Murli du jour du vendredi 10 juillet 2020

10-07-2020 praatahmurli om shanti "baapdaada"' madhuban

“meethe bachche - tum is padhaai se apne sukhdhaam jaate ho via shantidham, yahi tumhaari em object hai, yeh kabhi nahin bhoolni chaahiye''

prashn:- tum bachche saakshi hokar is samay drama ki kaun-si scene dekh rahe ho?

uttar:- is samay drama mein total duhkh ki scene hai। agar kisi ko sukh hai bhi to alpakaal kaag vishta samaan। baaki duhkh hi duhkh hai। tum bachche abhi roshni mein aaye ho। jaante ho second by second behad srishti ka chakra phirta rehta hai, ek din na mile doosre se। saari duniya ki act badalti rehti hai। nai scene chalti rehti hai।

double om shanti। ek - baap svadharma mein tike hue hain, doosra - bachchon ko bhi kehte hain apne svadharma mein tiko aur baap ko yaad karo। aur koi aise kah na sake ki svadharma mein tiko। tum bachchon ki buddhi mein nishchay hai। nishchaybuddhi vijayanti। vahi vijay paayenge। kaahe ki vijay paayenge? baap ke varse ki। svarga mein jaana - yeh hai baap ke varse ki vijay paana। baaki hai pad ke liye purushaartha। svarga mein jaana to zaroor hai। bachche jaante hain yeh chhi-chhi duniya hai। bahut athaah duhkh aane vaale hain। drama ke chakra ko bhi tum jaante ho। anek baar baba aaya hua hai paavan banaae sabhi aatmaon ko machchharon sadrishya le jaane, phir khud bhi nirvaandhaam mein jaakar nivaas karenge। bachche bhi jaayenge! tum bachchon ko yeh to khushi rahni chaahiye - is padhaai se ham apne sukhdhaam jaayenge via shantidham। yeh hai tumhaari em object। yeh bhoolni nahin chaahiye। roz-roz sunte ho, samajhte ho hamko patit se paavan banaane ke liye baap padhaate hain। paavan banne ka sahaj upaay bataate hain yaad ka। yeh bhi nai baat nahin। likha hua hai bhagwan ne raajayog sikhaaya। sirf bhool yeh kar di hai jo krishna ka naam daal diya hai। aise bhi nahin hai bachchon ko jo knowledge mil rahi hai, woh geeta ke sivaae aur koi shaastra mein hogi। bachche jaante hain koi bhi manushya ki mahima hai nahin, jaise baap ki hai। baap na aaye to srishti ka chakra hi na phire। duhkhadhaam se sukhdhaam kaise banen? srishti ka chakra to phirna hi hai। baap ko bhi zaroor aana hi hai। baap aate hain sabko le jaane phir chakra phirta hai। baap na aaye to kaliyug se satayug kaise banen? baaki yeh baaten koi shaastron mein nahin hain। raajayog hai hi geeta mein। agar samjhen bhagwan aabu mein aaya hai to ekdam bhaage milne ke liye। sannyaasi bhi chaahte to hain na ki bhagwan se milen। patit-paavan ko yaad karte hain vaapis jaane ke liye। abhi tum bachche padmaapadma bhaagyashaali ban rahe ho। vahaan athaah sukh hote hain। nai duniya mein jo devi-devta dharma tha, woh abhi nahin hai। baap daivi raajya ki sthaapna karte hi hain brahma dvaara। yeh to clear hai। tumhaari em object hi yeh hai। ismen sanshay ki baat hi nahin। aage chalkar samajh hi jaayenge, raajdhaani zaroor sthaapan hoti hai। aadi sanaatan devi-devta dharma hai। jab tum svarga mein rehte ho to inka naam hi bhaarat rehta hai phir jab tum narka mein aate ho tab hindustaan naam padta hai। yahaan kitna duhkh hi duhkh hai। phir yeh srishti badalti hai phir svarga mein hai hi sukhdhaam। yeh knowledge tum bachchon ko hai। duniya mein manushya kuchh bhi nahin jaante। baap khud kehte hain abhi hai andhiyaari raat। raat mein manushya dhakke khaate rehte hain। tum bachche roshni mein ho। yeh bhi saakshi ho buddhi mein dhaaran karna hai। second by second behad srishti ka chakra phirta rehta hai। ek din na mile doosre se। saari duniya ki act badalti rehti hai। nai scene chalti rehti hai। is samay total hai hi duhkh ki scene। agar sukh hai to bhi kaag vishta samaan। baaki duhkh hi duhkh hai। is janma mein karke sukh hoga phir doosre janma mein duhkh। ab tum bachchon ki buddhi mein yeh rehta hai - abhi ham jaate hain apne ghar। ismen mehnat karni hai paavan banne ki। shri-shri ne shreemat di hai shri lakshmi-naaraayan banne ki। barrister mat denge - barrister bhav। ab baap bhi kehte hain shreemat se yeh bano।

