Murli du jour du samedi 17 novembre 2018

17-11-2018 praatahmurli om shanti "baapdaada"' madhuban

"meethe bachche - tum brahma ki santaan aapas mein bhaai-behen ho, tumhaari vritti bahut shuddh pavitra honi chaahiye''

prashn:- kin bachchon ke samjhaane ka prabhaav bahut achha pad sakta hai?

uttar:- jo grihastha vyavhaar mein rehte kamal phool samaan pavitra rehte hain। aise anubhvi bachche kisi ko bhi samjhaayen to unke samjhaane ka bahut achha prabhaav pad sakta hai kyonki shaadi karke bhi apvitra vritti na jaaye - yeh bahut badi manzil hai। ismen bachchon ko bahut-bahut khabardaar bhi rehna hai।

geet:- hamaare teertha nyaare hain…

om shanti। baap baith bachchon ko samjhaate hain kyonki bachche hi baap ko jaante hain। bachche to sab bachche hi hain, sab bachche brahmaakumaar-kumaariyaan hain, woh jaante hain brahmaakumaar-kumaariyaan hue behen-bhaai। sab ek baap ke bachche hain to reality mein samjhaana hai ki ham aatmaayen bhaai-behen hain। sab brothers hain। yahaan to tum jaante ho ham ek hi grand father aur father ke bachche hain। shivbaaba ke potre, brahma ke bachche hain। samjho inki laukik stri hai, usne bhi kaha ham brahmaakumaari hain to uska bhi naata woh ho jaata। jaise laukik behen-bhaai hon, usmein koi gandi drishti nahin jaati hai, aajkal to sab gande ban padte hain kyonki duniya hi dirty hai। tum bachche abhi samajhte ho ham brahmaakumaar-kumaariyaan hain। brahma dvaara adopted children bane hain to behen-bhaai hain। samjhaana pade, sanyaas bhi do prakaar ke hain। sanyaas arthaat pavitra rehna, 5 vikaaron ko chhodna। woh hai hathayog sanyaasi, unki department hi alag hai। pravritti maarga vaalon ka connection hi chhod jaate hain, unka naam hi hai hathayog karma sanyaasi। tum bachchon ko samjhaaya jaata hai grihastha vyavhaar mein rehte deh sahit deh ke sab sambandh tyaag baap ko yaad karna hai। vo to gharbaar chhod dete hain। maama, chaacha, kaaka koi nahin rehta। samajhte hain baaki hai ek, unko hi yaad karna hai, va jyoti jyot samaana hai। nirvaandhaam jaana hai। unki department hi alag hai, paharvaais alag hai। woh to kah dete stri narka ka dvaar hai, aag kapoos ikkatthe rah nahin sakte। alag hone se hi ham bach sakte hain। drama anusaar unka dharma hi alag hai। woh sthaapna shankaraachaarya ki hai, woh sikhlaate hain hathayog, karma sanyaas, na ki raajayog। tum jaante ho drama bana hua hai so bhi nambarvaar। 100 percent sensible sabko to nahin kahenge। to bhi kahenge koi 100 percent sensible hain, koi 100 percent nonsensible hain। yeh to hoga। tum jaante ho ham kehte hain mama-baba to aapas mein behen-bhaai ho gaye। gandi vritti honi nahin chaahiye, law aisa kehta hai। behen-bhaai ki aapas mein kabhi shaadi ho na sake। behen-bhaai ka agar ghar mein kuchh bhi hota hai, baap dekhte hain inki chalan gandi hai to bada phikra rehta hai। yeh kahaan se paida hue, kitna nuksaan karte hain, bahut usko daantate hain। aage in baaton ki parhej rehti thi। abhi to 100 percent tamopradhaan hain, maaya ka prabhaav barobar jor hai। parampita paramatma ke bachchon se to maaya ki ekdam ladaai hoti hai। baap kehte hain - yeh hamaare bachche hain, ham inhon ko svarga mein le jaata hoon। maaya kehti hai - nahin, yeh hamaare bachche hain, ham inko narka mein le jaati hoon। yahaan to dharmaraaj baap ke haath mein hain। to jo grihastha vyavhaar mein rehte hue pavitra rehte hain unhein auron ko bahut achhi reeti samjhaana hai ki ham kaise ikkatthe rehte hue pavitra rehte hain। jo kaam hathayogi sanyaasi bhi na kar sake so baap kara rahe hain। sanyaasi kabhi raajayog sikhla na saken। vivekaanand ki kitaab par baahar se naam likha hai raajayog। parantu sanyaasi jo nivritti maarga vaale hain woh raajayog sikhla na saken। tum jo grihastha vyavhaar mein rehte aur pavitra rehte ho, woh samjhaayenge to uska teer achha lagega। baba ne akhbaar mein dekha tha, dehli mein jhaadon ke baare mein kuchh conference hoti hai। uske oopar bhi kaise samjhaayen ki tum in jangali jhaadon aadi ka to khyaal karte ho parantu is genealogical tree ka kabhi khyaal kiya hai ki is manushya srishti ki kaise utpatti, paalna hoti hai।

