aur shakti donon hi power hogi tab aatmaayen najdeek aayengi। iske baad baba ne teesra drishya dikhaaya-kya dekha baba ke saamne dher cards pade the। baba ne kaha in cards ko aise sajaaon jisse koi scenery ban jaae kyonki har card par scenery ki dijaain thi - kismen chitra kismen shareer। ham milaane lagi to kabhi ulta kabhi sulta ho jaata tha। aur baapdaada bahut hans rahe the। usmein bahut hi sundar satayug ki seenriyo thi। ek krishna baal roop mein jhoole mein jhool raha tha, saath mein kaanta (daasi) jhula rahi thi। doosre mein sakhe-sakhiyon ka khel tha। matlab to satayug ki dincharya thi। phir baba ne vidaai dete samay kaha, bachchi sabko sandesh dena - ki shakti swaroop bhav aur prem swaroop bhav।

6. aaj jab is deh aur deh ke desh se pare apne ko sookshm vatan jisko brahmaapuri kehte hain vahaan gai to paramatma baap ne ek drishya dikhaaya - bahut badi ek bheed dekhi - phir dekha jaise koi ticket baant raha hai aur harek koshish kar raha hai ki humein bhi ticket mile। lekin thode samay mein dekha ki koi-koi ko ticket mili aur koi-koi ticket se vanchit rah gaye। jinko ticket mili woh dil hi dil mein harshaate rahe aur jinhen nahin mili woh ek do ko dekhte rahe। woh ticket kahaan ki thi us par ek doosra drishya dekha - ek bada sundar darvaaja tha jo achaanak khula - jinhon ke paas ticket thi woh to darvaaje ke andar chale gaye aur jinke paas ticket nahin thi woh bade hi pashchaataap se dekh rahe the। us get par likha hua tha - ' 'svarga ka dvaar ''। baba ne rahasya sunaaya - ki paramatma baap sabhi bachchon dvaara satayugi nai srishti svarga mein chalne ki ticket dila rahe hain। parantu kai bachche soch rahe hain ki ab nahin baad mein le lenge। lekin aise na ho ki yeh ticket milna banda ho jaae aur svarga mein jaane se vanchit ho jaayen। baba ne kaha - kai aatmaayen sunti hain, sochti hain ki yeh kaarya kya chal raha hai? to baapdaada bachchon prati yahi shiksha de rahe hain ki yeh jo samay aane vaala hai, aap jo ab soch rahe ho, sochte-saachte apne bhaagya ko ganva na do। yeh drishya dikhaaya। phir doosri scene dekhi ki nadi bah rahi thi - us nadi mein door-door se kai log aakar snaan kar rahe the। kai phir vahaan hi najdeek the lekin naha nahin rahe the। balki unse kai poochh rahe the ki nadi kahaan hain ham jaakar snaan karen lekin jo najdeek rahne vaale the unko nadi mein snaan karne ka mahatva nahin tha aur jo pyaase the, unko bhi us pyaas ka moolya kam karaate the। phir baba ne kaha ki bachchi yeh jo gyaan ganga hai। ganga ke najdeek vaale aabu nivaasi hain। door door se aakar to ismen snaan karte hain lekin yahaan vaale is mahatva ko na jaan unko taalte hain। to kahaan aise na ho is bhool mein rah jaayen isliye baapdaada ke sab bachche hain, bhal aagyaakaari bachche nahin hain phir bhi bachche to baba ke priy hain। to bachchon ko baba shiksha dete hain ki yeh amoolya samay jo gyaan ganga mein nahaane ka mil raha hai,woh kabhi ganva na dena। phir thode samay mein dekha ki kaeeyon ne to snaan kiya,kaeeyon ne jal ko bharkar rakha lekin kuchh samay ke baad nadi ne raasta palat liya aur jinhonne nahin nahaaya,na bharkar rakha woh auron se ek-ek boond maang rahe the,tadaph rahe the। to baba ne kaha yeh samay abhi aane vaala hai। phir baba ne sabhi bachchon ke prati ek mahaamantra ki saugaat di - baba bole, ek to mujh parampita ki yaad mein raho aur apne jeevan ko pavitra aur yogi banaao। yahi baapdaada ne sneh ke return mein mahaamantra ki saugaat sabhi prati di।

