Avyakt murli du vendredi 30 novembre 2007

>

30-11-07 om shanti avyakt baapdaada madhuban

‘‘satyata aur pavitrata ki shakti ko swaroop mein laate baalak aur maalikpan ka balance rakho’’

aaj sat baap, sat shikshak, satguru apne chaaron or ke satyata swaroop, shakti swaroop bachchon ko dekh rahe hain kyonki satyata ki shakti sarvashreshtha hai। is satyata ki shakti ka aadhaar hai sampoorn pavitrata। man-vachan-karma,sambandh-samparka,svapna mein bhi apvitrata ka naam nishaan na ho। aisi pavitrata ka pratyaksha swaroop kya dikhaai deta?aisi pavitra aatma ke chalan aur chehre mein spashta divyata dikhaai deti hai। unke naynon mein roohaani chamak,chehre mein sada harshitmukhta aur chalan mein har kadam mein baap samaan karmayogi। aise satyavaadi sat baap dvaara is samay aap sabhi ban rahe ho। duniya mein bhi kai apne ko satyavaadi kehte hain, sach bhi bolte hain lekin sampoorn pavitrata hi sachchi satyata shakti hai। jo is samay is sangamayug mein aap sabhi ban rahe ho। is sangamayug ki shreshtha praapti hai - satyata ki shakti, pavitrata ki shakti। jiski praapti satayug mein aap sabhi brahman so devta ban aatma aur shareer donon se pavitra bante ho। saare srishti chakra mein aur koi bhi aatma aur shareer donon se pavitra nahin bante। aatma se pavitra bante bhi hain lekin shareer pavitra nahin milta। to aisi sampoorn pavitrata is samay aap sab dhaaran kar rahe ho। phalak se kehte ho, yaad hai kya phalak se kehte ho? yaad karo। sabhi dil se kehte hain,anubhav se kehte hain ki pavitrata to hamaara janma siddha adhikaar hai, janma siddha adhikaar sahaj praapta hota hai kyonki pavitrata va satyata praapta karne ke liye aap sabhi ne pahle apne sat swaroop aatma ko jaan liya। apne sat baap, shikshak,satguru ko pahchaan liya। pahchaan liya aur pa liya। jab tak koi apne sat swaroop va sat baap ko nahin jaante to sampoorn pavitrata, satyata ki shakti aa nahin sakti। to aap sabhi satyata aur pavitrata ki shakti ke anubhvi hai na! hain anubhvi?anubhvi hain?woh log prayatna rate hain lekin yathaartha roop mein na apne swaroop, na sat baap ke yathaartha swaroop ko jaan sakte। aur aap sabne is samay ke anubhav dvaara pavitrata ko aise sahaj apnaaya jo is samay ki praapti ka praalabdha devtaaon ki pavitrata natural hai aur nature hai। aisi natural nature ka anubhav aap hi praapta karte ho। to check karo ki pavitrata va satyata ki shakti natural nature ke roop mein bani hai? aap kya samajhte ho?jo samajhte hain ki pavitrata to hamaara janma siddha adhikaar hai woh haath uthaao। janma siddha adhikaar hai ki mehnat karni padti hai?mehnat karni to nahin padti na! sahaj hai na! kyonki janmasiddha aadhikaar to sahaj praapta haata hai | mehnat nah karni padti। duniya vaale asambhav samajhte hain aur aapne asambhav ko sambhav aur sahaj bana diya hai।

jo naye naye bachche aaye hain, jo pahle baari aaye hain woh haath uthaao। achha jo naye naye bachche hain, mubaarak ho naye pahli baar aane vaalon ko kyonki baapdaada kehte hain ki bhale let to aaye ho lekin tu let mein nahin aaye ho। aur naye bachchon ko baapdaada ka vardaan hai ki last vaala bhi fast purooshaartha kar first division mein aa sakte hain। first number nahin lekin first division mein aa sakte hain। to naye bachchon ko itni himmat hai, haath uthaao jo first aayenge। dekhna T.vi. mein aapka haath dikhaai de raha hai। achha। himmat vaale hain। mubaarak ho himmat ki। aur himmat hai to baap ki to madad hai hi lekin sarva brahman parivaar ki bhi shubh bhaavna, shubh kaamna aap sabke saath hai। isliye jo bhi naye pahle baari aaye hain un sabke prati baapdaada aur parivaar ki taraph se dubaara padamguna badhaai ho, badhaai ho, badhaai ho। aap sabhi jo pahle aane vaale hain unhon ko bhi khushi ho rahi hai na! bichhudi hui aatmaayen phir se apne parivaar mein pahunch gaye hain। to baapdaada bhi khush ho rahe hain aur aap sab bhi khush ho rahe hain।