bachchon ki itni vishaalbuddhi bani nahin hai। itna attention nahin hai। koi na koi beemaari lagi hui hai। laukik ghar mein bhi behen-bhaai ke kabhi gande khyaalaat nahin hote। yahaan to tum sab ek baap ke bachche ho behen-bhaai, brahmaakumaar-kumaariyaan। agar gande khyaalaat aayen to unko kya kahenge? woh, jo narka mein rehte hain, unse bhi hajaar guna gande gine jaayenge। bachchon par bahut responsibility hai। jo grihastha vyavhaar mein rehte hue pavitra rehte hain, badi mehnat unke liye hai। duniya in baaton ko nahin jaanti। baap aate hain paavan banaane to zaroor bachche pratigya karenge, raakhi baandhi hui hai। ismen badi mehnat hai। shaadi kar aur pavitra rahe, badi bhaari manzil hai। jara bhi buddhi nahin jaani chaahiye। shaadi ho jaati hai to vikaari ho jaate hain। baap aakar nangan hone se bachaate hain। dropdi ki bhi shaastron mein baat hai। in baaton mein kuchh rahasya to hai na। yeh shaastra aadi sab drama mein noondh hain - jo kuchh past hota aaya hai, woh drama mein noondh hai, usko repeat zaroor karna hai। gyaan maarga aur bhakti maarga ki bhi noondh hai। tumhaari buddhi ab bahut vishaal ho gai hai। jaise behad baap ki buddhi vaise murabbi bachchon ki, jo shreemat par chalte hain। dher bachche hain। pata nahin, ajun kitne bachche honge। jab tak brahman-braahmani na banen tab tak varsa pa nahin sakte। ab tum brahmaavanshi hi phir jaakar sooryavanshi athva vishnuvanshi banenge। abhi ho shiv vanshi। shiv hai daada (grand father), brahma hai baba। prajaapita to ek hua na, saari praja ka। jaante bhi hain jo manushya srishti ka jhaad hai, uska bhi beej hoga। ismen pahla manushya bhi hoga, jisko new man kehte hain। new man kaun hoga? brahma hi hoga। brahma aur sarasvati - woh new gine jaayenge। ismen badi buddhi chaahiye। soul hi kehti hai O god father, O supreme god father। aatma kehti hai na, to woh sabka rachayita hai। oonch te oonch woh hua। phir aao manushya srishti par। unmein oonch kisko rakhen? prajaapita। yeh to koi bhi samajh sakte hain ki manushya srishti ka jo jhaad hai, usmein brahma ho gaya mukhya। shiv to hai aatmaon ka baap, brahma ko rachta kah sakte hain manushyon ka। parantu kiski mat par karte hain? baap kehte hain main hi brahma ko adopt karta hoon। naya brahma phir kahaan se aayega? bahut janmon ke ant ke janma mein main ismen pravesh karta hoon। inka naam prajaapita brahma rakhta hoon। abhi tum jaante ho ham barobar brahma ke bachche hain। shivbaaba se knowledge le rahe hain। ham baap se pavitrata, sukh, shanti, health, wealth lene aaye hain। bhaarat mein ham hi sada sukhi the। abhi nahin hain। phir baap woh varsa de rahe hain। bachche jaante hain first hai pavitrata। raakhi kisko baandhi jaati hai? jo apvitra bante hain woh pratigya karte hain ham pavitra rahenge। baap samjhaate hain yeh manzil badi bhaari hai। pahle se hi jo yugal hain unko samjhaana pade - ham kaise bhaai-behen ho rehte hain। haan, avastha jamaane mein time lagta hai। bachche likhte bhi hain maaya ke toofaan bahut aate hain। to grihastha vyavhaar mein rehte pavitra rahne vaale bachche bhaashan karen to achha hai kyonki yeh hai nai baat। yeh hai hi sva-raajayog। ismen bhi sanyaas hai। grihastha vyavhaar mein rehte ham jeevanmukti arthaat sadgati paayen। yeh to jeevanbandha hai। tumhaara hai svaraajya pad। sva ko raajya chaahiye। ab unko raajya nahin hai। aatma kehti hai ham raaja the, ham raani the, ab ham vikaari kangaal bane hain, hamaare mein koi gun nahin hain। yeh aatma kehti hai na। to apne ko aatma, parampita paramatma ki santaan samajhna hai। ham aatma bhaai-bhaai hain, aapas mein bahut lav hona chaahiye। ham saari duniya ko lovely banaate hain। raamraajya mein to sher bakri bhi ikkatthe jal peete the, kabhi ladaai nahin karte the to tum bachchon mein kitna lav hona chaahiye। yeh avastha dheere-dheere aayegi। ladte to bahut hain na। parliament mein bhi ladte hain to ek-do ko kursi uthaakar maarne lag padte hain। woh to hai aasuri sabha। tumhaari yeh hai eeshvareey sabha to kitna nasha hona chaahiye। parantu yeh school hai। padhaai mein koi to oonch chale jaate hain, koi dheele pad jaate hain। yeh school bhi wonderful hai, vahaan to school teacher alag-alag hote hain, yahaan school teacher ek, school ek hai। aatma shareer dhaaran kar teach karti hai। aatma ko sikhlaate hain। ham aatma, shareer dvaara padhte hain। itna aatma-abhimaani banna hai। ham aatmaayen hain, woh paramatma hai। yeh buddhi mein saara din daudaana hai। deh-abhimaan se hi bhoolen ho jaati hain। baap baar-baar kehte hain dehi-abhimaani bhav। deh-abhimaan mein aane se maaya ka vaar hoga। chadhaai bahut badi hai। kitna vichaar saagar manthan karna hota hai। raat ko hi vichaar saagar manthan ho sakta hai। aise vichaar saagar manthan karte-karte baap jaisa bante jaayenge।

