Avyakt murli du samedi 14 janvier 1984

>

14-01-84om shanti avyakt baapdaadaamdhuban

double sevaadhaari svatah hi maayaajeet

maayaajeet, jagatjeet banaane vaale sarva samartha baapdaada bole:-

aaj dilaaraam baap apne dil takhtansheen bachchon se va apne snehi, sahayogi bachchon se dil ki lene-den karne aaye hain। baap ki dil mein kya rehta aur bachchon ki dil mein kya rehta hai! aaj sabhi ke dil ka haal-chaal lene aaye hain। khaas dooraandeshi double videshi bachchon se dil ki len-den karne aaye hain। murli to sunte rehte ho lekin aaj rooh-roohaan karne aaye hain ki sabhi bachche sahaj saral roop se aage badhte ja rahe ho? koi mushkil, chalne mein thakaavat to nahin lagti। thakte to nahin ho? kisi chhoti badi baaton mein kanphyooj to nahin hote ho?jab kisi na kisi eeshvareey maryaada va shreemat ke direction ko sankalp mein va vaani mein va karma mein ullanghan karte ho tab kanphyooj hote ho। nahin to bahut khushi-khushi se,sukh chain aaraam se baap ke saath-saath chalne mein koi mushkil nahin। koi thakaavat nahin। koi uljhan nahin। kisi bhi prakaar ki kamzori sahaj ko mushkil bana deti hai। to baapdaada bachchon ko dekh rooh-roohaan kar rahe the ki itne laadle sikeeldhe shreshtha aatmaayen,vishesh aatmaayen,punya aatmaayen,sarva shreshtha paavan aatmaayen, vishwa ke aadhaarmoorta aatmaaen aur phir mushkil kaise? uljhan mein kaise aa sakte hain? kiske saath chal rahe hain? baapdaada sneh aur sahayog ki baanhon mein samaate hue saath-saath le ja rahe hain। sneh,sahayog ke baanhon ki maala sada gale mein padi hui hai। aise maala mein piraaye hue bachche aur uljhan mein aaven yeh ho kaise sakta! sada khushi ke jhoole mein jhoolne vaale, sada baap ki yaad mein rahne vaale mushkil va uljhan mein aa nahi sakte! kab tak uljhan aur mushkil ka anubhav karte rahenge?baap ki paalna ki chhatrachhaaya ke andar rahne vaale, uljhan mein kaise aa sakte hain। baap ka banne ke baad, shaktishaali aatmaayen banne ke baad,maaya ke knowledgeful banne ke baad,sarvashaktiyon,sarva khazaanon ke adhikaari banne ke baad, kya maaya va vighna hila sakte hain? (nahin) bahut dheere-dheere bolte hain। bolo sadaakaal ke liye nahin। dekhna - sabhi ka photo nikal raha hai। tape bhari hai aavaaz ki। phir vahaan jaakar badal to nahin jaayenge na! abhi se sirf sneh ke, seva ke, udti kala ke vishesh anubhvon ke hi samaachaar denge na। maaya aa gai,gir gaye,ulajh gaye, thak gaye, ghabra gaye, aise-aise patra to nahin aayenge na। jaise aajkal ki duniya mein samaachaar patron mein kya khabre nikalti hai? duhkh ki, ashaanti ki, ulajhnon ki।

