Murli du jour du samedi 21 novembre 2020

21-11-2020 praatahmurli om shanti "baapdaada"' madhuban

“meethe bachche - yeh sangamayug sarvottam banne ka shubh samay hai, kyonki isi samay baap tumhein nar se naaraayan banne ki padhaai padhaate hain''

prashn:- tum bachchon ke paas aisi kaun-si knowledge hai jiske kaaran tum kisi bhi haalat mein ro nahin sakte?

uttar:- tumhaare paas is bane-banaaye drama ki knowledge hai, tum jaante ho ismen har aatma ka apna part hai, baap humein sukh ka varsa de rahe hain phir ham ro kaise sakte। parvaah thi paar brahm mein rahne vaale ki, woh mil gaya baaki kya chaahiye। bakhtaavar bachche kabhi rote nahin।

om shanti। roohaani baap baith bachchon ko ek baat samjhaate hain। chitron mein bhi aise likhna hai ki trimoorti shivbaaba bachchon prati samjhaate hain। tum bhi kisko samjhaate ho to tum aatma kahenge - shivbaaba aise kehte hain। yeh baap bhi kahenge - baba tumko samjhaate hain। yahaan manushya, manushya ko nahin samjhaate hain lekin paramatma aatmaon ko samjhaate hain ya aatma, aatma ko samjhaati hai। gyaan saagar to shivbaaba hi hai aur woh hai roohaani baap। is samay roohaani bachchon ko roohaani baap se varsa milta hai। jismaani ahankaar yahaan chhodna padta hai। is samay tumko dehi-abhimaani ban baap ko yaad karna hai। karma bhi bhal karo, dhandha dhori aadi bhal chalaate raho, baaki jitna samay mile apne ko aatma samajh baap ko yaad karenge to vikarma vinaash honge। tum jaante ho shivbaaba ismen aaya hua hai। woh satya hai, chaitanya hai। sat chit aanand swaroop kehte hain। brahma, vishnu, shankar athva koi bhi manushya maatra ki yeh mahima nahin hai। oonch te oonch bhagwan ek hi hai, woh hai supreme soul। yeh gyaan bhi tumko sirf is samay hai। phir kabhi milna nahin hai। har 5 hazaar varsha baad baap aate hain, tumko aatma-abhimaani banaae baap ko yaad karaane, jisse tum tamopradhaan se satopradhaan bante ho, aur koi upaay nahin। bhal manushya pukaarte bhi hain-he patit-paavan aao parantu arth nahin samajhte। patit-paavan seetaaraam kahen to bhi theek hai। tum sab seetaayen athva bhaktiyaan ho। woh hai ek raam bhagwan, tum bhakton ko phal chaahiye bhagwan dvaara। mukti va jeevanmukti - yeh hai phal। mukti-jeevanmukti ka daata woh ek hi baap hai। drama mein oonch te oonch part vaale bhi hote hain to neeche part vaale bhi hote hain। yeh behad ka drama hai, isko aur koi samajh na sake। tum is samay tamopradhaan kanishta se satopradhaan purushottam ban rahe ho। satopradhaan ko hi sarvottam kaha jaata hai। is samay tum sarvottam nahin ho। baap tumko sarvottam banaate hain। yeh drama ka chakra kaise phirta rehta hai, isko koi bhi nahin jaante। kaliyug, sangamayug phir hota hai satayug। puraani ko nai kaun banaayenge? baap bigar koi bana na sake। baap hi sangam par aakar padhaate hain। baap na satayug mein aate hain, na kaliyug mein aate hain। baap kehte hain mera part hi sangam par hai isliye sangamayug kalyaankaari yug kaha jaata hai। yeh hai auspicious, bahut oonch shubh samay sangamayug। jabki baap aakar tum bachchon ko nar se naaraayan banaate hain। manushya to manushya hi hain parantu daiveegun vaale ban jaate hain, unko kaha jaata hai aadi sanaatan devi-devta dharma। baap kehte hain main yeh dharma sthaapan karta hoon, iske liye pavitra zaroor banna padega। patit-paavan ek hi baap hai। baaki sab hain brides, bhaktiyaan। patit-paavan seetaaraam kehna bhi theek hai। parantu pichhaadi mein jo phir raghupti raaghav raaja raam kah dete woh wrong ho jaata। manushya bigar arth jo aata hai so bolte rehte hain, dhun lagaate rehte hain। tum jaante ho chandravanshi dharma bhi ab sthaapan ho raha hai। baap aakar brahman kul sthaapan karte hain, inko dynasty nahin kahenge। yeh parivaar hai, yahaan na tum paandavon ki, na kaurvon ki raajaai hai। geeta jisne padhi hogi, unko yeh baaten jaldi samajh mein aayengi। yeh bhi hai geeta। kaun sunaate hain? bhagwan। tum bachchon ko pahle-pahle to yeh samjhaani deni hai ki geeta ka bhagwan kaun? woh kehte hain krishna bhagvaanuvaach। ab krishna to hoga satayug mein। unmein jo aatma hai woh to avinaashi hai। shareer ka hi naam badalta hai। aatma ka kabhi naam nahin badalta। shreekrishna ki aatma ka shareer satayug mein hi hota hai। number one mein vahi jaata hai। lakshmi-naaraayan number one phir hain second, third। to unke marks bhi itne kam honge। yeh maala banti hai na। baap ne samjhaaya hai runda maala bhi hoti hai aur roodra maala bhi hoti hai। vishnu ke gale mein runda maala dikhaate hain। tum bachche vishnupuri ke maalik bante ho nambarvaar। to tum jaise vishnu ke gale ka haar bante ho। pahle-pahle shiv ke gale ka haar bante ho, unko roodra maala kaha jaata hai, jo japte hain। maala pooji nahin jaati, simri jaati hai। maala ka daana vahi bante hain jo vishnupuri ki raajdhaani mein nambarvaar aate hain। maala mein sabse pahle hota hai phool phir yugal daana। pravritti maarga hai na। pravritti maarga shuru hota hai brahma, sarasvati aur bachchon se। yahi phir devta bante hain। lakshmi-naaraayan hai first। oopar mein hai phool shivbaaba। maala pher-pher kar pichhaadi mein phool ko maatha tekte hain। shivbaaba phool hai jo punarjanma mein nahin aate hain, inmen pravesh karte hain। vahi tumko samjhaate hain। inki aatma to apni hai। woh apna shareer nirvaah karti hai, unka kaam hai sirf gyaan dena। jaise koi ki stri va baap aadi marta hai to unki aatma ko brahman ke tan mein bulaate hain। aage aati thi, ab woh koi shareer chhodkar to nahin aati hai। yeh drama mein pahle se hi noondh hai। yeh sab hai bhakti maarga। woh aatma to gai, jaakar doosra shareer liya। tum bachchon ko abhi yeh saara gyaan mil raha hai, isliye koi marta hai to bhi tumko koi chinta nahin। amma mare to bhi halua khaana (shaanta behen ka misaal)। bachchi ne jaakar unhon ko samjhaaya ki tum rote kyon ho? usne to jaakar doosra shareer liya। rone se laut thode hi aayegi। bakhtaavar thode hi rote hain। to vahaan sabka rona banda karaae samjhaane lagi। aise bahut bachchiyaan jaakar samjhaati hain। abhi rona banda karo। jhoothe brahman bhi nahin khilaao। ham sachche braahmanon ko le aate hain। phir gyaan sunne lag jaate hain। samajhte hain yeh baat to theek bolte hain। gyaan sunte-sunte shant ho jaate hain। 7 din ke liye koi bhaagvat aadi rakhte hain to bhi manushya ke duhkh door nahin hote। yeh bachchiyaan to sabke duhkh door kar deti hain। tum samajhte ho rone ki to darkaar nahin। yeh to bana-banaaya drama hai। har ek ko apna part bajaana hai। koi bhi haalat mein rona nahin chaahiye। behad ka baap-teacher-guru mila hai, jiske liye tum itna dhakka khaate rehte ho। paar brahm mein rahne vaala parampita paramatma mil gaya to baaki kya chaahiye। baap dete hi hain sukh ka varsa। tum baap ko bhool jaate ho tab rona padta hai। baap ko yaad karenge tab khushi hogi। oho! ham to vishwa ke maalik bante hain। phir 21 peedhi kabhi royenge nahin। 21 peedhi arthaat poora budhaape tak akaale mrityu nahin hoti hai, to andar mein kitni gupta khushi rahni chaahiye।

