Avyakt murli du dimanche 28 février 2010

28-02-10 om shanti avyakt baapdaada madhuban

‘‘dehbhaan ke main-main ki holi jalaakar parmaatma, sang ke rang ki holi manaao’’

aaj holiest baap apne holi bachchon se holi manaane aaye hain। chaaron or ke bachche door door se sneh mein dil mein sama rahe hain। baapdaada chaaron or ke bachchon ke mastak mein bhaagya ka sitaara chamakta hua dekh rahe hain। itna bada bhaagya saare kalpa mein aur kiska bhi nahin hota। is sangamayug ke praapti ke aadhaar se aap bachche hi itne shreshtha pavitra bante ho jo bhavishya mein aap double pavitra bante ho। aatma bhi pavitra aur shareer bhi pavitra। saare kalpa mein chakra lagaake dekho koi dharmaatma bhi double pavitra nahin bana hai। aap bachche double pavitra bhi bante ho aur double pavitrata ki nishaani double taajdhaari bante ho।

aaj holi sab manaate hain lekin aap is samay jo double holi bante ho uska yaadgaar utsav ke roop mein holi manaate hain। aapke hi har kadam-kadam ka jeevan ka mahatva utsav ke roop mein manaate hain। aap is sangam par har din, har kadam umang aur utsaah mein rehte ho to aapke umang-utsaah ka yaadgaar yeh utsav ke roop mein manaate hain। kyon umang utsaah rehta? kyonki aap paramatma ke sang ke rang ki holi manaate ho। to aapka har kadam utsav ke roop mein manaate hain। abhi holi mein pahle jalaate hain phir manaate hain। aap bhi sangam par abhi apne puraane sanskaar svabhaav ko yog agni mein jalaate ho kyonki apne puraane sanskaar ko jalaane ke bina parmaatma sang ka rang lag nahin sakta, parmaatma milan ho nahin sakta। to aapne yog agni mein sanskaaron ko jalaaya phir parmaatma sang ke rang mein range। to aajkal jalaate bhi hain aur rang bhi lagaate hain lekin aapke adhyaatmik roop ko sthool roop de diya hai। woh sthool aag jalaate, sthool rang lagaate kyonki abhi body conscious vritti hai। aap holi bante ho woh holi manaate hain। saare kalpa mein koi bhi adhyaatmik holi manaake double holi nahin banen। to aap sabhi jo bhi jahaan se aaye ho to parmaatma sang ke holi mein aaye ho। parmaatma sang ki holi manaane aaye hain। aap holi ke liye kehte ho ki holi arthaat jo baat ho chuki woh ho li। to drama anusaar jo beet chuka usko kehte hain ho li, beeti so beeti। koi bhi vyartha baat chit par nahin laate hain, ho chuki, aisi holi manaate rehte ho na। aap sabhi ne holi arthaat pavitra banne ka poorn purooshaartha kar pavitrata ko dhaaran kiya hai tabhi bhavishya mein aapko double pavitrata ki nishaani double taaj dikhaate hain।

