Murli du jour du dimanche 22 novembre 2020

22-11-20 praatahmurli om shanti ''avyakt-baapdaada'' revise 21-01-87 madhuban

sva-raajya adhikaari hi vishwa-raajya adhikaari

aaj bhaagyavidhaata baap apne sarva shreshtha bhaagya-vaan bachchon ko dekh rahe hain। baapdaada ke aage ab bhi sirf yeh sangathan nahin hai lekin chaaron or ke bhaagyavaan bachche saamne hain। chaahe desh-videsh ke kisi bhi kone mein hain lekin behad ka baap behad bachchon ko dekh rahe hain। yeh saakaar vatan ke andar sthaan ki had aa jaati hai, lekin behad baap ke drishti ki srishti behad hai। baap ki drishti mein sarva brahman aatmaon ki srishti samaai hui hai। to drishti ki srishti mein sarva sammukh hai। sarva bhaagyavaan bachchon ko bhaagyavidhaata bhagwan dekh-dekh harshit hote hain। jaise bachche baap ko dekh harshit hote hain, baap bhi sarva bachchon ko dekh harshit hote hain। behad ke baap ko bachchon ko dekh roohaani nasha va fakhur hai ki ek-ek bachcha is vishwa ke aage vishesh aatmaon ki list mein hai! chaahe 16,000 ki maala ka last manka bhi hai, phir bhi, baap ke aage aane se, baap ka banne se vishwa ke aage vishesh aatma hai isliye chaahe aur kuchh bhi gyaan ke vistaar ko jaan nahin sakte lekin ek shabd ‘baba' dil se maana aur dil se auron ko sunaaya to vishesh aatma ban gaye, duniya ke aage mahaan aatma ban gaye, duniya ke aage mahaan aatma ke swaroop mein gaayan-yogya ban gaye। itna shreshtha aur sahaj bhaagya hai, samajhte ho? kyonki baba shabd hai ‘chaabi'। kiski? sarva khajaanon ki, shreshtha bhaagya ki। chaabi mil gai to bhaagya va khajaana avashya praapta hota hi hai। to sabhi maataayen va paandav chaabi praapta karne ke adhikaari bane ho? chaabi lagaane bhi aati hai ya kabhi lagti nahin hai? chaabi lagaane ki vidhi hai - dil se jaanna aur maanna। sirf mukh se kaha to chaabi hote bhi lagegi nahin। dil se kaha to khajaane sada haajir hain। akhut khajaane hain na। akhut khajaane hone ke kaaran jitne bhi bachche hain sab adhikaari hain। khule khajaane hain, bharpoor khajaane hain। aise nahin hai ki jo peechhe aaye hain, to khajaane khatma ho gaye hon। jitne bhi ab tak aaye ho arthaat baap ke bane ho aur bhavishya mein bhi jitne banne vaale hain, un sabse khajaane anekaanek guna jyaada hain isliye baapdaada har bachche ko golden chance dete hain ki jitna jisko khajaana lena hai, woh khuli dil se le lo। daata ke paas kami nahin hai, lene vaale ke himmat va purushaartha par aadhaar hai। aisa koi baap saare kalpa mein nahin hai jo itne bachche hon aur har ek bhaagyavaan ho! isliye sunaaya ki roohaani baapdaada ko roohaani nasha hai।

sabhi ki madhuban mein aane ki, milne ki aasha poori hui। bhakti-maarga ki yaatra se phir bhi madhuban mein aaraam se baithne ki, rahne ki jagah to mili hai na। mandiron mein to khade-khade sirf darshan karte hain। yahaan aaraam se baithe to ho na। vahaan to ‘bhaago-bhaago,' ‘chalo-chalo' kehte hain aur yahaan aaraam se baitho, aaraam se, yaad ki khushi se mauj manaao। sangamayug mein khushi manaane ke liye aaye ho। to har samay chalte-phirte, khaate-peete khushi ka khajaana jama kiya? kitna jama kiya hai? itna kiya jo 21 janma aaraam se khaate raho? madhuban vishesh sarva khajaane jama karne ka sthaan hai kyonki ‘yahaan ek baap doosra na koi' - yeh saakaar roop mein bhi anubhav karte ho। vahaan buddhi dvaara anubhav karte ho lekin yahaan pratyaksha saakaar jeevan mein bhi sivaae baap aur brahman parivaar ke aur koi nazar aata hai kya? ek hi lagan, ek hi baaten, ek hi parivaar ke aur ekras sthiti, aur koi ras hai hi nahin। padhna aur padhaai dvaara shaktishaali banna, madhuban mein yahi kaam hai na। kitne class karte ho? to yahaan vishesh jama karne ka saadhan milta hai isliye sab bhaag-bhaagkar pahunch gaye hain। baapdaada sabhi bachchon ko vishesh yahi smriti dilaate hain ki sada svaraajya adhikaari sthiti mein aage badhte chalo। svaraajya adhikaari - yahi nishaani hai vishwa-raajya adhikaari banne ki।

