Avyakt murli du jeudi 3 avril 1997

>

03-04-97 om shanti avyakt baapdaadaamdhuban

puraane sanskaaron ko khatma kar apne niji sanskaar dhaaran karne vaale ever ready bano

aaj baapdaada apne chaaron or se vishwa ke baap ke lav mein lavleen aur lucky bachchon ko dekh rahe hain। har ek bachche ke bhaagya par baap ko bhi naaz hai ki mere bachche vartamaan samay itne mahaan hain jo saare kalpa mein chaahe devta swaroop mein,chaahe dharma netaaon ke roop mein, chaahe mahaatmaaon ke roop mein, chaahe padmapti aatmaon ke roop mein kisi ka bhi itna bhaagya nahin hai jitna aap braahmanon ka bhaagya hai। to apne aise shreshtha bhaagya ko sada smriti mein rakhte ho? sada yeh anhad geet man mein gaate rehte ho ki vaah bhaagya vidhaata baap aur vaah mujh shreshtha aatma ka bhaagya! yeh bhaagya ka geet sada automatic bajta rehta hai?baap bachchon ko dekh-dekh sada harshit hote hain। bachche bhi harshit hote hain lekin kabhi-kabhi beech mein apne bhaagya ko emerge karne ke bajaae merge kar dete hain। jab baap dekhte hain ki bachchon ke andar apne saubhaagya ka nasha, nishchay merge ho jaata hai to kya kahenge?drama। lekin baapdaada sabhi bachchon ko sada hi bhaagya ke smriti swaroop dekhne chaahte hain। aap bhi sabhi chaahte yahi hain `lekin'…beech mein aa jaata hai। kisi se bhi poochho to sab bachche yahi lakshya rakh karke chal rahe hain ki mujhe baap samaan banna hi hai। lakshya bahut achha hai। jab lakshya shreshtha hai,bahut achha hai phir kabhi emerge roop, kabhi merge roop kyon? kaaran kya?baapdaada se itne achhe-achhe vaayde bhi karte hain, roohrihaan bhi karte hain phir bhi lakshya aur lakshan mein antar kyon?to baapdaada ne result mein dekha ki kaaran kya hai? vaise to aap sab jaante hain, nai baat nahin hai phir bhi baapdaada revise karaate hain।

baapdaada ne dekha teen baaten hain - ek hai sochna,sankalp karna। doosra hai bolna, varnan karna aur teesra hai karma mein practical anubhav mein aur chalan mein laana, karma mein laana। to teenon ka samaan balance kam hai। jab balance hota hai to nishchay aur nasha emerge hota hai aur jab balance kam hai to nishchay aur nasha merge ho jaata hai। result mein dekha gaya ki sochne ki gati bahut achhi bhi hai aur fast bhi hai। bolne mein raphtaar aur nasha woh bhi 75percent theek hai। bolne mein majority hoshiyaar bhi hain lekin practical chalan mein laane mein total marks kam hain। to do baaton mein theek hain lekin teesri baat mein bahut kam hain। kaaran?jab sankalp bhi achha hai,bol bhi bahut sundar roop mein hain phir practical mein kam kyon hota hai? kaaran kya, jaante ho? haan ya na bolo। jaante bahut achha hain। agar kisi ko bhi kahenge is topic par bhaashan karo ya class karaao to kitna achha class karaayenge! aur bade nishchay,nashe, phalak se bhaashan bhi karenge, class bhi karaayenge। karaate hain। baapdaada sabke classes sunte hain kya-kya bolte hain। muskuraate rehte hain, vaah! vaah bachche vaah!