to aaj ke din aap har ek bachcha kya jalaake jaayenge? baapdaada ne dekha ki janmadin par jo baap ne hom work diya tha - krodh ko janmadin par janmadin ki gift de do। to uski result baapdaada ke paas kuchh bachchon ki aaj pahunchi hai। baapdaada ne dekha ki kahaan-kahaan bachchon ne attention diya hai। aap sabne bhi apni result nikaali hogi to jo bhi aaj baithe hain, unhonne apni result nikaali, jinhonne apni result mein control kiya aur saphalta ka anubhav kiya woh haath uthaao। saphalta ko praapta kiya! bada haath uthaao। teachers haath uthaao, foreigners haath uthaao। (sabhi ne uthaaya) achha। mubaarak ho। isse aap sabne apne mein himmat rakhi aur himmat ka phal praapta ho sakta hai, yeh anubhav kiya। to kya agar is anubhav ko aage bhi lakshya rakhke baar-baar checking karte aur aage badhaane chaahe to samajhte ho ki sambhav hai? sambhav hai? aage ho sakta hai? woh haath uthaao। achha। ho sakta hai? teachers ho sakta hai? paandav ho sakta hai? achha। sambhav ho sakta hai, nahin, hona hi hai iski taali bajaao। achha। abhi to jyaada din nahin hue hain lekin abhi har teen maas ke baad aaj se teen maas attention rakh krodh ka tension khatma kar sakte ho? kar sakte ho? woh haath uthaao। achha। yeh to khushkhabri bahut achhi hai, kyon? krodh ka kaaran kya hota hai? krodh ka beej kya hota hai? aap sada apna bhavishya swaroop saamne rakho, aapka bhavishya swaroop kitna saja sajaaya harshit chehra hai aur baapdaada ko dekho usmein bhi brahma baap ko saamne laao kyon? shiv baap to hai hi niraakaar lekin brahma baap aapke sadrishya saakaar roopdhaari, aapke sadrishya jimmevaari ka taajdhaari phir bhi sada muskaraata hua, khushnuma chehra kyonki in vikaaron par vijay praapta kar aapke aage shareer hote kaarya karte example raha। brahma baap se jyaada aapki jimmevaari hai?brahma baap ki jimmevaari ke aage aapki jimmevaari to kuchh bhi nahin hai। aur last tak dekha karmaateet vibration mein avyakt pharishte ban gaye। to abhi baapdaada ko di hui saugaat vaapas to nahin lenge na! baapdaada samajhte hain ki kaarobaar mein aate hain to kahaan-kahaan aise circumstance bante hain, kaeeyon ne result mein bhi likha ki tej aavaaj ho jaata hai। mood mein thodi teji aa jaati hai। lekin jab aisi baaten saamne aati hain tab hi to vijayi banne ka chance hai। baaton ka kaam hai aana lekin aapka knowledge hai baaton se paar ho vijayi banna। to pasanda hai? krodh ko vidaai denge sada ke liye ya teen maas ke liye? kitna samay ki himmat hai? jo samajhte hain sada ke liye krodh jeet banna mushkil nahin hai, hona hi hai woh haath uthaao। hona hi hai। achha। baapdaada khush hai kyon? aapke last janma mein bhi aapki mahima kya gaate hain? aapke devta roop ke aage aapki mahima sarvagun sampanna, sampoorn nirvikaari yeh gaate hain। to aapka yeh banne ka part abhi sangamayug ka hi gaayan hai। baapdaada ke dil ki vishesh aasha hai bataayen? kaandh hilaao bataayen? baapdaada abhi se, abhi se har ek bachche ko sada khila hua gulaab ka pushpa dekhne chaahte hain। khushanseeb, khushnuma। baaton ka kaam hai aana, yeh bhi samajh lo। baaten aayengi lekin apna lakshya lakshan mein laana hai। ghabraana nahin। to jaise abhi kehte hain ki brahmaakumaariyaan pavitrata ka bahut paath padhaati hain, aise prasiddha ho ki brahmaakumaariyaan krodhmukta banaati hain kyonki krodh se mukta hona sab chaahte hain। tanaav hota hai na! to tanaav paida hota hai isliye sabhi chaahte hain lekin unhon ko vidhi nahin aati hai। jaise pavitra banna asambhav samajhte the lekin abhi aap sabke anubhav ke aadhaar se samajhte hain ki ho sakta hai। aise abhi is varsha yeh lahar phailaao ki krodh jeet banna ho sakta hai, koi mushkil nahin hai। aisa example ke anubhav practical mein stage par laao। baapdaada ne dekha hai ki bahut bachche kaarya karte bhi krodh jeet bane hain। aise drishtaanta aapke parivaar mein, brahman parivaar mein bane hain। to is varsha kya karenge? holi manaane aaye ho na! to holi mein kya karte hain? kuchh jalaate hain na! to aaj ki holi mein aap kya jalaayenge? krodh ka to kar liya, isko pakka karenge! lekin baapdaada ne dekha ki tanaav mein aane ka kaaran deh abhimaan ka ‘main’ shabd hai। dehbhaan ka ‘main’, ek hai main aatma hoon - yeh ‘main’ hai, lekin dehbhaan ka main shabd abhimaan ka bhi hota, apmaan ka bhi hota aur dilshikasta ka bhi main-main neeche giraata। to aaj krodh jeet mein aage badhne ke liye body conscious ka main isko yog agni mein jalaao। anek main-main ko jalaao aur ek main aatma hoon, is ‘main’ shabd ko pakka karo aur baaki ‘main’ aaj yog agni mein jalaake jaao। anek main hai na। to aaj jalaane ki holi manaayenge! kyonki krodh ka kaaran tanaav bahut hota hai। to is ‘main’ ko samaapta karne ke liye aaj apne andar sankalp lo। jalaana hai kyonki yeh bhi to bojh hai na। to train mein jaao, plen mein jaao to yeh bojh yahaan jalaake jaao। jala sakte ho? jo samajhte hain himmate bachche madde baap saath hai hi, to vijay bhi saath hai, jo yeh sochte hain ki mujhe vijayi banna hi hai, woh haath uthaao। banna hi hai achha। jo aaj vi.aai.pi aaye hain woh haath utha rahe hain। jo vi.aai.pi aaye hain utho, khade ho jaao। haath utha rahe hain। taali to bajaao। vijayi banenge? dekho। jo bhi vijayi banenge, us ek-ek ko maala pahna rahe hain। mubaarak ho, mubaarak ho। achha। himmat vaale abhi jo bhi vi.aai.pi aaye hain himmat vaale hain iseelie baapdaada vardaan de rahe hain। is samay aap jo bhi vi.aai.pi kisi bhi kaarya mein bane ho ek janma ke liye lekin baapdaada aap himmat vaale bachchon ko ab vi.aai.pi nahin kahenge, bachche kahenge। baapdaada yeh vardaan dete hain, guarantee dete hain ki aap sabhi 21 janma vi.aai.pi banenge। yeh election, selection nahin chalegi। to sabhi sirf ek baat chhodna nahin, jaise abhi sambandh mein samparka mein aaye ho aise is brahman parivaar ke connection ko chhodna nahin। jitna connection rakhenge utna relation pakka hoga aur baap ka vardaan praapta kar hi lenge। to manjoor hai? connection rakhna manjoor hai? haath uthaao। achha। (baapdaada ne phoolon ki maala uthaakar aage badhaai) yeh maala aap sabhi pahanna।

