Murli du jour du vendredi 24 juillet 2020

24-07-2020 praatahmurli om shanti "baapdaada"' madhuban

“meethe bachche - baap aaye hain tumhein gyaan ratna dene, baap tumhein jo bhi sunaate va samjhaate hain yeh gyaan hai, gyaan ratna gyaan saagar ke sivaae koi de nahin sakta''

prashn:- aatma ki value kam hone ka mukhya kaaran kya hai?

uttar:- value kam hoti hai khaad padne se। jaise sone mein khaad daalkar jevar banaate hain to uski value kam ho jaati hai। aise aatma jo sachcha sona hai, usmein jab apvitrata ki khaad padti hai to value kam ho jaati hai। is samay tamopradhaan aatma ki koi value nahin। shareer ki bhi koi value nahin। abhi tumhaari aatma aur shareer donon yaad se valuable ban rahe hain।

geet:- yeh kaun aaj aaya savere-savere…

om shanti। meethe-meethe roohaani bachchon prati baap baith samjhaate hain aur yaad ki yuktiyaan bhi bata rahe hain। bachche baithe hain, bachchon ke andar mein hai shiv bhole baba aaye hain। samjho aadha ghanta shant mein baith jaate hain, bolte nahin hain to tumhaare andar aatma kahegi ki shivbaaba kuchh bole। jaante ho shivbaaba viraajmaan hai, parantu bolte nahin hain। yeh bhi tumhaari yaad ki yaatra hai na। buddhi mein shivbaaba hi yaad hai। andar mein samajhte ho baba kuchh bole, gyaan ratna deve। baap aate hi hain tum bachchon ko gyaan ratna dene। woh gyaan ka saagar hai na। kahenge - bachche, dehi-abhimaani ho raho। baap ko yaad karo। yeh gyaan hua। baap kehte hain is drama ke chakra ko, seedhi ko aur baap ko yaad karo - yeh gyaan hua। baba jo kuchh samjhaayenge usko gyaan kahenge। yaad ki yaatra bhi samjhaate rehte hain। yeh sab hai gyaan ratna। yaad ki baat jo samjhaate hain, yeh ratna bahut achhe hain। baap kehte hain apne 84 janmon ko yaad karo। tum pavitra aaye the phir pavitra hokar hi jaana hai। karmaateet avastha mein jaana hai aur baap se poora varsa lena hai। woh tab milega, jab aatma satopradhaan ban jaayegi yaad ke bal se। yeh akshar bahut valuable hai, note karne chaahiye। aatma mein hi dhaarna hoti hai। yeh shareer to organs hain jo vinaash ho jaate hain। sanskaar achhe va bure aatma mein bhare jaate hain। baap mein bhi sanskaar bhare hue hain - srishti ke aadi-madhya-ant ki knowledge ke, isliye unko knowledgeful kaha jaata hai। baba right kar samjhaate hain - 84 ka chakra bilkul sahaj hai। abhi 84 ka chakra poora hua hai। abhi hamko vaapis baap ke paas jaana hai। maili aatma to vahaan ja na sake। tumhaari aatma pavitra ho jaayegi to phir yeh shareer chhoot jaayega। pavitra shareer to yahaan mil na sake। yeh puraani jutti hai, inse vairaagya aata ja raha hai। aatma ko pavitra ban phir bhavishya mein hamko pavitra shareer lena hai। satayug mein ham aatma aur shareer donon pavitra the। is samay tumhaari aatma apvitra ban gai hai to shareer bhi apvitra hai। jaisa sona vaisa jevar। government bhi kehti hai halke sone ka jevar pahno। uska bhaav kam hai। abhi tumhaari aatma ki bhi value kam hai। vahaan tumhaari aatma ki kitni value rehti hai। satopradhaan hai na। abhi hai tamopradhaan। khaad padi hai, koi kaam ki nahin hai। vahaan aatma pavitra hai, to bahut value hai। abhi 9 carat ban gai hai to koi value nahin hai isliye baap kehte hain aatma ko pavitra banaao to phir shareer bhi pavitra milega। yeh gyaan aur koi de na sake।