lekin aapke samaachaar patra kaun se honge? sada khushkhabri ke। khushi ke anubhav - aaj mainne yeh vishesh anubhav kiya। aaj yeh vishesh seva ki। aaj mansa ke seva ki anubhooti ki। aaj dil shikasta ko dilvaala bana diya। neeche gire hue ko uda diya। aise patra likhenge na। kyonki 63 janma uljhe bhi,gire bhi,thokren bhi khaai। sab kuchh kiya aur 63janmon ke baad yeh ek shreshtha janma, parivartan ka janma, chadhti kala se bhi udti kala ka janma, ismen ulajhna, girna,thakna, buddhi se bhatakna, yeh baapdaada dekh nahin sakte। kyonki snehi bachche hain na। to snehi bachchon ka yeh thoda-sa duhkh ki lahar ka samay sukhdaata baap dekh nahin sakte। samjha! to abhi sadaakaal ke liye beeti ki beeti kar liya na। jis samay koi bhi bachcha jara bhi uljhan mein aata va maaya ke vighnon ke vash ho jaata,kamzor ho jaata us samay vatan mein baapdaada ke saamne un bachchon ka chehra kaisa dikhaai deta hai,maaloom hai?Mickey mouse ke khel ki tarah। kabhi maaya ke bojh se mote ban jaate। kabhi purooshaartha ke himmatheen chhote ban jaate। Mickey mouse bhi koi chhota,koi mota hota hai na। Mickey mouse to nahin banenge na। baapdaada bhi yeh khel dekh hansate rehte hain। kabhi dekho pharishta roop, kabhi dekho mahaadaani roop, kabhi dekho sarva ke snehi sahayogi roop,kabhi double light roop aur kabhi-kabhi phir Mickey mouse bhi ho jaate hain। kaun-sa roop achha lagta hai? yeh chhota-mota roop to achha nahin lagta hai na। baapdaada dekh rahe the ki bachchon ko abhi kitna kaarya karna hai। kiya hai woh to karne ke aage kuchh bhi nahin hai। abhi kitnon ko sandesh diya hai? laakh dedh laakh bane hain na। kam se kam satayug ki pahli sankhya 9 laakh to banaao। banaana to jyaada hai lekin abhi 9 laakh ke hisaab se bhi socho to laakh dedh laakh kitne percent hue?baapdaada dekh rahe the kitni seva abhi karni hai। jiske oopar itni seva ki jimmadaari hai, woh kitne busy honge। unhon ko aur kuchh sochne ki phursat hogi?jo busy rehta hai woh sahaj hi maayaajeet hota hai। busy kismen hain? drishti dvaara, mansa dvaara, vaani dvaara, karma dvaara, samparka dvaara chaaron prakaar ki seva mein busy। mansa aur vaani va karma donon saath-saath hon। chaahe karma karte ho, chaahe mukh se bolte ho, jaise double light ho,double taajdhaari ho, double poojya ho, double varsa paate ho to seva bhi double chaahiye। sirf mansa nahin। sirf karma nahin। lekin mansa ke saath-saath vaani। mansa ke saath-saath karma। isko kaha jaata hai double sevaadhaari। aise double sevaadhaari svatah hi maayaajeet rehte hain। samjha! single seva karte ho। sirf vaani mein va sirf karma mein aa jaate ho to maaya ko saathi banne ka chance mil jaata hai। mansa arthaat yaad। yaad hai baap ka sahaara। to jahaan double hai,saathi saath mein hai to maaya saathi ban nahin sakti। single hote ho to maaya saathi ban jaati hai। phir kehte seva to bahut ki। seva ki khushi bhi hoti hai lekin phir seva ke beech mein maaya bhi aa gai। kaaran? single seva ki। double sevaadhaari nahin bane। abhi is varsha double videshi kis baat mein prize lenge?prize leni to hai na!