baapdaada ne vatan mein daadi ke saath ek result dekhi। kya result dekhi? aap sabhi jaante ho,maante ho ki ham maalik so baalak hain। hain na! maalik bhi ho, baalak bhi ho। sabhi hain? haath uthaao। soch ke uthaana, aise nahin। hisaab lenge na! achha, haath neeche karo। baapdaada ne dekha ki baalakpan ka nishchay aur nasha yeh to sahaj rehta hai kyonki brahmaakumaar aur brahmaakumaari kahlaate ho to baalak ho tabhi to brahmaakumaar kumaari kahlaate ho। aur saara din mera baba, mera baba yahi smriti mein laate ho phir bhool bhi jaate ho lekin beech-beech mein yaad aata hai। aur seva mein bhi baba baba shabd natural mukh se nikalta hai। agar baba shabd nahin nikalta to gyaan ka koi prabhaav nahin padta। prabhaav jo bhi seva karte ho, bhaashan karte ho, course karaate ho, bhinna-bhinna topic par karte ho। sachchi seva ka pratyaksha swaroop va pratyaksha pramaan yahi hai ki sunne vaale bhi anubhav karen ki main bhi baba ka hoon। unke mukh se bhi baba baba shabd nikle। koi taakat hai, yeh nahin। achha hai, yeh nahin। lekin mera baba anubhav karen isko kahenge seva ka pratyaksha phal। to baalakpan ka nasha va nishchay phir bhi achha rehta hai। lekin maalikpan ka nishchay aur nasha nambarvaar rehta hai। baalakpan se maalikpan ka practical chalan aur chehre se nasha kabhi dikhaai deta hai,kabhi kam dikhaai deta hai। vaastav mein aap double maalik ho ek baap ke khazaanon ke maalik ho। sabhi maalik ho na khazaanon ke?aur baap ne sabhi ko ek jitna hi khazaana diya hai। koi ko laakh diya ho, koi ko hajaar diya ho,aisa nahin hai। sabhi ko sab khazaane behad ke diye hain kyonki baap ke paas behad ke khazaane hain। kam nahin hain। to baapdaada ne sabhi ko sarva khazaane diye hain aur ek jaise, ek jitne diye hain। aur doosra maalik hai - sva raajya ke maalik ho। iseelie baapdaada phalak se kehte hain ki mera ek ek bachcha raaja bachcha hai। to raaja bachche ho na! praja to nahin? raajayogi ho ki prajaayogi ho?raajayogi ho na! to svaraajya ke maalik ho।