aur aap sabhi naye bachche va real gold bachche sada baap ke aagyaakaari ho na! to aaj is main ko jalaake hi jaana। jo pahle baari aaye hain woh utho। achha। baapdaada pahle baari aane vaale bachchon ko pahle baari aane ki padamguna mubaarak de rahe hain। lekin jaise abhi pahle baari aaye ho aise hi pahla number first division, pahla number mein to fix hai lekin first division mein aayenge, yeh himmat hai, haath uthaao jismen himmat hai? dekho soch ke uthaao। achha। to lakshya rakho ki ham last aaye hain lekin fast jaayenge kyonki samay ka koi bharosa nahin। abhi jo karna hai woh teevra purooshaarthi ban kar lo kyonki bahut samay ka purooshaartha aap sabko thode samay mein poora karna padega। to himmat hai? hai himmat? haath uthaao। dekho photo nikal raha hai aapka। baapdaada aise himmat vaalon ko mubaarak dete hain ki himmat aapki madad baap ki। lekin himmat nahin haarna। apne bhaagya ka sitaara sada chamkaate rehna kyonki is janma ka teevra purooshaartha, purooshaartha nahin teevra purooshaartha anek janmon ka bhaagya banaane vaala hai isliye himmat kabhi nahin haarna। baaten aayengi lekin baat mahaaveer nahin hai, aap sarvashaktivaan ke bachche ho, aapke aage baat kya hai! baat aati hai aur chali jaati hai। jo chali jaane vaali hai uske peechhe apni takdeer nahin ganvaana। achha baitho।

to sabhi ko baapdaada sneh se mubaarak de rahe hain, kis baat ki? himmat rakhi hai aur baapdaada har ek bachche ke himmat ke sankalp par khush hai। to holi manaai? jalaane ki holi to manaai। aur parmaatma sang ke rang ki holi bhi manaai। jalaai bhi manaai bhi।