mool baat hai - baapdaada ne pahle bhi sunaaya hai yeh revise course chal raha hai। to baap kehte hain ki kaaran ek hi hai, jyaada bhi nahin hai,ek hi kaaran hai aur baapdaada samajhte hain ki kaaran ko nivaaran karna mushkil bhi nahin hai, bahut sahaj hai। lekin sahaj ko mushkil bana dete hain। mushkil hai nahin, bana dete hain, kyon?nasha merge ho jaata hai। ek hi kaaran hai jo bhi dhaarna ki baaten sunte ho, karte bhi ho, chaahe shaktiyon ke roop mein, chaahe gunon ke roop mein, dhaarna ki baaten bahut achhi-achhi karte ho, itni achhi karte ho jo sunne vaale chaahe agyaani,chaahe gyaani sunkar bahut achha,bahut achha kahkar khoob taaliyaan bajaate hain, bahut achha kaha। lekin,kitne baar `lekin' aaya?yeh `lekin'hi vighna daal deta hai। `lekin' shabd samaapta hona arthaat baap samaan-sameep aana aur baap ke sameep aana arthaat samay ko sameep laana। lekin abhi tak `lekin' shabd kehna padta hai। baap ko achha nahin lagta, lekin kehna hi padta hai। to kaaran kya?jo bhi kehte ho, dhaaran bhi karte ho,dhaarna ke roop se dhaaran karte ho aur woh dhaarna kiski thoda samay, kiski jyaada samay bhi chalti hai lekin dhaarna practical mein sada badhti chale uske liye yahi mukhya baat hai ki jaise dvaapar se lekar antim janma tak jo bhi avgun va kamjoriyaan hain uski dhaarna sanskaar roop mein ban gai hain aur sanskaar banne ke kaaran mehnat nahin karna padta। chhodna bhi chaahte hain,achha nahin lagta hai phir bhi kehte hain kya karen, mera sanskaar aisa hai। aap bura nahin maanna,mera sanskaar aisa hai। sanskaar bana kaise? banaaya tabhi to bana na! to jab dvaapar se yeh ulte sanskaar ban gaye, jisse aap samay par majboor bhi hote ho phir bhi kehte ho kya karen, sanskaar hain। to sanskaar sahaj,na chaahte hue bhi practical mein aa jaate hain na! kisi ko krodh aa jaata hai, thode samay ke baad kehte hain aap bura nahin maanna,mera sanskaar hai। krodh ko sanskaar banaaya, avgun ko sanskaar banaaya aur gunon ko sanskaar kyon nahin banaaya hai?jaise krodh agyaan ki shakti hai aur gyaan ki shakti shanti hai। sahan shakti hai। to agyaan ki shakti krodh ko bahut achhi tarah se sanskaar bana liya hai aur use bhi karte rehte ho phir maaphi bhi lete rehte ho। maaph kar dena, aage se nahin hoga। aur aage aur jyaada hota hai। kaaran? kyonki sanskaar bana diya hai। to baapdaada ek hi baat bachchon ko baar-baar sunaate hain ki abhi har gun ko,har gyaan ki baat ko sanskaar roop mein banaao।

brahman aatmaon ke niji sanskaar kaun se hain?krodh ya sahanshakti? kaun sa hai? sahanshakti,shanti ki shakti yeh hai na! to avgunon ko to sahaj hi sanskaar bana diya, koot-koot kar andar daal diya hai jo na chaahte bhi nikalta rehta hai। aise har gun ko andar koot-koot kar sanskaar banaao। mera nizi sanskaar kaun sa hai? yeh sada yaad rakho। woh to raavan ki jaaydaad sanskaar bana diya। paraaye maal ko apna bana liya। ab baap ke khazaane ko apna banaao। raavan ki cheez ko sambhaal kar rakha hai aur baap ki cheez ko gum kar dete ho, kyon?raavan se pyaar hai! raavan achha lagta hai ya baap achha lagta hai? kahenge to sabhi baap achha lagta hai,yahi man se kah rahe hain na?lekin jo achha lagta hai uski baat nishchay ki syaahi se dil mein sama jaati hai। jab koi raavan ke sanskaar ke vash hote hain aur phir bhi kehte rehte hain - baba aapse mera bahut pyaar hai, bahut pyaar hai। baap poochhte hain kitna pyaar hai? to kehte hain aakaash se bhi jyaada। baap sunkarke khush bhi hote hain ki kitne bhole bachche hain। phir bhi baap kehte hain ki baap ka sabhi bachchon se vaayda hai - ki dil se agar ek baar bhi ''mera baba`` bol diya, phir bhale beech-beech mein bhool jaate ho lekin ek baar bhi dil se bola ''mera baba``, to baap bhi kehte hain jo bhi ho,jaise bhi ho mere hi ho। le to jaana hi hai। sirf baap chaahte hain ki baraati bankar nahin chalna, sazni bankar chalna। sunkar ke to sabhi bahut khush ho rahe hain। apne oopar hansi bhi aa rahi hai।