lekin baapdaada ne daadi ke saath result dekha - to jitna baalakpan ka nasha rehta hai, utna maalikpan ka kam rehta hai। kyon? agar svaraajya ke maalikpan ka nasha sada rehta to yeh jo beech-beech mein samasyaayen va vighna aate hain woh aa nahin sakte। vaise dekha jaata hai to samasya va vighna aane ka aadhaar vishesh man hai। man hi halchal mein aata hai। iseelie baapdaada ka mahaamantra bhi hai manamnaabhav। tanamnaabhav, dhanamnaabhav nahin hai, manamnaabhav hai। to agar svaraajya ka maalik hai to man maalik nahin hai। man aapka karmachaari hai,raaja nahin hai। raaja arthaat adhikaari। adheen vaale ko raaja nahin kaha jaata hai। to result mein kya dekha? ki man ka maalik main raajya adhikaari maalik hoon। yeh smriti, yeh aatma sthiti ki sada sthiti kam rehti hai। hai pahla paath,aap sabne pahla paath kya kiya tha? main aatma hoon, paramatma ka paath doosra number hai। lekin pahla paath main maalik raaja in karmendriyon ka adhikaari aatma hoon। shaktishaali aatma hoon। sarvashaktiyaan aatma ke nijeegun hain। to baapdaada ne dekha ki jo main hoon, jaisa hoon, usko natural swaroop smriti mein chalna, rehna,chehre se anubhav hona,samasya se kinaara hona,ismen abhi aur attention chaahiye। sirf main aatma nahin, lekin kaun si aatma hoon, agar yeh smriti mein rakho to master sarvashaktivaan aatma ke aage samasya va vighna ki koi shakti nahin jo aa sake। abhi bhi result mein koi na koi samasya va vighna dikhaai deta hai। jaante hain lekin chalan aur chehre mein nishchay ka pratyaksha swaroop roohaani nasha woh aur hi pratyaksha hona hai। iske liye yeh maalikpan ka nasha isko baar-baar check karo। second ki baat hai check karna। karma karte, koi bhi karma aarambha karte ho,aarambha karne time check karo - maalikpan ki authority se karmendriyon dvaara karma karaane vaala controlling power, ruling power vaali aatma hoon? ki saadhaaran karma shuru hua?smriti swaroop se karma aarambha karna aur saadhaaran sthiti se karma aarambha karna usmein bahut pharka hai। jaise had ke martabe vaale apna kaarya karte hain to kaarya ki seat par set hoke phir kaarya aarambha karte hain aise apne maalikpan ke svaraajya adhikaari ki seat par set hoke phir har kaarya karo। is maalikpan ke authority ki checking ko aur badhaana hai। aur iski nishaani hai, maalikpan ke authority ki nishaani hai sada har kaarya mein double light aur khushi ki anubhooti hogi aur result saphalta sahaj anubhav hogi। abhi kahaan-kahaan,abhi tak bhi adhikaari ke bajaae adheen ban jaate ho। adheenta ki nishaani kya dikhaai deti? jo baar-baar kehte hain mere sanskaar hain,chaahte nahin hain lekin mere sanskaar hain, meri nature hai। baapdaada ne pahle bhi sunaaya ki jis samay yeh kehte hain ki mere sanskaar hain,meri nature hai, kya yeh kamzori ke sanskaar aapke sanskaar hain?mere hain?yeh to raavan ke madhya ke sanskaar hain,raavan ki den hai। usko mera kehna hi wrong hai। aapke sanskaar to jo baap ke sanskaar hain vahi sanskaar hain। us samay socho ki mera-mera kahke mere hain,to woh adhikaari ban gaye hain aur aap adheen ban jaate hain। samaan baap jaise banna hai to mere sanskaar nahin,jo baap ke sanskaar woh mere sanskaar। baap ke sanskaar kya hain? vishwa kalyaankaari,shubh bhaavna,shubh kaamnaadhaari। to us samay baap ke sanskaar saamne laao, lakshya hai baap samaan banne ka aur lakshan rahe hue hain raavan ke। to mix ho jaate hain, kuchh achhe baap ke,kuchh woh mere past ke sanskaar। iseelie donon mix rehte hain na to khitkhit hoti rehti hai। aur sanskaar bante kaise hain?woh to sabhi jaante hain na! sanskaar man aur buddhi ke sankalp aur kaarya se sanskaar bante hain। pahle man sankalp karta,buddhi sahayog deti aur achhe ya bure sanskaar ban jaate।

to baapdaada ne daadi ke saath-saath result mein dekha ki maalikpan ka natural aur nature ka nasha rahe woh baalakpan ki bhent mein abhi bhi kam hai। iseelie baapdaada dekhte hain ki samaadhaan karne ke liye phir yuddha karne lag padte hain। hain brahman lekin beech-beech mein kshatriy ban jaate hain। to kshatriy nahin banna hai। brahman so devta banna hai। kshatriy banne vaale to bahut aane vaale hain, woh peechhe aane vaale hain aap to adhikaari aatmaayen hain। to suna result। isliye baarbaar main kaun, yeh smriti mein laao। hai hi,nahin lekin smriti swaroop mein laao। theek hai na। achha। result bhi sunaai। abhi samasya ka naam,vighna ka naam, halchal ka naam, vyartha sankalp ka naam,vyartha karma ka naam,vyartha sambandh ka naam, vyartha smriti ka naam samaapta karo aur karaao। theek hai na, karenge?karenge?jo dridh sankalp ka haath uthaayen,yeh haath uthaana to common ho gaya hai isliye haath nahin uthvaate hain,man mein dridh sankalp ka haath uthaao। man mein,shareer ka haath nahin, woh bahut dekh liya hai। jab sabhi ka milkar man se dridh sankalp ka haath uthega tab hi vishwa ke kone-kone mein sabhi ka khushi se haath uthega - hamaara sukhdaata, shaantidaata baap aa gaya।

