Murli du jour du mardi 13 octobre 2020

13-10-2020 praatahmurli om shanti "baapdaada"' madhuban

“meethe bachche - baba aaye hain tumhein ghar ki raah bataane, tum aatma-abhimaani hokar raho to yeh raah sahaj dekhne mein aayegi''

prashn:- sangam par kaun-si aisi knowledge mili hai jisse satayugi devtaayen mohjeet kahlaaye?

uttar:- sangam par tumhein baap ne amraktha sunaakar amar aatma ki knowledge di। gyaan mila - yeh avinaashi bana-banaaya drama hai, har ek aatma apna-apna part bajaati hai। woh ek shareer chhod doosra leti hai, ismen rone ki baat nahin। isi knowledge se satayugi devtaaon ko mohjeet kaha jaata। vahaan mrityu ka naam nahin। khushi se puraana shareer chhod naya lete hain।

geet:- nayan heen ko raah dikhaao…

om shanti। meethe-meethe roohaani bachchon prati roohaani baap kehte ki raah to dikhlaata hoon parantu pahle apne ko aatma nishchay kar baitho। dehi-abhimaani hokar baitho to phir tumko raah bahut sahaj dekhne aayegi। bhakti maarga mein aadhaakalpa thokren khaai hain। bhakti maarga ki athaah saamagri hai। ab baap ne samjhaaya hai behad ka baap ek hi hai। baap kehte hain tumko raasta bata raha hoon। duniya ko yeh bhi pata nahin kaun sa raasta bataate hain! mukti-jeevanmukti, gati-sadgati ka। mukti kaha jaata hai shantidham ko। aatma shareer bigar kuchh bhi bol nahin sakti। karmendriyon dvaara hi aavaaz hota hai, mukh se aavaaz hota hai। mukh na ho to aavaaz kahaan se aayega। aatma ko yeh karmendriyaan mili hain karma karne ke liye। raavan raajya mein tum vikarma karte ho। yeh vikarma chhi-chhi karma ho jaate hain। satayug mein raavan hi nahin to karma akarma ho jaate hain। vahaan 5 vikaar hote nahin। usko kaha jaata hai - svarga। bhaaratvaasi svargavaasi the, ab phir kahenge narkavaasi। vishay vaitarni nadi mein gota khaate rehte hain। sab ek-do ko duhkh dete rehte hain। ab kehte hain baba aisi jagah le chalo jahaan duhkh ka naam na ho। woh to bhaarat jab svarga tha tab duhkh ka naam nahin tha। svarga se narka mein aaye hain, ab phir svarga mein jaana hai। yeh khel hai। baap hi bachchon ko baith samjhaate hain। sachcha-sachcha satsang yeh hai। tum yahaan sat baap ko yaad karte ho vahi oonch te oonch bhagwan hai। woh hai rachta, unse varsa milta hai। baap hi bachchon ko varsa denge। had ka baap hote hue bhi phir yaad karte hain - he bhagwan, he parampita paramatma raham karo। bhakti maarga mein dhakke khaate-khaate hairaan ho gaye hain। kehte hain - he baba, hamko sukh-shanti ka varsa do। yeh to baap hi de sakte hain so bhi 21 janma ke liye। hisaab karna chaahiye। satayug mein jab inka raajya tha to zaroor thode manushya honge। ek dharma tha, ek hi raajaai thi। unko kaha jaata hai svarga, sukhdhaam। nai duniya ko kaha jaata hai satopradhaan, puraani ko tamopradhaan kahenge। har ek cheez pahle satopradhaan phir sato-rajo-tamo mein aati hai। chhote bachche ko satopradhaan kahenge। chhote bachche ko mahaatma se bhi oonch kaha jaata hai। mahaatmaayen to janma lete phir bade hokar vikaaron ka anubhav karke gharbaar chhod bhaagte hain। chhote bachche ko to vikaaron ka pata nahin hai। bilkul innocent hain isliye mahaatma se bhi oonch kaha jaata hai। devtaaon ki mahima gaate hain - sarvagun sampanna..... saadhuon ki yeh mahima kabhi nahin karenge। baap ne hinsa aur ahinsa ka arth samjhaaya hai। kisko maarna isko hinsa kaha jaata hai। sabse badi hinsa hai kaam kataari chalaana। devtaayen hinsak nahin hote। kaam kataari nahin chalaate। baap kehte hain ab main aaya hoon tumko manushya se devta banaane। devta hote hain satayug mein। yahaan koi bhi apne ko devta nahin kah sakte। samajhte hain ham neech paapi vikaari hain। phir apne ko devta kaise kahenge isliye hindu dharma kah diya hai। vaastav mein aadi sanaatan devi-devta dharma tha। hindu to hindustaan se nikaala hai। unhon ne phir hindu dharma kah diya hai। tum kahenge - ham devta dharma ke hain to bhi hindu mein laga denge। kahenge hamaare paas column hi hindu dharma ka hai। patit hone ke kaaran apne ko devta kah nahin sakte hain।