kai bachche roohrihaan karte hue baap se poochhte hain ki ‘ham bhavishya mein kya banenge, raaja banenge ya praja banenge?' baapdaada bachchon ko respond karte hain ki apne aapko ek din bhi check karo to maaloom pad jaayega ki main raaja banoonga va saahookaar banoonga va praja banoonga। pahle amritvele se apne mukhya teen karobaar ke adhikaari, apne sahayogi, saathiyon ko check karo। woh kaun? 1- man arthaat sankalp shakti। 2- buddhi arthaat nirnay shakti। 3- pichhle va vartamaan shreshtha sanskaar। yeh teenon vishesh kaarobaari hain। jaise aajkal ke jamaane mein raaja ke saath mahaamatri va vishesh matri hote hain, unheen ke sahayog se raajya kaarobaar chalti hai। satayug mein matri nahin honge lekin sameep ke sambandhi, saathi honge। kisi bhi roop mein, saathi samjho va matri samjho। lekin yeh check karo - yeh teenon sva ke adhikaar se chalte hain? in teenon par sva ka raajya hai va inhon ke adhikaar se aap chalte ho? man aapko chalaata hai ya aap man ko chalaate hain? jo chaaho, jab chaaho vaisa hi sankalp kar sakte ho? jahaan buddhi lagaane chaaho, vahaan laga sakte ho va buddhi aap raaja ko bhatkaati hai? sanskaar aapke vash hain ya aap sanskaaron ke vash ho? raajya arthaat adhikaar। raajya-adhikaari jis shakti ko jis samay jo order kare, woh usi vidhipoorvak kaarya karte va aap kaho ek baat, woh karen doosri baat? kyonki nirantar yogi arthaat svaraajya adhikaari banne ka vishesh saadhan hi man aur buddhi hai। mantra hi manmanaabhav ka hai। yog ko buddhiyog kehte hain। to agar yeh vishesh aadhaar stambha apne adhikaar mein nahin hain va kabhi hain, kabhi nahin hai; abhi-abhi hain, abhi-abhi nahin hai; teenon mein se ek bhi kam adhikaar mein hai to isse hi check karo ki ham raaja banenge ya praja banenge? bahutkaal ke raajya adhikaari banne ke sanskaar bahutkaal ke bhavishya raajya-adhikaari banaayenge। agar kabhi adhikaari, kabhi vasheebhoot ho jaate ho to aadhaakalpa arthaat poora raajya-bhaagya ka adhikaar praapta nahin kar sakenge। aadha samay ke baad tretaayugi raaja ban sakte ho, saara samay raajya adhikaari arthaat raajya karne vaale royal family ke sameep sambandh mein nahin rah sakte। agar vasheebhoot baar-baar hote ho to sanskaar adhikaari banne ke nahin lekin raajya adhikaariyon ke raajya mein rahne vaale hain। woh kaun ho gaye? woh hui praja। to samjha, raaja kaun banega, praja kaun banega? apne hi darpan mein apne takdeer ki soorat ko dekho। yeh gyaan arthaat knowledge darpan hai। to sabke paas darpan hai na। to apni soorat dekh sakte ho na। abhi bahut samay ke adhikaari banne ka abhyaas karo। aise nahin ki ant mein to ban hi jaayenge। agar ant mein banenge to ant ka ek janma thoda-sa raajya kar lenge। lekin yeh bhi yaad rakhna ki agar bahut samay ka ab se abhyaas nahin hoga va aadi se abhyaasi nahin bane ho, aadi se ab tak yeh vishesh kaaryakarta aapko apne adhikaar mein chalaate hain va dagmag sthiti karte rehte hain arthaat dhokha dete rehte hain, duhkh ki lahar ka anubhav karaate rehte hain to ant mein bhi dhokha mil jaayega। dhokha arthaat duhkh ki lahar zaroor aayegi। to ant mein bhi pashchaataap ke duhkh ki lahar aayegi isliye baapdaada sabhi bachchon ko phir se smriti dilaate hain ki raaja bano aur apne vishesh sahayogi karmachaari va raajya kaarobaari saathiyon ko apne adhikaar se chalaao। samjha?