baap ko pratyaksha karne ka beeda uthaaya hai na! uthaaya hai? pakka?teachers ne uthaaya hai? achha। paandavon ne uthaaya hai, pakka। achha date fix ki hai। date nahin fix hai? kitna time chaahiye?ek varsha chaahiye, do varsha chaahiye?kitna varsha chaahiye? baapdaada ne kaha tha har ek apne purooshaartha ki yatha shakti pramaan apni natural chalne ki ya udne ki vidhi samaan apni date sampanna banne ki khud hi fix karo। baapdaada to kahega ab karo, lekin yathaashakti apne purooshaartha anusaar apni date fix karo aur samay prati samay usko check karo ki samay pramaan mansa ki stage, vaacha ki stage, sambandh-samparka ki stage mein progress ho raha hai? kyonki date fix karne se svatah hi attention jaata hai।

baaki sabhi ki taraph se,chaaron or ki taraph se sandesh bhi aaye hain। email bhi aaye hain। to baapdaada ke paas to email jab tak pahunche uske pahle hi pahunch jaata hai,dil ke sankalp ka email bahut raphtaar ka hota hai। woh pahle pahunch jaata hai। to jinhonne bhi yaadapyaar, samaachaar apne sthiti ka, apni seva ka bheja hai, un sabko baapdaada ne sveekaar kiya, yaadapyaar sabhi ne bahut achhe umang-utsaah se bhi bheji hai। to baapdaada un sabhi ko chaahe videsh chaahe desh sabhi ko return mein yaadapyaar aur dil ki duaaon sahit pyaar aur shakti ki sakaash bhi de rahe hain। achha।

seva ka tarna raajasthaan aur Indore ka hai:- achha hai,donon ne yagya seva ki seva ka chance liya hai, yeh bhi golden chance lene vaale golden chancellor hain। baapdaada ne dekha hai ki sabhi ko intajaar rehta hai ki kab hamaara tarna seva ka bal aur seva ka phal milne ka aayega। to aap donon ka to pratyaksha phal paane ka chance aa gaya। aur baapdaada ne dekha hai ki har zone jo bhi nimitta bante hain woh roochi se seva karte hain kyonki sangamayug mein seva ka va har karma ka pratyakshaphal milta hai। abhi abhi dil se seva ki aur abhi abhi hi dil ki khushi mein naachte rehte hain। to jab bhi jitne din bhi madhuban mein chance mila hai to sabhi ne har samay man ki khushi ka dance ka anubhav kiya?aur dance to common hai, lekin aapke man ki dance, mind dance, paanv ki dance nahin,anubhav kiya hai na! man ki khushi ki dance ka anubhav kiya?haath uthaao jinhonne kiya, thakaavat to nahin hui na। athakpan ka anubhav kiya na। aur punya kitna jama kiya? log to ek brahman ko khilaate hain,seva karte hain to samajhte hain bada punya jama ho gaya। aur aapne kitne braahmanon ko khilaaya, sambhaala, class karaaya,refresh kiya, to aapke punya ka khaata kitna jama ho gaya! aur sabse khushi ki baat to yeh hai ki apna brahman parivaar ek samay mein ek saath kitne bade parivaar ko dekha। aur vishwa ke chaaron or ke bhaai bahinen apna eeshvareey parivaar dekhne ka chance madhuban mein hi milta hai। videsh se bhi aate, desh se bhi aate hain। itna bada parivaar ka milan yeh bhi ek vishesh khushi ki baat hai। dil mein umang aata hai na vaah baba aur vaah mera brahman parivaar! to bahut achha kiya, himmat aapki, madad madhuban nivaasiyon ki aur baap ki। kyonki madhuban nivaasi bhi saathi bante hain tab to kaarya kar sakte ho। to lottery le li। lottery ki mubaarak ho। achha hai। teachers ko bhi chance milta,parivaar vaalon ko bhi chance milta,chhote bade saathi teachers ko bhi chance milta। dekho kitni teachers aai hain?donon zone keekitni teachers aai hain? (350 donon zone ki teachers aai hain) achha hai,to mubaarak to hai hi aur aage bhi chance lete rehna। baaki donon mein ek saal mein har ek zone bataaye to vaaris kitne nikaale? zone head kaun hai?haath uthaao। to saare zone mein kitne vaaris nikle,kitne mike nikle? list nikaali hai? chup ho gaye kyon? abhi vaaris quality ek saal mein to nikalni chaahiye na! kyonki har saal ke baad zone ko chance milta hai। theek hai na! ek saal mein kuchh to vaaris ya mike nikalne chaahiye na! bolo na haan ji। aise hi haan ji nahin। list chaahiye। achha agle saal nikaalkar aana। abhi taiyaar kar rahe honge,phir list le aana। abhi jiska bhi zone ka tarna hoga in advance baapdaada kah rahe hain ki har zone se yeh donon result lenge। pahle hi taiyaari karke aana। kitne mike nikle aur kitne vaaris nikle?pahle vaale hain woh to lucky aur lovely hain, abhi kitne nikle?theek hai na?result nikalni chaahiye na? baapdaada ne abhi tak har wing dvaara bhi vaaris ya mike ki list nahin dekhi hai। har saal wing milte hain, baapdaada khush bhi hote hain lekin result abhi tak nahin aai hai। yeh wings ka programme kitne saal se chal raha hai? kitne saal hue hain? (22 saal) to 22saal mein har saal mein ek to nikalna chaahiye। list nahin aai hai। ek wing ki bhi list nahin aai hai। to achha hai, aap logon ne dil se seva ki hai iseelie dilaaraam baap ki taraph se bahut-bahut-bahut dil ki duaayen hain। achha। doosre varsha ke liye taiyaari karke aana।