7. aaj jab vatan mein gai to jaate hi kya dekha ki shivbaaba aur apna brahma baba donon aapas mein baithe the aur saamne jaise ek chhoti pahaadi bani hui thi। woh kiski thi?kya dekha ki dher ke dher patra the। itne patra the, itne patra the jaise ki pahaadiyaan ban gai thi jaise hi ham pahunchi to brahma baba ne hamko dekha aur kaha ki eeshu kahaan hai। itne patra ho gaye hain। mainne kaha baba main aai hoon। kaha eeshu bachchi ko bhi saath laai ho na! dekhna eeshu bachchi, main do minute mein itne saare patra poora kar deta hoon। shiv baba to saakshi hokar muskara rahe the। itne mein dekha ki eeshu behen bhi vahaan emerge ho gai। eeshu ka chehra bilkul hi shant tha। baba ne kaha bachchi kya soch rahi ho?aaj to patra ka javaab dena hai। usi samay jaise saakaar vatan ka sanskaar poorn reeti emerge tha। mama khadi hokar dekh rahi thi। itne mein hi shiv baba ne brahma baba ko kaha aap kahaan ho? vatan mein baithe ho?phir ek second mein hi roop badal gaya। baba ne kuchh kaha nahin,ekdam dead silence ho gaye। itne mein baba ne mujhe kaha ki bachchi yeh patra kholkar dekho। mainne kaha baba patra to dher hain। baba ne kaha bachchi ismen to ek second lagega। kyonki sabhi mein ek hi baat hai। iske baad baba ne sunaaya ki sabhi patron mein bachchon ke ulhane hi hain। patron mein sabhi ulhane hi the। ab dekhna baba bachchon ko respaanda karte hain। dekhna ek second mein main sabhi ko javaab de deta hoon। phir baba ne sabhi patron ka laal aksharon mein yahaan maaphik hi patra likha। patra mein kya tha - "brahman kul bhooshan, svadarshanchakradhaari,ye ratnon bachchon prati,samaachaar yeh hai ki sabhi bachchon ke ulhanon ke patra sookshm vatan mein paaye। respond mein baapdaada bachchon ko kah rahe hain ki drama ki bhaavi ke bandhan mein sarva aatmaayen bandhi hui hain। sabhi part baja rahi hain। usi drama ke meethe-meethe bandhan anusaar aaj avyakt vatan mein part baja raha hoon। sabhi bachchon ko dil va jaan sik va prem se avyakt roop se yaad pyaar bahut-bahut-bahut sveekaar ho। jaise baap ki sthiti hai vaise bachchon ko sthiti rakhni hai"। yeh hai baapdaada ka patra। phir baba ko hamne bhog sveekaar karaaya। baba bole bachchi aaj kuchh naye bachche bhi aaye hain। pahle main unhon ko khilaata hoon। phir vatan mein baba ne sabhi bachchon ko emerge kar apne haston se jaldi-jaldi ek ek drishti bhi de rahe the,haathon se gitti bhi khila rahe the। lekin ek ek ko ek second bhi jo drishti de rahe the, us drishti mein bahut kuchh bhara hua tha। uske baad phir teesra drishya hamne dekha। baba ko kaha ki sabhi ne ek prashn poochhne ke liye kaha hai। baba ne kaha jo bhi prashn hain woh poochh sakte ho। baba to ek akshar mein javaab de dega।