baap hi kehte hain maamekam yaad karo। krishna kaise kahenge। woh to dehdhaari hai na। baap kehte hain apne ko aatma samajh mujh baap ko yaad karo। koi dehdhaari ko yaad na karo। abhi tum samajhte ho to phir samjhaana hai। shivbaaba hai niraakaar, unka alaukik janma hai। tum bachchon ko bhi alaukik janma dete hain। alaukik baap alaukik bachche। laukik, paarlaukik aur alaukik kaha jaata hai। tum bachchon ko alaukik janma milta hai। baap tumko adopt kar varsa dete hain। tum jaante ho ham braahmanon ka bhi alaukik janma hai। alaukik baap se alaukik varsa milta hai। brahmaakumaar-kumaariyon bigar aur koi svarga ka maalik ban na sake। manushya kuchh bhi samajhte nahin। tumko baap kitna samjhaate hain। aatma jo apvitra bani hai woh sivaae yaad ke pavitra ban nahin sakti। yaad mein nahin rahenge to khaad rah jaayegi। pavitra ban nahin sakenge phir sazaayen khaani padengi। saari duniya ki manushya aatmaon ko pavitra ban vaapis jaana hai। shareer to nahin jaayega। baap kehte hain apne ko aatma samajhna kitna mushkil rehta hai। dhandhe aadi mein woh avastha thode hi rehti hai। baap kehte hain achha apne ko aatma nahin samajhte ho to shivbaaba ko yaad karo। dhandha aadi karte yahi mehnat karo ki main aatma is shareer se kaam karti hoon। main aatma hi shivbaaba ko yaad karti hoon। aatma hi pahle-pahle pavitra thi, ab phir pavitra banna hai। yeh hai mehnat। ismen badi jabardasta kamaai hai। yahaan kitne bhi saahookaar hain, arab-kharab hain parantu woh sukh nahin hai। sabke sir par duhkh hain। bade-bade raajaayen, president aadi aaj hain, kal unko maar dete। vilaayat mein kya-kya hota rehta hai। saahookaaron par, raajaaon par to museebat hai। yahaan bhi jo raajaayen the woh praja ban gaye hain। raajaaon par phir praja ka raajya ho gaya hai। drama mein aise noondh hai। pichhaadi mein hi yeh haal hota hai। bahut hi aapas mein ladte rahenge। tum jaante ho kalpa pahle bhi aise hua tha। tum gupta vesh mein dil va jaan, sik va prem se apna ganvaaya hua raajya lete ho। tumko pahchaan mili hai - ham to maalik the, sooryavanshi devtaayen the। abhi phir woh banne ke liye purooshaartha kar rahe ho kyonki yahaan tum satya naaraayan ki katha sun rahe ho na। baap dvaara ham nar se naaraayan kaise banen? baap aakar raajayog sikhlaate hain। bhakti maarga mein yeh koi sikhla na sake। koi bhi manushya ko baap, teacher, guru nahin kahenge। bhakti mein kitni puraani kahaaniyaan baith sunaate hain। ab tum bachchon ko 21 janma vishraam paane ke liye paavan to zaroor banna pade।