double videshi:-double videshi chatur bahut hain। har tarna mein apna achha adhikaar rakha hai। baapdaada ko aur sabhi brahman parivaar ko khushi hoti hai ki baapdaada ka sangathan international sangathan hai। achhi himmat karke aate hain। sabse jyaada group kahaan ka hai? (Malaysia se 61 aaye hain) achha hai,jitna bada group hai na,utni badi badi badi mubaarak ho। achha hai foreign ka vishesh gaayan hai ki vahaan ki life fast life hoti hai to jo double videshi brahman parivaar ke ban gaye unka bhi fast purooshaartha hai? jab desh ki fast life hai to brahman parivaar ki fast purooshaartha ki life hai? fast hai ya slow hai?fast hai?haan ya na kaho। jiski fast hai woh haath uthaao। aadha hai, aadha nahin hai। abhi agle varsha jab aao na, aana hi padega na। to is saal mein lakshya rakho ki purooshaarthi to hain lekin purooshaartha ke aage teevra shabd add kar do। purooshaarthi banna common hai,teevra purooshaarthi banna vishesh hai। to aap sabhi vishesh aatmaayen ho,saadhaaran thode hi ho, vishesh ho। to vishesh aatmaon ki pahli nishaani hai teevra purooshaarthi। socha aur kiya। aise nahin karenge, ho jaayega… hona to hai hi… nahin। karna hi hai। udna hi hai। baap samaan banna hi hai,isko kehte hain teevra purooshaarthi। to kya karenge? teevra purooshaartha hai na! abhi samay teevra sameep aa raha hai। samay mein teevrata aa gai hai lekin duhkh ke ashaanti ke samay ko samaapta karne vaale, unhon ko to samay se bhi teevra banna hi hai। phir bhi achhe hain, lagan hai, pahunch gaye ho, uski mubaarak hai। achha। teevra purooshaarthi?theek hai,jo kehte hain haan,woh haath uthaao। saadhaaran purooshaartha nahin, teevra purooshaartha?ki beech beech mein saadhaaran purooshaartha karenge? saadhaaran nahin sada teevra purooshaartha। bas maalikpan ka nasha har samay chehre se hi dikhaai de। mukh se bhi jyaada chehra bolta hai। to bahut achha, agle saal result dekhenge। achha। baith jaao, bahut-bahut mubaarak ho।

dhaarmik wing, social wing aur transport wing meeting ke liye aaye hain:- samaaj seva mein koi na koi seva ka saadhan logon ko dete hain,kuchh na kuchh seva karte hain। to samaaj seva vaale yahi lakshya rakho jo bhi aatmaayen samparka mein aati hain unko koi na koi gun,koi na koi gyaan ki point, koi na koi khazaana,jo baap se mila hai, woh dena hai। yeh social seva har ek ki karni hai,khaali haath koi na jaae, kuchh lekar hi jaaye kyonki daata ke bachche hain,kaise bhi logon ko chaahe kisi saadhan dvaara, chaahe direct connection dvaara lekin kuchh na kuchh dena hai। yeh social seva, aadhyaatmik seva chaaron or phailaani hai, chaahe kisi bhi vidhi se,jo har ek ke mukh se nikle ki humein bahut achhi seva ka saadhan mila। bahut achhi praapti karaai। aajkal bahut pyaasi bhi hain, to kuchh na kuchh praapti karaake bharpoor banaao। achha।