tum bachchon ko saara gyaan buddhi mein rakhna hai। grihastha vyavhaar mein rahkar raajayog seekhna hai। saara buddhi ka kaam hai। buddhi mein dhaarna hoti hai। grihasthiyon ko to bahut mehnat hai। aajkal to tamopradhaan hone kaaran bahut gande hote hain। maaya ne sabko khatma kar diya hai। chabaakar ekdam kha hi jaati hai। baap aate hain maaya ajgar ke pet se nikaalne। nikaalna bada mushkil hota hai। jo grihastha vyavhaar mein rehte hain unko jalva dikhaana hai। samjhaana hai hamaara raajayog hai। ham brahmaakumaar-kumaariyaan kyon kehte hain? is paheli ko samajhna, samjhaana hai। vaastav mein bi.ke. to tum bhi ho। prajaapita brahma to nai srishti rachte hain। new man dvaara nai srishti banaate hain। vaastav mein to satayug ka pahla bachcha jo hota hai unko hi new kahenge। kitni khushi ki baat hai। vahaan to khushi ke baaje gaaje bajenge। vahaan to aatma aur shareer donon pavitra rehte hain। yahaan to ismen abhi baba ne pravesh kiya hai। yeh new man koi pavitra nahin hai, puraane mein baith inko new banaate hain। puraani cheez ko naya banaate hain। ab new man kisko kahen? kya brahma ko kahen? buddhi ka kaam chalta hai। woh thode hi samajhte hain - Adam Eve kaun hain? new man hai shreekrishna, vahi phir puraana man brahma। phir puraana man brahma ko new man banaata hoon। new world ka new man chaahiye। woh kahaan se aaye? new man to satayug ka prince hai। unko hi gora kehte hain। yeh hai saanvara, yeh new man nahin। vahi shreekrishna 84 janma lete-lete ab pichhaadi ke janma mein hai, jisko phir baba adopt karte hain। puraane ko naya banaate hain, kitni goodh baate hain samajhne ki। new so old, old so new। shyaam so sundar, sundar so shyaam। jo puraane te puraana hai vahi naye te naya ban rahe hain। tum jaante ho hamko baba rejuvenate kar naye te naya banaate hain। yeh badi samajhne ki baaten hain। aur apni avastha bhi banaani hai। kumaar-kumaari to hain hi pavitra। baaki ham grihastha mein rehte kamal phool samaan bante hain, svadarshan chakradhaari bante hain। vishnuvanshi ko trikaaldarsheepne ka knowledge nahin hai। puraane man trikaaldarshi hain। kitni atapti baaten hain। old man hi knowledge lekar new man bante hain। baap baith samjhaate hain woh hathayog hai, yeh raajayog hai। raajayog maana hi svarga ki baadshaahi। sanyaasi to kehte sukh kaag vishta samaan hai। naphrat karte hain। baap kehte hain naari hi svarga ka dvaar hai। maataaon par kalash rakhta hoon। to pahle-pahle samjhaao shivaae namah, bhagvaanuvaach। aavaaj bulanda nikalna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ham aatma bhaai-bhaai hain, is nishchay se pavitrata ke vrat ko paalan karte hue aapas mein bahut pyaar se rehna hai। sabko lovely banaana hai।

2) vishaal buddhi ban gyaan ke guhya rahasyon ko samajhna hai, vichaar saagar manthan karna hai। maaya ke vaar se bachne ke liye dehi-abhimaani ho rahne ka abhyaas karna hai।

vardaan:- khushi ki goli va injection dvaara svayan ki davaai svayan karne vaale knowledgeful bhav

brahman bachche apne beemaari ki davaai svayan hi kar sakte hain। khushi ki khuraak second mein asar karne vaali davaai hai। jaise doctors powerful injection laga dete hain to change ho jaate। aise brahman svayan hi svayan ko khushi ki goli de dete va khushi ka injection laga dete to beemaari ka roop badal jaata। knowledge ki light might shareer ko bhi chalaane mein bahut madad deti hai। koi bhi beemaari aati hai to yeh bhi buddhi ko rest dene ka saadhan hai।

slogan:- jo man ki ekaagrata dvaara sarva siddhiyaan praapta kar lete hain vahi siddhi swaroop bante hain।