Avyakt murli du lundi 4 décembre 1972

>

04-12-72om shanti avyakt baapdaadaamdhuban

mahaaveer aatmaon ki roohaani drill

is samay sabhi kahaan baithe ho? saakaari duniya mein baithe ho va aakaari duniya mein baithe ho? aakaari duniya mein, is saakaar duniya ke aakarshan se pare apne ko anubhav karte ho va aakaari roop mein sthit hote saakaari duniya ki koi bhi aakarshan apni taraph aakarshitanheen karti hai? saakaari duniya ke bhinna-bhinna prakaar ke aakarshan se ek second mein apne ko nyaara aur baap ka pyaara bana sakte ho? karma karte huye karmabandhanon se pare, bandhanayukta se bandhanmukta sthiti anubhav karte ho? abhi-abhi aap roohaani mahaaveer mahaaveerniyon ko direction mile ki shareer se pare ashareeri, aatma- abhimaani, bandhanmukta, yogayukta ban jaao; to ek second mein sthit ho sakte ho? jaise hathayogi apne shvaas ko jitna samay chaahen utna samay rok sakte hain। aap sahaj yogi, svatah yogi, sada yogi, karma yogi, shreshtha yogi apne sankalp ko, shvaas ko praaneshvar baap ke gyaan ke aadhaar par jo sankalp, jaisa sankalp jitna samay karna chaaho utna samay usi sankalp mein sthit ho sakte ho? abhi-abhi shuddh sankalp mein raman karna, abhi-abhi ek sankalp mein sthit hona - yeh practice sahaj kar sakte ho? jaise sthool mein chalte-chalte apne ko jahaan chaahen rok sakte ho। achal, adol sthiti ka jo gaayan hai woh kinhon ka hai? tum mahaaveer-mahaaveerniyaan shreemat par chalne vaale shreshtha aatmaayen ho na। shreemat ke sivaayay aur sabhi maten samaapta ho gai na। koi aur mat vaar to nahin karti? manmat bhi vaar na kare। shaastravaadiyon ki maten, gurooon ki mat, kaliyugi sambandhiyon ki mat - yeh to samaapta ho hi gai। lekin manmat arthaat apni alpagya aatma ke sanskaaron ke anusaar sankalp utpanna hota hai aur us sankalp ko vaani va karma tak bhi laate hain; to usko kya kahenge? isko shreemat kahenge? va vyartha sankalpon ki utpatti ko shreemat kahenge? to shreemat par chalne vaale ek sankalp bhi manmat va aatmaon ke mat arthaat parmat par nahin kar sakte। sthiti ki speed tej na hone kaaran kuchh na kuchh shreemat mein manmat va parmat mix hoti hai। jaise sthool kaar chalaate ho, paitrol ke andar agar zara bhi kuchh kichda mix ho jaata, refine nahin hota hai to speed nahin pakdegi। aise hi yahaan bhi speed nahin badhti। check karo va karaao ki kahin mix to nahin hai? yeh mix, fix hone nahin deti, dagmag hoti rehti hai। shreshtha aatmaaen, padmaapadma bhaagyashaali aatmaaen ek kadam bhi padmon ki kamaai ke bina nahin ganvaate hain। roohaani drill aati hai na। abhi-abhi niraakaari, abhi-abhi aakaari, abhi-abhi saakaari karmayogi। deri nahin lagni chaahiye। jaise saakaar roop apna hai vaise hi niraakaari, aakaari roop bhi apna hi hai na। apni cheezko apnaana, usmein deri kya? paraai cheez ko apnaane mein kuchh samay lagega, soch chalega lekin yeh to apna hi asli swaroop hai। jaise sthool chole ko karttavya ke pramaan dhaaran karte ho aur utaar dete ho, vaise hi is saakaar deh roopi chole ko karttavya ke pramaan dhaaran kiya aur nyaara hua। lekin jaise sthool vastrabhi agar tight hote hain to sahaj utarte nahin hain, aise hi agar aatma ka yeh deh roopi vastra deh ke, duniya ke, maaya ke aakarshan mein tight arthaat khincha hua hai to saral utrega nahin arthaat sahaj nyaara nahin ho sakenge। samay lag jaata hai। thakaavat hoti hai। koi bhi kaarya jab sambhav nahin hota hai to thakaavat va pareshaani ho hi jaati hai। pareshaani kabhi ek thikaane tikne nahin deti। to yeh bhakti ka bhatakna kyon shuru hua? jab aatma is shareer roopi chole ko dhaaran karne aur nyaare hone mein asmartha ho gai। yeh deh ka bhaan apne taraph khainch gaya tab pareshaan hokar bhatakna shuru kiya। lekin ab aap sabhi shreshtha aatmaaen is shareer ke aakarshan se pare ek second mein ho sakte ho, aisi practice hai? practice ki pareeksha ka samay kaun-sa hota hai? jab karmabhog ka jor hota hai। karmendriyaan bilkul karmabhog ke vash apne taraph aakarshan karen, jisko kaha jaata hai bahut darda hai। kehte hain na - bahut darda hai, isliye thoda bhool gai। lekin yeh to tag oph vaar ( Tug of War; rassa-kashi) ka samay hai, aise samay karmabhog ko karmayog me parivartan karne vaale, saakshi ho karmendriyon ko bhogvaane vaale jo hote hain, unko hi ashta ratna kaha jaata hai, jo aise samay vijayi ban dikhaate hain। kyonki ashta ratnon mein sadaiv ashta shaktiyaan kaayam rehti hain। aise ashta hi bhakton ko alpakaal ki shaktiyon ka vardaan dene vaale ishta bante hain।

aise ashta bhujaadhaari arthaat ashta shakti sampanna, shakti roop mahaaveer- mahaaveerniyaan, ek second mein sankalp ko control karne mein sarvashreshtha aatmaaen, sarva aatmaon ko baap ka parichay dilaane vaali aatmaaen, bichhudi hui aatmaon ko baap se milaane vaali aatmaaen, pyaasi aatmaon ko sadaakaal ke liye tritpa karne vaali aatmaaen, bandhanmukta, yogayukta, yuktiyukta, jeevanmukta aatmaon ko yaad-pyaar aur namaste।

mela arthaat milan। yahaan antim mela kaun-sa hoga? sangam ki baat sunaao। karmaateet avastha bhi tab hogi jab pahle mela hoga। baap ke sanskaar, baap ke gun, baap ke karttavya ki speed aur baap ke avyakt niraakaari sthiti ki stage - sabhi mein samaanta ka mela lagega। jab aatmaaen baap ki samaanta ke mele ko manaavengi tab jay-jaykaar hogi, vinaash ke sameep aavenge। baap ki samaanta hi vinaash ko sameep laavegi। mela lagne ke baad kya hota hai? ati shanti। to aatmaaen bhi mela manaavengi, phir vaanaprastha mein chali jaavengi। vaanaprastha kaho athva karmaateet kaho, lekin pahle yeh mela hoga। achha!