ek baat jo baapdaada ne phir se kahi,list aani chaahiye। ek bhi wing ki list nahin aai hai। aur unhon ki jo aap list likho, usmein unki praapti ka anubhav bhi short mein saath mein ho। jaise yahaan kahkar jaate hain na bahut praapti hui bahut mila। lekin jo praapti hui woh ikattha raha,usko badhaaya?baapdaada ne dekha hai jo bhi wings hai, chaahe transport ka hai chaahe dhaarmik hai। lekin jab programme karte hain connection mein aate hain, unse lagaataar connection mein rakhte rahen, woh nahin hota hai। jab phir programme hoga tab patra bhejenge, nimantran bhejenge, phir se aao। baapdaada ne ek foreign ka samaachaar suna hai, jo call oph time ka programme karte hain, usmein jo bhi aate hain,achha lagta hai, jigyaasa uthti hai, connection hota hai to unhein relation mein laane ke liye samay prati samay lagaataar har saptaah kuchh na kuchh bhejte rehte hain। aise aap peeth nahin karte ho, 6maas, saal ke baad woh yaad aa gaya to aa gaya,connection ho gaya to ho gaya। lekin har ek ki address pramaan unko kuchh na kuchh saptaah mein bhejna chaahiye,jisse unhon ki paalna hoti rahe, bina paalna ke vriksha bhi nahin bada hota। to yeh karna chaahiye। har ek wing ko, sirf programme nahin, progress bhi unhon ki karaani chaahiye। najdeek aate jaayen। aur result apne paas rakhte raho। is varsha mein kitne najdeek relation mein aaye? samjha,suna na। achha hai foreign ka result achha hai | yeh bhi karte honge lekin baapdaada ke paas result nahin aai hai। baaki achha hai jab yeh vargo ki seva hui hai, to connection mein bahut aaye hain aur parivartan bhi hua hai, pahle bulaana padta tha abhi bina bulaaye bhi aane chaahte hain, pharka to hai। lekin iski result saare parivaar ko pata hona chaahiye। ek do ki result se umang aata hai। aur ek ka sunke doosre ko aata hai, ham bhi kar sakte hain, himmat bhi aati hai। baaki baapdaada khush hai ki vargo ki department banne se bhinna bhinna prakaar ki bhinna bhinna vargo ki seva badhti ja rahi hai isliye sabhi varga vaalon ko seva ki mubaarak bhi hai aur aage badhne ka aur bhi saadhan karenge to pratyaksha phal dikhaai dega। aakhir to sabhi varga vaale milkarke kahen ham sab ek baap ke ek hain। is vishwa ki stage par ek hai, ek mat hain, ek ke hi hain। yeh aavaaj phaile। dhaarmik log bhi kahen ham ek hain। ek ke hain। baaki seva ki hai uski mubaarak। achha।

CAD group bhi aaya hai:- ismen brahman bhi hain, phaayda uthaaya hai? to dil vaalon ne dilaaraam ko to pahchaan liya। iseelie dilaaraam ko pahchaana to dil khush ho gai aur achha hai jitna-jitna aap saath vaalon ko anubhavsunaayenge,utna yeh seva phailti jaayegi। kyonki pratyaksha pramaan hai na। aap svayan hi pratyaksha pramaan hai to koi bhi pratyaksha pramaan dekh karke jaldi khush ho jaate hain। himmat aati hai। to apna anubhav jo bhi samparka mein aaye va samparka karke bhi phailaate jaao। kyonki aavashyakta to hai। gareebi badhti jaati hai aur gareebi ke samay agar sahaj saadhan mil jaae to sabhi khush hote hain। to achha hai। samay prati samay karte bhi rehte hain aur aage bhi karte chalo। achha। mubaarak ho। achha |

