Avyakt murli du mercredi 5 décembre 1984

>

05-12-84om shanti avyakt baapdaadaamdhuban

sampoorn kaam jeet arthaat had ki kaamnaaon se pare

sarva ki manokaamnaaen poorn karne vaale shiv baba bole-

aaj baapdaada apni sarvashreshtha bhujaaon ko dekh rahen hain। sabhi bhujaayen sneh aur shakti dvaara vishwa ko parivartan ke kaarya mein lagi hui hain। ek ki sab bhujaayen hain। isliye sabke andar ek hi lagan hai, ki apne eeshvareey parivaar ke apne hi bhaai-bahnen jo baap ko aur apne asli parivaar ko na jaanne ke kaaran bachche hote hue bhi bhaagya vidhaata baap se bhaagya praapta karne se vanchit hain - aise bhaagya se vanchit aatmaon ko surjeet karen। kuchh na kuchh adhikaar ki anchali dvaara unhon ko bhi baap ke parichay se parichit karen। kyonki aap sabhi saari vanshaavli ke bade ho। to bade bachche baap samaan gaaye jaate hain। isliye badon ko chhote anjaan bhaai bahnon prati raham aur pyaar svatah hi aata hai। jaise had ke parivaar ke badon ko parivaar ke prati sada dhyaan rehta hai,aise tum behad ke parivaar ke badon ko dhyaan rehta hai na! kitna bada parivaar hai। saara behad ka parivaar saamne rehta hai?sabhi prati raham ki kirnen,roohaani aasheervaad ki kirnen,vardaan ki kirnen phailaane vaale master soorya ho na! jaise soorya jitna svayan ooncha hoga to chaaron or kirnen phailaayega। neeche hone se chaaron or kirnen nahin phaila sakte hain। aise aap oonche te oonche baap samaan oonchi sthiti mein sthit hote tab hi behad ki kirnen phaila sakte ho arthaat behad ke sevaadhaari ban sakte ho। sabhi aise behad ke sevaadhaari ho na। sarva aatmaon ki manokaamnaayen poorn karne vaale kaamdhenu ho na! sarva ki manokaamnaayen poorn karne vaale ab tak apne man ki kaamnaayen poorn karne mein busy to nahin ho? apne man ki kaamnaayen poorn nahin hongi to auron ki manokaamaanaayen kaise poorn karenge? sabse bade te badi manokaamna baap ko paane ki thi। jab woh shreshtha kaamna poorn ho gai to us shreshtha kaamna mein sarva chhoti-chhoti had ki kaamnaayen samaai hui hain। shreshtha behad ki kaamna ke aage aur koi had ki kaamnaayen rah jaati hain kya? yeh had ki kaamnaayen bhi maaya se saamna nahin kara sakti। yeh had ki kaamna behad ki sthiti dvaara behad ki seva kara nahin sakti। had ki kaamnaayen bhi sookshm roop se check karo -mukhya kaam vikaar ke ansh va vansh hain। isliye kaamna vash saamna nahin kar sakte। behad ki manokaamna poorn karne vaale nahin ban sakte। kaam jeet arthaat had ki kaamnaaon jeet। aisi manokaamnaayen poorn karne vaali vishesh aatmaayen ho।‘manmanaabhav’ki sthiti dvaara man ki had ki kaamnaayen poorn kar arthaat samaapta kar auron ki manokaamnaayen poorn kar arthaat samaapta kar auron ki manokaamnaayen poorn karne ka abhi samay hai। tripta aatmaayen hi auron ki kaamnaayen poorn kar sakengi। abhi vaani se pare sthiti mein sthit rahne ki vaanaprastha avastha mein kaamna jeet arthaat sampoorn kaam jeet ke sample vishwa ke aage bano। aapke chhote-chhote bhaai-bahinen yahi kaamna lekar aap badon ki taraph dekh rahe hain। pukaar rahe hain ki hamaari manokaamnaayen poorn karo। hamaari sukh-shanti ki ichchhaayen poorn karo। to aap kya karenge?apni ichchhaayen poorn karenge va unhon ki poorn karenge?sabhi ko dil se, kahne se nahin ya vaayumandal ke sangathan ki maryaada pramaan nahin,dil se yeh shreshtha naara nikle ki - ‘‘ichchha maatram avidya’’।