abhi tum jaante ho - ham poojya devta the, ab pujaari bane hain। pooja bhi pahle sirf shiv ki karte hain phir vyabhichaari pujaari banen। baap ek hai unse varsa milta hai। baaki to anek prakaar ki deviyaan aadi hain। unse koi varsa nahin milta hai। is brahma se bhi tumko varsa nahin milta। ek hai niraakaari baap, doosra hai saakaari baap। saakaari baap hote hue bhi he bhagwan, he parampita kehte rehte hain। laukik baap ko aise nahin kahenge। to varsa baap se milta hai। pati aur patni half partner hote hain to unko aadha hissa milna chaahiye। pahle aadha unka nikaal baaki aadha bachchon ko dena chaahiye। parantu aajkal to bachchon ko hi saara dhan de dete hain। koi-koi ka moh bahut hota hai, samajhte hain hamaare marne baad bachcha hi hakdaar rahega। aajkal ke bachche to baap ke chale jaane par maa ko poochhte bhi nahin। koi-koi maatri-snehi hote hain। koi phir maatri-drohi hote hain। aajkal bahut karke maatri drohi hote hain। sab paise uda dete hain। dharma ke bachche bhi koi-koi aise nikal padte hain jo bahut tang karte hain। ab bachchon ne geet suna, kehte hain baba hamko sukh ka raasta bataao - jahaan chain ho। raavan raajya mein to sukh ho na sake। bhakti maarga mein to itna bhi nahin samajhte ki shiv alag hai, shankar alag hai। bas maatha tekte raho, shaastra padhte raho। achha, isse kya milega, kuchh bhi pata nahin। sarva ke shanti ka, sukh ka daata to ek hi baap hai। satayug mein sukh bhi hai to shanti bhi hai। bhaarat mein sukh shanti thi, ab nahin hai isliye bhakti karte dar-dar dhakke khaate rehte hain। abhi tum jaante ho shantidham, sukhdhaam mein le jaane vaala ek hi baap hai। baba ham sirf aapko hi yaad karenge, aapse hi varsa lenge। baap kehte hain deh sahit deh ke sarva sambandhon ko bhool jaana hai। ek baap ko yaad karna hai। aatma ko yahaan hi pavitra banna hai। yaad nahin karenge to phir sazaayen khaani padengi। pad bhi bhrashta ho jaayega isliye baap kehte hain yaad ki mehnat karo। aatmaon ko samjhaate hain। aur koi bhi satsang aadi aisa nahin hoga jahaan aise kahe - he roohaani bachchon। yeh hai roohaani gyaan, jo roohaani baap se hi bachchon ko milta hai। rooh arthaat niraakaar। shiv bhi niraakaar hai na। tumhaari aatma bhi bindi hai, bahut chhoti। unko koi dekh na sake, sivaae divya drishti ke। divya drishti baap hi dete hain। bhagat baith hanoomaan, ganesh aadi ki pooja karte hain ab unka saakshaatkaar kaise ho। baap kehte hain divya drishti daata to main hi hoon। jo bahut bhakti karte hain to phir main hi unko saakshaatkaar karaata hoon। parantu isse phaayda kuchh bhi nahin। sirf khush ho jaate hain। paap to phir bhi karte hain, milta kuchh bhi nahin। padhaai bigar kuchh ban thode hi sakenge। devtaayen sarvagun sampanna hain। tum bhi aise bano na। baaki to woh hai sab bhakti maarga ka saakshaatkaar। sachmuch krishna se jhoolo, svarga mein unke saath raho। woh to padhaai par hai। jitna shreemat par chalenge utna oonch pad paayenge। shreemat bhagwan ki gaai hui hai। krishna ki shreemat nahin kahenge। parampita paramatma ki shreemat se krishna ki aatma ne yeh pad paaya hai। tumhaari aatma bhi devta dharma mein thi arthaat krishna ke gharaane mein thi। bhaaratvaasiyon ko yeh pata nahin hai ki raadhe-krishna aapas mein kya lagte the। donon hi alag-alag raajaai ke the। phir svayanvar baad lakshmi-naaraayan bante hain। yeh sab baaten baap hi aakar samjhaate hain। ab tum padhte hi ho svarga ka prince-princess banne ke liye। prince-princess ka jab svayanvar hota hai tab phir naam badalta hai। to baap bachchon ko aisa devta banaate hain। agar baap ki shreemat par chalenge to। tum ho mukh vanshaavli, woh hain kukh vanshaavli। woh brahman log hathiyaala baandhate hain kaam chita par bithaane ka। abhi tum sachchi-sachchi braahmaniyaan kaam chita se utaar gyaan chita par bithaane hathiyaala baandhate ho। to woh chhodna pade। yahaan ke bachche to ladte-jhagadte paisa bhi saara barbaad karte hain। aajkal duniya mein bahut ganda hai। sabse gandi beemaari hai bioscope। achhe bachche bhi bioscope mein jaane se kharaab ho padte hain isliye bi.ke. ko bioscope mein jaana mana hai। haan, jo majboot hain, unko baba kehte hain vahaan bhi tum service karo। unko samjhaao yeh to hai had ka bioscope। ek behad ka bioscope bhi hai। behad ke bioscope se hi phir yeh had ke jhoothe bioscope nikle hain।

