Murli du jour du jeudi 13 août 2020

13-08-2020 praatahmurli om shanti "baapdaada"' madhuban

“meethe bachche - tumhein kaun padhaane aaya hai, vichaar karo to khushi mein romaanch khade ho jaayenge, oonche te ooncha baap padhaate hain, aisi padhaai kabhi chhodni nahin hai''

prashn:- abhi tum bachchon ko kaun-sa nishchay hua hai? nishchaybuddhi ki nishaani kya hogi?

uttar:- tumhein nishchay hua ham abhi aisi padhaai padh rahe hain, jisse double sirtaaj raajaaon ka raaja banenge। svayan bhagwan padhaakar humein vishwa ka maalik bana rahe hain। abhi ham unke bachche bane hain to phir is padhaai mein lag jaana hai। jaise chhote bachche apne maa-baap ke sivaae kisi ke paas bhi nahin jaate। aisa behad ka baap mila hai to aur koi bhi pasanda na aaye। ek ki hi yaad rahe।

geet:- kaun aaya aaj savere-savere…

om shanti। meethe-meethe bachchon ne geet suna - kaun aaya hai aur kaun padhaata hai? yeh samajh ki baat hai। koi bahut aklamand hote hain, koi kam aklamand hote hain। jo bahut padha likha hota hai, use bahut aklamand kahenge। shaastra aadi jo bhi padhe likhe hote hain, unka maan hota hai। kam padhe hue ko kam maan milta hai। ab geet ka akshar suna - kaun aaya padhaane! teacher aate hain na। school mein padhne vaale jaante hain teacher aaya। yahaan kaun aaya hai? ekdam romaanch khade ho jaane chaahiye। oonch te oonch baap phir se padhaane aaye hain। samajhne ki baat hai na! takdeer ki bhi baat hai। padhaane vaala kaun hai? bhagwan। woh aakar padhaate hain। vivek kehta hai - bhal koi kitni bhi bade te badi padhaai padhta ho, phat se woh padhaai chhodkar aae bhagwan se padhe। ek second mein sab kuchh chhod baap ke paas padhne aae।

