Murli du jour du dimanche 17 mai 2020

17-05-20 praatahmurli om shanti ''avyakt-baapdaada'' revise 13-01-86 madhuban

brahman jeevan - sada behad ki khushiyon ka jeevan

aaj baapdaada apne holi aur happy hanso ki sabha dekh rahe hain। sabhi holi ke saath happy bhi sada rehte hain? holi arthaat pavitrata ki pratyaksha nishaani- happy arthaat khushi sada pratyaksha roop mein dikhaai degi। agar khushi nahin to avashya koi apvitrata arthaat sankalp va karma yathaartha nahin hai tab khushi nahin hai। apvitrata sirf 5 vikaaron ko nahin kaha jaata। lekin sampoorn aatmaon ke liye, devaatma banne vaalon ke liye aythaartha, vyartha, saadhaaran sankalp, bol va karma bhi sampoorn pavitrata nahi kaha jaayega। sampoorn stage ke sameep pahunch rahe ho isliye vartamaan samay ke pramaan vyartha aur saadhaaran karma na hon ismen bhi checking aur change chaahiye। jitna samartha aur shreshtha sankalp, bol aur karma hoga, utna sada khushi ki jhalak, khushanseebi ki phalak anubhav hogi aur anubhav karaayegi। baapdaada sabhi bachchon ki yeh donon baaten check kar rahe the ki pavitrata kahaan tak dhaaran ki hai! vyartha aur saadhaaranta abhi bhi kahaan tak hai? aur roohaani khushi, avinaashi khushi aantarik khushi kahaan tak rehti hai! sabhi brahman bachchon ka brahman jeevan dhaaran karne ka lakshya hi hai sada khush rehna। khushi ki jeevan vyateet karne ke liye hi brahman bane ho na ki purooshaartha ki mehnat va kisi na kisi uljhan mein rahne ke liye brahman bane ho।

roohaani aantarik khushi va ateendriy sukh jo saare kalpa mein nahin praapta ho sakta hai woh praapta karne ke liye brahman bane ho। lekin check karo ki khushi kisi saadhan ke aadhaar par, kisi had ki praapti ke aadhaar par, va thode samay ki saphalta ke aadhaar par, maanyata va naamaachaar ke aadhaar par, man ke had ki ichchhaaon ke aadhaar par va yahi achha lagta hai - chaahe vyakti, chaahe sthaan va vaibhav, aise man pasandi ke pramaan khushi ki praapti ka aadhaar to nahin hai? in aadhaaron se khushi ki praapti - yeh koi vaastavik khushi nahin hai। avinaashi khushi nahin hai। aadhaar hila to khushi bhi hil jaati। aisi khushi praapta karne ke liye brahman nahin bane ho। alpakaal ki praapti dvaara khushi yeh to duniya vaalon ke paas bhi hai। unhon ka bhi slogan hai khaao piyo mauj karo। lekin woh alpakaal ka aadhaar samaapta hua to khushi bhi samaapta ho jaati। aise hi brahman jeevan mein bhi in aadhaaron se khushi ki praapti hui to baaki antar kya hua? khushiyon ke saagar ke bachche bane ho to har sankalp mein, har second khushi ki lahron mein lahraane vaale ho। sada khushiyon ke bhandaar ho! isko kaha jaata hai holi aur happy hans। baapdaada dekh rahe the ki jo lakshya hai bina koi had ke aadhaar ke sada aantarik khushi mein rahne ka, us lakshya se badal aur had ki praaptiyon ki chhoti-chhoti galiyon mein phans jaane kaaran kai bachche lakshya arthaat manzil se door ho jaate hain। high ve ko chhodkar galiyon mein phans jaate hain। apna lakshya, khushi ko chhod had ki praaptiyon ke peechhe lag jaate hain। aaj naam hua va kaam hua ichchha poorn hui to khushi hai। manapsanda, sankalp pasanda praapti hui to bahut khushi hai। thodi bhi kami hui to lakshya vahaan hi rah jaata। lakshya had ke ban jaate isliye behad ki avinaashi khushi se kinaara ho jaata hai। to baapdaada bachchon se poochhte hain ki kya brahman isliye bane ho? isliye yeh roohaani jeevan apnaai hai? yeh to saadhaaran jeevan hai। isko shreshtha jeevan nahin kaha jaata।