abhi tum bachchon ko baap ne samjhaaya hai - mool vatan jahaan sabhi aatmaayen rehti hain phir beech mein hai sookshm vatan। yeh hai - saakaar vatan। khel saara yahaan chalta hai। yeh chakra phirta hi rehta hai। tum brahman bachchon ko hi svadarshan chakradhaari banna hai। devtaaon ko nahin। parantu braahmanon ko yeh alankaar nahin dete hain kyonki purooshaarthi hain। aaj achhe chal rahe hain, kal gir padte hain isliye devtaaon ko de dete hain। krishna ke liye dikhaate hain svadarshan chakra se akaasur-bakaasur aadi ko maara। ab unko to ahinsa parmodharma kaha jaata hai phir hinsa kaise karenge! yeh sab hai bhaktimaarga ki saamagri। jahaan jaao shiv ka ling hi hoga। sirf naam kitne alag-alag rakh diye hain। mitti ki deviyaan kitni banaate hain। shrringaar karte hain, hazaaron roopaya kharcha karte hain। utpatti ki phir pooja karenge, paalna kar phir jaae dubote hain। kitna kharcha karte hain gudiyon ki pooja mein। mila to kuchh bhi nahin। baap samjhaate hain yeh sab paise barbaad karne ki bhakti hai, seedhi utarte hi aaye hain। baap aate hain to sabki chadhti kala hoti hai। sabko shantidham-sukhdhaam mein le jaate hain। paise barbaad karne ki baat nahin। phir bhaktimaarga mein tum paise barbaad karte-karte insolvent ban gaye ho। solvent, insolvent banne ki katha baap baith samjhaate hain। tum in lakshmi-naaraayan ki dynasty ke the na। ab tumko nar se naaraayan banne ki shiksha baap dete hain। vo log teejri ki katha, amar katha sunaate hain। hai sab jhooth। teejri ki katha to yeh hai, jisse aatma ka gyaan ka teesra netra khulta hai। saara chakra buddhi mein aa jaata hai। tumko gyaan ka teesra netra mil raha hai, amraktha bhi sun rahe ho। amar baba tumko katha suna rahe hain - amarpuri ka maalik banaate hain। vahaan tum kabhi mrityu ko nahin paate। yahaan to kaal ka manushyon ko kitna dar rehta hai। vahaan darne ki, rone ki baat nahin। khushi se puraana shareer chhod naya le lete hain। yahaan kitna manushya rote hain। yeh hai hi rone ki duniya। baap kehte hain yeh to bana-banaaya drama hai। har ek apna-apna part bajaate rehte hain। yeh devtaayen mohjeet hain na। yahaan to duniya mein anek guru hain jinki anek maten milti