abhi baapdaada sabhi bachchon ko ek drill karaane chaahte hain। woh drill hai, chaaron or ki paristhitiyaan hain, kahaan koi paristhiti hai, kahaan koi paristhiti hai, aise chaaron or ke paristhitiyon ke beech mein aap ek second mein ekaagra ho sakte ho? aisi practice svayan mein anubhav karte ho? ya samjho jis samay aapko kaarne akaarne kisi baat ke prati vyartha sankalp ka toofaan aa gaya hai, aise samay par aap apne man buddhi ko ekaagra kar sakte ho? yeh ekaagrata ke shakti ki drill samay par karke dekhi hai? agar aise samay par ek second mein ekaagrata ki shakti kaarya mein nahin aati to aage chalkar aisi paristhiti baar-baar aayegi। to aaj baapdaada second mein fullstop arthaat ekaagra sthiti ke abhyaas par attention khinchavaana chaahta hai kyonki prakriti apne bhinna-bhinna rang dikhaane shuru kar diye hain। chaaron or kya-kya ho raha hai, woh aap sab jyaada jaante ho। to aise man-buddhi ko bhatkaane vaali baaten aani hi hain, to abhi yeh practice karo ki man ko buddhi ko aap ek second mein paramdham mein tika sakte ho! abhi apne ko pharishte roop mein tikaao। abhi apne ko main brahman master sarvashaktivaan sthiti mein hoon, is master sarvashaktivaan sthiti mein sthit ho jaao। (baapdaada ne drill karaai) aisi practice saare din mein jab bhi samay mile, baar-baar man ko ekaagra karke dekho। jahaan chaaho, jo chaaho vahaan man ekaagra ho। purooshaartha ek minute lage, ek second mein fullstop kyonki aisa samay halchal ka abhi taiyaari kar raha hai isliye mind control -man mera hai, main man nahin, mera man hai to mere ke oopar main ka control hai? yeh drill bahut aavashyak hai।

to sabhi jo bhi aaye hain, baapdaada ko ek-ek bachcha pyaara hai। kyon? kaisa bhi hai lekin baapdaada har bachche ko koton mein koi aatma dekhte hain। chaahe purooshaartha mein kamzor hai lekin baap ka pyaara bana hai। dil se kehte hain mera baba isliye baap ka bhi ati pyaara hai। sirf baapdaada ek baat phir se yaad dila raha hai ki apna chehra sada khushnuma, khushi mein chamakta rahe। baaten chali jaayen lekin khushi nahin jaaye। sangamayug ki khushi parmaatma gift hai। to holi arthaat koi aisi baaten aaven to yaad karna ki holi manaake aaye hain, jo holi baat ho li, khushi nahin jaaye। parmaatma saugaat,khazaana khushi hai।

baapdaada sada kehte hain yeh slogan sada yaad rahe khush rehna hai aur khushi baantani hai। jitna baantenge utni badhegi aur khushnuma chehra chalte phirte automatic seva karta rahega। jo bhi dekhega woh yahi sochega kya mila hai। to aaj holi ki dilkhush mithaai hai khushi। sabne khaai? sada khaate rehna। ismen koi beemaari nahin hogi। achha।

seva ka tarna dilli aur aagra zone ka hai:- dilli vaale badi dil vaale kyonki dilli raajdhaani, ab ki bhi raajdhaani aur bhavishya mein bhi raajdhaani। aur dilli mein baapdaada ki dil ki aashaayen bhi hain aur aashaayen poori bhi ki hain। seva ke hisaab se dilli mein bhi seva ho rahi hai aur aajkal jo bachchon ne chhote bade shahron mein umang se seva ki hai uski result mein baapdaada khush hai। dilli vaalon par bhi khush hai। dilli vaale abhi ek aisi kamaal dikhaayen, bolen? jo baapdaada ki shuru se ek baat rahi hui hai ki dilli vaale ya koi bhi, lekin aaj dilli hai geeta ka bhagwan kaun? is baat ko kisi bhi vidhi se aisa group banaave jo khud kahe ki geeta ka bhagwan paramatma hai, aisa pahle chhota group taiyaar karke dikhaave। announce nahin kare lekin aisa chhota group, kai connection vaale hain, kai judge aate hain, kai bade-bade connection mein aate hain, unhon ko samjhaake unhon ko taiyaar kare, group kare ki sachmuch bhagwan kaun? yeh ho sakta hai? ho sakta hai? nai baat karke dikhaao। pahle group taiyaar karo jismen sabhi position vaale hon, bhinna-bhinna position vaale ho, dhaarmik log bhi ho, judge bhi ho, vakeel bhi ho, saadhaaran position vaale bhi ho, aisa group taiyaar karo kyonki yeh baat prasiddha honi hai na! pratyaksha karni hi hai geeta ka bhagwan kaun? to dilli mein sab prakaar ke log hain aur jahaan dharma sthaan hain, vahaan jaake bhi agar koi aise niklen to woh bhi kar sakte hain। ek group taiyaar karo।

