Avyakt murli du mercredi 31 mai 1972

>

31-05-72om shanti avyakt baapdaadaamdhuban

bhavishya mein ashta devta aur bhakti mein ishta banne ka purooshaartha

apne aapko sada shivshakti samajh kar har karma karti ho? apne alankaar va ashta bhujaadhaari moorta sada apne saamne rehti hai? ashta bhujaadhaari arthaat ashta shaktivaan। to sada apne ashta shakti-swaroop spashta roop mein dikhaai dete hain? shaktiyon ka gaayan hai na -- shivmai shaktiyaan। to shiv baba ki smriti mein sada rehti ho? shiv aur shakti - donon ka saath-saath gaayan hai। jaise aatma aur shareer - donon ka saath hai, jab tak is srishti par part hai tab tak alag nahin ho sakte। aise hi shiv aur shakti - donon ka bhi itna hi gahra sambandh hai, jo gaayan hai shivshaktipan ka। to aise hi sadaiv saath ka anubhav karti ho va sirf gaayan hai? sada saath aisa ho jo koi bhi kab is saath ko tod na sake, mita na sake। aise anubhav karte hue sada shivmai shakti-swaroop mein sthit hokar chalo to kab bhi donon ki lagan mein maaya vighna daal nahin sakti। kahaavat bhi hai - do das ke baraabar hote hain। to jab shiv aur shakti donon ka saath ho gaya to aisi shakti ke aage koi kuchh kar sakta hai? in dabhle shaktiyon ke aage aur koi bhi shakti apna vaar nahin kar sakti va haar khila nahin sakti। agar haar hoti hai va maaya ka vaar hota haiy; to kya us samay shiv-shakti-swaroop mein sthit ho? apne ashta-shaktiyaan-sampanna sampoorn swaroop mein sthit ho? ashta shaktiyon mein se agar koi bhi ek shakti ki kami hai to ashta bhujaadhaari shaktiyon ka jo gaayan hai woh ho sakta hai? sadaiv apne aapko dekho ki ham sadaiv ashta shaktiyaandhaari shiv-shakti hokar ke chal rahi hain? jo sada ashta shaktiyon ko dhaaran karne vaale hain vahi ashta devtaaon mein aa sakte hain। agar apne mein koi bhi shakti ki kami anubhav karte ho to ashta devtaaon mein aana mushkil hai। aur ashta devta saari srishti ke liye ishta roop mein gaaye aur pooje jaate hain। to bhakti maarga mein ishta banna hai va bhavishya mein ashta devta banna hai to ashta shaktiyon ki dhaaran sadaiv apne mein karte chalo। in shaktiyon ki dhaarna se svatah hi aur sahaj hi do baaton ka anubhav karenge। woh kaunsi do baaten? sada apne ko shiv-shakti va ashta bhujaadhaari athva ashta shaktidhaari samajhne se ek to sada saatheepan ka anubhav karenge aur doosra sada apni stage saaksheepan ki anubhav karenge। ek saathi aur doosra saakshi, yeh donon anubhav honge, jisko doosre shabdon mein saakshi avastha arthaat bindu roop ki stage kaha jaata hai aur saatheepan ka anubhav arthaat avyakt sthiti ka anubhav kaha jaata hai। ashta shakti ki dhaarna hone se in donon sthiti ka anubhav sada sahaj aur svatah karenge। aise anubhav karenge jaise koi saakaar mein saath hota hai to phir kab bhi apne mein akelaapan va kamjoreepan anubhav nahin hoti hai। is reeti se jab sarvashaktivaan shiv aur shakti donon ki smriti rehti hai to chalte-phirte bilkul aise anubhav karenge jaise saakaar mein saath hain aur haath mein haath hai। gaaya jaata hai na - saath aur haath। to saath hai buddhi ki lagan aur sada apne saath shreemat roopi haath anubhav karenge। jaise koi ke oopar kiska haath hota hai to woh nirbhay aur shakti-roop ho koi bhi mushkil kaarya karne ko taiyaar ho jaata hai। isi reeti jab shreemat roopi haath apne oopar sada anubhav karenge, to koi bhi mushkil paristhiti va maaya ke vighna se ghabraayenge nahin। haath ki madad se, himmat se saamna karna sahaj anubhav karenge। iske liye chitron mein bhakta aur bhagwan ka roop kya dikhaate hain? shaktiyon ka chitra bhi dekhenge to vardaan ka haath bhakton ke oopar dikhaate hain। mastak ke oopar haath dikhaate hain। iska arth bhi