Murli du jour du mercredi 8 juillet 2020

08-07-2020 praatahmurli om shanti "baapdaada"' madhuban

“meethe bachche - tumhaari padhaai ka foundation hai purity, purity hai tab yog ka jauhar bhar sakega, yog ka jauhar hai to vaani mein shakti hogi''

prashn:- tum bachchon ko abhi kaun-sa prayatna poora-poora karna hai?

uttar:- sir par jo vikarmon ka bojha hai use utaarne ka poora-poora prayatna karna hai। baap ka bankar koi vikarma kiya to bahut zor se gir padenge। bi.ke. ki agar ninda karaai, koi takleeph di to bahut paap ho jaayega। phir gyaan sunne-sunaane se koi phaayda nahin।

om shanti। roohaani baap bachchon ko samjha rahe hain ki tum patit se paavan ban paavan duniya ka maalik kaise ban sakte ho! paavan duniya ko svarga athva vishnupuri, lakshmi-naaraayan ka raajya kaha jaata hai। vishnu arthaat lakshmi-naaraayan ka combined chitra aisa banaaya hai, isliye samjhaaya jaata hai। baaki vishnu ki jab pooja karte hain to samajh nahin sakte ki yeh kaun hain? mahaalakshmi ki pooja karte hain parantu samajhte nahin ki yeh kaun hai? baba abhi tum bachchon ko bhinna-bhinna reeti se samjhaate hain। achhi reeti dhaaran karo। koi-koi ki buddhi mein rehta hai ki paramatma to sab kuchh jaante hain। ham jo kuchh achha va bura karte hain woh sab jaante hain। ab isko andhashraddha ka bhaav kaha jaata hai। bhagwan in baaton ko jaante hi nahin। tum bachche jaante ho bhagwan to hai patiton ko paavan banaane vaala। paavan banaakar svarga ka maalik banaate hain phir jo achhi reeti padhenge woh oonch pad paayenge। baaki aise nahin samajhna hai ki baap sabke dilon ko jaante hain। yeh phir besamjhi kahi jaayegi। manushya jo karma karte hain unka phir achha ya bura drama anusaar unko milta hi hai। ismen baap ka koi connection hi nahin। yeh khyaal kabhi nahin karna hai ki baba to sab kuchh jaante hi hain। bahut hain jo vikaar mein jaate, paap karte rehte hain aur phir yahaan athva centres par aa jaate hain। samajhte hain baba to jaante hain। parantu baba kehte ham yeh dhandha hi nahin karte। jaani jaananhaar akshar bhi wrong hai। tum baap ko bulaate ho ki aakar patit se paavan banaao, svarga ka maalik banaao kyonki janma-janmaantar ke paap sir par bahut hain। is janma ke bhi hain। is janma ke paap batlaate bhi hain। bahuton ne aise paap kiye hain jo paavan banna bada mushkil lagta hai। mukhya baat hai hi paavan banne ki। padhaai to bahut sahaj hai, parantu vikarmon ka bojha kaise utre uska prayatna karna chaahiye। aise bahut hain athaah paap karte hain, bahut disservice karte hain। bi.ke. aashram ko takleeph dene ki koshish karte hain। iska bahut paap chadhta hai। woh paap aadi koi gyaan dene se nahin mit sakenge। paap mitenge phir bhi yog se। pahle to yog ka poora purushaartha karna chaahiye, tab kisko teer bhi lag sakega। pahle pavitra banen, yog ho tab vaani mein bhi jauhar bharega। nahin to bhal kisko kitna bhi samjhaayenge, kisko buddhi mein janchega nahin, teer lagega nahin। janma-janmaantar ke paap hain na। abhi jo paap karte hain, woh to janma-janmaantar se bhi bahut ho jaate hain isliye gaaya jaata hai satguru ke nindak… yeh sat baba, sat teacher, satguru hai। baap kehte hain bi.ke. ki ninda karaane vaale ka bhi paap bahut bhaari hai। pahle khud to paavan banen। kisko samjhaane ka bahut shauk rakhte hain। yog paai ka bhi nahin, isse phaayda kya? baap kehte hain mukhya baat hai hi yaad se paavan banne ki। pukaarte bhi paavan banne ke liye hain। bhakti maarga mein ek aadat pad gai hai, dhakke khaane ki, phaaltu aavaaz karne ki। praarthana karte hain parantu bhagwan ko kaan kahaan hain, bigar kaan, bigar mukh, sunenge, bolenge kaise? woh to avyakt hai। yeh sab hai andhashraddha।