prashn:-

sabhi poochhte hain ki pichhaadi ke samay aap ne kuchh bola nahin। baahar ki scene to ham sabhi ne suni hai lekin andar kya tha woh anubhav bhi sunna chaahte hain। baba bole, haan bachchi, kyon nahin। apna anubhav sunaayenge। achha lo suno -

bachchi khel to sirf 10-15 minute ka hi tha। us thode se samay mein hi anek khel chale। usmein bhinna-bhinna anubhav hue। pahla anubhav to yeh tha ki pahle jor se yuddha chal rahi thi। kiski? yogbal aur karmabhog ki। karmabhog bhi full force mein apne taraph kheench raha tha aur yogbal bhi full force mein hi tha। aise anubhav ho raha tha ki jo bhi shareer ke hisaab-kitaab rahe huai the woh phat se yog agni mein bhasma ho rahe the। aur main saakshi ho dekh raha hoon, jaise akhaade mein baith mallayuddha dekhte hain। matlab to donon ka force poora hi tha। uske baad baba bole ki kuchh samay baad karmabhog (darda) to bilkul nirbal ho gaya। bilkul darda gum ho gaya। aise hi anubhav ho raha tha ki aakhreen mein yogbal ne karmabhog par jeet pa li। us samay teen baaten saath-saath chal rahi thi woh kaun si? ek taraph to baba se baaten kar raha tha ki baba aap humein apne paas bula rahe ho। doosre taraph yoon to koi khaas bachchon ki smriti nahin, lekin sabhi bachchon ke sneh ki yaad shuddh moh ke roop mein thi baaki shuddh moh ki rag va yeh sankalp ki chhutti nahin li va aur koi bhi sankalp nahin tha। teesri taraph yeh bhi anubhav ho raha tha ki kaise shareer se aatma nikal rahi hai। karmaateet nyaari avastha jo baba ne pahle murli bhi chalaai ki kaise bhaan bhaan hokar sannaata ho jaata hai। vaise hi bilkul dead silence ka anubhav ho raha tha aur dekh raha tha ki kaise ek-ek ang se aatma apni shakti chhodti ja rahi hai। to karmaateet avastha ki mrityu kya cheej hai woh anubhav ho raha tha। yeh hai mera anubhav। phir hamne baba ko kaha ki baba sabhi bachche kehte hain agar ham sabhi saamne hote to baba ko rok lete। to baba ne kahaan bachchi rok lete to yeh drama kaise hota। phir hamne kaha baba yeh scene jaise ab to artificial lag rahi hai। real drama nahin lagta। baba ne kaha ki bachchi yeh sneh ki meethi taar juti hone ke kaaran tumko ant tak yeh wonder hi dekhne mein aayega aur ab tak bhi to sambandh hai। bhal saakaar rath gaya hai lekin brahma ke roop mein avyakt part baja rahe hain। baba ne kaha main bhi kabhi saakaar vatan mein chala jaata hoon phir shiv baba poochhte hain kahaan baithe ho? yahaan baithe jaise saakaar vatan mein। yeh makaan ban raha hai vahaan tak jaata hoon। mainne kaha baba, kabhi kabhi lagta hai ki jaise baba chakra laga rahe hain। baba ne kaha main chakkar lagaata hoon to woh bhaasna to bachchon ko aayegi hi। matlab to rooh roohaan ho rahi thi। phir baba ne ek drishya dikhaaya jaise ek chakra ke andar bahut chakra dikhaai pade। chakra ka dhang aise banaaya tha ki us chakra se nikalne ke 4-5 raaste dikhaai pade parantu nikal na paaye। sirf brahma baba ka yeh dikhaaya ki chakra mein chalte-chalte pyaainta (zero) par khade ho gaye, nikle nahin। baba ne sam- jhaaya ki yeh hai drama ka bandhan। brahma bhi drama ke sarkal se nikal nahin sakte। drama ke bandhan se koi bhi nikal nahin sakte। us zero pyaainta tak pahunch gaye lekin phir bhi drama ka meetha bandhan hai। jis meethe bandhan ko khel ke roop mein dikhaaya। phir mishri baadaami khilaai। chhutti di, bola, jaao bachchi time ho gaya hai।