koi bhi karma karo, chaahe kitni bhi badi seva ka kaam ho lekin jo seva aantarik khushi, roohaani mauj, behad ki praapti se neeche le aati hai arthaat had mein le aati hai, aaj mauj kal moonjh, aaj khushi kal vyartha uljhan mein daalti hai, khushi se vanchit kar deti hai, aisi seva ko chhod do lekin khushi ko nahin chhodo। sachchi seva sada behad ki sthiti ka, behad ki khushi ka anubhav karaati hai। agar aisi anubhooti nahin hai to woh mix seva hai। sachchi seva nahin hai। yeh lakshya sadaiv rakho ki seva dvaara svaunnati, sva praapti, santushtata aur mahaanta ki anubhooti hui? jahaan santushtata ki mahaanta hogi vahaan avinaashi praapti ki anubhooti hogi। seva arthaat phoolon ke bageeche ko hara-bhara karna। seva arthaat phoolon ke bageeche ka anubhav karna na ki kaanton ke jangal mein phansana। uljhan, apraapti, man ki moonjh, abhi abhi mauj, abhi-abhi moonjh, yeh hai kaante। in kaanton se kinaara karna arthaat behad ki khushi ka anubhav karna hai। kuchh bhi ho jaae- had ki praapti ka tyaag bhi karna pade, kai baaton ko chhodna bhi pade, baaton ko chhodo lekin khushi ko nahin chhodo। jiske liye aaye ho us lakshya se kinaare na ho jaao। yeh sookshm checking karo। khush to hain lekin alpakaal ki praapti ke aadhaar se khush rehna isi ko hi khushi to nahin samajhte? kahaan sidescene ko hi manzil to nahin samajh rahe ho? kyonki sidescene bhi aakarshan karne vaale hote hain। lekin manzil ko paana arthaat behad ke raajya adhikaari banna। manzil se kinaara karne vaale vishwa ke raajya adhikaari nahin ban sakte। royal family mein bhi nahin aa sakte isliye lakshya ko, manzil ko sada smriti mein rakho। apne se poochho - chalte-chalte kahaan koi had ki gali mein to nahin pahunch rahe hain! alpakaal ke praapti ki khushi, sadaakaal ki khushanseebi se kinaara to nahin kara rahi hai? thode mein khush hone vaale to nahin ho? apne aap ko khush to nahin kar rahe ho? jaisi hoon, vaisi hoon, theek hoon, khush hoon। avinaashi khushi ki nishaani hai- unko auron se bhi sada khushi ki duaayen avashya praapta hongi। baapdaada aur nimitta badon ke sneh ki duaayen andar alaukik aatmik khushi ke saagar mein lahraane ka anubhav karaayengi। albelepan mein yeh nahin sochna main to theek hoon lekin doosre mere ko nahin jaante। kya soorya ki roshni chhip sakti hai? satyata ki khushbu kabhi mit nahin sakti। chhip nahin sakti isliye dhokha kabhi nahin khaana। yahi paath pakka karna। pahle apni behad ki avinaashi khushi phir doosri baaten। behad ki khushi seva ki va sarva ke sneh ki, sarva dvaara avinaashi sammaan praapta hone ki khushanseebi arthaat shreshtha bhaagya svatah hi anubhooti karaayegi। jo sada khush hai woh khushanseeb hai। bina mehnat, bina ichchha athva bina kahne ke sarva praapti sahaj hongi। yeh paath pakka kiya?

