Murli du jour du jeudi 23 juillet 2020

23-07-2020 praatahmurli om shanti "baapdaada"' madhuban

“meethe bachche - yeh tumhaara jeevan bahut-bahut amoolya hai, kyonki tum shreemat par vishwa ki seva karte ho, is hell ko heaven bana dete ho''

prashn:- khushi gaayab hone ka kaaran tatha uska nivaaran kya hai?

uttar:- khushi gaayab hoti hai - (1) deh-abhimaan mein aane ke kaaran, (2) dil mein jab koi shanka paida ho jaati hai to bhi khushi gum ho jaati hai isliye baba raay dete hain, jab bhi koi shanka utpanna ho to phauran baba se poochho। dehi-abhimaani rahne ka abhyaas karo to sadaiv khush rahenge।

om shanti। oonch te oonch bhagwan aur phir bhagvaanuvaach, bachchon ke aage। main tumko oonch te oonch banaata hoon to tum bachchon ko kitni khushi honi chaahiye। samajhte bhi ho baba hamko saare vishwa ka maalik banaate hain। manushya kehte parampita paramatma oonch te oonch hai। baap khud kehte hain - main to vishwa ka maalik banta nahin hoon। bhagvaanuvaach - mujhe manushya kehte hain oonch te oonch bhagwan aur main kehta hoon ki mere bachche oonch te oonch hain। siddhakar bataate hain। purooshaartha bhi drama anusaar karaate hain, kalpa pahle muaaphik। baap samjhaate rehte hain, kuchh bhi baat na samjho to poochho। manushyon ko to kuchh bhi pata nahin hai। duniya kya hai, vaikuntha kya hai। bhal kitne bhi koi navaab, mugal aadi hokar gaye hain, bhal America mein kitne bhi paise vaale hain parantu in lakshmi-naaraayan jaise to ho na saken। woh to white house aadi banaate hain parantu vahaan to ratna jadit golden house bante hain। usko kaha hi jaata hai sukhdhaam। tumhaara hi hero-heroine ka part hai। tum diamond bante ho। golden ej thi। ab hai iron ej। baap kehte hain tum kitne bhaagyashaali ho। bhagwan khud baith samjhaate hain to tumko kitna khush rehna chaahiye। tumhaari yeh padhaai hai hi nai duniya ke liye। yeh tumhaara jeevan bahut amoolya hai kyonki tum vishwa ki service karte ho। baap ko bulaate hi hain ki aakar hell ko heaven banaao। heavenly god father kehte hain na। baap kehte hain - tum heaven mein the na, ab hell mein ho। phir heaven mein honge। hell shuru hota hai, to phir heaven ki baaten bhool jaati hain। yeh to phir bhi hoga। phir bhi tumko golden ej se iron ej mein zaroor aana hai। baba baar-baar bachchon ko kehte hain dil mein koi bhi shanka ho, jisse khushi nahin rehti to bataao। baap baith padhaate hain to padhna bhi chaahiye na। khushi nahin rehti hai kyonki tum deh-abhimaan mein aa jaate ho। khushi to honi chaahiye na। baap to sirf brahmaanda ka maalik hai, tum to vishwa ke bhi maalik bante ho। bhal baap ko creator kaha jaata hai parantu aise nahin ki pralay ho jaati hai phir nai duniya rachte hain। nahin, baap kehte hain main sirf puraani ko naya banaata hoon। puraani duniya vinaash karaata hoon। tumko nai duniya ka maalik banaata hoon। main kuchh karta nahin hoon। yeh bhi drama mein noondh hai। patit duniya mein hi mujhe bulaate hain। paarasnaath banaata hoon। to bachche khud paaraspuri mein aa jaate hain। vahaan to mujhe kabhi bulaate hi nahin hain। kabhi bulaate ho ki baba paaraspuri mein aakar thodi visit to lo? bulaate hi nahin। gaayan bhi hai duhkh mein simran sab karen, patit duniya mein yaad karte hain, sukh mein kare na koi। na yaad karte hain, na bulaate hain। sirf dvaapar mein mandir banaakar usmein mujhe rakh dete hain। patthar ka nahin to heere ka ling banaakar rakh dete hain - pooja karne ke liye, kitni wonderful baaten hain। achhi tarah se kaan kholkar sunna chaahiye। kaan bhi pure karna chaahiye। purity first। kehte hain sherni ka doodh sone ke bartan mein hi thahar sakta hai। ismen bhi pavitrata hogi to dhaarna hogi। baap kehte hain kaam mahaashatru hai, in par vijay paani hai। tumhaara yeh antim janma hai। yeh bhi tum jaante ho, yeh vahi mahaabhaarat ladaai bhi hai। kalpa-kalpa jaise vinaash hua hai, hoobhu ab bhi hoga, drama anusaar।

