Avyakt murli du dimanche 29 août 1971

29-08-1971 madhuban avyakt baapdaada om shanti 29-08-1971

sabse sookshm bandhan - buddhi ka abhimaan

yogayukta aur bandhanmukta bane ho? jitna-jitna yogayukta utna hi sarva-bandhan mukta bante jaate hain। to yogayukta ki nishaani hai hi bandhanmukta hona। apne sarva bandhanon ko jaante ho na, ki kis-kis prakaar ke bandhan hain jo yogayukta hone mein rukaavat daalte hain? jaise sarva duhkhon ki list nikaalte the vaise bhinna-bhinna bandhanon ki list nikaalo। us list ko saamne rakhte hue check karo ki kitna bandhanon se mukta hue hain aur kitne bandhan abhi tak rahe hue hain। isse apne sampoorn yogayukta arthaat sampoorn stage ko parakh sakte ho ki kitna sampoorn stage ke najdeek pahunch paaye hain। bandhanon ki list saamne laao, kitne prakaar ke bandhan honge? inki list niklegi to jaal maaphik dikhaai degi। kitni maheen taaron ki jaal banaate hain। to ab judge karo ki kitne bandhan rah gaye hain aur kaun-kaunse rah gaye hain? koi bade-bade bandhan hain va chhote-chhote bandhan hain? jyaada mehnat kin bandhanon ko chuktu karne mein lagti hai? sabhi se kade se kada bandhan kaun sa hai? (deh-abhimaan) yeh to sabhi bandhanon ka foundation hai। lekin pratyaksha roop mein sabhi se kada bandhan kaun sa hai? lok laaj to bahut chhoti baat hai, yeh to first step hai। sabhi se bade te bada antim bandhan hai shreemat ke saath apne gyaan buddhi ko mix karna arthaat apne ko samajhdaar samajh kar shreemat ko apni buddhi ki kamaal samajh kar kaam mein lagaana। jisko kahenge gyaan-abhimaan arthaat buddhi ka abhimaan। yeh sabhi se sookshm aur bada bandhan hai। is bandhan se cross kiya to maano sabhi se bade te bada jump diya। koi bhi baat mein agar koi madhur shabdon mein bhi kamjori ka eeshaara de aur usi samay koi sanskaar, svabhaav va service ke liye buraai aakar karte hain; to donon hi baaten saamne rakhte hue socho ki zara bhi vritti mein va drishti mein va soorat mein pharka aata hai? zara bhi pharka nahin aaye, zara bhi himmat ullaas mein antar nahin aaye - isko kaha jaata hai is bandhan ko cross karna। agar mukh se na bola lekin suni hui baat ka vyartha sankalp bhi chala to isko kahenge bade te bada bandhan।

jo gaayan hai ninda-stuti, haar-jeet, mahima va glaani mein samaan arthaat buddhi mein knowledge rahegi ki yeh haar hai, yeh jeet hai, yeh mahima hai, yeh glaani hai। lekin ekras avastha va sthiti se dagmag na ho - isko kaha jaata hai samaanta। knowledge hote hue bhi dagmag nahin hona - yeh hai vijay। to is kade bandhan ko cross kar liya arthaat sampoorn pharishta ban gaya। iske liye mukhya prayatna kaun sa hai? yeh avastha kaise rakhen jo is bandhan ko bhi cross kar len? gyaan-abhimaan ko kaise cross kare? iska purushaartha kya hai? aap sabhi ne jo bhi baaten sunaai woh bhi attention mein rakhne ki hain। lekin saath-saath is kade bandhan ko cross karne ke liye sadaiv yeh baaten yaad rahen ki ham kalyaankaari baap ki santaan hain। jo bhi dekhte hain, sunte hain unmein akalyaan ka roop hote hue bhi apni kalyaan ki baat ko nikaalna hai। bhale roop akalyaan ka, haar va glaani ka ho kyonki sthiti ko dagmag karne ke kaaran yeh teenon hi hote hain। to roop bhale yahi dikhaai de lekin us akalyaan ke roop ko kalyaankaari ke roop mein transfer karne ki shakti va glaani ko bhi unnati ka roop samajh dhaaran karne ki shakti va haar se bhi aage ke liye hajaar guna vijayi banne ki himmat, ullaas aur yukti nikaalne ki shakti agar apne paas hai to kabhi bhi soorat aur seerat mein unka asar nahin padega। to rahasya kya hua? koi bhi baat ko va samasya ko transfer kar traansaperenta (paardarshi) banna hai athva apkaari par bhi upkaari banna hai। jaise sanskaaron ki samaanta ke kaaran koi sakhi ban jaati hai, aise ninda karne vaale ko bhi us sneh aur sahayog ki drishti se dekhna hai। sanskaaron ke samaanta vaali sakhi aur glaani karne vaali - donon ke liye andar sneh aur sahayog mein antar na ho। isko kaha jaata hai apkaari par upkaar ki drishti athva vishwa kalyaankaari banna। aisi sthiti ab ban jaati hai to samjho sampoornata ke sameep hain। aise nahin jinke sanskaar milenge unko saathi banaayenge, doosron se kinaara kar lenge। bhale kade sanskaar vaali ho unko bhi apne shubhchintak sthiti ke aadhaar se transfer kar sameep laao। jab koi hopeless case ko theek karte hain tab hi to naam baala hota hai na। theek ko theek karna va theek se theek hokar chalna yeh koi badi baat nahin hai। badi baat hai apni shreshtha smriti aur vritti se aise-aise ko bhi badalkar dikhaana। dekho, homyopaithik davaai ki itni chhoti-chhoti goliyaan kitne bade rog ko khatma kar sakti hain! to kya master sarvashaktimaan apne vritti aur drishti se kiske bhi kade sanskaar ke rog ko khatma nahin kar sakte। agar koi ke sanskaaron ko palta nahin sakte va khatma nahin kar sakte hain to samjho mujh master rachayita se to rachna ki shakti jyaada kaam kar rahi hai। jaise misaal bataaya - chhoti-si goliyaan rog ko khatma kar sakti hain, woh davaai yeh nahin kehti ki rog ko kaise mitaayen to kya aapki rachna mein shakti hai aur aap master rachayita mein nahin?