yahi hai ki mastak arthaat buddhi mein sadaiv shreemat roopi haath agar hai to haath aur saath hone kaaran sada vijayi hain। aisa sadaiv saath aur haath ka anubhav karte ho? kitni bhi kamjor aatma ho lekin saath agar sarvashaktivaan hai to kamjor aatma mein bhi svatah hi bhale bhar jaata hai। kitna bhi bhayaanak sthaan hai lekin saathi shoorveer hai to kaisa bhi kamjor shoorveer ho jaaega। phir kab maaya se ghabraayenge nahin। maaya se ghabraane va maaya ka saamna na karne ka kaaran saath aur haath ka anubhav nahin karte ho। baap saath de rahe hain, lekin lene vaala na leve to kya karenge? jaise baap bachche ka haath pakad kar unko sahi raaste par laana chaahte hain, lekin bachcha baar-baar haath chhuda kar apni mat par chale to kya hoga? moonjh jaaega। is reeti ek to buddhi ke sang aur saath ko bhool jaate ho aur shreemat roopi haath ko chhod dete ho, tab moonjhate ho va uljhan mein aate ho। aur shreemat roopi haath ko chhod dete ho tab moonjhate ho va uljhan mein aate ho athva kamjor ban jaate ho। maaya bhi badi chatur hai। kabhi bhi vaar karne ke liye pahle saath aur haath chhuda kar akela banaati hai। jab akele kamjor pad jaate ho tab maaya vaar karti hai। vaise bhi agar koi dushman kisi ke oopar vaar karta hai to pahle unko sang aur saath se chhudaate hain। koi na koi yukti se unko akela bana kar phir vaar karte hain। to maaya bhi pahle saath aur haath chhuda kar phir vaar karegi। agar saath aur haath chhodo hi nahin to phir sarvashaktivaan saath hote maaya kya kar sakti hai? maayaajeet ho jaayenge। to saath aur haath ko kab chhodo nahin। aise sada master sarvashaktivaan bankar ke chalo। bhakti mein bhi pukaarte hain na - ek baar haath pakad lo। to baap haath pakadte hain, haath mein haath dekar chalaana chaahte hain phir bhi haath chhod dete hain to bhatakna nahin hoga to kya hoga? to ab apne aapko bhatkaane ke nimitta bhi svayan hi bante ho। jaise koi bhi yoddha yuddha ke maidaan par jaane se pahle hi apne shastrako, apni saamagri ko saath mein rakh karke phir maidaan mein jaate hain। aise hi is karmakshetra roopi maidaan par koi bhi karma karne athva yoddhe ban yuddha karne ke liye aate ho; to karma karne se pahle apne shastraarthaat yeh ashta shaktiyon ki saamagri saath rakh kar phir karma karte ho? va jis samay dushman aata hai us samay saamagri yaad aati hai? to phir kya hoga? haar ho jaaegi। sada apne ko karmakshetra par karma karne vaale yoddhe arthaat mahaarthi samjho। jo yuddha ke maidaan par saamna karne vaale hote hain woh kabhi bhi shastrako nahin chhodte hain। sone ke samay bhi apne shastra ko nahin chhodte hain। aise hi sote samay bhi apni ashta shaktiyon ko vismriti mein nahin laana hai arthaat apne shastra ko saath mein rakhna hai। aise nahin - jab koi maaya ka vaar hota hai us samay baith socho ki kya yukti apnaaoon? soch karte-karte hi samay beet jaaega। isliye sadaiv ever ready rehna chaahiye। sada alert aur ever ready agar nahin hain to kahin na kahin maaya dhokha khilaati hai aur dhokhe ka result kya hota? apne aapko dekh kar hi duhkh ki lahar utpanna ho jaati hai। apni kami hi kami ko laati hai। agar apni kami nahin hai to kab bhi koi bhi kami nahin aa sakti। begampur ke baadshaah kehte the na। yeh is samay ki stage hai jabki gam ki duniya saamne hai। gam aur be-gam ki abhi knowledge hai। iske hote hue us sthiti mein sada nivaas karte, isliye begampur ka baadshaah kaha jaata hai। bhale beggar ho lekin beggar hote bhi begampur ke baadshaah ho। to sada is nashe mein rehte ho ki ham begampur ke baadshaah hain? baadshaah athva raaje logon mein automatically shakti rehti hai raajya chalaane ki। lekin us automatic shakti ko agar sahi