tum baap ko jitna yaad karenge utna paap naash honge। aise nahin ki baap jaante hain - yeh bahut yaad karta hai, yeh kam yaad karta hai, yeh to apna chart khud ko hi dekhna hai। baap ne kaha hai yaad se hi tumhaare vikarma vinaash honge। baba bhi tumse hi poochhte hain ki kitna yaad karte ho? chalan se bhi maaloom padta hai। sivaae yaad ke paap kat nahin sakte। aise nahin, kisko gyaan sunaate ho to tumhaare va unke paap kat jaayenge। nahin, jab khud yaad karen tab paap katen। mool baat hai paavan banne ki। baap kehte hain mere bane ho to koi paap nahin karo। nahin to bahut zor se gir padenge। ummeed bhi nahin rakhni hai ki ham achha pad pa sakenge। pradarshani mein bahuton ko samjhaate hain to bas khush ho jaate hain, hamne bahut service ki। parantu baap kehte hain pahle tum to paavan bano। baap ko yaad karo। yaad mein bahut fail hote hain। gyaan to bahut sahaj hai, sirf 84 ke chakra ko jaanna hai, us padhaai mein kitne hisaab-kitaab padhte hain, mehnat karte hain। kamaayenge kya? padhte-padhte mar jaaen to padhaai khatma। tum bachche to jitna yaad mein rahenge utna dhaarna hogi। pavitra nahin banenge, paap nahin mitaayenge to bahut saza khaani padegi। aise nahin, hamaari yaad to baba ko pahunchti hi hai। baba kya karenge! tum yaad karenge to tum paavan banenge, baba usmein kya karenge, kya shaabaas denge। bahut bachche hain jo kehte hain ham to sadaiv baap ko yaad karte hi rehte hain, unke bigar hamaara hai hi kaun? yeh bhi gapoda maarte rehte hain। yaad mein to badi mehnat hai। ham yaad karte hain va nahin, yeh bhi samajh nahin sakte। anjaane se kah dete ham to yaad karte hi hain। mehnat bigar koi vishwa ka maalik thode hi ban sakte। oonch pad pa na saken। yaad ka jauhar jab bhare tab service kar saken। phir dekha jaae kitni service kar praja banaai। hisaab chaahiye na। ham kitne ko aapasmaan banaate hain। praja banaani pade na, tab raajaai pad pa sakte। woh to abhi kuchh hai nahin। yog mein rahen, jauhar bhare tab kisko poora teer lage। shaastron mein bhi hai na - pichhaadi mein bheeshmapitaamah, dronaachaarya aadi ko gyaan diya। jab tumhaara patitapna nikal satopradhaan tak aatma aa jaati hai tab jauhar bharta hai to jhat teer lag jaata hai। yeh kabhi khyaal nahin karo ki baba to sab kuchh jaante hain। baba ko jaanne ki kya darkaar hai, jo karenge so paayenge। baba saakshi ho dekhte rehte hain। baba ko likhte hain hamne phalaani jagah jaakar service ki, baba poochhenge pahle tum yaad ki yaatra par tatpar ho? pahli baat hi yeh hai - aur sang tod ek baap sang jodo। dehi-abhimaani banna pade। ghar mein rehte bhi samajhna hai yeh to puraani duniya, puraani deh hai। yeh sab khalaas hona hai। hamaara kaam hai baap aur varse se। baba aise nahin kehte ki grihastha vyavhaar mein nahin raho, koi se baat na karo। baba se poochhte hain shaadi par jaayen? baba kahenge bhal jaao। vahaan bhi jaakar service karo। buddhi ka yog shivbaaba se ho। janma-janmaantar ke vikarma yaad bal se hi bhasma honge। yahaan bhi agar vikarma karte hain to bahut sazaayen bhogni paden। paavan bante-bante vikaar mein gira to mara। ekdam purja-purja ho jaate। shreemat par na chal bahut nuksaan karte hain। kadam-kadam par shreemat chaahiye। aise-aise paap karte hain jo yog lag na sake। yaad kar na saken। koi ko jaakar kahenge - bhagwan aaya hai, unse varsa lo, to woh maanenge nahin। teer lagega nahin। baba ne kaha hai bhakton ko gyaan sunaao, vyartha kisko na do, nahin to aur hi ninda karaayenge।