abhi sunne ke samay apne oopar hansate ho na! apne oopar hansi aati hai aur jab josh karte ho tab laal, peele ho jaate ho। lekin baap ne result mein dekha ki bachchon mein ek visheshta bahut achhi hai, kaun si? pavitrata mein rehna, iske liye kitna bhi sahan karna pada hai, kitna bhi opposition karne vaale saamne aaye hain lekin is baat mein 75percent achhe hain। koi-koi gasiya (gapoda) bhi lagaate hain lekin phir bhi 75 percent ne is baat mein paas hokar dikhlaaya hai। ab uske baad doosra subject kaun sa aata hai? krodh। deh-bhaan to total hai hi। lekin dekha gaya hai ki krodh ki subject mein bahut kam paas hain। aise samajhte hain ki shaayad krodh koi vikaar nahin hai, yeh shastra hai, vikaar nahin hai। lekin krodh gyaani tu aatma ke liye mahaashatru hai। kyonki krodh anek aatmaon ke sambandh,samparka mein aane se prasiddha ho jaata hai aur krodh ko dekh karke baap ke naam ki bahut glaani hoti hai। kahne vaale yahi kehte hain, dekh liya gyaani tu aatma bachchon ko। krodh ke bahut roop hain। ek to mahaan roop aap achhi tarah se jaante ho,dikhaai deta hai - yeh krodh kar raha hai। doosra - krodh ka sookshm swaroop andar mein eershya,dvesh,ghrina hoti hai। is swaroop mein jor se bolna ya baahar se koi roop nahin dikhaai deta hai,lekin jaise baahar krodh hota hai ta krodh agni roop hai na, woh andar khud bhi jalta rehta hai aur doosre ko bhi jalaata hai। aise eershya, dvesh,ghrina - yeh jismen hai, woh is agni mein andar hi andar jalta rehta hai। baahar se laal, peela nahin hota, laal peela phir bhi theek hai lekin woh kaala hota hai। teesra krodh ki chaturaai ka roop bhi hai। woh kya hai? kahne mein samajhne mein aise samajhte hain va kehte hain ki kahaan-kahaan serious hona hi padta hai। kahaan-kahaan la uthaana hi padta hai - kalyaan ke liye। abhi kalyaan hai ya nahin woh apne se poochho। baapdaada ne kisi ko bhi apne haath mein la (Law) uthaane ki chhutti nahin di hai। kya koi murli mein kaha hai ki bhale la uthaao, krodh nahin karo? la uthaane vaale ke andar ka roop vahi krodh ka ansh hota hai। jo nimitta aatmaayen hain woh bhi la uthaate nahin hain, lekin unhon ko la revise karaana padta hai। la koi bhi nahin utha sakta lekin nimitta hain to baap dvaara banaaye hue la ko revise karna padta hai। nimitta banne vaalon ko itni chhutti hai, sabko nahin।

aaj baapdaada thoda official shiksha de rahe hain, pyaar se uthaana kyonki baapdaada bachchon ke likhe hue, kiye hue vaayde dekhkar, sunkar muskuraate rehte hain। abhi baapdaada ne jo sunaaya ki har gun ko niji sanskaar banaao। underline kiya? to abhi se yeh kehna - ki shant swaroop mein rehna, sahansheel banna - yeh to mera sanskaar ban gaya hai। phir baapdaada jab milan manaane aaye, to ise apna niji sanskaar banaakar baapdaada ke aage in 5-6 maas mein dikhaana। isliye aaj result suna rahe hain। krodh ki report bahut aati hai। chhota-bada, bhinna-bhinna roop se krodh karte hain। abhi baapdaada jyaada nahin kholte hain lekin kahaaniyaan bahut maje ki hain। isliye aaj se krodh ko kya karenge?vidaai denge? (sabhi ne taali bajaai) dekho, taali bajaana bahut sahaj hai lekin krodh ki taali nahin baje। baapdaada abhi yeh baar-baar sunne nahin chaahte hain phir bhi raham padta hai to sun lete hain। to ab se yeh nahin kehna ki baba vaayda to kiya lekin… phir-phir aa gaya,kya karen! chaahte nahin hain, aa jaata hai। aap hi maaya ko samjha do, krodh ko samjha do। to yeh purooshaartha bhi baap kare aur praalabdha bachche lenge?yeh bhi mehnat baap kare? to aisa vaayda nahin karna, jo phir 5 maas ke baad result dekhen। bhale aap bataao nahin bataao,baap ke paas to pahunchti hai। aisi result na ho - kya karen, ho jaata hai,circumstance aise aate hain,baat bahut badi ho gai na! baap ko bhi samjhaane ki koshish karte hain, bade hoshiyaar hain। kehte hain baba chhoti-moti baaten ham paar kar lete hain, yeh baat hi badi thi na! abhi dosh kis par rakha?baat par। aur baat kya karti hai?aai aur gai।5 hajaar varsha ke baad phir baat aayegi। jo5 hajaar varsha ke baad baat aani hai,us par dosh rakh dete hain। aise nahin karna। kya karoon…! yeh sankalp mein bhi nahin laana। baapdaada krodh ke liye kyon vishesh kah raha hai? kyonki agar krodh ko aapne vidaai de di to ismen lobh, ichchha sab aa jaata। lobh sirf paise aur khaane ka nahin hota hai, bhinna-bhinna prakaar ki, chaahe gyaan ki, chaahe agyaan ki koi bhi ichchha - yeh bhi lobh hai। to krodh ko khatma karne se lobh svatah khatma hota jaayega,ahankaar bhi khatma ho jaayega। abhimaan aata hai na - main bada,main samajhdaar,main jaanta hoon - yeh kya apne ko samajhte hain! tab krodh aata hai। to abhimaan aur lobh yeh bhi saath-saath vidaai le lenge। iseelie baapdaada vishesh lobh ke liye na kah karke krodh ko underline kara raha hai। to sanskaar banaayenge?abhi sab haath uthaao aur sabka photo nikaalo। (sabne haath uthaaya) abhi thodi si mubaarak dete hain, bahut nahin aur jab phir se result dekhenge phir vatan ke devtaayen bhi,svarga ke devtaayen bhi aapke oopar vaah, vaah ke pushpa giraayenge।