jo sevaakendra84ka varsha seva mein, sva ki sthiti mein sada nirvighna rah,nirvighna banaane ka vibration vishwa mein phailaayenge,saare varsha mein koi bhi vighna vash nahin honge - aisi seva aur sthiti mein jis bhi sevaakendra ka example hoga usko number one prize milegi। aisi prize lenge na! jitne bhi centres len। chaahe desh ke hon, chaahe videsh ke hon lekin saare varsha mein nirvighna hon। yeh centre ke potaamel ka chart rakhna। jaise aur pota mel rakhte ho na। kitni pradarshaniyaan hui, kitne log aaye, vaise yeh potaamel har maas ka note karna। yeh maas sab class ke aane vaale brahman parivaar nirvighna rahe। maaya aai ismen koi aisi baat nahin। aise nahin ki maaya aayegi hi nahin। maaya aave lekin maaya ke vash nahin hona hai। maaya ka kaam hai aana aur aapka kaam hai - ‘maaya ko jeetna’। unke prabhaav mein nahin aana hai। apne prabhaav se maaya ko bhagaana hai, na ki maaya ke prabhaav mein aana hai। to samjha kaun-si prize leni hai। ek bhi vighna mein aaya to prize nahin kyonki saathi ho na। sabhi ko ek do ko saath dete hue apne ghar chalna hai na। iske liye sada sevaakendra ka vaataavran aisa shakti- shaali ho jo vaataavran bhi sarva aatmaon ke liye sada sahayogi ban jaae। shaktishaali vaataavran kamzor ko bhi shaktishaali banaane mein sahayogi hota hai। jaise kila baandha jaata hai na। kila kyon baandhate hain ki praja bhi kile ke andar safe rahe। ek raaja ke liye kothri nahin banaate,kila banaate the। aap sabhi bhi svayan ke liye, saathiyon ke liye, anya aatmaon ke liye jvaala ka kila baandho। yaad ke shakti ki jvaala ho। abhi dekhenge kaun prize lete hain? 84ke ant mein,new year manaane aate ho na to jo vijayi honge unhon ko vishesh nimantran dekar bulaaya jaayega। akele vijayi nahin। poora centre vijayi ho। us centre ki ceremony karenge। phir dekhenge videsh aage aata hai va desh? achha,aur koi mushkil to nahin, koi bhi maaya ka roop tang to nahin karta hai na। yaadgaar mein kahaani kya suni hai! soorpankha usko tang karne aai to kya kiya?maaya ka naak kaatne nahin aata? yahaan sab sahaj ho jaata hai, unhonne to intresting banaane ke liye kahaani bana di hai। maaya par ek baar vaar kar liya, bas। maaya mein koi dam nahin hai,kamzor hai। sirf baahar ka roop shaktishaali banaakar aati hai। baaki hai andar ki kamzori। mari padi hai। thoda-sa raha hua shvaans chal raha hai। isko khatma karna aur vijayi banna hai। kyonki antim samay par to pahunch gaye hain na! sirf vijayi ban vijay ke hisaab se raajya bhaagya paana hai। isliye yeh antim shvaans par nimitta maatra vijayi banna hai। maaya jeet jagatjeet hain na। vijay praapta karne ka phal - raajya bhaagya hai। isliye sirf nimitta maatra yeh maaya se khel hai। yuddha nahin hai। khel hai, samjha! aaj se mikkeemaaus nahin banna। achha!