baapdaada dekhte hain aaye kislie hain, jaana kahaan hai aur ja kahaan rahe hain? had ko chhod phir bhi had mein hi jaana to behad ka anubhav kab karenge! baapdaada ko bhi bachchon par sneh hota hai। raham to nahin kahenge kyonki bhikhaari thode hi ho। daata, vidhaata ke bachche ho, duhkhiyon par raham kiya jaata hai। aap to sukh swaroop sukh daata ke bachche ho। ab samjha kya karna hai? baapdaada is varsha ke liye baar-baar bhinna-bhinna baaton mein attention dila rahe hain। is varsha vishesh sva par attention rakhne ka samay diya ja raha hai। duniya vaale to sirf kehte hain ki khaao piyo mauj karo। lekin baapdaada kehte hain- khaao aur khilaao। mauj mein raho aur mauj mein laao। achha-

sada avinaashi behad ki khushi mein rahne vaale, har karma mein khushanseeb anubhav karne vaale, sada sarva ko khushi ka khajaana baantane vaale, sada khushi ki khushbu phailaane vaale,sada khushi ke umang, utsaah ki lahron mein lahraane vaale, aise sada khushi ki jhalak aur phalak mein rahne vaale, shreshtha lakshya ko praapta karne vaale shreshtha aatmaon ko baapdaada ka sada holi aur happy rahne ki yaadapyaar aur namaste।

party se:-

1- pravritti mein rehte sada nyaare aur baap ke pyaare ho na! kabhi bhi pravritti se lagaav to nahin lag jaata? agar kahaan bhi kisi se attachment hai to woh sada ke liye apne jeevan ka vighna ban jaata hai isliye sada nirvighna ban aage badhte chalo। kalpa pahle misal agand ban achal adol raho। agand ki visheshta kya dikhaai hai? aisa nishchaybuddhi jo paanv bhi koi hila na sake। maaya nishchay roopi paanv ko hilaane ke liye bhinna-bhinna prakaar se aati hai। lekin maaya hil jaae aapka nishchay roopi paanv na hile। maaya svayan surrender hoti hai। aap to surrender nahin honge na! baap ke aage surrender hona, maaya ke aage nahin, aise nishchaybuddhi sada nishchinta rehte hain। agar jara bhi koi chinta hai to nishchay ki kami hai। kabhi kisi baat ki thodi si bhi chinta ho jaati hai - uska kaaran kya hota, zaroor kisi na kisi baat ke nishchay mein kami hai। chaahe drama mein nishchay ki kami ho, chaahe apne aap mein nishchay ki kami ho, chaahe baap mein nishchay ki kami ho। teenon hi prakaar ke nishchay mein jara bhi kami hai to nishchinta nahin rah sakte। sabse badi beemaari hai chinta। chinta ke beemaari ki davaai doctors ke paas bhi nahin hai। tempory sulaane ki davaai de denge lekin sada ke liye chinta nahin mita sakenge। chinta vaale jitna hi praapti ke peechhe daudte hain utna praapti aage daud lagaati hai isliye sada nishchay ke paanv achal rahen। sada ekbal ek bharosa yahin paanv hai। nishchay kaho, bharosa kaho, ek hi baat hai। aise nishchaybuddhi bachchon ki vijay nishchit hai।

(2) sada baap par balihaar jaane vaale ho? jo bhakti mein vaayda kiya tha - woh nibhaane vaale ho na? kya vaayda kiya? sada aap par balihaar jaayenge। balihaar arthaat sada samarpit ho balvaan banne vaale। to balihaar ho gaye ya hone vaale ho? balihaar hona maana mera kuchh nahin। mera-pan samaapta। mera shareer bhi nahin। to kabhi deh abhimaan mein aate ho? mera hai tab deh-bhaan aata hai। isse bhi pare rahne vaale isko kaha jaata hai - balihaar jaana। to mera-pan sada ke liye samaapta karte chalo। sab kuchh tera yahi anubhav karte chalo। jitna jyaada anubhvi utna authority swaroop। woh kabhi dhokha nahin kha sakte। duhkh ki lahar mein nahin aa sakte। to sada anubhav ki kahaaniyaan sabko sunaate raho। anubhvi aatma thode samay mein saphalta jyaada praapta karti hai। achha।