kai bachche baba se poochhte hain - baba hamko daan karne ki aadat hai, ab to gyaan mein aa gaye hain, ab kya karen? baba raay dete hain - bachche, gareebon ko daan dene vaale to bahut hain। gareeb koi bhookh nahin marte hain, fakeeron ke paas bahut paise pade rehte hain isliye in sab baaton se tumhaari buddhi hat jaani chaahiye। daan aadi mein bhi bahut khabardaari chaahiye। bahut aise-aise kaam karte hain, baat mat poochho aur phir khud samajhte nahin ki hamaare sir par bojha bahut bhaari hota jaata hai। gyaan maarga koi hanseekudi ka maarga nahin hai। baap ke saath to phir dharmaraaj bhi hai। dharmaraaj ke bade-bade dande khaane padte hain। kehte hain na jab pichhaadi mein dharmaraaj lekha lenge tab pata padega। janma-janmaantar ki sazaayen khaane mein koi time nahin lagta hai। baba ne kaashi kalvat ka bhi misaal samjhaaya hai। woh hai bhakti maarga, yeh hai gyaan maarga। manushyon ki bhi bali chadhaate hain, yeh bhi drama mein noondh hai। in sab baaton ko samajhna hai, aise nahin ki yeh drama banaaya hi kyon? chakra mein laaya hi kyon? chakra mein to aate hi rahenge। yeh to anaadi drama hai na। chakra mein na aao to phir duniya hi na rahe। moksha to hota nahin। mukhya ka bhi moksha nahin ho sakta। 5 hazaar varsha ke baad phir aise hi chakra lagaayenge। yeh to drama hai na। sirf koi ko samjhaane, vaani chalaane se pad nahin mil jaayega, pahle to patit se paavan banna hai। aise nahin baba to sab jaante hain। baba jaan karke bhi kya karenge, pahle to tumhaari aatma jaanti hai shreemat par ham kya karte hain, kahaan tak baba ko yaad karte hain? baaki baba yeh baithkar jaane, isse phaayda hi kya? tum jo kuchh karte ho so tum paayenge। baba tumhaari act aur service se jaante hain - yeh bachcha achhi service karte hain। phalaane ne baba ka bankar bahut vikarma kiye hain to uski murli mein jauhar bhar na sake। yeh gyaan talvaar hai। usmein yaad bal ka jauhar chaahiye। yogbal se tum vishwa par vijay praapta karte ho, baaki gyaan se nai duniya mein oonch pad paayenge। pahle to pavitra banna hai, pavitra banne bigar oonch pad mil na sake। yahaan aate hain nar se naaraayan banne ke liye। patit thode hi nar se naaraayan banenge। paavan banne ki poori yukti chaahiye। ananya bachche jo centres sambhaalte hain unko bhi badi mehnat karni pade, itni mehnat nahin karte hain isliye woh jauhar nahin bharta, teer nahin lagta, yaad ki yaatra kahaan! sirf pradarshani mein bahuton ko samjhaate hain, pahle yaad se pavitra banna hai phir hai gyaan। paavan honge to gyaan ki dhaarna hogi। patit ko dhaarna hogi nahin। mukhya subject hai yaad ki। us padhaai mein bhi subject hoti hain na। tumhaare paas bhi bhal bi.ke. bante hain parantu brahmaakumaar-kumaari, bhaai-behen banna maasi ka ghar nahin hai। sirf kahne maatra nahin banna hai। devta banne ke liye pahle pavitra zaroor banna hai। phir hai padhaai। sirf padhaai hogi pavitra nahin honge to oonch pad nahin pa sakenge। aatma