8. aaj jab vatan mein gai to koi bhi najar nahin aa raha tha। door se koi jaise aavaaj aa rahi thi - aise lag raha tha jaise koi khaas kaarya ho raha ho। main pahle to kuchh rooki lekin phir aage chalkar kya dekha - shivbaaba brahma baba,mama aur vishvakishor chaaron hi aapas mein baatcheet kar rahe the aur bahut plan unke aage rakhe the। jismen kuchh nishaan aadi dikhaai de rahe the। lekin samajh mein nahin aaya। mama sabhi bachchon ka haalchaal poochh rahi thi। mainne kaha mama aapne baba ko bhi bula liya। mama boli - mama bhi nahin chaahti ki bachchon se maat-pita ka saakaari saath chhoote lekin drama। phir mainne baba se poochha - baba yeh plans aadi kya hain? baba bole - bachchi,jaise martial ke paas saare nakshe rehte hain ki kahaan-kahaan kya-kya ho raha hai। aage kya hona hai - vaise yeh bhi sthaapna ke kaarya ki hi baatcheet chal rahi thi। jo phir sunaayenge। iske baad ek drishya dikhaaya - jismen teen sangathan the। ek to dekha laal-laal cheetiyaan jo aapas mein gend ke maaphik iktthi ho ja rahi thi। drishya aisa tha jo brahma baba ne shuru-shuru mein dekha tha -doosra sangathan tha mool vatan mein aatmaayen shama roop mein thi teesra sangathan - ham braahmanon ka tha। jo sabhi circle roop mein baithe the aur beech mein baapdaada the। woh aise lag raha tha jaise phool ke beech mein boor hota hai aur chaaron or patte hote hain। iska rahasya baba ne bataaya - ki bachchi jab pratyakshata shuru hui to bhi sangathan mein dekha। ant mein bhi aatmaon ko sangathan roop mein hi rehna hai aur ab madhya mein bhi sangathan hai। sangathan ki shakti hai to koi bhi hila nahin sakta। dekho, baapdaada ne kahaan-kahaan se chun-chunkar sangathan banaaya hai। to bachche bhi jab sangathan mein chalenge to maaya ka vaar nahin hoga। jaise gulaab ka phool va koi bhi phool hota hai to unko yogya sthaan par rakhenge aur akela patta hoga to haath se jaldi masal denge। to bachchon ka bhi sangathan roopi guldasta hoga to vijay praapta karte rahenge। koi vaar nahin kar sakega। aise kehte baba ne kaha ki sabhi bachchon ko kehna ki sangathan hi safety ka saadhan hai।