satayug ki sthaapna ke baare mein kuchh jaankaari

apne kalpa pahle vaale svarga ke merge hue sanskaaron ko emerge karo to svayan hi apne ko satayugi shaahjaadi va shaahjaade anubhav karenge aur jis samay woh satayugi sanskaar emerge karenge to satayug ki sabhi reeti-rasam aise spashta emerge hongi jaise kal ki baat hai। kal aisa karte the - aisa anubhav kar sakte ho। satayug ka arth hi hai, jo bhi prakriti ke sukh hain, aatma ke sukh hain,buddhi ke sukh hain, man ke sukh hain, sambandh ke sukh hain,jo bhi sukh hote woh sab haajir hain। to ab socho prakriti ke sukh kya hote hain, man ka sukh kya hota hai, sambandh ka sukh kya hota hai - aise emerge karo। jo bhi aapko is duniya mein achhe te achha dikhaai deta hai - woh sab cheezen pure roop mein, sampanna roop mein, sukhdaai roop mein vahaan hongi। chaahe dhan kaho, tan kaho, mausam kaho, sab praapti to shreshtha te shreshtha hain - usko hi satayug kaha jaata hai। ek bahut achhe te achhi sukhdaai sampanna family samjho;vahaan raaja praja samaan martabe hote hue bhi parivaar ke roop mein chalta hai। yeh nahin kahenge ki yeh daas-daasi hai। number honge,seva hogi lekin daasi hai is bhaavna se nahin chalenge। jaise parivaar ke sab sambandh khush mijaaj, sukhi parivaar,samartha parivaar,jo bhi shreshthata hai woh sab hai। dukaanon mein bhi khareedaari karenge to hisaab-kitaab se nahin। parivaar ki len-den ke hisaab se kuchh denge kuchh lenge। gift hi samjho। jaise parivaar mein niyam hota hai - kiske paas jyaada cheez hoti hai to sabhi ko baantate hain। hisaab-kitaab ki reeti se nahin। kaarobaar chalaane ke liye koi ko koi diyooti mili hui hai,koi ko koi। jaise yahaan madhuban mein hai na। koi kapde sambhaalta, koi anaaz sambhaalta,koi paise to nahin dete ho na। lekin charge vaale to hain na। aise vahaan bhi honge। sab cheezen athaah hai,isliye ji haajir। kami to hai hi nahin। jitna chaahiye jaisa chaahiye woh lo। sirf busy rahne ka yeh ek saadhan hai। woh bhi khel-paal hai। koi hisaab-kitaab kisko dikhaana to hai nahin। yahaan to sangam hai na। sangam maana economy। satayug maana - khaao, piyo,udaao। ichchha maatram avidya hai। jahaan ichchha hoti vahaan hisaab-kitaab karna hota। ichchha ke kaaran hi neeche oopar hota hai। vahaan ichchha bhi nahin,kami bhi nahin। sarva praapti hain aur sampanna bhi hain to baaki aur kya chaahiye! aise nahin achhi cheez lagti to jyaada le li। bharpoor honge। dil bhari hui hogi। satayug mein to jaana hi hai na। prakriti sab seva karegi। (satayug mein baba to nahin honge) brahma baap to saath hi honge। (shivbaaba oopar kya karenge?) bachchon ka khel dekhte rahenge। koi to saakshi bhi ho na। nyaara to nyaara hi rahega na। pyaara rahega lekin nyaara rah karke pyaara rahega। pyaare ka khel to abhi kar rahe hain na। satayug mein nyaaraapan hi achha hai। nahin to jab aap sabhi girenge to kaun nikaalega! satayug mein aana arthaat chakra mein aana। achha - satayug mein jab aap janma lo to tab nimantran dena। aap agar sankalp emerge karengi to phir aayenge। satayug mein aana arthaat chakra mein aana। baapdaada ko svarga ki baaton mein aap aakarshan kar rahe ho! achha- itne to vaibhav honge jo sab kha bhi nahin sakenge। sirf dekhte rahenge। achha –

aise sada sarva samartha aatmaon ko, sada maayaajeet, jagatjeet aatmaon ko,sada sahaj yogi bhav ke vardaani bachchon ko, double sevaadhaari, double taajdhaari, double light bachchon ko baapdaada ka yaad-pyaar aur namaste।’’

daadi ji madraas, baingaloor,maisoor tatha kalkatta ka chakra lagaakar madhuban pahunchi hain,daadi ji ko dekh baapdaada bole:-

‘‘kadmon mein padmon ki seva samaai hui hai। chakravarti ban chakra lagaae apne yaadgaar sthaan bana liye। kitne teertha bane! mahaaveer bachchon ka chakra lagaana maana yaadgaar banna। har chakra mein apni-apni visheshta hoti hai। is chakra mein bhi kai aatmaon ke dilon ki aasha poorn karne ki visheshta rahi। yeh dil ki aasha poorn karna arthaat vardaani banna। vardaani bhi bani aur mahaadaani bhi bani। drama anusaar jo programme banta hai usmein kai raaz bhare hue hote hain। raaz udaake le jaate hain। achha-

jaanki daadi se:- aap sabhi ko naam ka daan deti ho! naam ka daan kya hai? aapka naam kya hai! naam ka daan dena arthaat trustee bankar vardaan dena। aapka naam lete hi sabko kya yaad aayega? - second mein jeevan mukti। trustee banna। yeh aapke naam ki visheshta hai। isliye naamdaan bhi de do to kiska bhi beda paar ho jaayega। baap ne abhi aapke trasteepan ki visheshta ka gaayan kiya hai, vahi yaadgaar, hai। vahi ‘janak’akshar unko mil gaya hoga। ek hi janak ki do kahaaniyaan hain। janak jo second mein videhi ban gaya। doosra janak jo second mein trustee ban gaya। mera nahin - ‘tera’। treta vaala janak bhi dikhaate hain। lekin aap to baap ki janak ho, seeta vaali nahin। naam daan ka mahatva kyon hain, is par class karaana। naam ki naeeya dvaara bhi paar ho jaate hain। aur kuchh samajh mein na bhi aaye lekin ‘shivbaaba shivbaaba’ bhi kaha to svarga ki get paas to mil jaati hai। achha –