pavitra chaahiye। pavitra ho tab pavitra duniya mein oonch pad pa sake। pavitrata par hi baba zor dete hain। bigar pavitrata kisko gyaan de na sake। baaki baba dekhte kuchh bhi nahin hai। khud baithe hain na, sab baaten samjhaate hain। bhakti maarga mein bhaavna ka bhaada mil jaata hai। woh bhi drama mein noondh hai, shareer bigar baap baat kaise karenge? sunenge kaise? aatma ko shareer hai tab sunti bolti hai। baba kehte hain mujhe organs hi nahin to sunoon, jaanoon kaise? samajhte hain baba to jaante hain ham vikaar mein jaate hain। agar nahin jaante hain to bhagwan hi nahin maanenge। aise bhi bahut hote hain। baap kehte hain main aaya hoon tumko paavan banaane ka raasta bataane। saakshi ho dekhta hoon। bachchon ki chalan se maaloom pad jaata hai - yeh kapoot hai va sapoot hai? service ka bhi saboot chaahiye na। yeh bhi jaante hain jo karta hai so paata hai। shreemat par chalega to shreshtha banega। nahin chalega to khud hi ganda bankar girega। koi bhi baat hai to clear poochho। andhashraddha ki baat nahin। baba sirf kehte hain yaad ka jauhar nahin hoga to paavan kaise banenge? is janma mein bhi paap aise-aise karte hain baat mat poochho। yeh hai hi paap aatmaon ki duniya, satayug hai punya aatmaon ki duniya। yeh hai sangam। koi to dullhead hain to dhaarna kar nahin sakte। baba ko yaad nahin kar sakte। phir tu let ho jaayenge, bhambhor ko aag lag jaayegi phir yog mein bhi rah nahin sakenge। us samay to haahaakaar mach jaati hai। bahut duhkh ke pahaad girne vaale hain। yahi phurna rehna chaahiye ki ham apna raajya-bhaagya to baap se le leven। deh-abhimaan chhod service mein lag jaana chaahiye। kalyaankaari banna hai। dhan vyartha nahin ganvaana hai। jo laayak hi nahin aise patit ko kabhi daan nahin dena chaahiye, nahin to daan dene vaale par bhi aa jaata hai। aise nahin ki dhindhora peetna hai ki bhagwan aaya hai। aise bhagwan kahlaane vaale bhaarat mein bahut hain। koi maanenge nahin। yeh tum jaante ho tumko roshni mili hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) padhaai ke saath-saath pavitra zaroor banna hai। aisa laayak va sapoot bachcha ban service ka saboot dena hai। shreemat par svayan ko shreshtha banaana hai।

2) sthool dhan bhi vyartha nahin ganvaana hai। patiton ko daan nahin karna hai। gyaan dhan bhi paatra ko dekhkar dena hai।

vardaan:- sada mould hone ki visheshta se samparka aur seva mein saphal hone vaale saphaltaamoorta bhav

jin bachchon mein svayan ko mould karne ki visheshta hai woh sahaj hi golden ej ki stage tak pahunch sakte hain। jaisa samay, jaise circumstance ho usi pramaan apni dhaarnaaon ko pratyaksha karne ke liye mould hona padta hai। mould hone vaale hi real gold hain। jaise saakaar baap ki visheshta dekhi - jaisa samay, jaisa vyakti vaisa roop - aise follow father karo to seva aur samparka sabmen sahaj hi saphaltaamoorta ban jaayenge।

slogan:- jahaan sarvashaktiyaan hain vahaan nirvi5ghna saphalta saath hai।