aaj se har ek apne mein dekhe - doosre ka nahin dekhna। doosre ki yeh baaten dekhne ke liye man ki aankh band karna। yeh aankhen to band kar nahin sakte na, lekin man ki aankh banda karna - doosra karta hai ya teesra karta hai, mujhe nahin dekhna hai। baap itna bhi force dekar kehte hain ki agar koi virla mahaarthi bhi koi aisi kamjori kare to bhi dekhne ke liye aur sunne ke liye man ko antarmukhi banaana। hansi ki baat sunaayen - baapdaada aaj thoda spashta suna rahe hain, bura to nahin lagta hai। achha-ek aur bhi spashta baat sunaate hain। baapdaada ne dekha hai ki majority samay prati samay, sada nahin kabhi-kabhi mahaarthiyon ki visheshta ko kam dekhte aur kamjori ko bahut gahraai se dekhte hain aur follow karte hain। ek do se varnan bhi karte hain ki kya hai,sabko dekh liya hai। mahaarthi bhi karte hain, ham to hain hi peechhe। abhi mahaarthi jab badlenge na to ham badal jaayenge। lekin mahaarthiyon ki tapasya, mahaarthiyon ke bahutkaal ka purooshaartha unhon ko addition marks dilaakar bhi paas with honour kar leti hai। aap isi intajaar mein rahenge ki mahaarthi badlenge to ham badlenge to dhokha kha lenge isliye man ko antarmukhi banaao। samjha। yeh bhi baapdaada bahut sunte hain,dekh liya… dekh liya। hamaari bhi to aankhe hain na,hamaare bhi to kaan hain na,ham bhi bahut sunte hain। lekin mahaarthiyon se is baat mein rees nahin karna। achchhaai ki race karo,buraai ki rees nahin karo,nahin to dhokha kha lenge। baap ko taras padta hai kyonki mahaarthiyon ka foundation nishchay, atoot-achal hai, uski duaayen extra mahaarthiyon ko milti hain। isliye kabhi bhi man ki aankh ko is baat ke liye nahin kholna। band rakho। sunne ke bajaae man ko antarmukhi rakho। samjha।

aaj garam-garam halua khilaaya hai। lekin niji sanskaar banaao। mehnat karte ho, woh bhi baapdaada ko achha nahin lagta। baapdaada ne bachchon ka ek wonderful chitra dekha। woh chitra dekhenge। sunna chaahte hain ki bahut halua kha liya?kamaal ka chitra hai। baapdaada ko bhi kamaal lagti hai। woh chitra kya dekha? ki bachche kehte ek hain aur karte doosra hain। mukh se kah rahe hain - ham to lakshmi-naaraayan banenge, raam seeta nahin, lakshmi-naaraayan aur karte kya hain? kehte to hain lakshmi-naaraayan banenge। kahne vaalon ke mukh mein gulaabjaamun। lekin karte kya hain? poochho lakshmi-naaraayan banenge pakka?kehte hain haan 100percent lakshmi-naaraayan banenge। lekin chitra kya dikhaate hain? treta vaale raam ke samaan yuddha karte rehte hain। teer kamaan haath mein sada hi hai। kehte hain lakshmi-naaraayan banenge lekin practical mein tretaayugi raam samaan yuddha karte rehte hain। sada aadha samay yuddha mein,aadha samay yog mein। sabhi nahin,lekin bahut hain। to baapdaada ko yeh chitra dekh karke wonderful chitra lagta hai। jo kehte ho, jo achha-achha sochte ho woh karna hi hai। uski sahaj vidhi sunaai ki orijinal niji sanskaar ko emerge karo। sanskaar se svatah hi karma ho hi jaata hai। mehnat kam saphalta jyaada hoti hai, mehnat se bach jaayenge। jaise aadhaakalpa jab vishwa ke maalik bante ho to kai prakaar ki mehnat se svatah hi chhoot jaate ho। aise is samay niji sanskaar banaane se sahaj mehnat se chhoot jaayenge। samay prati samay kamaan uthaane ki, yuddha karne ki aavashyakta hi nahin padegi। nirantar yogi,sahaj yogi,karmayogi,raajayogi svatah hi ban jaayenge। yog lagaana nahin padega lekin har second, har samay yogi jeevan svatah hi hogi। to aise hi chaahte ho na?