tum bachchon ko svarga mein phir se apne mahal banaane hain। jaise kalpa pahle banaaye the। svarga ko kehte hi hain paradise। puraanon se paradise akshar nikla hai। kehte hain maanasrovar mein pariyaan rehti thi। usmein koi tubka lagaaye to pari ban jaaye। vaastav mein hai gyaan maanasrovar। usmein tum kya se kya ban jaate ho। shobhnik ko pari kehte hain, aise nahin pankhon vaali koi pari hoti hai। jaise tum paandavon ko mahaaveer kaha jaata hai, unhonne phir paandavon ke bahut bade-bade chitra, guphaayen aadi baith dikhaai hain। bhakti maarga mein kitne paise barbaad karte hain। baap kehte hain hamne to bachchon ko kitna saahookaar banaaya। tumne itne sab paise kahaan kiye। bhaarat kitna saahookaar tha। abhi bhaarat ka kya haal hai। jo 100 percent solvent tha, ab 100 percent insolvent ban pada hai। abhi tum bachchon ko kitni taiyaari karni chaahiye। bachchon aadi ko bhi yahi samjhaana hai ki shivbaaba ko yaad karo। tum krishna jaise banenge। krishna kaise bana, yeh kisko pata thode hi hai। aage janma mein shivbaaba ko yaad karne se hi krishna bana। to tum bachchon ko kitni khushi rahni chaahiye। lekin apaar khushi unhein hi rahegi jo sada doosron ki khidmat (seva) mein rehte hain। mukhya dhaarna chalan bahut-bahut royal ho। khaan-paan bahut sundar ho। tum bachchon ke paas jab koi aate hain to unki har prakaar se khidmat karni chaahiye। sthool bhi to sookshm bhi। jismaani-roohaani donon karne se bahut khushi hogi। koi bhi aaye to unko tum sachchi satya naaraayan ki kahaani sunaao। shaastron mein to kya-kya kahaaniyaan likh di hain। vishnu ki naabhi se brahma nikla phir brahma ke haath mein shaastra de diye hain। ab vishnu ki naabhi se brahma kaise nikalte hain, kitna raaz hai। aur koi in baaton ko kuchh samajh na sake। naabhi se nikalne ki to baat hi nahin hai। brahma so vishnu, vishnu so brahma bante hain। brahma ko vishnu banne mein second lagta hai। second mein jeevanmukti kaha jaata hai। baap ne saakshaatkaar karaaya tum vishnu ka roop bante ho। second mein nishchay ho gaya। vinaash saakshaatkaar bhi hua, nahin to kalkatta mein jaise raajaai thaath se rehte the। koi takleeph nahin thi। bada royalty se rehte the। ab baap tumhein yeh gyaan ratnon ka vyaapaar sikhlaate hain। woh vyaapaar to inke aage kuchh bhi nahin hai। parantu inke part aur tumhaare part mein farka hai। baba ne inmen pravesh kiya aur phat se sab chhod diya। bhatthi banni thi। tumne bhi sab kuchh chhoda। nadi paar kar aae bhatthi mein pade। kya-kya hua, koi ki parvaah nahin। kehte hain krishna ne bhagaaya! kyon bhagaaya? unhon ko patraani banaane। yeh bhatthi bhi bani, tum bachchon ko svarga ki mahaaraani banaane ke liye। shaastron mein to kya-kya likh diya hai, practical mein kya-kya hai। so ab tum samajhte ho। bhagaane ki baat hi nahin। kalpa pahle bhi gaali mili thi। naam badnaam hua tha। yeh to drama hai, jo kuchh hota hai kalpa pahle muaaphik।