baaki baapdaada ne bachchon ka purooshaartha aur himmat dekhi ki baap ne kaha bachchon ne chaaron or seva ki dhoom machaai। iske liye baapdaada dil se duaayen de rahe hain ki bachchon mein umang utsaah hai aur aage bhi aur badhta rahega। baaki baapdaada ne samaachaar suna hai abhi bhinna-bhinna programme dilli mein chal rahe hain, baap ki saugaat jo bachchon ko mili hai, sthaan mila hai,(O.aar.si.) usko kaarya mein la rahe hain। iski vishesh mubaarak de rahe hain। umang-utsaah bachchon mein hai, sirf thoda sa samay daal dete hain।

dilli mein baap aur jagat amba donon ne seva ki hai। brahma baap ne bhi seva ki aur jagdamba ne bhi seva ki hai aur jamuna ka kinaara to dilli mein hi hai। raajdhaani bhi apni jamuna kinaare honi hai। to dilli vaalon ko sabhi ko sthaan dena padega। dil badi hai na! badi dil। baapdaada har sthaan ke bachchon ki mahima karte hain vaah mere bachche vaah! to dilli ke bachchon ki bhi, tarna hai aapka to vishesh baapdaada seva ke sahayog ki, snehi banaane ki mubaarak ho, mubaarak ho। abhi yeh karke dikhaao। aisa koi group, jo bhi zone himmat rakhe aisa group banaake laave। jo nimitta bane aavaaj phailaane ka, jo rahi hui points hain usko abhi karke dikhaao। achha hai। baapdaada bachchon ki seva bhi dekhte rehte hain to seva bhi ho rahi hai aur seva ke saath sva ki sthiti mein aage badhne ka umang bhi achha hai। achha hai।

