Murli du jour du lundi 9 novembre 2020

09-11-2020 praatahmurli om shanti "baapdaada"' madhuban

“meethe bachche - tumhaara yeh time bahut-bahut valuable hai, isliye ise vyartha mat ganvaao, paatra ko dekhkar gyaan daan karo''

prashn:- gunon ki dhaarna bhi hoti jaae aur chalan bhi sudharti rahe uski sahaj vidhi kya hai?

uttar:- jo baba ne samjhaaya hai - woh doosron ko samjhaao। gyaan dhan ka daan karo to gunon ki dhaarna bhi sahaj hoti jaayegi, chalan bhi sudharti rahegi। jinki buddhi mein yeh knowledge nahin rehti hai, gyaan dhan ka daan nahin karte, woh hain manhoos। woh muphta apne ko ghaata daalte hain।

geet:- bachpan ke din bhula na dena…

om shanti। meethe-meethe bachchon ne geet suna, arth to achhi reeti samjha। ham aatma hain aur behad baap ke bachche hain - yeh bhula na do। abhi-abhi baap ki yaad mein harshit hote hain, abhi-abhi phir yaad bhool jaane se gam mein pad jaate hain। abhi-abhi jeete ho, abhi-abhi mar padte ho arthaat abhi-abhi behad ke baap ke bante ho, abhi-abhi phir jismaani parivaar taraph chale jaate ho। to baap kehte hain aaj hanse kal ro na dena। yeh hua geet ka arth।