baapdaada yahi dekhte hain ki kaun-kaun kitne svaraajya adhikaari bane hain? achha। to sab kya banne chaahte ho? raaja banne chaahte ho? to abhi svaraajya adhikaari bane ho va yahi kehte ho ban rahe hain, ban to jaayenge? ‘gen-gen' nahin karna। ‘jaayenge', to baap bhi kahenge - achha, raajya-bhaagya dene ko bhi dekh lenge। sunaaya na - bahut samay ka sanskaar abhi se chaahiye। vaise to bahut-kaal nahin hai, thoda-kaal hai। lekin phir bhi itne samay ka bhi abhyaas nahin hoga to phir last samay yeh ulhana nahin dena - hamne to samjha tha, last mein hi ho jaayenge isliye kaha gaya hai - kab nahin, ab। kab ho jaayega nahin, ab hona hi hai। banna hi hai। apne oopar raajya karo, apne saathiyon ke oopar raajya karna nahin shuru karna। jiska sva par raajya hai, uske aage abhi bhi sneh ke kaaran sarva saathi bhi chaahe laukik, chaahe alaukik sabhi ‘ji hajoor', ‘haan-ji' kehte hue saathi bankar ke rehte hain, snehi aur saathi ban ‘haan-ji' ka paath practical mein dikhaate hain। jaise praja raaja ki sahayogi hoti hai, snehi hoti hai, aise aapki yeh sarva karmendriyaan, vishesh shaktiyaan sada aapke snehi, sahayogi rahengi aur iska prabhaav saakaar mein aapke seva ke saathiyon va laukik sambandhiyon, saathiyon mein padega। daivi parivaar mein adhikaari ban order chalaana, yeh nahin chal sakta। svayan apni karmendriyon ko order mein rakho to svatah aapke order karne ke pahle hi sarva saathi aapke kaarya mein sahayogi banenge। svayan sahayogi banenge, order karne ki aavashyakta nahin। svayan apne sahayog ki offer karenge kyonki aap svaraajya adhikaari hain। jaise raaja arthaat daata, to daata ko kehna nahin padta arthaat maangana nahin padta। to aise svaraajya adhikaari bano। achha। yeh mela bhi drama mein noondh tha। ‘vaah drama' kah rahe hain na। doosre log kabhi ‘haay drama' kahenge, kabhi ‘vaah drama' aur aap sada kya kehte ho? vaah drama! vaah! jab praapti hoti hain na, to praapti ke aage koi mushkil nahin lagta hai। to aise hi, jab itne shreshtha parivaar se milne ki praapti ho rahi hai to koi mushkil, mushkil nahin lagega। mushkil lagta hai? khaane par thaharna padta hai। khaao to bhi prabhu ke gun gaao aur queue mein thahro to bhi prabhu ke gun gaao। yahi kaam karna hai na। yeh bhi rehearsal ho rahi hai। abhi to kuchh bhi nahin hai। abhi to aur vriddhi hogi na। aise apne ko mould karne ki aadat daalo, jaisa samay vaise apne aapko chala saken। to pat (jameen) mein sone ki bhi aadat pad gai na। aise to nahin-khatiya nahin mili to neend nahin aai? tent mein bhi rahne ki aadat pad gai na। achha laga? thandi to nahin lagti? abhi saare aabu mein tent lagaayen? tent mein sona achha laga ya kamra chaahiye? yaad hai, pahle-pahle jab paakistaan mein the to mahaarthiyon ko hi pat mein sulaate the? jo naameegraami mahaarthi hote the, unhon ko haal mein pat mein tiphuti (teen foot) dekar sulaate the। aur jab brahman parivaar ki vriddhi hui to bhi kahaan se shurooaat ki? tent se hi shuru ki na। pahle-pahle jo nikle, woh bhi tent mein hi rahe, tent mein rahne vaale saint (mahaatma) ho gaye। saakaar part hote bhi tent mein hi rahe। to aap log bhi anubhav karenge na। to sabhi har reeti se khush hain? achha, phir aur 10,000 mangaake tent denge, prabandha karenge। sab nahaane ke prabandha ka sochte ho, woh bhi ho jaayega। yaad hai, jab yeh haal bana tha to sabne kya kaha tha? itne nahaane ke sthaan kya karenge? isi lakshya se yeh banaaya gaya, abhi kam ho gaya na। jitna banaayenge utna kam to hona hi hai kyonki aakhir to behad mein hi jaana hai। achha।