hain। har ek ki mat apni। ek santoshi devi bhi hai jiski pooja hoti hai। ab santoshi deviyaan to satayug mein ho sakti hain, yahaan kaise ho sakti। satayug mein devtaayen sadaiv santushta hote hain। yahaan to kuchh na kuchh aash rehti hai। vahaan koi aash nahin hoti। baap sabko santushta kar dete hain। tum padmapti ban jaate ho। koi apraapta vastu nahin rehti jiski praapti ki chinta ho। vahaan chinta hoti hi nahin। baap kehte hain sarva ka sadgati daata to main hi hoon। tum bachchon ko 21 janma ke liye khushi hi khushi dete hain। aise baap ko yaad bhi karna chaahiye। yaad se hi tumhaare paap bhasma honge aur tum satopradhaan ban jaayenge। yeh samajhne ki baaten hain। jitna auron ko jaasti samjhaayenge utna praja banti jaayegi aur oonch pad paayenge। yeh koi saadhu aadi ki katha nahin hain। bhagwan baith inke mukh dvaara samjhaate hain। abhi tum santushta devi-devta ban rahe ho। abhi tumko vrat bhi rakhna chaahiye - sadaiv pavitra rahne ka kyonki paavan duniya mein jaana hai to patit nahin banna hai। baap ne yeh vrat sikhaaya hai। manushyon ne phir anek prakaar ke vrat banaaye hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek baap ki mat par chal sada santushta rah santoshi devi banna hai। yahaan koi bhi aash nahin rakhni hai। baap se sarva praaptiyaan kar padmapti banna hai।

2) sabse ganda banaane vaala bioscope (cinema) hai। tumhein bioscope dekhne ki mana hai। tum baha-dur ho to had aur behad ke bioscope ka raaz samajh doosron ko samjhaao। service karo।

vardaan:- fullstop ki stage dvaara prakriti ki halchal ko stop karne vaale prakritipti bhav

vartamaan samay halchal badhne ka samay hai। final paper mein ek taraph prakriti ka aur doosri taraph paanch vikaaron ka vikraal roop hoga। tamoguni aatmaon ka vaar aur puraane sanskaar..sab last samay par apna chance lege। aise samay par sametne ki shakti dvaara abhi-abhi saakaari, abhi-abhi aakaari aur abhi-abhi niraakaari sthiti mein sthit hone ka abhyaas chaahiye। dekhte hue na dekho, sunte hue na suno। jab aisi fullstop ki stage ho tab prakritipti ban prakriti ki halchal ko stop kar sakenge।

slogan:- nirvighna raajya adhikaari banne ke liye nirvighna sevaadhaari bano।