Murli du jour du jeudi 9 juillet 2020

09-07-2020 praatahmurli om shanti "baapdaada"' madhuban

“meethe bachche - jab samay mile to ekaanta mein baith vichaar saagar manthan karo, jo points sunte ho usko revise karo''

prashn:- tumhaari yaad ki yaatra poori kab hogi?

uttar:- jab tumhaari koi bhi karmedriyaan dhokha na den, karmaateet avastha ho jaae tab yaad ki yaatra poori hogi। abhi tumko poora purushaartha karna hai, naaummeed nahin banna hai। service par tatpar rehna hai।

om shanti। meethe-meethe bachche aatma-abhimaani hokar baithe ho? bachche samajhte hain aadhaakalpa ham deh-abhimaani rahe hain। ab dehi-abhimaani ho rahne ke liye mehnat karni padti hai। baap aakar samjhaate hain apne ko aatma samajhkar baitho tab hi baap yaad aayega। nahin to bhool jaayenge। yaad nahin karenge to yaatra kaise kar sakenge! paap kaise katenge! ghaata pad jaayega। yeh to ghadi-ghadi yaad karo। yeh hai mukhya baat। baaki to baap anek prakaar ki yuktiyaan batlaate hain। wrong kya hai, right kya hai - woh bhi samjhaaya hai। baap to gyaan ka saagar hai। bhakti ko bhi jaante hain। bachchon ko bhakti mein kya-kya karna padta hai। samjhaate hain yeh yagya tap aadi karna, yeh sab hai bhakti maarga। bhal baap ki mahima karte hain, parantu ulti। vaastav mein krishna ki mahima bhi poori nahin jaante। har ek baat ko samajhna chaahiye na। jaise krishna ko vaikuntha naath kaha jaata hai। achha, baba poochhte hain, krishna ko trilokeenaath kaha ja sakta hai? gaaya jaata hai na - trilokeenaath। ab triloki ke naath arthaat teen lok mool vatan, sookshm vatan, sthoolavtan। tum bachchon ko samjhaaya jaata hai tum brahmaanda ke bhi maalik ho। krishna aise samajhte honge ki ham brahmaanda ke maalik hain? nahin। woh to vaikuntha mein the। vaikuntha kaha jaata hai svarga nai duniya ko। to vaastav mein trilokeenaath koi bhi hai nahin। baap right baat samjhaate hain। teen lok to hain। brahmaanda ka maalik shivbaaba bhi hai, tum bhi ho। sookshm vatan ki to baat hi nahin। sthool vatan mein bhi woh maalik nahin hai, na svarga ka, na narka ka maalik hai। krishna hai svarga ka maalik। narka ka maalik hai raavan। inko raavan raajya, aasuri raajya kaha jaata hai। manushya kehte bhi hain parantu samajhte nahin hain। tum bachchon ko baap baith samjhaate hain। raavan ko 10 sheesh dete hain। 5 vikaar stri ke, 5 vikaar puroosh ke। ab 5 vikaar to sabke liye hain। sab hain hi raavan raajya mein। abhi tum shreshthaachaari ban rahe ho। baap aakar shreshthaachaari duniya banaate hain। ekaanta mein baithne se aise-aise vichaar saagar manthan chalega। us padhaai ke liye bhi student ekaanta mein kitaab le jaakar padhte hain। tumko kitaab to padhne ki darkaar nahin। haan, tum points note karte ho। isko phir revise karna chaahiye। yeh badi guhya baaten hain samajhne ki। baap kehte hain na - aaj tumko guhya te guhya nai-nai points samjhaata hoon। paaraspuri ke maalik to lakshmi-naaraayan hain। aise bhi nahin kahenge ki vishnu hain। vishnu ko bhi samajhte nahin hain ki yahi lakshmi-naaraayan hai। abhi tum short mein em object samjhaate ho। brahma-sarasvati koi aapas mein mel-female nahin hain। yeh to prajaapita brahma hai na। prajaapita brahma ko great-great grand father kah sakte hain, shivbaaba ko sirf baba hi kahenge। baaki sab hain brothers। itne sab brahma ke bachche hain। sabko maaloom hai - ham bhagwan ke bachche brothers ho gaye। parantu woh hai niraakaari duniya mein। abhi tum brahman bane ho। nai duniya satayug ko kaha jaata hai। inka naam phir purushottam sangamayug rakha hai। satayug mein hote hi hain purushottam। yeh badi wonderful baaten hain। tum nai duniya ke liye taiyaar ho rahe ho। is sangamayug par hi tum purushottam bante ho। kehte bhi hain ham lakshmi-naaraayan banenge। yeh hain sabse uttam purush। unhon ko phir devta kaha jaata hai। uttam se uttam number one hain lakshmi-naaraayan phir nambarvaar tum bachche banenge। sooryavanshi gharaane ko uttam kahenge। number one to hain na। aahiste-aahiste kala kam hoti hai।