gyaan,yog, dhaarna aur seva in chaaron subject ka saar do shabd hain। ek - baap hi mera sansaar hai। doosra - har gun, har shakti mera nizi sanskaar hai। to do shabd yaad rakhna - sansaar aur sanskaar। mushkil hai kya? thoda-thoda mushkil hai?jab baat aa jaati hai phir to mushkil hai?lekin baat aapke aage kya hai? baat badi ya baap bada? kaun bada hai? lekin us samay baat badi lagti hai। baapdaada ke paas aise samay ke bachchon ke photo bahut hain। museum laga hua hai। kabhi aana to dekhna। apna hi photo dekh lena। lekin abhi samaapti samaaroh manaao। jab aap yeh samaapti samaaroh manaayenge tab vishwa parivartan ka samaaroh aapke saamne aayega।

aur ek baat sunaayen, sunne ke liye taiyaar ho? baalak maalik hote hain na! to maalik se order lekar phir sunaana hota hai। behad ka haal hai na। dekho jaise roonda maala dikhaai hai na। vaise yahaan aakar dekho to roonda maala hi lagti hai। sirf aapko face dikhaai dega, bas। to behad ke haal mein baapdaada bhi aaj khuli dil se behad ki baaten bata rahe hain। kal ka din kaun sa tha?(buddhavaar) to buddhavaar ki baat hai। aaj to sabhi raat ka khel dekhkar thoda thake hue the। thoda sa pareshaani to hui na। (raat ko toofaan ke saath barsaat hui) lekin last samay mein to bahut kuchh hone vaala hai। agar thodi si rehearsal kar li to achha hai। thodi rehearsal honi chaahiye। bag baggage sametna aur bhaagna, daudna- yeh to exercise karaai। vaise to boodhi-boodhi maataayen bhaagti nahin hain lekin raat ko bistar aur ataichi lekar to bhaagi। isliye yeh bhi khel hai। exercise to ho gai na। taange to chali। yeh chhoti-moti rehearsal to final ke aage kuchh bhi nahin hai। yeh bhi abhyaas hona chaahiye। baapdaada ne kaha hai ever ready raho। ismen bhi ever ready, baaris padi second mein chal pade। koi disturb hue?second mein set ho gaye। baapdaada bhi samajhte hain jab tak pakka nahin bana hai tab tak bachche kam aaven। lekin jitna hi kam kehte hain utna hi badhta jaata hai। laal jhandi dikhaate bhi hain - nahin aao, phir bhi aa jaate ho to dekho khel। baapdaada ko bachchon ka sneh dekhkar khushi hoti hai aur sada yahi bachchon ko kehte hain - aao bachche, aao। nahin aao, kaise kahenge! kah sakte hain? to sabhi jitne bhi aaye ho, khushi se aaye ho aur khushi lekar jaana aur toli ke saath-saath pahle khushi baantana - uske saath toli baantana। achha।