kai bachche bade chatur hain। chatur sujaan se bhi chaturaai karte hain। hoti had ki ichchha hai aur phir kahenge aise aise। yeh shubh ichchha hai, seva prati ichchha hai। hoti apni ichchha hai lekin baahar ka roop seva ka bana dete hain। isliye baapdaada muskaraate hue, jaante hue, dekhte hue, chaturaai samajhte hue bhi kai bachchon ko baahar se eeshaara nahin dete। lekin drama anusaar eeshaara milta zaroor hai। woh kaise?had ki ichchhaayen poorn hote hue roop praapti ka hota lekin andar ek ichchha aur ichchhaaon ko paida karti rehti hai। isliye man ki uljhan ke roop mein eeshaara milta rehta hai। baahar se kitna bhi koi had ki praapti mein khaata peeta gaata rahe lekin yeh man ki uljhan ko chhipaane ka saadhan karte। andar man tripta nahin hoga। alpakaal ke liye hoga lekin sadaakaal ki tripta avastha va yeh dil ka geet ki ‘baap mila sansaar mila’, yeh nahin ga sakta। woh baap ko bhi kehte hain - aap to mile lekin yeh bhi zaroor chaahiye। yeh chaahiye-chaahiye ki chaahna ki tripti nahin hogi। samay pramaan abhi sabka ek ‘‘ichchha maatram avidya’’ka aavaaz ho tab auron ki ichchhaayen poorn kar sakenge। abhi thode samay mein aap ek-ek shreshtha aatma ko vishwa chaitanya bhandaar anubhav karega। bhikhaari ban aayenge। yeh aavaaz niklega ki aap hi bharpoor bhandaar ho। abhi tak dhoondh rahe hain ki koi hain,lekin woh kahaan hain, kaun hain yeh spashta samajh nahin sakte। lekin abhi samay ka ‘airo’ (teer) lagega। jaise raaste dikhaane ke chinha hote hain na। airo dikhaata hai ki yahaan jaao। aise sabhi ko yeh anubhooti hogi ki yahaan jaao। aise bharpoor bhandaar bane ho? samay bhi aapka sahayogi banega। shikshak nahin,sahayogi banega। baapdaada samay ke pahle sab bachchon ko sampanna swaroop mein bharpoor bhandaar ke roop mein, ichchha maatram avidya, tripta swaroop mein dekhna chaahta hai। kyonki abhi se sanskaar nahin bharenge to ant mein sanskaar bharne vaale bahut kaal ki praapti ke adhikaari nahin ban sakte। isliye vishwa ke liye vishwa aadhaar moorta ho। vishwa ke aage jahaan ke noor ho। jahaan ke kul deepak ho। jo bhi shreshtha mahima hai - sarva shreshtha mahima ke adhikaari aatmaayen ab vishwa ke aage apne sampanna roop mein pratyaksha ho dikhaao। samjha।

sabhi aaye hue vishesh sevaadhaari bachchon ko vishesh sneh swaroop se baapdaada sneh ki svaagat kar rahe hain। right-hand bachchon ko samaanta ki haindashek kar rahe hain। bhale padhaare। achha –

sabhi vishwa ki manokaamnaayen poorn karne vaale, sada sampanna tripta aatmaon ko,vishwa ke aadhaar moorta,har samay vishwa kalyaan ki shreshtha kaamna mein sthit rahne vaale, vishwa ke aage master vishwa rakshak ban sarva ki raksha karne vaale, sarva shreshtha mahaan aatmaon ko baapdaada ka yaad pyaar aun namaste।’’