9. aaj jab vatan mein gai to baapdaada donon bahut busy the। kya dekha - donon ke aage bahut se phool bhi the aur patte bhi the। jaise guldaste mein phool bhi daale jaate aur patte bhi daale jaate। phool do teen prakaar ke alag-alag the,unko dekh rahe the aur chhaant rahe the। to baap-daada donon usi hi kaarya mein busy the। mujhe dekha bhi nahin। jab main najdeek gai to mujhe dekh muskaraaya - aur kaha ki main saara din busy rehta hoon। dekho bachchi kitni badi kaarobaar chal rahi hai। yeh phool patte teen quality ke alag-alag karke rakhe hain। pahle baba ne mujhe phool dikhaaye jinki sankhya bahut kam thi phir beech ki quality dikhaai jismen phool bahut the lekin saath mein thode patte bhi lage the। phool achhe the lekin jo patte lage hue the woh kuchh defected the। teesri quality mein phir patte jaasti the aur phool bahut hi kam the। is par baba ne mujhe samjhaaya ki yeh pahli quality jismen thode phool hain - yeh woh bachche hain jo bilkul dil par chadhe hue hain aur aise dil vaale ananya bachche bahut hi thode hain। doosre number vaale bachche hain bahut achhe, parantu thoda kuchh kami hai। phool bane hain lekin thodi kami hai। baaki teesri quality ke hain praja। unmein koi phool nikalta hai jo peechhe jaane vaala hai। baaki sab hain praja। to do oopar ki quality bachchon ki hai। baapdaada ab guldasta sajaate hain। jab guldasta sajaaya jaata hai to sirf phool daalne se guldasta nahin shobhta। usmein kuchh patte bhi chaahiye। tum phool ho lekin tumhaare saath patte bhi chaahiye। tum raaja banenge to praja bhi chaahiye na। to praja roopi patton ke beech mein phool shobhta hai। to yahaan baithe tum bachchon ka guldasta banaata hoon। aur dekhta hoon ki ek phool ne kitni praja banaai hai। jisne jaasti praja banaai hai unka guldasta bhi shobhta hai। phir baba ne ek prashn poochha- ki jab koi devta par phool chadhaate hain to sirf phool chadhaate patte nikaal dete hain kyon? patte to phool ka show hote hain phir patte kyon nikaal dete?phir baba ne sunaaya ki tum bachchon se hi yeh saari rasam-rivaaj hoti hai। jab tum pahle arpan hue to akele the lekin phool ko agar kuchh samay rakhna ho to patte saath mein honge to rakh sakenge vaise hi jab tum pahle arpan hue to tum akele phool arpan hue ho। phir tumko 21 janmon ke liye avinaashi chalna hai - to praja roopi patte bhi lagaaye jaate hain। pahle tum aaye to praja nahin thi lekin ab to tum phoolon ki shobha hi praja roopi patton se hai isliye baapdaada kehte hain, praja banaao।

10.aaj jab main vatan mein gai to aise laga jaise koi soorya ke najdeek jaae to soorya ki garma- is ya sakaash tej aati hai,aise hi aaj vatan mein jaise hi aage badhte gaye to aise anubhav hua jaise koi bhatti ke aage jaate hain। aaj baba laal-laal light mein jaise avyakt feature mein dikhaai de rahe the aur soorya ke samaan kirnen nikal rahi thi। kya dekha ki neeche bahut badi sabha hai। aisi sabha saakaar reeti mein braahmanon ki kabhi nahin thi - sabhi braahmanon par woh kirnen ja rahi thi। aur main bhi vatan mein gai to dekha mere par bhi woh kirnon ki light might aa rahi hai। kuchh samay baad - main baba se usi roop mein mili aur kaha ki baba main bhog lekar aai hoon। baba bhog sveekaar karte hue sikhla rahe the ki khaate samay kaise light might ki sthiti mein rehna hai। phir mainne baba se poochha ki bachchon ko yaad-pyaar to denge na। is par baba ne kaha ki sneh ka roop to bahut dekha lekin sneh ke saath shakti roop ki sthiti jo baba bachchon ki banaane chaahte hain, woh abhi tak kam hai। to aaj baba sneh ke saath shakti bhar rahe the। aur kaha isi se hi service mein saphalta hogi। baba ne sandesh bhi yeh diya ki sirf sneh nahin lekin saath mein shakti bhi bharni hai। jo baba ne khud drishya mein dikhaaya ki bachchon ko is srishti ko light-might ki kirnen deni hai। itne din baba ka sneh ke roop se milan tha lekin aaj sneh ke saath light-might ka roop tha to main use lene mein hi tatpar ho gai aur vaapas saakaar vatan mein aa gai।