sadaiv yeh lakshya rakho ki transfer hona hai aur transfer karna hai। aise nahin kehna ki yeh transfer ho to main transfer ho jaaoon। nahin। mujhe hona hai aur mujhe hi karna hai। jo aise himmat rakhne vaale bante hain, vahi vishwa ke mahaaraajan ban sakte hain। to vishwa mahaaraajan banna hai to jo daivi parivaar ki aatmaaen bhavishya ke vishwa mein aane vaali hain arthaat yeh chhota-sa parivaar jo vishwa-raajya ke adhikaari banne vaale hain, in sabhi aatmaon ke oopar ab se hi sneh ka raajya karna hai। order nahin chalaana hai। abhi se vishwa mahaaraajan nahin ban jaana hai। abhi to vishwa sevaadhaari banna hai। sneh dena hi bhavishya ke liye jama karna hai। yeh bhi dekhna hai ki apne bhavishya ke khaate mein yeh sneh kitna jama kiya hai। gyaan dena saral hai lekin vishwa mahaaraajan banne ke liye sirf gyaan daata nahin banna hai। iske liye sneh dena arthaat sahayog dena hai। jahaan sneh hoga vahaan sahayog avashya hoga। agar yeh high jump de diya to sabhi baaton mein shreshtha sahaj hi ban jaayenge।

achha, ab bhatthi vaalon ne apne ko transfer kiya? jitna transfer kiya hoga utna hi harek ki soorat translight ke chitra ke misal dikhaai degi। translight ka chitra door se hi spashta dikhaai deta hai। to aise sabhi baaton mein spashta aur shreshtha bane ho? (banenge) kab tak banenge? paanch varsha tak? kab tak ka vaayda kiya hai? itni shakti apne mein bhari jo kaisi bhi samasyaaen aayen, kaisi bhi baaten na banne vaali bhi ban jaaen, to bhi achal, adol, ekras rahenge? aisi apne mein shakti bhari hai? aise nahin kehna ki yeh to hamko pata hi nahin tha। aisa bhi hota hai! nai baat hui isliye fail ho gaya, yeh nahin kehna। jab bhatthi karke jaate ho to jaise apne mein naveenta laate ho। to maaya bhi pareeksha lene ke liye nai-nai baaten saamne laayegi। isliye achhi tarah se master knowledgeful, master trikaaldarshi bankar ja rahe ho to door se hi maaya ke vaar ko pahchaan kar khatma kar do, aise master sarvashaktimaan bane ho? kya, kyon ki bhaasha khatma ki? “kya karen, kaise karen''… yeh khatma। sirf teen maas ka paper nahin, abhi to ant tak ka vaayda karna hai। yeh to gairanted maal ho gaya na। apni yatha shakti harek ne jo bhi prayatna kiya woh bahut achha kiya। ab achhe te achha bankar dikhaana। jaise yeh nasha hai vaise hi pravritti mein rehte hue bhi is nashe ko kaayam rakhna hai। is group ka chhaap kya raha? koi aapko badal na sake lekin aap sabhi ko badal kar dikhaana। koi paristhiti va koi vaayumandal hamko nahin badle lekin ham paristhitiyon ko, vaayumandal ko, vrittiyon ko, sanskaaron ko badal kar dikhaayen - yeh pakka chhaap lagaana hai। tred mark bhatthi ka avinaashi laga kar jaana hai। apna tred mark nahin bhoolna। agar bhatthi ke dhaarnaaon ki smriti saath-saath rakhenge to saphalta sadaiv saath rahegi। achha।

* * * om shanti * * *