double videshi:- baapdaada ne suna ki 90 deshon se aaye hain। to baapdaada kehte hain vaah double videshi vaah! sabhi khushi mein to udte rehte ho na! seva ka umang aur teevra purooshaartha ka umang, donon hi ek do mein sahayogi ban dilaate rehte hain। baapdaada ko madhuban mein aake har group ko refresh karna, himmat badhaana yeh bahut achha lagta hai aur aajkal jo lahar phailaai hai, special bhatthi karna, ekaantavaasi banna, yeh lahar bahut achha hai। chaahe general programme to chalte hain lekin yeh chhote-chhote group banaakar jo sva-unnati ke liye programme karte hain yeh unnati ka saadhan bahut achha hai। teachers ne bhi kiya hai। achha hai। paandavon ne bhi kiya hai kyonki yeh special attention jaata hai, sva ke prati। to madhuban mein jo refreshment karne umang se aate hain, yeh baapdaada ko bahut achha lagta hai। samay nikaala aur samay ka laabh leke jaate hain। ek general programme ka laabh, baapdaada se milne ka laabh aur special apni sva-unnati ka laabh। vaise baapdaada sabhi taraph vaalon ko yahi raay dete hain ki apne-apne yahaan bhi chhote-chhote group ko sva-unnati ka chance deke anubhav ko badhaao। chaahe 5 ka group banaao, chhote centre hain। aajkal vishesh attention first sva-unnati। controlling power। jo drill bataai ekaagrata ki shakti par attention। to baapdaada desh vaale aur videsh vaale donon se attention dene mein seva mein aur sva-unnati mein attention hai, lekin aur bhi badhaate jaao kyonki baapdaada ne do baaten baar-baar attention mein di hain ek achaanak aur doosra bahutkaal ka purooshaartha jama hona chaahiye। ho jaayega nahin, ho raha hai nahin, teevra hai? abhi koi bhi dhaarna mein teevra hai parivartan kar rahe hain, nahin। abhi-abhi karna hai। ho jaayega nahin। kabhi nahin, abhi। baaki baapdaada double videshiyon ki vriddhi ko dekh bhi khush hai। har ek koshish kar raha hai jo bhi area rahi hui hai woh videsh mein bhi poori karen। ulhana videsh mein bhi rehna nahin chaahiye। ho raha hai baapdaada khush hai lekin aur bhi agar kahaan kona raha hua ho to attention deke woh bhi ulhana poora kar do। kab shabd nahin bolna, ab। to baapdaada har ek par khush hai। amritvele videsh mein bhi chakra lagta hai। aise nahin sirf madhuban mein ya bhaarat mein chakra lagaate hain। videsh mein chakra lagaana baapdaada ko kitna time chaahiye? to har ek bachche ke chart ko baapdaada chakra lagaake dekhte rehte hain। pyaar bhi hai na! pyaar hai bachchon ka, baap ka bhi to kya karenge? chakra to lagaayenge na! sabhi jagah jaate hain, aise nahin sirf london America, nahin, sabhi jagah chakra lagaate hain। aur baapdaada ki har season mein videshi miss nahin hote, abhi yeh jo reeti banaai hai, yeh achhi banaai hai। raunak hai। baapdaada hamesha kehte hain madhuban ka bachche shrringaar hain। to double videshiyon ke aane se madhuban ka shrringaar ho jaata hai। haan, taali bajaao। aap sabhi ko bhi achha lagta hai na! double videshi har tarna mein aate hain, himmat rakhte hain। aaj 90 deshon se aaye hain। baapdaada ko bachchon ka pyaar dekhke kuchh bhi ho, circumstance nahin dekhte, sneh ko dekhte hain। to yeh 90 deshon se kisse aaye hain? sneh se। to baapdaada khaas jaise double videshi kehte hain vaise sauguna mubaarak aur duaayen de rahe hain। achha baith jaao।

aai.T. group:- achha hai, baapdaada ne dekha hai ki aai.T. group dvaara bachchon ko bhi laabh mila hai, jo door baithe saamne dekhte hain। aur seva mein bhi T.vi. dvaara sandesh achhe milte rahe hain। sirf is department ko har desh ke T.vi. group ko aisa umang utsaah mein laana hai jo desh ki desh mein bhi seva ho, jaise abhi ek student dvaara seva jahaan tahaan ho rahi hai, aise har zone mein har bade sthaan mein jahaan sandesh pahunch sakta hai, vahaan bhi iska phaayda lena chaahiye। jahaan tahaan programme chalte hain woh bhi dikha sakte hain, apni area mein। jo apni area ke saadhan hote hain, achhi baaten phailaane ki, woh bhi har desh kar raha hai, ya nahin kar raha hai uski bhi checking honi chaahiye। baaki saadhan achha hai। kar bhi rahe ho, lekin badhaate chalo। aise attraction ke programme banaate raho aur chaaron or bhejte raho to chaaron or phailta jaae। baaki baapdaada khush hai ki din pratidin is department ko bhi kaayde mein la rahe hain aur aage badhta rahega, yeh baapdaada ko khushi hai। achha hai। aapas mein meeting ki, umang ulhaas badhaaya, aise hi umang utsaah, samaachaar ki len den badhaate raho। achha hai, mubaarak ho। achha।

baapdaada phir se ishaara de rahe hain ki sva purooshaartha, sva purooshaartha se sva unnati aur seva ki unnati donon taraph attention dete raho, aage badhte raho aur sada udte raho, udaate raho। achha।