baba ne samjhaaya hai - abhi tum purooshottam sangamayugi bane ho। uttam te uttam purush hain yeh lakshmi-naaraayan। duniya mein kisko bhi pata nahin hai ki kis education se inhonne yeh pad paaya hai। tum padhte ho - yeh pad paane liye। kaun padhaate hain? bhagwan। to aur sab padhaaeeyaan chhod is padhaai mein lag jaana chaahiye kyonki baap aate hi hain kalpa ke baad। baap kehte hain - main har 5 hazaar varsha ke baad aata hoon sammukh padhaane। wonder hai na। kehte bhi hain bhagwan hamko padhaate hain, yeh pad praapta karaane। phir bhi padhte nahin। to baap kahenge na yeh sayaana nahin hai। baap ki padhaai par poora dhyaan nahin dete hain। baap ko bhool jaate hain। tum kehte ho ki baba ham bhool jaate hain। teacher ko bhi bhool jaate hain। yeh hain maaya ke toofaan। parantu padhaai to padhni chaahiye na। vivek kehta hai bhagwan padhaate hain to us padhaai mein ekdam lag jaana chaahiye। chhote bachchon ko hi padhna hota hai। aatma to sabki hai। baaki shareer chhota-bada hota hai। aatma kehti hai main aapka chhota bachcha bana hoon। achha mere bane ho to ab padho। doodh-paak to nahin ho। padhaai first। ismen bahut attention dena hai। student phir aate hain yahaan supreme teacher ke paas। woh padhaane vaale teachers bhi mukrar hain। to bhi supreme teacher to hai na। 7 roz bhatthi bhi gaai hui hai। baap kehte hain pavitra raho aur mujhe yaad karo। daiveegun dhaaran kiye to tum yeh ban jaayenge। behad ke baap ko yaad karna pade। chhote bachche ko maa-baap ke sivaae doosra koi uthaate hain to unke paas jaate nahin। tum bhi behad ke baap ke bane ho to aur koi ko dekhna pasanda bhi nahin aayega, phir koi bhi ho। tum jaante ho ham oonch te oonch baap ke hain। woh hamko double sirtaaj raajaaon ka raaja banaate hain। light ka taaj manamnaabhav aur ratan jadit taaj madhyaajeebhav। nishchay ho jaata hai ham is padhaai se vishwa ka maalik bante hain, 5 hazaar varsha baad history repeat hoti hai na। tumko raajaai milti hai। baaki sab aatmaayen shantidham apne ghar chali jaati hain। abhi tum bachchon ko maaloom pada hai - asul mein ham aatmaayen baap ke saath apne ghar mein rehti hain। baap ka banne se abhi tum svarga ke maalik bante ho phir baap ko bhool orphan ban padte ho। bhaarat is samay orphan hai। orphan unko kaha jaata hai jinko maa-baap nahin hote। dhakka khaate rehte hain। tumko to ab baap mila hai, tum saare srishti chakra ko jaante ho to khushi mein gadgad hona chaahiye। ham behad ke baap ke bachche hain। parampita paramatma prajaapita brahma dvaara nai srishti braahmanon ki rachte hain। yeh to bahut sahaj samajhne ki baat hai। tumhaare chitra bhi hain, viraat roop ka chitra bhi banaaya hai। 84 janmon ki kahaani dikhaai hai। ham so devta phir kshatriy, vaishya, shoodra bante hain। yeh koi bhi manushya nahin jaante kyonki brahman aur braahmanon ko padhaane vaale baap ka, donon ka naam-nishaan gum kar diya hai। english mein bhi tum log achhi reeti samjha sakte ho। jo english jaante hain to translation kar phir samjhaana chaahiye। father knowledgeful hai, unko hi yeh knowledge hai ki srishti ka chakra kaise phirta hai। yeh hai padhaai। yog ko bhi baap ki yaad kahi jaati hai, jisko angreji mein kamyooniyan kaha jaata hai। baap se kamyooniyan, teacher se kamyooniyan, guru se kamyooniyan। yeh hai god father se kamyooniyan। khud baap kehte hain mujhe yaad karo aur koi bhi dehdhaari ko yaad nahin karo। manushya guru aadi karte hain, shaastra padhte hain। em object kuchh bhi nahin। sadgati to hoti nahin। baap to kehte hain ham aaye hain sabko vaapis le jaane। abhi tumko baap ke saath buddhi ka yog rakhna hai, to tum vahaan jaae pahunchenge। achhi reeti yaad karne se vishwa ke maalik banenge। yeh lakshmi-naaraayan paradise ke maalik the na। yeh kaun samjhaane vaala hai। baap ko kaha jaata hai knowledgeful। manushya phir kah dete antaryaami। vaastav mein antaryaami ka akshar hai nahin। andar rahne vaali, nivaas karne vaali to aatma hai। aatma jo kaam karti hai, woh to sab jaante hain। sab manushya antaryaami hain। aatma hi seekhti hai। baap tum bachchon ko aatma-abhimaani banaate hain। tum aatma ho mool vatan ki rahne vaali। tum aatma kitni chhoti ho। anek baar tum aai ho part bajaane। baap kehte hain main bindi hoon। meri pooja to kar nahin sakte। kyon karenge, darkaar hi nahin। main tum aatmaon ko padhaane aata hoon। tumko hi raajaai deta hoon phir raavan raajya mein chale jaate ho to mujhe hi bhool jaate ho। pahle-pahle aatma aati hai part bajaane। manushya kehte hain 84 laakh janma lete hain। parantu baap kehte hain maximum hain hi 84 janma। foreign mein jaakar yeh baaten sunaayenge to unko kahenge yeh knowledge to hamko yahaan baith padhaao। tumko vahaan 1000 roopaya milte hain, ham aapko 10-20 hazaar roopaya denge। hamko bhi knowledge sunaao। god father ham aatmaon ko padhaate hain। aatma hi judge aadi banti hai। baaki manushya to sab hain deh-abhimaani। koi ko bhi gyaan nahin hai। bhal bade-bade philosopher aadi bahut hain, parantu yeh knowledge kisko bhi nahin hai। god father niraakaar padhaane aate hain। ham unse padhte hain, yeh baaten sunkar chaaidhat ho jaayenge। yeh baaten to kabhi suni padhi nahin। ek baap ko hi kehte ho liberator, guide jabki vahi liberator hai to phir Christ ko kyon yaad karte ho? yeh baaten achhi reeti samjhaao to woh chaaidhat ho jaayenge। kahenge yeh ham sunen to sahi। paradise ki sthaapna ho rahi hai, uske liye yeh mahaabhaarat ladaai bhi hai। baap kehte hain main tumko raajaaon ka raaja double sirtaaj banaata hoon। purity, pees, prosperity sab thi। vichaar karo, kitne varsha hue? Christ se 3 hazaar varsha pahle inhon ka raajya tha na। kahenge yeh to spiritual knowledge hai। yeh to direct us supreme father ka bachcha hai, unse raajayog seekh raha hai। world ki history-geography kaise repeat hoti hai, yeh saari knowledge hai। hamaari aatma mein 84 janmon ka part bhara hua hai। is yog ki taakat se aatma satopradhaan ban golden ej mein chali jaayegi, phir unke liye raajya chaahiye। puraani duniya ka vinaash bhi chaahiye। so saamne khada hai phir ek dharma ka raajya hoga। yeh paap aatmaon ki duniya hai na। abhi tum paavan ban rahe ho, bolo is yaad ke bal se ham pavitra bante hain aur sabka vinaash ho jaayega। natural calamities bhi aane vaali hain। hamaara realise kiya hua hai aur divya drishti se dekha hua hai। yeh sab khalaas hona hai। baap aaye hain deity world sthaapan karne। sunkar kahenge oho! yeh to god father ke bachche hain। tum bachche jaante ho yeh ladaai lagegi, natural calamities hogi। kya haal hoga? yeh bade-bade makaan aadi sab girne lag padenge। tum jaante ho yeh bombs aadi 5 hazaar varsha pahle bhi banaaye the apne hi vinaash ke liye। abhi bhi bombs taiyaar hain। yogbal kya cheez hai, jisse tum vishwa par vijay paate ho aur koi thode hi jaante। bolo, science tumhaara hi vinaash karti hai। hamaara baap ke saath yog hai to us silence ke bal se ham vishwa par jeet paakar satopradhaan ban jaate hain। baap hi patit-paavan hai। paavan duniya zaroor sthaapan karke hi chhodenge। drama anusaar noondh hai। bombs jo banaaye hain to rakh denge kya! aise-aise samjhaayenge to samjhenge yeh to koi authority hai, inmen god ne aakar pravesh kiya hai। yeh bhi drama mein noondh hai। aisi-aisi baaten bataate rahenge to woh khush honge। aatma mein kaise part hai, yeh bhi anaadi bana-banaaya drama hai। phir apne samay par Christ aakar tumhaara dharma sthaapan karenge। aisi authority se bolenge to woh samjhenge baap sab bachchon ko baith samjhaate hain। to is padhaai mein bachchon ko lag jaana chaahiye। baap, teacher, guru teenon ek hi hain। woh kaise knowledge dete hain, yeh bhi tum samajhte ho। sabko pavitra banaakar le jaate hain। deity dynasty thi to pavitra the। god-goddess the। baat karne ka bada hoshiyaar ho, speed bhi achhi ho। bolo baaki sab aatmaayen sweet hom mein rehti hain। baap hi le jaate hain, sarva ka sadgati daata woh baap hai। unka birth place hai bhaarat। yeh kitna bada teertha ho gaya।