11. aaj jab main vatan mein gai to jaise ek sabha lagi hui thi - class ho raha tha। pahle to main dheere-dheere aage badhne lagi। baapdaada ne naynon se svaagat kiya। phir bole bachchi in sabse mulaakaat karo aur yeh bhog sabhi ko khilaao। to kya dekha - jo aatmaayen advance mein shareer chhodkar gai hain un sabhi ko emerge kar baba class kara rahe the। phir sabhi ko madhuban ka brahma bhojan sveekaar karaaya। us sangathan mein sabhi gai hui aatmaayen thi। phir mainne ek drishya dekha - bahut makaan ban rahe the। aur jaise makaan mein jab chhat padti hai to usko bahut aadhaar dete hain phir jab seementa pakka ho jaata hai to woh aadhaar lakdi patti aadi nikaal dete hain। to is tarah makaan banne ki chhat bharne ki kaarobaar bahut jor shor se chal rahi thi। to main is makaan ko dekhti rahi aur baba gaayab ho gaya। baba ne yeh dikhaaya ki makaan banaane ke liye pahle aadhaar diya jaata hai phir aadhaar nikaala jaata hai। aise hi drishya dekhte yahaan pahunch gai।

12. aaj jab main vatan mein gai to baba nahin dikhaai diye। thodi der ke baad baba ko dekha to mainne poochha aap kahaan gaye the? baba bole - aaj guroovaar ka din hai to sabhi bachchon ke paas chakra lagaane gaye the। vaise to saakaar roop mein itne thode samay mein sab jagah nahin pahunch sakta tha। ab to avyakt vatan mein avyakt vimaan dvaara rocket se bhi jalda pahunch sakte hain। hamne kaha baba aapne chakra lagaaya to usmein aapne kya dekha! baba ne kaha - majority bachche abhi tak sneh mein achhe chal rahe hain aur bahut aise bhi hain jinhon ke andar kuchh sankalp bhi hai ki na maaloom ab kya hoga। parantu sangathan ke sahaare ab tak theek hain। baba ne kaha ki sneh ke aadhaar par jo bachche abhi tak thahre hue hain to ab sneh ke saath gyaan ka foundation jara bhi dheela hua to bachchon par vaayumandal ka asar bahut sahaj ho sakta hai। isliye har ek bachche ko apni checking karni hai। phir bhi vyakta deh mein ho to sneh mein pahle force achha rehta hai lekin is sneh par phir jaise-jaise din padte jaayenge to vaayumandal ka asar jaldi pad sakta hai। sneh mein bhal kehte hain ki shivbaaba kalyaankaari hai ya baba ne jo kiya hai woh theek hai। sneh ke vash sankalp banda kiya hai। sneh ki result majority ki adhik hai। vaayumandal ka asar hamaare par na ho aur hamaara asar vaayumandal par ho tab kaaydemujeeb chal sakte hain। hamne kaha ki baba hamaare paas to gyaan ki hi baaten chalti hain। tab baba ne kaha bachchi, gyaan ke foundation se apne ko santushta rakhen,aise bachche thode hain। to aaj baba ne yeh result bataai aur kaha ki sabhi ko jaakar sunaana ki vaayumandal ko humein change karna hai na ki vaayumandal humein change kare। phir bhog sveekaar karaane ke baad baba ne ek scene dikhaai - ek bahut bada haal tha, us haal mein chaaron or se bahut badbu aa rahi thi। us kamre mein do teen bahut achhi khushboodaar agarbatti jal rahi thi। dheere-dheere agarbatti ki khushbu ne badbu ko daba diya। baba ne sunaaya dekho bachchi, chaaron taraph badbu ka vaayumandal tha lekin itni si agarbatti ne vaayu- mandal ko badal diya। to tum bachchon par jab dekho ki vaayumandal ka asar hota hai to ag-rabatti ka misaal saamne rakho ki ham sarvashaktivaan baap ke bachche hain। agar vaayumandal ka asar hamaare par aaye to isse to agarbatti achhi hai। jab tum bachche powerful khushboodaar banenge tab yeh vaayumandal dab jaayega। baba ne kaha ab harek bachche ko shiksha to mili hai। shiksha bhi sabhi bade meethe roop se sunte hain। lekin jaise meethe roop se sunte ho usi meethe roop se dhaaran bhi karna hai। meethaapan chipakta bahut jaldi hai। jo aise meetha banenge to baap se chipak jaayenge। yaad aur meethaapan nahin hoga to alag-alag rahenge। jaise namkeen cheej aapas mein kabhi nahin milti hai। to jo aise honge unki avastha yogayukta nahin rahegi। ab jaise bachchon ne suna vaise hi dhaaran karenge to bahut bal milega।