apne se poochhna chaahiye - mere mein koi avgun to nahin hai? is samay gaate bhi hain mujh nirgun haare mein koi gun naahi, aapehi taras paroi। taras arthaat raham। baba kehte - bachche main to kisi par raham karta hi nahin hoon। raham to har ek ko apne par karna hai। yeh drama bana hua hai। berahmi raavan tumko duhkh mein le aate hain। yeh bhi drama mein noondh hai। ismen raavan ka bhi koi dosh nahin। baap aakar sirf raay dete hain। yahi unka raham hai। baaki yeh raavanraajya to phir bhi chalega। drama anaadi hai। na raavan ka dosh hai, na manushyon ka dosh hai। chakra ko phirna hi hai। raavan se chhudaane ke liye baap yuktiyaan bataate rehte hain। raavan mat par tum kitna paap aatma bane ho। abhi puraani duniya hai। phir zaroor nai duniya aayegi। chakra to phirega na। satayug ko phir zaroor aana hai। abhi hai sangamayug। mahaabhaarat ladaai bhi is samay ki hai। vinaash kaale vipreet buddhi vinshanti। yeh hone ka hai। aur ham vijayanti svarga ke maalik honge। baaki sab honge hi nahin। yeh bhi samajhte ho - pavitra hone bigar devta banna mushkil hai। ab baap se shreemat milti hai shreshtha devta banne ki। aisi mat kabhi mil na sake। shreemat dene ka unka part hai bhi sangam par। aur koi mein to yeh gyaan hi nahin hai। bhakti maana bhakti। unko gyaan nahin kahenge। roohaani gyaan, gyaan-saagar rooh hi dete hain। unki hi mahima hai gyaan ka saagar, sukh ka saagar। baap purushaartha ki yuktiyaan bhi bataate hain। yeh khyaal rakhna chaahiye ki abhi fail hue to kalpa-kalpaantar fail honge, bahut chot lag jaayegi। shreemat par na chalne se chot lag jaati hai। braahmanon ka jhaad badhna bhi zaroor hai। itna hi badhega jitna devtaaon ka jhaad hai। tumko purushaartha karna aur karaana hai। sapling lagti rahegi। jhaad bada ho jaayega। tum jaante ho abhi hamaara kalyaan ho raha hai। patit duniya se paavan duniya mein jaane ka kalyaan hota hai। tum bachchon ki buddhi ka taala abhi khula hai। baap buddhivaanon ki buddhi hai na। abhi tum samajh rahe ho phir aage chal dekhna kis-kis ka taala khulta hai। yeh bhi drama chalta hai। phir satayug se repeat hoga। lakshmi-naaraayan jab takhta par baithte hain tab sanvat shuru hota hai। tum likhte bhi ho one se 1250 varsha tak svarga, kitna clear hai। kahaani hai satya naaraayan ki। katha amarnaath ki hai na। tum abhi sachchi-sachchi amarnaath ki katha sunte ho uska phir gaayan chalta hai। tyohaar aadi sab is samay ke hain। number one parva hai shivbaaba ki jayanti। kaliyug ke baad zaroor baap ko aana pade duniya ko change karne। chitron ko koi achhi reeti se dekhe, kitna poora hisaab bana hua hai। tumko yeh khaatiri hai, jitna kalpa pahle purushaartha kiya hai utna karenge zaroor। saakshi ho auron ka bhi dekhenge। apne purushaartha ko bhi jaante hain। tum bhi jaante ho। student apni padhaai ko nahin jaante honge? dil khaayegi zaroor ki ham is subject mein bahut kachche hain। phir naapaas ho jaate hain। imtahaan ke time jo kachche honge unki dil dhadakti rahegi। tum bachche bhi saakshaatkaar karenge। parantu naapaas to ho hi gaye, kar kya sakte hain! school mein naapaas hote hain to sambandhi bhi naaraaz, teacher bhi naaraaz hota hai। kahenge hamaare school se kam paas hue to samjha jaayega ki teacher itna achha nahin isliye kam paas hue। baba bhi jaante hain centres par kaun-kaun achhi teacher hai, kaise padhaati hai। kaun-kaun achhi reeti padhaakar le aati hai। sab maaloom padta hai। baba kehte - baadlon ko laana hai। chhote bachchon ko le aayenge to unmein moh rahega। akela nikalkar aana chaahiye to buddhi achhi reeti lagi rahe। bachchon ko to vahaan bhi dekhte rehte hain।