tum bachche jaante ho - bahut karke manushya shanti ke liye hi dhakka khaate hain। teertha yaatra par jaate hain। aise nahin ki dhakka khaane se koi shanti milti hai। yeh ek hi sangamayug hai, jab baap aakar samjhaate hain। pahle-pahle to apne ko pahchaano। aatma hai hi shant swaroop। rahne ka sthaan bhi shantidham hai। yahaan aati hai to karma zaroor karna padta hai। jab apne shantidham mein hai to shant hai। satayug mein bhi shanti rehti hai। sukh bhi hai, shanti bhi hai। shantidham ko sukhdhaam nahin kahenge। jahaan sukh hai use sukhdhaam, jahaan duhkh hai use duhkhadhaam kahenge। yeh sab baaten tum samajh rahe ho। yeh sab samjhaane ke liye koi ko sammukh hi samjhaaya jaata hai। pradarshani mein jab andar ghuste hain to pahle-pahle baap ka hi parichay dena chaahiye। samjhaaya jaata hai aatmaon ka baap ek hi hai। vahi geeta ka bhagwan hai। baaki yeh sab aatmaayen hain। aatma shareer chhodti aur leti hai। shareer ke naam hi badalte hain। aatma ka naam nahin badalta। to tum bachche samjha sakte ho - behad ke baap se hi sukh ka varsa milta hai। baap sukh ki srishti sthaapan karte hain। baap duhkh ki srishti rache aisa to hota nahin। bhaarat mein lakshmi-naaraayan ka raajya tha na। chitra bhi hain - bolo yeh sukh ka varsa milta hai। agar kahe yeh to tumhaari kalpana hai to ekdam chhod dena chaahiye। kalpana samajhne vaala kuchh bhi samjhega nahin। tumhaara time to bahut valuable hai। is saari duniya mein tumhaare jitna valuable time koi ka hai nahin। bade-bade manushyon ka time valuable hota hai। baap ka time kitna valuable hai। baap samjhaakar kya se kya bana dete hain। to baap tum bachchon ko hi kehte hain ki tum apna valuable time mat ganvaao। knowledge paatra ko hi deni hai। paatra ko samjhaana chaahiye - sab bachche to samajh nahin sakte, itni buddhi nahin jo samjhen। pahle-pahle baap ka parichay dena hai। jab tak yeh nahin samajhte ki ham aatmaon ka baap shiv hai to aage kuchh bhi nahin samajh sakenge। bahut pyaar, namrata se samjhaakar ravaana kar dena chaahiye kyonki aasuri sampradaay jhagda karne mein deri nahin karenge। government student ki kitni mahima karti hai। unhon ke liye kitne prabandha rakhti hai। college ke student hi pahle-pahle patthar maarna shuru karte hain। josh hota hai na। boodhe ya maataayen to patthar itna jor se laga na saken। aksar karke students ka hi shor hota hai। unhon ko hi ladaai ke liye taiyaar karte hain। ab baap aatmaon ko samjhaate hain - tum ulte ban gaye ho। apne ko aatma ke badle shareer samajh lete ho। ab baap tumko seedha kar rahe hain। kitna raat-din ka farka ho jaata hai। seedha hone se tum vishwa ke maalik ban jaate ho। abhi tum samajhte ho ham aadhaakalpa ulte the। ab baap aadhaakalpa ke liye sulta banaate hain। allaah ke bachche ho jaate to vishwa ki baadshaahi ka varsa milta hai। raavan ulta kar dete hain to kala kaaya chat ho jaati phir girte hi rehte। raamraajya aur raavan raajya ko tum bachche jaante ho। tumko baap ki yaad mein rehna hai। bhal shareer nirvaah arth karma bhi karna hai phir bhi samay to bahut milta hai। koi jigyaasu aadi nahin hai, kaam nahin hai to baap ki yaad mein baith jaana chaahiye। woh to hai alpakaal ke liye kamaai aur tumhaari yeh hai sadaakaal ke liye kamaai, ismen attention jaasti dena padta hai। maaya ghadi-ghadi aur taraph khyaalaat ko le jaati hai। yeh to hoga hi। maaya bhulaati rahegi। is par ek naatak bhi dikhaate hain - prabhu aise kehte, maaya aise kehti। baap bachchon ko samjhaate hain maamekam yaad karo, ismen hi vighna padte hain। aur koi baat mein itne vighna nahin padte। pavitrata par kitni maar khaate hain। bhaagvat aadi mein is samay ka hi gaayan hai। pootnaayen, soopankhaayen bhi hain, yeh sab is samay ki baaten hain jabki baap aakar pavitra banaate hain। utsav aadi bhi jo manaate hain, jo past ho gaya hai, unka phir tyohaar manaate aate। past ki mahima karte aate hain। raamraajya ki mahima gaate hain kyonki past ho gaya hai। jaise Christ aadi aaye, dharma sthaapan karke gaye। tithi taareekh bhi likh dete hain phir unka birth de manaate aate hain। bhakti maarga mein bhi yeh dhandha aadhaakalpa chalta hai। satayug mein yeh hota nahin। yeh duniya hi khatma ho jaani hai। yeh baaten tumhaare mein bhi bahut thode hain jo samajhte hain। baap ne samjhaaya hai sab aatmaon ko ant mein vaapis jaana hai। sab aatmaayen shareer chhod chali jaayengi। tum bachchon ki buddhi mein hai - baaki thode din hain। ab phir se yeh sab vinaash ho jaana hai। satayug mein sirf ham hi aayenge। sabhi aatmaayen to nahin aayengi। jo kalpa pahle aaye the vahi nambarvaar aayenge। vahi achhi reeti padhkar aur padha bhi rahe hain। jo achha padhte hain vahi phir nambarvaar transfer hote hain। tum bhi transfer hote ho। tumhaari buddhi jaanti hai jo aatmaayen hain sab nambarvaar vahaan shantidham mein jaakar baithengi phir nambarvaar aati rahengi। baap phir bhi kehte hain mool baat hai baap ka parichay dena। baap ka naam sadaiv mukh mein ho। aatma kya hai, paramatma kya hai? duniya mein koi bhi nahin jaante। bhal gaate hain bhrikuti ke beech chamakta hai ajab sitaara...... bas jaasti kuchh nahin samajhte। so bhi yeh gyaan bahut thodon ki buddhi mein hai। ghadi-ghadi bhool jaate hain। pahle-pahle samjhaana hai baap hi patit-paavan hai। varsa bhi dete hain, shaahanshaah banaate hain। tumhaare paas geet bhi hai - aakhir woh din aaya aaj...... jiska raasta bhakti maarga mein bahut takte the। dvaapar se bhakti shuru hoti hai phir ant mein baap aakar raasta bataate hain। kayaamat ka samay bhi inko kaha jaata hai। aasuri bandhan ka sab hisaab-kitaab chuktu kar phir vaapis chale jaate hain। 84 janmon ke part ko tum jaante ho। yeh part bajta hi rehta hai। shiv jayanti manaate hain to zaroor shiv aaya hoga। zaroor kuchh kiya hoga। vahi nai duniya banaate hain। yeh lakshmi-naaraayan maalik the, ab nahin hain। phir baap raajayog sikhlaate hain। yeh raajayog sikhaaya tha। tumhaare sivaae aur koi ke mukh mein aa nahin sakega। tum hi samjha sakte ho। shivbaaba hamko raajayog sikhla rahe hain। shivoham ka jo uchchaaran karte hain woh bhi wrong hai। tumko ab baap ne samjhaaya hai - tum hi chakra lagaae brahman kul se devta kul mein aate ho। so ham, ham so ka arth bhi tum samjha sakte ho। abhi ham brahman hain yeh 84 ka chakra hai। yeh koi mantra japne ka nahin hai। buddhi mein arth rehna chaahiye। woh bhi second ki baat hai। jaise beej aur jhaad second mein saara dhyaan mein aa jaata hai। vaise ham so ka raaz bhi second mein aa jaata hai। ham aise chakra lagaate hain jisko svadarshan chakra bhi kaha jaata hai। tum kisko kaho ham svadarshan chakradhaari hain to koi maanenge nahin। kahenge yeh to sab apne oopar title rakhte hain। phir tum samjhaayenge ki ham 84 janma kaise lete hain। yeh chakra phirta hai। aatma ko apne 84 janmon ka darshan hota hai, isko hi svadarshan chakradhaari kaha jaata hai। pahle to sunkar chamak jaate hain। yeh phir kya gapoda lagaate hain। jab tum baap ka parichay denge to unko gapoda nahin lagega। baap ko yaad karte hain। gaate bhi hain baba aap aayenge to ham vaari jaayenge। aapko hi yaad karenge। baap kehte hain tum kehte the na - abhi phir tumko yaad dilaata hoon। nashtomoha ho jaao। is deh se bhi nashtomoha ho jaao। apne ko aatma samajh mujhe hi yaad karo to tumhaare vikarma vinaash ho jaaen। yeh meethi baat sabko pasanda aayegi। baap ka parichay nahin hoga to phir kis na kis baat mein sanshay uthaate rahenge, isliye pahle to 2-3 chitra aage rakh do, jismen baap ka parichay ho। baap ka parichay milne se varse ka bhi mil jaayega।