13. aaj jab main vatan mein gai to baap aur daada donon saamne khade the। aur jaate hi naynon ki mulaakaat se sabhi ki jo yaadapyaar le gai thi woh di। jaise hi main yaad de rahi thi to saakaar baba ne mera haath pakda। us haath pakadne mein na maaloom kya jaadu tha - aise anubhav hua jaise saagar mein koi snaan karta hai, aise thode samay ke liye main prem ke saagar mein leen ho gai। uske baad hamne almighty baba ki taraph dekha। to baba ne kaha bachchi-baap mein mukhya do gun jo hain woh bachchon ne saakaar roop mein anubhav kiya hai। woh do gun kaun se hain? jitna hi gyaan swaroop utna hi prem swaroop। to bachchon ko bhi yeh do gun apne har chalan mein dhaaran karne hain। phir mainne baba se poochha ki pahle vatan mein jo gaye hue bachchon ka itna sangathan tha iska rahasya kya tha! baba ne kaha poora raaj to baad mein chalkar sunaayenge lekin saakaar roop se jo koi service arth ya kuchh hisaab kitaab chuktu karne arth chale gaye hain un bachchon se mulaakaat karne ke liye bulaaya tha। baba unse haalchaal poochh rahe the ki kaun-kaun, kis reeti se kis roop se kya-kya kar rahe hain। hamne kaha baba, yeh kis roop se sthaapna ke kaarya mein busy hain? to baba bole bachchi yeh aage chalkar spashta karenge, phir bhi short mein sunaate hain। baba ne kaha - bachchi jab ladaai hoti hai to kisi bhi lashkar ko jab jeetna hota hai to sirf ek taraph se nahin chaaron taraph se lashkar bhejkar poora gheraav daal dete hain। is sangathan se yeh maaloom hua ki jo bhi bachche gaye hain woh chaaron aur phail gaye hain। abhi chaaron taraph sthaapna ki neev pad gai hai। baaki ab order dene ki jaroorat hai।

phir baba ne chaar stages ki ek seedhi dikhaai। pahli stage dikhaai - gyaan sunna, sochna- samajhna aur nishchay karna। koi soch karta hai, koi manthan karta hai। doosri stage bataai - ki ant samay kaise vinaash ho raha hai। kahaan baadh se doob rahe hain, kahaan kya ho raha hai lekin shakti dal aur paandav bilkul adol khade the। teesri stage dikhaai ki aatmaayen jaise nikal kar paramdham mein gubbaare maaphik ja rahi hain। phir paramdham ki scene bhi baba ne dikhaai। chauthi scene - svarga ki dikhaai। svarga mein aatmaayen kaise chhote-chhote bachchon mein pravesh ho rahi hain। to yeh sabhi stages seedhi ke chitra ke roop mein dikhaai। yeh seedhi dikhaane ka rahasya bataate hue baba ne kaha,bachchon ki buddhi mein yeh ghoomta rahe ki ab hamaari kya stage hai। jo antim stage dhaaran karni hai woh lakshya pahle se hi buddhi mein rakhenge to purooshaartha tej chalega। vinaash ke samay ki jo scene dikhaai usmein aap bachchon ki adol avastha rahe। phir baba ne humein dher heere haath mein diye aur kaha in heeron ka teeka sabhi bachchon ko lagaana। yeh heere kyon de raha hoon? kyonki heere misal aatma mastak mein rehti hain। to harek aatma sachcha heera ban chamakti rahe।

achha !