meeting mein aaye hue bhaai bahinon se -sevaadhaari bachchon ne seva ke plans man mein to bana liye honge, baaki meeting ke sangathan mein saakaar mein laane ke liye varnan karenge। jo bhi sevaayen chal rahi hain,har seva achhe te achhi kahenge। jaise samay sameep aa raha hai, samay sabhi ki buddhiyon ko halchal mein la raha hai। aise samay pramaan aisa shaktishaali plan banaao jo dharniyon par hal chale, hamesha beej daalne ke pahle hal chalaate hain na! hal chalaane mein kya hota? halchal hoti hai aur uske baad jo beej daalte hain woh sahaj saphalta ko paata hai। aise abhi yeh halchal ka hal chalaao। kaun-si halchal ka? jaise aaj sunaaya -’’koi hain’’ yeh to sab samajhte hain lekin yahi hain aur yeh ek hi hain, yeh halchal ka hal nahin chala hai। abhi aur bhi hain,yeh bhi hain yahaan tak pahunche hain lekin yeh ek hi hain, abhi aisa teer lagaao। is touching ke saath aisi aatmaayen aapke saamne aayen। jab aisi halchal ho tab hi pratyakshata ho। iski vidhi kya hai? jaise sab vidhi chalti rehti hai, bhinna-bhinna programme karte rehte ho। conference bhi karte ho to doosron ki stage par bhi jaate ho,apni stage bhi banaate ho। yog shivir bhi karaate ho। yeh sabhi saadhan sameep to laayen hain aur jo shankaaye theen un shankaaon ki nivriti bhi hui hai। sameep bhi aa gaye। lekin abhi varse ke adhikaar ke sameep aaven। vaah-vaah karne vaale to bane,abhi vaaris banen। abhi aisa koi aavaaz bulanda ho ki yahi sachcha raasta dikhaane vaale hain, baap se milaane vaale hain। bachaane vaale hain, bhagaane vaale nahin। to abhi uski vidhi,vaataavran aisa ho। stage ki rooprekha bhi aisi ho aur sabhi ka sankalp bhi ek hi ho। vaataavran ka prabhaav shaktishaali hona chaahiye। pyaar ka to hota hai lekin shanti aur shakti usmein aur thoda addition karo। duniya ke hisaab se to shanti bhi anubhav karte hain, lekin aisa shanti ka teer lage jo shanti saagar ke sivaae rah nahin saken। yeh aapke sang ka rang to utne samay tak achha lagta hai lekin rang mein rang jaaen aur yahi rang unhon ko kheenchata rahe, sameep laata rahe, sambandh mein laata rahe woh pakka rang lagaao। sunaaya na - abhi tak jo kiya hai woh achhe te achha kiya hai lekin abhi sona taiyaar kiya hai, abhi nag daalne hain। aaj ki duniya mein pratyaksha pramaan chaahiye। to pratyaksha pramaan shanti aur shakti ka anubhav ho। chaahe ek ghadi ke liye ho lekin anubhav aisi cheez hai jo anubhav ki shakti sameep sambandh mein zaroor laayegi। to plan to banaayenge hi। baaki baapdaada bachchon ke himmat, umang-utsaah par khush hain। seva ke shauk mein rahne vaale bachche hain। seva ki lagan achhi hai। sankalp bhi sabhi ka chalta zaroor hai ki abhi kuchh naveenta honi chaahiye। naveenta laane ke liye,pahle to sabhi ka ek sankalp hona chaahiye। ek ne sunaaya aur sabhi ne sveekaar kiya। ek sankalp mein sada dridh hon। agar ek eet bhi hilti hai to poori deevaar ko hila deti hai। ek ka bhi sankalp ismen thoda-sa kaarne akaarne circumstance pramaan halka hota hai to saara programme halka ho jaata hai। to aise apne ko dridh sankalp mein laake, karna hi hai, sabka sahayog milna hi hai, phir trial karo। vaise baapdaada seva se khush hain। aisi koi baat nahin hai lekin abhi sone mein nag bharenge to door se aakarshan karenge।

videsh mein bhi bachche himmat achhi rakh rahe hain। woh khud bhi aapas mein hansate rehte hain ki mike hamaara pahuncha, aavaaz bhi hua lekin thodi aavaaz vaala aaya। badi aavaaz vaala nahin। phir bhi itne tak to pahunch gaye hain। himmat to achhi karte hain। achha –