tum jaante ho sabko tamopradhaan banna hi hai। punarjanma sabko lena hai, vaapis koi bhi ja nahin sakte। aisi-aisi baaten samjhaane se bahut wonder khaayenge। baba to kehte hain jodi ho to bahut achha samjha sakte hain। bhaarat mein pahle pavitrata thi। phir apvitra kaise hote hain। yeh bhi bata sakte hain। poojya hi pujaari ban jaate hain। impure banne se phir apni hi pooja karne lagte hain। raajaaon ke ghar mein bhi in devtaaon ke chitra rehte hain, jo pavitra double sirtaaj the unhon ko bigar taaj vaale apvitra poojte hain। vo ho gaye pujaari raajaayen। unko to god-goddess nahin kahenge kyonki in devtaaon ki pooja karte hain। aapehi poojya, aapehi pujaari, patit ban jaate hain to raavan raajya shuru ho jaata hai। is samay raavan raajya hai। aise-aise baith samjhaayen to kitna maza kar dikhaayen। gaadi ke do pahiye yugal ho to bahut wonder kar dikhaayen। ham yugal hi phir so poojya banenge। ham purity, pees, prosperity ka varsa le rahe hain। tumhaare chitra bhi nikalte rehte hain। yeh hai eeshvareey parivaar। baap ke bachche hain, potre aur potriyaan hain, bas aur koi sambandh nahin। nai srishti inko kahi jaati hai phir devi-devta to thode banenge। phir aahiste-aahiste vriddhi hoti hai। yeh knowledge kitni samajhne ki hai। yeh baba bhi dhandhe mein jaise navaab tha। koi baat ki parvaah nahin rehti thi। jab dekha yeh to baap padhaate hain, vinaash saamne khada hai to phat se chhod diya। yeh zaroor samjha hamko baadshaahi milti hai to phir gadaai kya karenge। to tum bhi samajhte ho bhagwan padhaate hain, yeh to poori reeti padhna chaahiye na। unki mat par chalna chaahiye। baap kehte hain apne ko aatma samajh baap ko yaad karo। baap ko tum bhool jaate ho, lajja nahin aati hai, woh nasha nahin chadhta hai। yahaan se bahut achha refresh ho jaate hain phir vahaan sodawater ho jaate hain। ab tum bachche purushaartha karte ho - gaanv-gaanv mein service karne ka। baba kehte hain pahle-pahle to yeh bataao ki aatmaon ka baap kaun hai। bhagwan to niraakaar hi hai। vahi is patit duniya ko paavan banaayenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan bhagwan supreme teacher bankar padha rahe hain isliye achhi reeti padhna hai, unki mat par chalna hai।

2) baap ke saath aisa yog rakhna hai jisse silence ka bal jama ho। silence bal se vishwa par jeet paani hai, patit se paavan banna hai।

vardaan:- ekmat aur ekras avastha dvaara dharni ko phaldaayak banaane vaale himmatvaan bhav

jab aap bachche himmatvaan bankar sangathan mein ekmat aur ekras avastha mein rehte va ek hi kaarya mein lag jaate ho to svayan bhi sada praphullit rehte aur dharni ko bhi phaldaayak banaate ho। jaise aajkal science dvaara abhi-abhi beej daala abhi-abhi phal mila, aise hi silence ke bal se sahaj aur teevragti se pratyakshata dekhenge। jab svayan nirvighna ek baap ki lagan mein magan, ekmat aur ekras rahenge to anya aatmaayen bhi svatah sahayogi banengi aur dharni phaldaayak ho jaayegi।

slogan:- jo abhimaan ko shaan samajh lete, woh nirmaan nahin rah sakte।