sab taraph ke bachche pahunch gaye hain। to yeh bhi behad ke haal ka shrringaar ho gaya hai। neeche bhi baithe hain। (bhinna-bhinna sthaanon par murli sun rahe hain) yeh vriddhi hona bhi to khushanseebi ki nishaani hai। vriddhi to hui lekin vidhipoorvak chalna। aise nahin, yahaan madhuban mein to aa gaye, baba ko bhi dekha, madhuban bhi dekha, abhi jaise chaahen vaise chalen। aise nahin karna kyonki kai bachche aise karte hain-jab tak madhuban mein aane ko nahin milta hai, tab tak pakke rehte hain, phir jab madhuban dekh liya to thode albele ho jaate hain। to albele nahin banna। brahman arthaat brahman jeevan hai, to jeevan to sada jab tak hai, tab tak hai। jeevan banaai hai na। jeevan banaai hai ya thode samay ke liye brahman banen hain? sada apne brahman jeevan ki visheshtaayen saath rakhna kyonki isi visheshtaaon se vartamaan bhi shreshtha hai aur bhavishya bhi shreshtha hai। achha। baaki kya raha? toli। (vardaan) vardaan to vardaata ke bachche hi ban gaye। jo hain hi vardaata ke bachche, unhon ko har kadam mein vardaata se vardaan svatah hi milta rehta hai। vardaan hi aapki paalna hai। vardaanon ki paalna se hi pal rahe hain। nahin to socho, itni shreshtha praapti aur mehnat kya ki। bina mehnat ke jo praapti hoti hai, usko hi vardaan kaha jaata hai। to mehnat kya ki aur praapti kitni shreshtha! janma-janma praapti ke adhikaari ban gaye। to vardaan har kadam mein vardaata ka mil raha hai aur sada hi milta rahega। drishti se, bol se, sambandh se vardaan hi vardaan hai। achha।

abhi to golden jubilee manaane ki taiyaari kar rahe ho। golden jubilee arthaat sada golden sthiti mein sthit rahne ki jubilee mana rahe ho। sada real gold, jara bhi alloy (khaad) mix nahin। isko kehte hain golden jubilee। to duniya ke aage sone ke sthiti mein sthit hone vaale sachche sone pratyaksha hon, iske liye yeh sab seva ke saadhan bana rahe hain kyonki aapki golden sthiti golden ej ko laayegi, svarnim sansaar ko laayegi, jiski ichchha sabko hai ki abhi kuchh duniya badalni chaahiye। to sva-parivartan se vishwa-parivartan karne vaali vishesh aatmaayen ho। aap sabko dekh aatmaon ko yeh nishchay ho, shubh ummeeden hon ki sachmuch svarnim duniya aai ki aai! sample ko dekhkarke nishchay hota hai na-haan, achhi cheez hai। to svarna sansaar ke sample aap ho। svarna sthiti vaale ho। to aap sample ko dekh unhon ko nishchay ho ki haan, jab sample taiyaar hai to avashya aisa hi sansaar aaya ki aaya। aisi seva golden jubilee mein karenge na। naaammeed ko ummeend dene vaale banna। achha।

sarva svaraajya adhikaari, sarva bahutkaal ke adhikaar praapta karne ke abhyaasi aatmaon ko, sarva vishwa ki vishesh aatmaon ko, sarva vardaata ke vardaanon se palne vaali shreshtha aatmaon ko baapdaada ka yaadapyaar aur namaste।

vardaan:- bhatakti hui aatmaon ko yathaartha manzil dikhaane vaale chaitanya light-might house bhav

kisi bhi bhatakti hui aatma ko yathaartha manzil dikhaane ke liye chaitanya light-might house bano। iske liye do baaten dhyaan par rahenh 1- har aatma ki chaahna ko parakhna, jaise yogya doctor use kaha jaata hai jo nabja ko jaanta hai, aise parakhne ki shakti ko sada use karna। 2-sada apne paas sarva khajaanon ka anubhav kaayam rakhna। sada yeh lakshya rakhna ki sunaana nahin hai lekin sarva sambandhon ka, sarva shaktiyon ka anubhav karaana hai।

slogan:- doosron ki correction karne ke bajaae ek baap se theek connection rakho।