kal ki baat sunaate hain। kal vatan mein advance party emerge hui thi। baapdaada se roohrihaan kar rahe the aur baapdaada se poochh rahe the ki humein jis seva ke arth nimitta banaakar bheja hai,woh seva kab shuru hogi? baapdaada ne kya javaab diya hoga? woh baar-baar yahi kah rahe the ki humein advance party mein jo janma dilaaya hai, woh vishesh kaarya ke liye dilaaya hai aur majority achhe te achhe yogi tu aatmaayen,gyaani tu aatmaayen, mahaaveer bhi bahut advance party mein gaye hain aur jo doosre saath mein gaye hain,unhon mein bhi majority aisi aatmaayen gai hain jo snehi aur gupta yogi hain। mix to sabmen hote hain lekin aapke hisaab se jisko mahaarthi nahin kahen, majority saadhaaran kehte ho, woh bhi sneh ke kaaran yog mein achhe powerful rahe hain। aur vishesh yog ki subject mein aage rahne vaali aisi aatmaayen,yogbal se janma dene ke nimitta ban nai srishti ki sthaapna karengi। to woh poochh rahe the ki kab hamaari seva shuru hogi? ismen bhi kuchh aatmaon ka, jo gai hain alag part bhi hai। sabhi ka ek jaisa nahin hai lekin majority ka nai srishti ke sthaapna ka part bana hua hai। to roohrihaan chal rahi thi। baapdaada ne to muskuraate hue unhon ko doosri-doosri baaton mein busy kar diya kyonki kab ka respond baapdaada ko akela nahin karna hai, aap sabhi ko karna hai। jab aap kahenge ever ready, tab unhon ki seva aarambha hogi। iseelie vinaash ka samay kabhi bhi fix nahin hona hai। achaanak hona hai। baapdaada ne pahle se hi ishaara de diya hai,us samay nahin ulhana dena ki baba thoda ishaara to dete। achaanak hona hai,ever ready rehna hai। iske liye ek nimitta mahaarthi ko example banaaya (daadi chandramni ko)। hai to sab drama anusaar lekin koi vishaal seva ka example bhi banta hai। isliye kya karenge? jab baapdaada mile to sab man se kehna, kaagaj ka vaayda ya mukh ka vaayda nahin,man se vaayda karke dikhaana ki ''ham sab puraane sanskaar khatma kar apne niji sanskaar dhaaran karne vaale ever ready aatmaayen hain।`` theek hai? karenge?chhoti-chhoti baaten khatma karo। aise lagta hai jaise 60 saal ka bujurga aur bachche maaphik gend se khele। achha nahin lagta। gend kya, mitti se khelte ho। deh- abhimaan ki mitti se khelte ho। abhi gyaan ratnon se khelo, gunon se khelo, shaktiyon se khelo, mitti se nahin। kisi bhi prakaar ka deh-abhimaan,mitti se khelna hai। suna! vatan ka samaachaar suna!

aap sabhi ki yagya maata, sarasvati maata usne vishesh sabhi bachchon ko yaadap yaar diya hai। diya to sabhi ne hai lekin vishesh yagya maata ne aap sabke liye bahut-bahut dil se yaadapyaar diya hai aur yahi mahaamantra yaad karaaya ki ab ghar chalne ki taiyaari karo। kinaare saare chhodo, chalo,udo। yagya maata se pyaar hai na! achha।

aaj bahut baaten sunaai hain। abhi ek second mein ekdam man aur buddhi ko bilkul plen kar ek baap se sarva sambandhon ka,baap hi sansaar hai - chaahe vyakti sambandh,chaahe praaptiyaan,yahi sansaar hai … to ek hi baap sansaar hai,is baap ki yaad mein, is roop mein, is ras mein, is anubhav mein lavleen ho jaao।(baapdaada ne 3 minute drill karaai) achha।

aaj teachers bhi aai hai na। haath uthaao teachers। jo khaas programme pramaan bhatthi mein aai hain woh haath uthaao। vishesh teachers prati,baapdaada sada khush hote hain ki chaahe badi,chaahe chhoti lekin apne jeevan ke liye phainsala karne mein bahut hi achhe apne judge bane hain, jo phat se apne jeevan ka phainsala kiya ki mujhe yahi seva ki jeevan vyateet karni hai। yeh vaayda sabhi teachers ne kiya hai na?ya kabhi-kabhi sochti hain ki socha nahin tha aisa hoga, pahle pata hota to nahin karte। aise to nahin sochte? yahaan ek geet bajaate ho, baahar ka hai ya aap logon ka hai, ek geet bajaate ho usmein baap ko kehte ho - aapke phoolon se bhi pyaar to kaanton se bhi pyaar। yeh gaati ho? yeh man mein dhaarna hai? kaanton se pyaar hai to kaante to chubhte bhi hain na। agar kaante ko pyaar se sambhaal se uthaao to kaante bhi pyaare lagte hain aur albele pan mein kaante ko haath lagaao to naaraajgi ka khoon bhi nikalta hai। to aise to nahin ho na?aap to pyaar karne vaale ho na। chhoti-chhoti baaten, chhote-chhote kaante hain। lekin aapko to kaanton se bhi pyaar hai kyonki kaante arthaat chhoti-chhoti baaten anubhvi bahut banaati hain।