baap kehte hain yeh puraani duniya to kabristaan honi hai। naya makaan banaate hain to buddhi mein rehta hai na - hamaara naya makaan ban raha hai। dhandha aadi to karte rehte hain। parantu buddhi naye makaan taraph rehti hai। chupkar to nahin baith jaate। woh hai had ki baat, yeh hai behad ki baat। har kaarya karte hue smriti rahe ki abhi ham ghar jaakar phir apni raajdhaani mein jaayenge to apaar khushi rahegi। baap kehte hain - bachche, apne bachchon aadi ki sambhaal bhi karni hai। parantu buddhi vahaan lagi rahe। yaad na karne se phir pavitra bhi nahin ban sakte। yaad se pavitra, gyaan se kamaai। yahaan to sab hain patit। do kinaare hain। baba ko khivaiya kehte hain, parantu arth nahin samajhte। tum jaante ho baap us kinaare le jaate hain। aatma jaanti hai ham ab baap ko yaad kar bahut najdeek ja rahe hain। khivaiya naam bhi arth sahit rakha hai na। yeh sab mahima karte hain - naeeya meri paar lagaao। satayug mein aise kahenge kya? kaliyug mein hi pukaarte hain। tum bachche samajhte ho besmajh ko to yahaan aana nahin hai। baap ki sakhta mana hai। nishchay nahin to kabhi nahin le aana chaahiye। kuchh bhi samjhenge nahin। pahle to 7 roz ka course do। koi ko to 2 roz mein bhi teer lag jaata hai। achha lag gaya to phir chhodenge thode hi। kahenge ham 7 roz aur bhi seekhenge। tum jhat samajh jaayenge yeh is kul ka hai। tej buddhi jo honge woh koi baat ki parvaah nahin karenge। achha, ek naukri chhoot jaayegi doosri milegi, bachche dil vaale jo hote hain unki naukri aadi chhootti hi nahin hai। khud hi wonder khaate hain। bachchiyaan kehti hain hamaare pati ki buddhi phero। baba kehte hain mujhe mat kaho। tum yogbal mein rah phir baith gyaan samjhaao। baba thode hi buddhi ko pherenge। phir to sabhi aise dhandhe karte rahenge। jo rasam nikalti hai unko pakad lete hain। koi guru se kisko phaayda hua, suna, to bas unke peechhe pad jaate hain। nai aatma aati hai to unki mahima to niklegi na। phir bahut followers ban padte hain isliye in sab baaton ko dekhna nahin hai। tumko dekhna hai apne ko - ham kahaan tak padhte hain? yeh to baba detail mein jaise chit-chat karte hain। baaki sirf kah dena baap ko yaad karo yeh to ghar mein bhi rah kar sakte ho। lekin gyaan ka saagar hai to zaroor gyaan bhi denge na। yeh hai mukhya baat - manamnaabhav। saath mein srishti ke aadi-madhya-ant ka raaz bhi samjhaate hain। chitra bhi to is samay bahut achhe-achhe nikle hain। unka bhi arth baap samjhaate hain। vishnu ki naabhi se brahma ko dikhaaya hai। trimoorti bhi hai phir vishnu ki naabhi se brahma yeh phir kya hai? baap baith samjhaate hain - yeh right hai ya wrong hai? manomay chitra bhi dher banaate hain na। koi-koi shaastron mein