abhi aapka poojya swaroop pratyaksha hona chaahiye। poojya hai, pooja karne vaale nahin। yahi hamaare eeshta hain, poorvaj hain, poojya hain, yahaan se hi sarva manaakaamnaayen poorn honi hain, abhi yeh anubhooti ho। sunaaya na - abhi apne had ke sankalp va kaamnaayen samaapta honi chaahiye, tab hi yeh lahar phailegi। abhi bhi thoda-thoda mera-mera hai। mere sanskaar, mera svabhaav yeh bhi samaapta ho jaae। baap ka sanskaar so mera sanskaar। original sanskaar to woh hai na। braahmanon ka parivartan hi vishvaprivarta na ka aadhaar hai। to kya karenge abhi?bhaashan zaroor karna hai lekin aap bhaasha mein aao aur woh bhaasha se pare chale jaaen। aisa bhaashan ho। bolna to padega na। aap aavaaz mein aao, ve aavaaz se pare chale jaaen। bol nahin ho lekin anubhav bhara hua bol ho। sabhi mein lahar phail jaae। jaise kabhi koi aisi baat sunaate hain to kabhi hansane ki,kabhi rone ki,kabhi vairaag ki lahar phail jaati hai woh temporary hota hai lekin phir bhi phailti hai na। aise anubhooti hone ka lahar phail jaae। hona to yahi hai। jaise shuru mein sthaapna ki aadi mein ek om ki dhvani shuru hoti thi aur kitne saakshaatkaar mein chale jaate the। lahar phail jaati thi। aise sabha mein anubhootiyon ki lahar phail jaae। kisko shanti ki, kisko shaktiyon ko anubhooti ho। yeh lahar phaile। sirf sunne vaale na ho lekin anubhav ki lahar ho। jaise jharna bah raha ho to jo bhi jharne ke neeche aayega usko sheetalta ka, fresh hone ka anubhav hoga na! aise woh bhi shanti,shakti,prem,aanand, ateendriy sukh ki anubhooti karte jaaen। aaj bhi science ke saadhan garmeesardi ki anubhooti karaate hain na। saare kamre mein hi woh lahar phail jaati hai। to kya yeh itni shiv-shaktiyaan,paandav,master shanti, shakti sabke saagar…yeh lahar nahin phaila sakte! achha –

kitni vishaal buddhi vaale ikatthe hue hain। shakti sena bhi bahut hai। madhuban mein ek hi samay par itni shreshtha aatmaayen aa jaaen, yeh koi kam baat nahin hai। abhi to aapas mein bhi saadhaaran ho, to saadhaaran baat lagti hai। ek-ek kitni mahaan aatmaayen ho। itni mahaan aatmaon ka sangathan to saare kalpa mein aisa nahin ho sakta। koi ek-ek ka mahatva kam nahin hai। abhi to aapas mein bhi ek do ko saadhaaran samajhte ho, aage chal ek do ko visheshta pramaan vishesh aatma samjhenge। abhi halki-halki baaten note jyaada hoti hain, visheshtaayen kam। baithkar socho to ek-ek kitne bhakton ke poorvaj ho। sabhi ishta dev aur deviyaan ho na। ek-ek ishta dev ke kitne bhakta honge? kam hastiyaan to nahin ho na! ek moorti ka bhi itna mahatva hota, itne ishta dev ikatthe ho jaaen to kya ho jaae! shaktishaali ho। parantu aapas mein bhi chhipaaya hai to vishwa se bhi chhipe ho। vaise ek-ek ka moolya anginat hai। baapdaada to jab bachchon ke mahatva ko dekhte hain to naaz hota hai ki ek-ek bachcha kitna mahaan hai। apne ko bhi kabhi samajhte ho kabhi nahin। vaise ho bahut mahaan। saadhaaran hasti nahin ho! thodi-si pratyakshata hogi phir aapko bhi maaloom padega ki ham kaun hain! baap to usi mahaanta se dekhte hain। baap ke aage to sab pratyaksha hai na। achha - ek class yeh bhi karna ki ek-ek ki mahaanta kya hai। achha –