baapdaada ko is group se jo abhi aaye hain aur aane vaale bhi hain, unse badon se bhi jyaada pyaar hai। kyon pyaar hai? kyonki naam chhoti hai lekin seva badi karte ho। dekho,pradarshani kaun samjhaate hain, bade samjhaate hain ya aap samjhaati ho?course kaun karaata hai, bhaashan achhe-achhe kaun karta hai?aap log hi to karte ho। to baapdaada, naam chhote hai lekin seva mein aapko badon se bhi bade samajhte hain। sirf ghabraana nahin,ghabraana kaam kamjoron ka। aap to bahut bahaadur ho, mahaaveer ho,iseelie ghabraao nahin। dil chhoti kabhi nahin karo, badi dil। bade baap ke bachche hain na। chhote baap ke bachche hain kya! to chhoti dil nahin। na chhoti dil karo na chhoti-chhoti baaton mein ghabraao। sada yeh slogan yaad rakho ki dekhne mein chhote hain lekin kaam bada karke dikhaayenge। badon ke sahayogi banenge। badon ko aankh nahin dikhaayenge lekin sahayogi ban vishwa mein naam baala karenge। aisi teachers hain? jo samajhti hain aisa hi karte hain aur karenge - woh haath uthaao। yeh to bahut hain bahaadur। haath uthaana bahut sahaj hai, dekhna! phir bhi baapdaada aapke bhaagya par khush hote hain। aapka bhi baap se bahut pyaar hai na! to baap ka bhi aapse bahut pyaar hai,sirf chhoti dil nahin karna। komal nahin banna, mahaaveer banna। kabhi bhi chehre par kamjori ka, komalta ka chinha na ho। nirmaanta alag cheez hai,komalta alag cheez hai। nirmaan bhale bano, komal nahin bano। komal kehte hain jo paani ka phal ho। aise lagaao paani aur bah jaaye usko kehte hain komal। to komal nahin banna, kamaal karke dikhaana। baaten to badon ke saamne bhi aati hain, aapke saamne bhi aati hain lekin aap aur hi aise samjho ki ham example bankar dikhaayenge। ham gyaan aur yog mein aage hain aur rahenge। baaton ki parvaah nahin karo। kabhi bhi harshitmukh chehra badalna nahin chaahiye। sada man, tan muskuraata rahe। samjha! kamaal karke dikhaayengi?kabhi bhi man murjhaaye nahin,muskuraata rahe। ho sakta hai?

teachers bolo-haan ji?haan ji bol rahi ho ya na ji? man se bol rahi ho ya mukh se? dekho,baapdaada ne vishesh milne ke liye programme rakha। to sada muskuraate rehna tabhi aapke poojya swaroop mein yaadgaar ban jaayega। sab khush hain? baapdaada mila, baaten ki? abhi jo bhatthi ho usmein is group ki sabhi teachers number one ho, second number nahin ho,second group ka naam hai, aap second nahin ho। to jo second group aaya hai woh sab baat mein number one ho। achha।

teachers sikeeldhi hain na? seva to bahut karti hain na, din raat lagi hui to hain। aise hi jo bhi yahaan shaantivan mein va madhuban mein,gyaan sarovar mein, hospital mein,sangam bhavan mein seva par hain, sabhi taraph ke sevaadhaariyon ko baapdaada pyaar ki massage kar rahe hain। jo bhi jahaan seva kar rahe hain, woh sabhi apne ko pyaar ki apne haath mein massage anubhav karna। naam kitnon ka lenge। dekho aap sabki seva hai। aap aaye to sevaadhaariyon ko seva ka bhaagya diya। to pahle to aap ho। agar aane vaale aate nahin to sevaadhaari kiski seva karte। to mahatva to aapka bhi hai na! achha।

chaaron or ke sarva baapdaada ke lavleen aatmaayen,sarva baap ke sevaadhaari aatmaayen,sarva sahaj purooshaartha ko apnaane vaali shreshtha aatmaayen,sada baap samaan banne ke lakshya aur lakshan ko samaan banaane vaali,baap ke sameep aatmaon ko baapdaada ka bahut-bahut yaadapyaar aur namaste।

achha-double foreigners theek hain? haath hilaao। bahut achha-dekho,double foreigners ho to baithne ke liye bhi double haal chaahiye। iseelie aapko yeh double, triple haal mein bithaaya hai। double foreigners ko achha lagta hai? baapdaada ko bhi behad achhi lagti hai। lekin yeh behad bhi had ho gai hai। abhi se chhota ho gaya hai। abhi kya karengi? dekho last tak full baithe hain। vriddhi to honi hai। achha।