baap kehte hain apne ko aatma samjho। aadhaakalpa to drama anusaar deh-abhimaani ho rehte ho, ab dehi-abhimaani banna hai। drama anusaar ab puraani duniya ko badal naya banna hai। duniya to ek hi hai। puraani duniya se phir nai banegi। nai duniya mein naya bhaarat tha to usmein devi-devta the, capital bhi jaante ho, jamuna ka kantha tha, jisko paristaan bhi kehte the। vahaan natural beauty rehti hai। aatma pavitra ban jaati hai to pavitra aatma ko shareer bhi pavitra milta hai। baap kehte hain main aakar tumko haseen so devi-devta banaata hoon। tum bachche apni jaanch karte raho, koi hamaare mein avgun to nahin hai? yaad mein rehte hain? padhaai bhi padhni hai। yeh hai bahut badi padhaai। ek hi padhaai hai, us padhaai mein to kitne kitaab aadi padhte hain। yeh padhaai hai oonch te oonch, padhaane vaala bhi hai oonch te oonch shivbaaba। aise nahin ki shivbaaba koi is duniya ka maalik hai। vishwa ke maalik to tum bante ho na। kitni nai-nai guhya baaten tumko sunaate rehte hain। manushya samajhte hain paramatma srishti ka maalik hai। baap samjhaate hain - meethe-meethe bachchon, main is srishti ka maalik nahin hoon। tum maalik bante ho aur phir raajya ganvaate ho। phir baap aakar vishwa ka maalik banaate hain। vishwa isko hi kaha jaata hai। mool vatan va sookshm vatan ki baat nahin hai। mool vatan se tum yahaan aakar 84 janma ka chakra lagaate ho। phir baap ko aana padta hai। abhi phir tumko purooshaartha karaata hoon - woh praalabdha paane ke liye, jo tumne ganvaai hai। haar aur jeet ka khel hai na। yeh raavan raajya khalaas hona hai। baap kitna sahaj reeti samjhaate hain। baap khud baith padhaate hain। vahaan to manushya, manushya ko padhaate hain। ho tum bhi manushya parantu baap tum aatmaon ko baith padhaate hain। padhaai ke sanskaar aatma mein hi rehte hain। abhi tum bahut knowledgeful ho, woh sab hai bhakti ki knowledge। kamaai ke liye bhi knowledge hai। shaastron ki bhi knowledge hai। yeh hai roohaani knowledge। tumhaari rooh ko roohaani baap baith knowledge sunaate hain। 5 hazaar varsha pahle bhi tumne suni thi। saare manushya srishti bhar mein aise kabhi koi padhaata nahin hoga। kisko bhi pata nahin, eeshvar kaise padhaate hain?

tum bachche jaante ho abhi is padhaai se kingdom sthaapan ho rahi hai। jo achhi reeti padhte aur shreemat par chalte hain woh highest bante hain aur jo baap ki jaae ninda karaate hain, haath chhod jaate hain woh praja mein bahut kam pad paate hain। baap to ek hi padhaai padhaate hain। padhaai mein kitni margin hai। deity kingdom thi na। ek hi baap hai jo yahaan aakar kingdom sthaapan karte hain। baaki yeh sab vinaash ho jaana hai। baap kehte hain - bachche, ab jaldi taiyaari karo। gaphlat mein time vesta nahin karo। yaad nahin karte hain to most valuable time nuksaan hota hai। shareer nirvaah arth dhandha aadi bhal karo phir bhi hath kaar de dil yaar de। baap kehte hain mujhe yaad karo to raajaai tumko mil jaayegi। khuda dosta ki kahaani bhi suni hai na। allaah avaldeen ka bhi naatak dikhaate hain। thaka karne se khajaana nikal aaya। abhi tum bachche jaante ho - allaah tumko thaka karne se kya se kya banaate hain। jhat divya drishti se vaikuntha chale jaate ho। aage bachchiyaan aapas mein milkar baithti thi, phir aapehi chali jaati thi dhyaan mein। phir jaadu kah dete the। to woh band kar diya। to yeh sab baaten hain is samay ki। haatamtaai ki bhi kahaani hai। muhalra mukh mein daalte the to maaya gum ho jaati thi। muhalra nikaalne se maaya aa jaati thi। rahasya to koi samajh na sake। baap kehte hain bachche mukh mein muhalra daal do। tum shanti ke saagar ho, aatma shanti mein apne svadharma mein rehti hai। satayug mein bhi jaante hain ki ham aatma hain। baaki paramatma baap ko koi bhi nahin jaante। kabhi bhi koi poochhe - bolo vahaan vikaar ka naam nahin hai। hai hi viceless world। 5 vikaar vahaan hote hi nahin। deh-abhimaan hi nahin। maaya ke raajya mein deh-abhimaani bante hain, vahaan hote hi hain mohjeet। is puraani duniya se nashtomoha hona hai। vairaagya to unko aata hai jo gharbaar chhodte hain। tumko to gharbaar nahin chhodna hai। baap ki yaad mein rehte yeh puraana shareer chhodkar jaana hai। sabka hisaab-kitaab chuktu hona hai। phir chale jaayenge ghar। yeh kalpa-kalpa hota hai। tumhaari buddhi abhi door-door oopar jaati hai, vo log dekhte hain kahaan tak saagar hai? soorya-chaand mein kya hai? aage samajhte the yeh devtaayen hain। tum kehte ho yeh to maandave ki battiyaan hain। yahaan khel hota hai। to yeh battiyaan bhi yahaan hain। mool vatan, sookshm vatan mein yeh hoti nahin। vahaan khel hi nahin। yeh anaadi khel chala aata hai। chakra phirta rehta hai, pralay hoti nahin। bhaarat to avinaashi khanda hai, ismen manushya rehte hi hain, jalmai hoti nahin। pashu-pakshi aadi jo bhi hain, sab honge। baaki jo bhi khanda hain, woh satayug-treta mein rehte nahin। tumne jo kuchh divya drishti se dekha hai, woh phir practical mein dekhenge। practical mein tum vaikuntha mein jaakar raajya karenge। jiske liye purooshaartha karte rehte ho, phir bhi baap kehte hain yaad ki badi mehnat hai। maaya yaad karne nahin deti hai। bahut pyaar se baba ko yaad karna hai। agyaan kaal mein bhi pyaar se baap ki mahima karte hain। hamaara phalaana aisa tha, phalaane martabe vaala tha। abhi tumhaari buddhi mein saara srishti chakra baitha hua hai। sab dharmon ki knowledge hai। jaise vahaan roohon ka sijra hai, yahaan phir manushya srishti ka sijra hai। great-great grand father brahma hai। phir hai tumhaari biraadri। srishti to chalti rehti hai na।