abhi tum bachche nai duniya ka muhoorta karte ho। jaise naya ghar taiyaar hota hai to bachche khush hote hain। muhoorta karte hain। tum bachche bhi nai duniya ko dekh khush hote ho। muhoorta karte ho। likha hua bhi hai sone ke phoolon ki varsha hoti hai। tum bachchon ko kitna khushi ka paara chadhna chaahiye। tumko sukh aur shanti donon milte hain। doosra koi nahin jinko itna sukh aur shanti mile। doosre dharma aate hain to dvait ho jaata hai। tum bachchon ko apaar khushi hai - ham purushaartha kar oonch pad paayen। aise nahin ki jo takdeer mein hoga so milega, paas hone honge to honge। nahin, har baat mein purushaartha zaroor karna hai। purushaartha nahin pahunchta hai to kah dete jo naseeb mein hoga। phir purushaartha karna hi banda ho jaata hai। baap kehte hain tum maataaon ko kitna oonch banaata hoon। female ka maan sab jagah hai। vilaayat mein bhi maan hai। yahaan bachchi paida hoti hai to ulta manjha (ulti chaarpaai) kar dete। duniya bilkul hi dirty hai। is samay tum bachche jaante ho bhaarat kya tha, ab kya hai। manushya bhool gaye hain sirf shanti-shanti maangate rehte hain। vishwa mein shanti chaahte hain। tum yeh lakshmi-naaraayan ka chitra dikhaao। inhon ka raajya tha to pavitrata-sukh-shanti bhi thi। tumko aisa raajya chaahiye na। mool vatan mein to vishwa ki shanti nahin kahenge। vishwa mein shanti to yahaan hogi na। devtaaon ka raajya saare vishwa mein tha। mool vatan to hai aatmaon ki duniya। manushya to yeh bhi nahin jaante ki aatmaon ki duniya hoti hai। baap kehte hain ham tumko kitna oonch purushottam banaata hoon। yeh samjhaane ki baat hai। aise nahin, radiyaan maarenge - bhagwan aaya hai, to koi maanega nahin। aur hi gaali khaayenge aur khilaayenge। kahenge bi.ke. apne baba ko bhagwan kehti hain। aise service nahin hoti hai। baba yukti bataate rehte hain। kamre mein 8-10 chitra deevaal mein achhi reeti laga do aur baahar mein likh do - behad ke baap se behad sukh ka varsa lena hai athva manushya se devta banna hai, to aao ham aapko samjhaayen। aise bahut aane lag padenge। aapehi aate rahenge। vishwa mein shanti to thi na। abhi itne dher dharma hain। tamopradhaan duniya mein shanti kaise ho sakti hai। vishwa mein shanti woh to bhagwan hi kar sakta hai। shivbaaba aate hain zaroor kuchh saugaat laate honge। ek hi baap hai jo itna door se aate hain aur yeh baba ek hi baar aate hain। itna bada baba 5 hazaar varsha ke baad aate hain। musaaphiri se lautte hain to bachchon ke liye saugaat le aate hain na। stri ka pati bhi, bachchon ka baap to bante hain na। phir daada, pardaada, tardaada bante hain। inko tum baba kehte ho phir grand father bhi hoga। great grand father bhi hoga। biraadriyaan hain na। Adam, aadi dev naam hai parantu manushya samajhte nahin hain। tum bachchon ko baap baith samjhaate hain। baap dvaara srishti chakra ki history-geography ko tum jaankar chakravarti raaja ban rahe ho। baba kitna pyaar aur roochi se padhaate hain to itna padhna chaahiye na। savere ka time to sab free hote hain। subah ka class hota hai - aadha pauna ghanta, murli sunkar phir chale jaao। yaad to kahaan bhi rehte kar sakte ho। itvaar ka din to chhutti hai। savere 2-3 ghanta baith jaao। din ki kamaai ko make up kar lo। poori jholi bhar do। time to milta hai na। maaya ke toofaan aane se yaad nahin kar sakte hain। baba bilkul sahaj samjhaate hain। bhakti maarga mein kitne satsangon mein jaate hain। krishna ke mandir mein, phir shreenaath ke mandir mein, phir aur kiske mandir mein jaayenge। yaatra mein bhi kitne vyabhichaari bante hain। itni takleeph bhi lete, phaayda kuchh nahin। drama mein yeh bhi noondh hai phir bhi hoga। tumhaari aatma mein part bhara hua hai। satayug treta mein jo part kalpa pahle bajaaya hai vahi bajaayenge। moti buddhi yeh bhi nahin samajhte hain। jo maheen buddhi hain vahi achhi reeti samajh kar samjha sakte hain। unhein andar bhaasna aati hai ki yeh anaadi naatak bana hua hai। duniya mein koi nahin samajhte yeh behad ka naatak hai। inko samajhne mein bhi time lagta hai। har ek baat detail mein samjhaakar phir kaha jaata hai - mukhya hai yaad ki yaatra। second mein jeevanmukti bhi gaaya hua hai। aur phir yeh bhi gaayan hai ki gyaan ka saagar hai। saara saagar syaahi banaao, jangal ko kalam banaao, dharti ko kaagaz banaao… to bhi ant nahin aa sakti। shuru se lekar tum kitna likhte aaye ho। dher kaagaj ho jaaen। tumko koi dhakka nahin khaana hai। mukhya hai hi alpha। baap ko yaad karna hai। yahaan bhi tum aate ho shivbaaba ke paas। shivbaaba inmen pravesh kar tumko kitna pyaar se padhaate hain। koi bhi badaai nahin hai। baap kehte hain main aata hoon puraane shareer mein। kaise saadhaaran reeti shivbaaba aakar padhaate hain। koi ahankaar nahin। baap kehte hain tum mujhe kehte hi ho baba patit duniya, patit shareer mein aao, aakar hamko shiksha do। satayug mein nahin bulaate ho ki aakar heere-javaahraaton ke mahal mein baitho, bhojan aadi paao..... shivbaaba bhojan paate hi nahin। aage bulaate the ki aakar bhojan khaao। 36 prakaar ka bhojan khilaate the, yeh phir bhi hoga। yeh bhi charitra hi kahen। krishna ke charitra kya hain? woh to satayug ka prince hai। unko patit-paavan nahin kaha jaata। satayug mein yeh vishwa ke maalik kaise bane hain - yeh bhi abhi tum jaante ho। manushya to bilkul ghor andhiyaare mein hain। abhi tum ghor roshni mein ho। baap aakar raat ko din bana dete hain। aadhaakalpa tum raajya karte ho to kitni khushi honi chaahiye।