training mein aai hui teachers se:-training to ki, bahut achha kiya lekin training karne ke baad dil mein stamp kitni pakki lagaai? kya sada nirvighna ban auron ko bhi nirvighna banaati rahengi? yeh vaayda kiya?nirvighna rahengi? ki thoda thoda beech mein vighna aayega? achha aa bhi jaae to parivartan karne ki shakti vighna ko, samasya ko samaadhaan ke roop mein parivartan karne ki shakti anubhav karte ho?jo samajhte hain ki parivartan ki shakti kaarya mein lagaake baapdaada ko ya jin teachers ne seva ki, usko saboot dikhaayenge aisi himmat rakhne vaale haath uthaao। dil ka haath uthaaya hai na! kuchh bhi ho jaae, si father। auron ki visheshta ko dekhna lekin follow father। achha। kitne hain group mein? (70 bahine hain) to aap sabhi apni teacher dvaara madhuban mein result likhte rehna, baar baar nahin likhna, 15din mein teacher dvaara O.ke. likhna, bas। chhota sa card bhejna, lamba patra nahin bhejna। sunaaya tha na - agar koi kamzori aa bhi jaae to sirf O.ke.ke beech mein line laga dena। to yahaan se phir aapko yaad dilaate rahenge। abhi 70 to nirvighna aatmaayen ban gai na aur nirvighna banaayengi bhi। jahaan bhi jaayengi vahaan nirvighna ban nirvighna banaayengi। hai na himmat? himmat hai?achha। result dekhna। report aati jaayegi na to pata padta jaayega। achha।

sab kuchh suna। jaise sunna sahaj lagta hai na! aise hi sunne se pare sweet silence ki sthiti bhi jab chaaho jitna samay chaaho utna samay maalik hoke, pahle vishesh hai man ke maalik, iseelie kaha jaata hai,man jeete jagatjeet। to abhi suna, dekha,aatma raaja ban man buddhi sanskaar ko apne control mein kar sakte ho? man-buddhi-sanskaar teenon ke maalik ban order karo sweet silence, to anubhav karo ki order karne se,adhikaari banne se teenon hi order mein rehte hain? abhi-abhi adhikaari ki stage par sthit ho jaao। achha।

chaaron or ke sada svamaandhaari,satyata ke shakti swaroop,pavitrata ke siddhi swaroop, sada achal adol sthiti ke anubhvi sva parivartak aur vishwa parivartak, sada adhikaari sthiti dvaara sarva aatmaon ko baap dvaara adhikaar dilaane vaale chaaron taraph ke baapdaada ke lucky aur lovely aatmaon ko parmaatma yaadapyaar aur dil ki duaayen sveekaar ho aur baapdaada ka meethe meethe bachchon ko namaste।

daadiyon se:- achha hai baapdaada ne result dekhi। achha raha। shubhchintan aur shubhchintak donon hi sthiti mein busy rehna,vaayumandal phailaana yeh achha hai। achha kar rahi hain। achha kar rahe hain karte rahenge। majority dikha gaya hai ki jo aap nimitta hain, sab nimitta hain,to jo bhi aap nimitta hain,unhon ko vishesh is samay yeh attention rakhna hai ki santushta rehna to hai hi lekin santushta rahe,vaayumandal santushta rahe, uske liye aapas mein koi na koi plan banaate rehna। yeh teen paandav bhi aaven। jo bhi nimitta bane hue hain unhon ko aajkal ke vaayumandal pramaan svayan to santushta rehna hi hai lekin santushta karna bhi hai। asantushtata ka vaayumandal mein prabhaav nahin ho kyaan ki aajkal santushtata sabko chaahiye। lekin himmat nahin hai। iseelie beech-beech mein kuchh na kuchh aisa parvash hoke kar lete hain lekin unhon ko bhi kuchh shiksha, kuchh kshama, kuchh raham, kuchh aatmik sneh uski aavashyakta hai aur dekha jaata hai ki vaayumandal mein majority ko balance rakhna nahin aata। balance se shiksha bhi ho aur phir saath-saath unko himmat bhi do। sirf shiksha se, abhi sabhi shikshak ban gaye hain, iseelie shiksha ke saath himmat aur sneh dil ka,baahar ka nahin lekin dil ka sneh donon ka balance rakh karke dena hai। aur aise plan banaao jo chaaron or koi na koi aisa plan chalta rahe। jaise samay prati samay bhattiyaan chalaate ho woh to chalaate hi raho lekin chhota mota programme sada chalta rahe,to aisi vidhi nikaalo jisse chaaron or ka vaayumandal shaktishaali banen। chaahna hai lekin himmat kam hai। to aapas mein milke koi na koi har maas ke liye aisa work nikaalo jo sabhi usmein busy ho jaaen, result aati rahe। aur checking bhi ho,agar nahin karte hain to kyon? albelaapan hai to unke oopar sneh se sahayog dena padega kyonki samay teevrata se sameep aa raha hai। to aisa koi plan banaao। koi na koi work interest ka nikaalke sabko busy rakho usmein। theek hai। achha hai sabhi himmat vaale ho na। himmat kam to nahin hoti? himmat kam hoti hai, to baap ki madad ka bhi anubhav nahin hota hai, baap madad deta hai,lekin catch nahin kar paate hain। phaayda nahin utha sakte hain। iseelie sada apne ko dekho, himmat badhaao। koi na koi aisi baat buddhi mein rakho jisse himmat badhti rahe। jitni himmat badhegi na to himmat ke aage aur baaten aani bhi kam ho jaayengi। achha hai, sochna is par।