reeti kaam mein nahin lagaate hain, kahin na kahin ulte kaarya mein phans jaate hain to raajaai ki shakti kho lete hain aur raajya pad ganva dete hain। aise hi yahon bhi tum ho begampur ke baadshaah aur sarva shaktiyon ki praapti hai। lekin agar koi na koi sangadosh va koi karmendriy ke vasheebhoot ho apni shakti kho lete ho to jo begampur ka nasha va khushi praapta hai woh svatah hi kho jaati hai। jaise woh baadshaah bhi kangaal ban jaate hain, vaise hi yahaan bhi maaya ke adheen hone ke kaaran mohtaaj, kangaal ban jaate hain। tab to kehte hain - kya karen, kaise hoga, kab hoga? yeh sabhi hai kangaalpan, mohtaajpan ki nishaani। kahaan na kahaan koi karmendriyon ke vash ho apni shaktiyon ko kho lete hain। samjha? to ashta shakti swaroop begampur ke baadshaah hain, is smriti ko kab bhoolna nahin। bhakti mein bhi sadaiv yahi pukaara ki sada aapki chhatrachhaaya mein rahen। to is saath aur haath ki chhatrachhaaya se baahar kyon nikalte ho? aaj ki puraani duniya mein agar koi chhote-mote martabe vaale ka bhi koi saathi achha hota hai to bhi apni khumaari mein aur khushi mein rehte hain। samajhte hain - hamaara backbone powerful hai। isliye khumaari aur khushi mein rehte hain। aap logon ka backbone kaun hai! jinka sarvashaktivaan backbone hai to kitni khumaari aur khushi honi chaahiye! kab khushi ki lahar khatma ho sakti hai? saagar mein kab lahren khatma hoti hain kya? nadi mein lahar uthti nahin। saagar mein to lahren uthti rehti hain। to master saagar ho na। phir eeshvareey khumaari va eeshvareey khushi ki lahar kab khatma ho sakti hai? khatma tab hoti hai jab saagar se sambandh toot jaata hai; arthaat saath aur haath chhod dete ho tab khushi ki lahar sama jaati hai। agar sada saath ka anubhav karo to paap karma se bhi sada sahaj bach jaao; kyonki paap karma akelepan mein hota hai। koi chori karta hai, jhooth bolta hai va koi bhi vikaar vash hota hai jisko apvitrata ke sankalp va karma kaha jaata hai, woh akelepan mein hi hota hai। agar sada apne ko baap ke saath-saath anubhav karo to phir yeh karma honge hi nahin। koi dekh raha ho to phir chori karenge? koi saamne-saamne sun raha ho to phir jhooth bolenge? koi bhi vikarma va vyartha karma baar-baar ho jaate hain to iska kaaran yeh hai ki sada saathi ko saath mein nahin rakhte ho athva saath ka anubhav nahin karte ho। kabhi-kabhi chalte-chalte udaas bhi kyon hote ho? udaas tab hote hain jab akelaapan hota hai। agar sangathan ho aur sangathan ki praapti ho to udaas honge kya? agar sarvashaktivaan baap saath hai, beej saath hai; to beej ke saath saara vriksha saath hai, phir udaas avastha kaise hogi? akelaapan hi nahin to udaas kyon honge? kabhi-kabhi maaya ke vighnon ka vaar hone ke kaaran apne ko nirbal anubhav karne ke kaaran pareshaan stage par pahunch jaate ho। bhalevaan ka saath bhoolte ho tab nirbal hote ho aur nirbal hone ke kaaran apni shaan ko bhool pareshaan ho jaate ho। to jo bhi kamjoriyaan va kami anubhav karte ho, un sabhi ka kaaran kya hoga? saath aur haath ka sahaara milte hue bhi chhod dete ho। samjha? kehte bhi ho ki saare kalpa mein ek hi baar aisa saath milta hai; phir bhi chhod dete ho। koi kisko haath dekar kinaare karna chaahe aur woh phir bhi doobne ka prayatna kare to kya kaha jaaaiga? apne aapko svayan hi pareshaan karte ho na। bahut samay se is srishti mein rehte hue abhi bhi yahi pareshaani ki sthiti achhi lagti hai? nahin, to baar-baar us taraph kyon jaate ho? abhi jaldi-jaldi chalna hai। speed tej karni hai। saar ko apne mein sama liya to saarayukta ho jaaenge aur asaar sansaar se behad ke vairaagi ban jaaenge। achha।

sada saath aur haath lene vaale begampur ke baadshaahon ko namaste।