baap kehte hain - main tumko raajaaon ka raaja banaata hoon। yeh chitra banaao। double sirtaaj raajaaon ke aage single taaj vaale maatha tekte hain। aapehi poojya aapehi pujaari ka bhi raaz samajh mein aa jaae। pahle baap ki pooja karte hain phir apne hi chitron ki baith pooja karte hain। jo paavan hokar gaye hain unka chitra banaae baith poojte hain। yeh bhi tumko abhi gyaan mila hai। aage to bhagwan ke liye hi kah dete the aapehi poojya aapehi pujaari। ab tumko samjhaaya gaya hai - tum hi is chakra mein aate ho। buddhi mein yeh knowledge sadaiv rehti hai aur phir samjhaana bhi hai। dhan diye dhan na khute... jo dhan daan nahin karte hain unko manhoos bhi kehte hain। baap ne jo samjhaaya hai woh phir doosron ko samjhaana hai। nahin samjhaayenge to muphta apne ko ghaata daalenge। gun bhi dhaaran nahin honge। chalan hi aisi ho jaayegi। har ek apne ko samajh to sakte hain na। tumko ab samajh mili hai। baaki sab hain besmajh। tum sab kuchh jaante ho। baap kehte hain is taraph hai daivi sampradaay, us taraph hai aasuri sampradaay। buddhi se tum jaante ho abhi ham sangamayug par hain। ek hi ghar mein ek sangamayug ka, ek kaliyug ka, donon ikatthe rehte hain। phir dekha jaata hai hans banne laayak nahin hain to yukti rachi jaati hai। nahin to vighna daalte rahenge। koshish karni hai aap samaan banaane ki। nahin to tang karte rahenge phir yukti se kinaara karna padta hai। vighna to padenge। aisi knowledge to tum hi dete ho। meetha bhi bahut banna hai। nashtomoha bhi hona pade। ek vikaar ko chhoda to phir aur vikaar khit-khit machaate hain। samjha jaata hai jo kuchh hota hai kalpa pahle muaaphik। aise samajh shant rehna padta hai। bhaavi samjhi jaati hai। achhe-achhe samjhaane vaale bachche bhi gir padte hain। badi jor se chamaat kha lete hain। phir kaha jaata hai kalpa pahle bhi chamaat khaai hogi। har ek apne andar mein samajh sakte hain। likhte bhi hain baba ham krodh mein aa gaye, phalaane ko maara yeh bhool hui। baap samjhaate hain jitna ho sake control karo। kaise-kaise manushya hain, ablaaon par kitne atyaachaar karte hain। puroosh balvaan hote hain, stri abla hoti hai। baap phir tumko yeh gupta ladaai sikhlaate hain jisse tum raavan par jeet paate ho। yeh ladaai koi ki buddhi mein nahin hai। tumhaare mein bhi nambarvaar hain jo samajh sakte hain। yeh hai bilkul nai baat। abhi tum padh rahe ho - sukhdhaam ke liye। yeh bhi abhi yaad hai phir bhool jaayegi। mool baat hai hi yaad ki yaatra। yaad se ham paavan ban jaayenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kuchh bhi hota hai to bhaavi samajh shant rehna hai। krodh nahin karna hai। jitna ho sake apne aapko control karna hai। yukti rach aapasmaan banaane ki koshish karni hai।

2) bahut pyaar aur namrata se sabko baap ka parichay dena hai। sabko yahi meethi-meethi baat sunaao ki baap kehte hain apne ko aatma samajh mujhe yaad karo, is deh se nashtomoha ho jaao।

vardaan:- namrata roopi kavach dvaara vyartha ke raavan ko jalaane vaale sachche snehi, sahayogi bhav

koi kitna bhi aapke sangathan mein kami dhoondhane ki koshish kare lekin jara bhi sanskaar-svabhaav ka takkar dikhaai na de। agar koi gaali bhi de, insult bhi kare, aap saint ban jaao। agar koi wrong bhi karta to aap right raho। koi takkar leta hai to bhi aap use sneh ka paani do। yeh kyon, aisa kyon-yeh sankalp karke aag par tel nahin daalo। namrata ka kavach pahankar raho। jahaan namrata hogi vahaan sneh aur sahayog bhi avashya hoga।

slogan:- merepan ki anek had ki bhaavnaayen ek “mere baba'' mein sama do।