chakra bhi dikhaaya hai। parantu koi ne kitni aayu likh di hai, koi ne kitni। anek mat hain na। shaastron mein had ki baaten likh di hain, baap behad ki baat samjhaate hain ki saari duniya mein hai raavanraajya। yeh tumhaari buddhi mein gyaan hai - ham kaise patit bane phir paavan kaise bante hain। peechhe phir aur dharma aate hain। anek variety hai। ek na mile doosre se। ek jaise features vaale do ho na saken। yeh bana-banaaya khel hai jo repeat hota rehta hai। baap bachchon ko baith samjhaate hain। time thoda hota jaata hai। apni jaanch karo - ham kahaan tak khushi mein rehte hain? hamko koi vikarma nahin karna hai। toofaan to aayenge। baap samjhaate hain - bachche, antarmukh hokar apna chart rakho to jo bhoolen hoti hain unka pashchaataap kar sakenge। yeh jaise yogbal se apne ko maaph karte ho। baba koi kshama ya maaph nahin karte। drama mein kshama akshar hi nahin hai। tumko apni mehnat karni hai। paapon ka danda manushya khud hi bhogte hain। kshama ki baat hi nahin। baap kehte hain har baat mein mehnat karo। baap baith yukti bataate hain aatmaon ko। baap ko bulaate ho puraane raavan ke desh mein aao, ham patiton ko aakar paavan banaao। parantu manushya samajhte nahin। woh hai aasuri sampradaay। tum ho brahman sampradaay, daivi sampradaay ban rahe ho। purushaartha bhi bachche nambarvaar karte hain। phir kah dete inki takdeer mein itna hi hai। apna time vesta karte hain। janma-janmaantar, kalpa-kalpaantar oonch pad pa nahin sakenge। apne ko ghaata nahin daalna chaahiye kyonki abhi jama hota hai phir ghaate mein chale jaate ho। raavan raajya mein kitna ghaata hota hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) antarmukhi ban apni jaanch karni hai, jo bhi bhoolen hoti hain unka dil se pashchaataap kar yogbal se maaph karna hai। apni mehnat karni hai।

2) baap ki jo raay milti hai us par poora chalkar apne oopar aapehi raham karna hai। saakshi ho apne va doosron ke purushaartha ko dekhna hai। kabhi bhi apne aapko ghaata nahin daalna hai।

vardaan:- nirantar yaad dvaara avinaashi kamaai jama karne vaale sarva khajaanon ke adhikaari bhav

nirantar yaad dvaara har kadam mein kamaai jama karte raho to sukh, shanti, aanand, prem…in sab khajaanon ke adhikaar ka anubhav karte rahenge। koi kashta, kashta anubhav nahin honge। sangam par braahmanon ko koi kashta ho nahin sakta। yadi koi kashta aata bhi hai to baap ki yaad dilaane ke liye, jaise gulaab ke pushpa ke saath kaanta unke bachaav ka saadhan hota hai। vaise yeh takleephen aur hi baap ki yaad dilaane ke nimitta banti hain।

slogan:- parmaatma shreemat ke aadhaar par karma roopi beej ko shubh sankalpon ka jal milta rahe to beej shaktishaali ban jaayega।