abhi tum achhi reeti jaante ho kalpa pahle jinhonne raajya liya hai woh zaroor aayenge। baap kehte hain main bhi kalpa-kalpa aakar bhaarat ko svarga banaata hoon। poora 84 janmon ka hisaab bataaya hai। satayug mein tum amar rehte ho। vahaan akaale mrityu hoti nahin। shivbaaba kaal par jeet pahnaate hain। kehte hain main kaalon ka kaal hoon। kathaayen bhi hain na। tum kaal par vijay paate ho। tum jaate ho amarlok mein। amarlok mein oonch pad paane ke liye ek to pavitra banna hai, doosra phir daiveegun bhi dhaaran karne hain। apna roz potaamel rakho। raavan dvaara tumko ghaata pada hai। mere dvaara phaayda hota hai। vyaapaari log in baaton ko achhi reeti samjhenge। yeh hain gyaan ratna। koi virla vyaapaari inse vyaapaar kare। tum vyaapaar karne aaye ho। koi to achhi reeti vyaapaar kar svarga ka sauda lete hain - 21 janma ke liye। 21 janma bhi kya 50-60 janma tum bahut sukhi rehte ho। padmapti bante ho। devtaaon ke pair mein padma dikhaate hain na। arth thode hi samajhte hain। tum abhi padmapti ban rahe ho। to tumko kitni khushi honi chaahiye। baap kehte hain main kitna saadhaaran hoon। tum bachchon ko svarga mein le jaane aaya hoon। bulaate bhi ho he patit-paavan aao, aakar paavan banaao। paavan rehte hi hain sukhdhaam mein। shantidham ki koi history-geography to ho nahin sakti। woh to aatmaon ka jhaad hai। sookshm vatan ki koi baat hi nahin। baaki yeh srishti chakra kaise phirta hai woh tum jaan gaye ho। satayug mein lakshmi-naaraayan ki dynasty thi। aise nahin, ek hi lakshmi-naaraayan sirf raajya karte hain। vriddhi to hoti hai na। phir dvaapar mein vahi poojya so phir pujaari bante hain। manushya phir paramatma ke liye kah dete aapehi poojya। jaise paramatma ke liye sarvavyaapi kah dete hain, in baaton ko tum samajhte ho। aadhaakalpa tum gaate aaye ho oonch te oonch bhagwan aur ab bhagvaanuvaach - oonch te oonch bachche ho। to aise baap ki raay par bhi chalna chaahiye na। grihastha vyavhaar bhi sambhaalna hai। yahaan to sab rah na saken। sab rahne lagen to kitna bada makaan banaana pade। yeh bhi tum ek din dekhenge ki neeche se oopar tak kitni badi queue lag jaati hai, darshan karne ke liye। koi ko darshan nahin hota hai to gaali bhi dene lag padte hain। samajhte hain mahaatma ka darshan karen। abhi baap to hai bachchon ka। bachchon ko hi padhaate hain। tum jisko raasta bataate ho koi to achhi reeti chal padte hain, koi dhaarna kar nahin sakte, kitne hain jo sunte bhi rehte phir baahar mein jaate hain to vahaan ke vahaan rah jaate, woh khushi nahin, padhaai nahin, yog nahin। baba kitna samjhaate hain, chart rakho। nahin to bahut pachhtaana padega। ham baba ko kitna yaad karte hain, chart dekhna chaahiye। bhaarat ke praacheen yog ki bahut mahima hai। to baap samjhaate hain - koi bhi baat nahin samjho to baba se poochho। aage tum kuchh bhi nahin jaante the। baba kehte hain yeh hai kaanton ka jangal। kaam mahaashatru hai। yeh akshar khud geeta ke hain। geeta padhte the parantu samajhte thode hi the। baba ne saari aayu geeta padhi। samajhte the - geeta ka mahaatma bahut achha hai। bhakti maarga mein geeta ka kitna maan hai। geeta badi bhi hoti hai, chhoti bhi hoti hai। krishna aadi devtaaon ke vahi chitra paise-paise mein milte rehte hain, unheen chitron ke phir kitne bade-bade mandir banaate hain। to baap samjhaate hain tumko to vijay maala ka daana banna hai। aise meethe-meethe baba ko baba-baba bhi kehte hain। samajhte bhi hain svarga ki raajaai dete hain phir bhi sunanti, kathanti aho maaya phaarakti devanti। baba kaha to baba maana baba। bhaktimaarga mein bhi gaaya jaata hai patiyon ka pati, gurooon ka guru ek hi hai। woh hamaara father hai। gyaan ka saagar patit-paavan hai। tum bachche kehte ho baba ham kalpa-kalpa aapse varsa lete aaye hain। kalpa-kalpa milte hain। aap behad ke baap se hamko zaroor behad ka varsa milega। mukhya hai hi alpha। usmein be merge hai। baba maana varsa। woh hai had ka, yeh hai behad ka। had ke baba to dher ke dher hain। behad ka baap to ek hi hai। achha।

meethe-meethe 5 hazaar varsha baad phir se aakar milne vaale bachchon prati baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sthool, sookshm khidmat (seva) kar apaar khushi ka anubhav karna aur karaana hai। chalan aur khaan-paan mein bahut royalty rakhni hai।

2) amarlok mein oonch pad paane ke liye pavitra banne ke saath-saath daiveegun bhi dhaaran karne hain। apna potaamel dekhna hai ki ham baba ko kitna yaad karte hain? avinaashi gyaan ratnon ki kamaai jama kar rahe hain? kaan pure bane hain jismen dhaarna ho sake?

vardaan:- maaya ke khel ko saakshi hokar dekhne vaale sada nirbhay, maayaajeet bhav

samay prati samay jaise aap bachchon ki stage aage badhti ja rahi hai, aise ab maaya ka vaar nahin hona chaahiye, maaya namaskaar karne aaye vaar karne nahin। yadi maaya aa bhi jaae to use khel samajhkar dekho। aise anubhav ho jaise saakshi hokar had ka drama dekhte hain। maaya ka kaisa bhi vikraal roop ho aap use khilauna aur khel samajhkar dekhenge to bahut maja aayega, phir usse darenge va ghabraayenge nahin। jo bachche sada khilaadi bankar saakshi ho maaya ka khel dekhte hain woh sada nirbhay va maayaajeet ban jaate hain।

slogan:- aisa sneh ka saagar bano jo krodh sameep bhi na aa sake।