sabhi mahaarthi bhaai-bahnon ko dekh:-

seva ke nimitta bane hue bachchon ki bhi to maala hai na। sabhi vishesh ratna nimitta bane hue ho। nimitta banne ki visheshta ‘nimitta’banaati hai। brahma baap ko aap sabke oopar ek baat ka naaz hai। kaun-si baat ka vishesh naaz hai?sabhi bachchon ne ek do mein vichaar milaate hue aadi se unity ka jo roop dikhaaya hai is par brahma baap ko vishesh naaz hai। ‘unity is brahman parivaar ka foundation hai।’isliye brahma baap ko avyakt vatan mein rehte bhi bachchon par naaz hai। dekhte to hain na kaarobaar।

landan group se:- sada roohaani gulaab ban auron ko bhi khushbu dene vaale avinaashi bageeche ke pushpa ho na। sabhi roohaani gulaab ho। jis roohaani gulaab ko dekh saari vishwa aakarshit hoti hai। ek-ek roohaani gulaab kitna valuable hai। amoolya hai। jo abhi tak bhi aap sabke jad chitron ki bhi value hain। ek-ek jad chitra kitni value se lete va dete hain। hain to saadhaaran patthar ya chaandi ya sona lekin value kitni hain। sone ki moorti kitni value mein denge। itne valuable kaise bane! kyonki baap ka banne se sada hi shreshtha ban gaye। isi bhaagya ke geet sada gaate raho। vaah mera bhaagya aur vaah bhaagya vidhaata! aur vaah sangamayug! vaah meetha drama! sabmen vaah-vaah aata hai na। vaah-vaah ke geet gaate rehte ho na! baapdaada ko london nivaasiyon par naaz hai, seva ke vriksha ka beej jo hai woh london hai। to london nivaasi bhi beejroop ho gaye। yu.ke. vaale arthaat sada O.ke. rahne vaale, sada padhaai aur seva donon ka balance rakhne vaale। sada har kadam mein svayan ki unnati ko anubhav karne vaale। jab baap ke bane to sada baap ka saath aur baap ka haath hai। har bachche ke oopar - aise anubhav karte ho na। jiske oopar baap ka haath hai woh sada hi safe hain। sada safe rahne vaale ho na। O.ke. group ke paas maaya to nahin aati hai na। maaya bhi sada ke liye O.ke.,O.ke. karke vidaai karke chali jaati hai। yu.ke. arthaat O.ke. group ko sang bhi to bahut shreshtha hain na। sang achha, vaayumandal shaktishaali to maaya aa kaise sakti! sada hi safe honge। O.ke. group arthaat maayaajeet group।

Mauritius party:- sada apne ko shreshtha bhaagyavaan samajhte ho? bhaagya mein kya mila?bhagwan hi bhaagya mein mil gaya! svayan bhaagya vidhaata bhaagya mein mil gaya। isse bada bhaagya aur kya ho sakta hai?to sada ye khushi rehti hai ki vishwa mein sabse bade te bade bhaagyavaan ham aatmaayen hain। ham nahin,ham aatmaayen। aatmaayen kahenge to kabhi bhi ulta nasha nahin aayega। dehi-abhimaani banne se shreshtha nasha - eeshvareey nasha rahega। bhaagyavaan aatmaayen hain, jinhon ke bhaagya ka ab bhi gaayan ho raha hai। ‘bhaagvat’ - aapke bhaagya ka yaadgaar hai। aisa avinaashi bhaagya jo ab tak bhi gaayan hota hai, isi khushi mein sada aage badhte raho। kumaariyaan to nirbandhan,tan se bhi nirbandhan,man se bhi nirbandhan। aise nirbandhan hi udti kala ka anubhav kar sakte hain। achha- om shanti।