baap samjhaate hain - bachche, nar se naaraayan banna hai to tumhaari jo kathni hai, vahi karni ho। pahle apni avastha ko dekhna hai। baba ham to aapse poora varsa lekar hi chhodenge, to woh chalan bhi chaahiye। yeh ek hi padhaai hai, nar se naaraayan banne ki। yeh tumko baap hi padhaate hain। raajaaon ka raaja tum hi bante ho, aur koi khanda mein hote nahin। tum pavitra raajaayen bante ho, phir bigar light vaale apvitra raajaayen pavitra raajaaon ke mandir banaakar pooja karte hain। abhi tum padh rahe ho। student teacher ko kyon bhoolte hain! kehte hain baba maaya bhula deti hai। dosh phir maaya par rakh dete hain। are, yaad to tumko karna hai। mukhya teacher ek hi hai, baaki aur sab hain naayab teachers। baap ko bhool jaate ho, achha teacher ko yaad karo। tumko 3 chance diye jaate hain। ek bhoole to doosre ko yaad karo। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se poora varsa lene ke liye jo kathni ho vahi karni ho, iska purooshaartha karna hai। mohjeet banna hai।

2) sada yaad rahe ki ham shanti ke saagar ke bachche hain, humein shanti mein rehna hai। mukh mein muhalra daal lena hai। gaphlat mein apna time vesta nahin karna hai।

vardaan:- tadaphti hui aatmaon ko ek second mein gati-sadgati dene vaale master daata bhav

jaise sthool season ka intajaam karte ho, sevaadhaari saamagri sab taiyaar karte ho jisse kisi ko koi takleeph na ho, samay vyartha na jaae। aise hi ab sarva aatmaon ki gati-sadgati karne ki antim season aane vaali hai, tadaphti hui aatmaon ko queue mein khada karne ka kashta nahin dena hai, aate jaaen aur lete jaaen। iske liye ever ready bano। purooshaarthi jeevan mein rahne se oopar ab daataapan ki sthiti mein raho। har sankalp, har second mein master daata ban karke chalo।

slogan:- hazoor ko buddhi mein haazir rakho to sarva praaptiyaan ji hazoor karengi।