chaaron or ke baapdaada ke sneh mein samaaye hue yaad aur seva mein aage se aage badhne aur badhaane vaale, amritvela sabse achha powerful banaane vaale aur mansa seva dvaara merciful, dayaalu, kripaalu ban aatmaon ko kuchh na kuchh anchali dene vaale apne is vidhi ko aage badhaate chalo। baapdaada dekhte hain ki har ek bachcha umang utsaah mein rehta hai lekin abhi addition kya karo? sada shabd addition karo। kabhi-kabhi shabd dictionary se nikaal do। to chaaron or ke bachchon ne holi bhi manaai, jalaai bhi aur sang ka rang bhi lagaaya, beeti so beeti ki holi bhi manaai, iseelie baapdaada chaaron or ke bachchon ko sammukh dil mein dekh rahe hain। baapdaada ki padam padam guna yaadapyaar aur namaste।

daadiyon se:- baba ke, drama ke bandhan mein bandhe hue hain। achha hai ek do mein raay karke haan ji, haan ji karte khud bhi udte raho aur sabhi ko udaate raho। achha।

mohini behen se:- pyaar se aage badhti rehti ho। (beech-beech mein tabiyat bigad jaati hai) woh galti se hota hai। apne kuchh time ka neeche-oopar ho jaata hai baaki baapdaada madadgaar hai। jo ho chuka hai usko thoda sudhaarne mein time lagta hai, puraana shareer hai। ho jaayengi। sirf dincharya aur davaai accurate time par karte raho kyonki abhi kuchh samay aapko davaaeeyon ka aadhaar lena padega, ho jaayega।

sabhi ke sir par haath hai, yeh to ek ke oopar rakha, lekin aap sabhi ke sir ke oopar baap ka haath hai।

pardaadi se:- yeh to brahman jeevan ka inko saugaat hai ki sada harshit rehti hai। kuchh bhi ho lekin harshit rehti hai। udti rehti, naachti rehti। patient nahin hai lekin udti kala vaali hai।

nirvair bhaai se:- aapko bhi sada ki, har ghadi ki mubaarak

brijmohan bhaai se:- seva mein busy rehte ho achha hai।

ramesh bhaai se:- achha hai government ke kaayde to badalte hain lekin aap apne brahman parivaar ke jo bhi sahaj ho sake, sahaj, sahaj kar chalte chalo, chalaate chalo। apne department ko sahaj banaate jaao। to sabhi khushi-khushi se sahayogi bante rahen kyonki yagya ka kaarya aapke department ke oopar aadhaarit hai। to aise sahaj kar do, bhale mushkil ho, government to mushkil karegi, lekin mushkil ko bhi sahaj vidhi dhoondhakar sahaj chalaate chalo। baaki government to apna kaam karegi, aap apna kaam karo। achha hai। (budget mein)woh to aayengi। unhon ka kaam woh to karenge na। aur ham apna kaam karen। woh right hain apne kaam mein, unhon ki problem hain na। paandav government ki problem nahin hai, khushi khushi se।

bhoopaal bhaai se:- kaarobaar theek hai? (paani ki dikkat hai) yeh paani ki trucks thodi badha do na। woh to abhi ki season hai। baaki stock karo, stock ko badhaao। sthaan ko, trucks ko badhaane se sahaj ho jaayega। to sthaan bhi badhaao, trucks bhi badhaao, stock bhi badhaao।

videsh ki badi bahinon se:- bahut achha group banaake purooshaartha mein aage badha rahe ho। baapdaada ko to madhuban ki yeh season bahut achhi lagti hai। ek saal ke liye dose mil jaata hai। yeh bhatthi ka anubhav bahut achha hai। aapas ka group banaaya hai na, yeh achha hai। har saal naya naya kuchh karte jaao।(bahreen mein achhi seva chal rahi hai) silence ki taraph jitna attention khinchaayenge achha hai। (jayanti behen se) achha kar aai mubaarak ho।

haidraabaad shanti sarovar mein naya haal bana hai, jiska udghaatan baapdaada button dabaakar kar rahe hain:-is sthaan se seva badhegi, bahuton ko sandesh milega। sirf aapas mein jaldi jaldi meeting karte raho abhi kya karna hai, abhi kya karna hai, yeh plan banaate raho, practical laate raho। paandav aur shaktiyaan donon hi milkar plan banaao aage kya karna hai, aage kya karna hai। ek poora ho doosra karo phir yeh sthaan kaam mein aa jaayega।