double foreigners is season mein khush hain? gyaan sarovar mein khush hain? dekho,double foreigners,double bhaagyavaan ho,sab daadiyaan aapke liye gyaan sarovar mein aati hain,aapko aane ki mehnat nahin karni padti, vahaan hi pahunch jaati hain। sikeeldhe ho na। to sikeeldhe ko mehnat nahin di jaati hai। to aapke paas sabhi daadiyaan, daade aate hain to achha lagta hai na। sirf double foreigners ki season mein to apne aapko hi dekhte ho, kabhi bhaarat vaalon ko bhi to dekho,iseelie abhi mix kiya hai। achha lagta hai mix ya alag? achha। aakhir to abhi double videshi ho lekin orijinal to bhaarat ke ho na ki videsh ke ho? bhaarat ke ho na! raajya kahaan karenge, America mein, london mein ya bhaarat mein? bhaarat mein hi karenge na। iseelie bhaarat aur videsh ka sangam hai। baapdaada to aapko isi roop mein dekhte hain ki aadi bhaaratvaasi hain aur abhi bhi bhaarat mein hi rahenge, bhaaratvaasi banenge। achha। om shanti।

jagdeesh bhaai tatha anya mukhya bhaaeeyon se

seva mein pahla seva ke nimitta banna aur seva mein surrender hona - ye aapka vishesh part hai। achha hai chaaron ka apna-apna part hai। sabhi ki visheshta aapni-apni hai।

sabhi ki visheshta aavashyak hai na। inki visheshta bhi aavashyak hai,aapki bhi aavashyak hai। jaise bahut cheejen mila ke achhi ban jaati hain na tasty,to aise sabhi ki visheshta milkar seva mein taste aa jaati hai।

sabhi ki visheshta chaahiye। bahut achha। daadiyon ne kaha aur paandavon ne maana - ye bahut achhi baat hai,jab bhi bulaayen haan-ji, haan-ji। aapke sangathan ke aadhaar par saara daivi parivaar chalta hai। isliye jaise daadiyaan nimitta hain,vaise aap bhi nimitta ho। jimmevaar ho। hain ya nahin hain? sab baat mein samjho ham sab seva ke saathi hain, yeh10-12 nahin hain lekin ek hain,ismen yagya ka shaan hai। baap-daada sabhi ko ever ready dekhkar bahut khush hain, kaarya to badhne hi hain। kam to hone nahin hain। sangathan ki shakti bahut vaayumandal ko power deta hai। right hand to aap log ho na! vishesh right-hand ho। theek hai na?soch mein to nahin ho? nahin। nimitta hain nimitta ban anguli last tak deni hai। achha।

sab theek hain। seva mein saphalta hai hi na? vriddhi bhi ho rahi hai aur vidhi bhi spashta ho rahi hai। sahaj hai na?

(mohini behen America ka samaachaar suna rahi hain)dil ka pyaar le aaya hai kyonki baapdaada jaante hain jitna seva se pyaar hai utna baap se bhi dil ka pyaar hai। to dil ka pyaar dil tak pahunchaata hai। bahut achha kiya। yeh udti kala ki nishaani hai। jaise sthool mein udkarke aaye na। to yeh udna,udti kala ki vidhi ko siddha karta hai। achhi raphtaar theek hai।

vedaanti behen se:- aap chhatrachhaaya ke beech mein ho। seva achhi chal rahi hai। don't care।

sudesh behen se:- sabhi ko pyaar se chalaao। pahle inhon ko theek karengi phir hoga। pahle in aatmaon ko pakka karo aur hi extra powerful stage se। theek।

chakradhaari behen se:- Russia to achha hai। result achhi hai। dharni bhi achhi hai। Russia ki dharni achhi hai iseelie phal jaldi nikalta hai।

jo is samay shaantivan ki seva mein haajir hain woh haath uthaao। Indore vaale haath uthaao। । achhi seva kar rahe ho, umang aur utsaah se seva kar rahe ho aur anekon ki duaayen praapta kar rahe ho। aise hi sada seva mein duaayen lete rehna।

ashok mehta ke bachche se:-lucky hai na?brahman parivaar ke pyaare ho। dekho laukik parivaar mein bhi lucky,alaukik parivaar mein bhi lucky। abhi kya karegen jaakar?aaj kya paath padha? (gussa kam karenge)to yahaan gussa chhodkar ja rahe ho। jab bhi gussa aave na to yeh haal emerge karna। bahut achha। aise hi khile hue roohe gulaab banna।