sandeshi daadi ne shareer chhoda hai, unke prati bhog lagaane ke liye bhuvneshvar se group aaya hai:-baapdaada ki bahut ramneek bachchi kahen,ya sakhi kahen jo sandeshi,is shareer ko chhod karke advance party mein gai, apne jeevan ka baapdaada se saakaar mein phaayda bhi bahut achha uthaaya,sakheepan ka part bhi bajaaya, khelne vaali bani, aur apne smriti se apna bhavishya banaaya। abhi jo aaye hain saathi banke, woh utho। jo bhi aaye hain। achha hai। pyaar ka saboot to diya na। abhi aage bhi pyaar ka saboot hai, sabhi ko santushta rahke santushta karna। himmatheen ko himmat dena। nambarvaar to hote hi hain na। to himmat dete rehna। umang-ulhaas badhaate rehna। sirf yaad nahin karna, lekin uski paalna ka pratyaksha saboot dena। baaki achha part bajaaya। aap sabhi bhi achhe te achha part bajaate rehna aur bajaayenge। sabhi theek hain! haath hilaao। achha।

daadi jaanki baapdaada ko bhog sveekaar kara rahi hain baapdaada bole:- dekho achhi daadiyaan mili hain na! yeh sab saathi bhi hain,daadiyon ki saathi bhi hain,daadiyaan bhi hain। to sada har daadi ki,har saathiyon ki visheshta ko dekh, visheshta ko kaarya mein laana kyonki baapdaada ne har ek bachche ko koi na koi visheshta special di hai,aap sabko bhi hai, aise nahin sirf daadiyon ko hai,aapko bhi hai lekin kya hai koi visheshta ko kaarya mein la raha hai isliye woh prasiddha ho jaata aur koi visheshta ko kaarya mein nahin laata to gupta rah jaata। baaki visheshta sabmen hai। chhote se chhota jo pyaade mein pyaada hai na usmein bhi visheshta hai। woh bhi smriti dilaata hai ki aap mahaarthi ho,aap mahaan ho ham pyaade hain। isliye sangathan sabhi jagah majboot karo, chaahe do hain chaahe 4 hain,chaahe 12hain, lekin do ka bhi sangathan aisa majboot ho jo donon ekmat hon। svabhaav ek do mein shreshtha banaae,milaane ki koshish karo। jaise daadi ko yaad karte hain na, kyon yaad karte ho?uski visheshta sabko apnaapan diya hai na, aise sabhi ko apnaapan diya na, to kyon aap sabhi nahin kar sakte ho? jaise sabhi ne anubhav kiya, hamaari daadi hai। aise nahin madhuban ki daadi hai, hamaari hai, aise sabhi brahman ek do mein apnaapan anubhav karen। yeh hai daadi ko yaad karna। isi ko hi yaad kaha jaata hai। samaan banna,visheshta dhaaran karna, isko kehte hain yaad। theek hai na! har ek yahi sochosab apne hain। apnaapan mahsoos ho, aise nahin yeh to pata nahin kaun hai, kya hai। ek parivaar hai na! daadi bhi sabhi centre par to nahin rehti thi na, ek hi sthaan par rehti thi madhuban mein, lekin sabhi ko apnaapan diya। to aap sabhi bhi apne apne sthaan par rehte bhi apnaapan de sakte ho। yeh dil ki sthiti hai। saath rahne ki baat nahin hai, yeh dil ka vibration apnaapan laata hai। achha।