tumhaari yaad ki yaatra poori tab hogi jab tumhaari koi bhi karmendriyaan dhokha na den। karmaateet avastha ho jaae tab yaad ki yaatra poori hogi। abhi poori nahin hui hai। abhi tumko poora purooshaartha karna hai। naaummeed nahin banna hai। service aur service। baap bhi aakar boodhe tan se service kar rahe hain na। baap karnakraavanhaar hai। bachchon ke liye kitna phikar rehta hai - yeh banaana hai, makaan banaana hai। jaise laukik baap ko had ke khyaalaat rehte hain, vaise paarlaukik baap ko behad ka khyaal rehta hai। tum bachchon ko hi service karni hai। din-pratidin bahut sahaj hota jaata hai। jitna vinaash ke najdeek aate jaayenge utna taakat aati jaayegi। gaaya hua bhi hai bheeshmapitaamah aadi ko pichhaadi mein teer lage। abhi teer lag jaae to bahut hangaama ho jaae। itni bheed ho jaae jo baat mat poochho। kehte hain na - maatha khujlaane ki phursat nahin। aise koi hai nahin। parantu bheed ho jaati hai to phir aise kaha jaata hai। jab inhon ko teer lag jaae to phir tumhaara prabhaav niklega। sab bachchon ko baap ka parichay milna to hai।

tum 3 pair prithvi mein bhi yeh avinaashi hospital aur godly university khol sakte ho। paisa nahin hai to bhi harja nahin hai। chitra tumko mil jaayenge। service mein maan-apmaan, duhkh-sukh, thandi-garmi, sab sahan karni hai। kisko heere jaisa banaana kam baat hai kya! baap kabhi thakta hai kya? tum kyon thakte ho? achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere ke samay aadha pauna ghanta bahut pyaar va roochi se padhaai padhni hai। baap ki yaad mein rehna hai। yaad ka aisa purooshaartha ho jo sab karmendriyaan vash mein ho jaaen।

2) service mein duhkh-sukh, maan-apmaan, garmi-thandi sab kuchh sahan karna hai। kabhi bhi service mein thakna nahin hai। 3 pair prithvi mein bhi hospital kam university khol heere jaisa banaane ki seva karni hai।

vardaan:- sarva shaktiyon ki light dvaara aatmaon ko raasta dikhaane vaale chaitanya light house bhav

yadi sada is smriti mein raho ki main aatma vishwa kalyaan ki seva ke liye paramdham se avatrit hui hoon to jo bhi sankalp karenge, bol bolenge usmein vishwa kalyaan samaaya hua hoga। aur yahi smriti light house ka kaarya karegi। jaise us light house se ek rang ki light nikalti hai aise aap chaitanya light house dvaara sarva shaktiyon ki light aatmaon ko har kadam mein raasta dikhaane ka kaarya karti rahegi।

slogan:- sneh aur sahayog ke saath shakti roop bano to raajdhaani mein number aage mil jaayega।