vidaai ke samay - 14 January makar sankraanti ki yaadapyaar

aaj ke din ke mahatva ko sada khaane aur khilaane ka mahatva bana diya hai। kuchh khaate hain kuchh khilaate hain। woh til daan karte hain ya khaate hain। til arthaat bahut chhoti-si bindi, koi bhi baat hoti hai- chhoti-si hoti hai to kehte hain yeh til ke samaan hai aur badi hoti hai to pahaad ke samaan kaha jaata hai। to pahaad aur til bahut pharka ho jaata hai na। to til ka mahatva isliye hai kyonki ati sookshm bindi bante ho। jab bindi roop bante ho tabhi udti kala ke patang bante ho। to til ka bhi mahatva hai। aur til sada mithaas se sangathan roop mein laate hain, aise hi til nahin khaate hain। madhurta arthaat sneh se sangathit roop mein laane ki nishaani hai। jaise til mein meetha padta hai to achha lagta hai, aise hi til khaao to kaduva lagega lekin meetha mil jaata hai to bahut achha lagega। to aap aatmaayen bhi jab madhurta ke saath sambandh mein aa jaati ho, sneh mein aa jaati ho to shreshtha ban jaati ho। to yeh sangathit madhurta ka yaadgaar hai। iski bhi nishaani hai। to sada svayan ko madhurta ke aadhaar se sangathan ki shakti mein laana bindi roop banna aur patang ban udti kala mein udna, yeh hai aaj ke din ka mahatva। to manaana arthaat banna। to aap bane ho aur woh sirf thode samay ke liye manaate hain। ismen daan dena arthaat jo bhi kuchh kamjori ho usko daan mein de do। chhoti-si baat samajhkar de do। til samaan samajhkar de do। badi baat nahin samjho- chhodna padega, dena padega, nahin। til ke samaan chhoti-si baat daan dena, khushi khushi chhoti-si baat samajhkar khushi se de do। yeh hai daan ka mahatva। samjha।

sada snehi banna, sada sangathit roop mein chalna aur sada badi baat ko chhota samajh samaapta karna। aag mein jala dena, yeh hai mahatva। to mana liya na। dridh sankalp ki aag jala di। aag jalaate hain na is din। to sanskaar parivartan divas, woh sankraanti kehte hain, aap sanskaar parivartan kahenge। achha - sabhi ko sneh aur sangathan ki shakti mein sada saphal rahne ki yaadapyaar aur good morning।

vardaan:- sada bhagwan aur bhaagya ki smriti mein rahne vaale sarvashreshtha bhaagyavaan bhav

sangamayug par chaitanya swaroop mein bhagwan bachchon ki seva kar rahe hain। bhakti maarga mein sab bhagwan ki seva karte lekin yahaan chaitanya thaakuron ki seva svayan bhagwan karte hain। amritvele uthaate hain, bhog lagaate hain, sulaate hain। record par sone aur regard par uthne vaale, aise laadle va sarva shreshtha bhaagyavaan ham brahman hain - isi bhaagya ki khushi mein sada jhoolte raho। sirf baap ke laadle bano, maaya ke nahin। jo maaya ke laadle bante hain woh bahut laadkod karte hain।

slogan:- apne harshitmukh chehre se sarva praaptiyon ki anubhooti karaana - sachchi seva hai।

soochna:- aaj antarraashtreey yog divas teesra ravivaar hai, saayan 6.30 se 7.30 baje tak sabhi bhaai bahinen sangathit roop mein ekatrit ho prabhu pyaar mein samaane ka anubhav karen। sada isi svamaan mein baithen ki main aatma sarva praaptiyon se sampanna sarvashreshtha bhaagyavaan aatma hoon। pyaar ke saagar baap ke pyaar ki kirnen nikalkar mujh aatma mein samaati ja rahi hain। vahi pyaar ke vibration chaaron or vaataavran mein phail rahe hain।