tum jaante ho ham maaya par jeet paakar jagatjeet banenge। hathiyaar aadi ki koi baat nahin। tum ho shiv shaktiyaan। tumhaare paas hai gyaan kataari, gyaan baan। unhonne phir bhakti maarga mein deviyon ko sthool baan khadag aadi de di hai। baap kehte hain gyaan talvaar se vikaaron ko jeetna hai, baaki deviyaan koi hinsak thode hi hain। yeh sab hai bhakti maarga। saadhu-santa aadi hain nivritti maarga vaale, woh pravritti maarga ko maante hi nahin। tum to sannyaas karte ho saari puraani duniya ka, puraane shareer ka। ab baap ko yaad karenge to aatma pavitra ho jaayegi। gyaan ke sanskaar le jaayenge। us anusaar nai duniya mein janma lenge। agar yahaan bhi janma lenge to bhi koi achhe ghar mein raaja ke paas va religious ghar mein woh sanskaar le jaayenge। sabko pyaare lagenge। kahenge yeh to devi hai। krishna ki kitni mahima gaate hain। chhotepan mein dikhaate hain maakhan churaaya, matki phodi, yeh kiya… kitne kalank lagaaye hain। achha, phir krishna ko saanvara kyon banaaya hai? vahaan to krishna gora hoga na। phir shareer badalta rehta hai, naam bhi badalta rehta hai। shreekrishna to satayug ka pahla prince tha, unko kyon saanvara banaaya hai? kabhi koi bata nahin sakenge। vahaan saamp aadi hote nahin jo kaala bana den। yahaan zahar chadh jaata hai to kaala ho jaata hai। vahaan to aisi baat ho na sake। tum ab daivi sampradaay banne vaale ho। is brahman sampradaay ka kisko bhi pata nahin hai। pahle-pahle baap brahma dvaara braahmanon ko adopt karte hain। prajaapita hai to unki praja bhi dher ki dher hai। brahma ki beti sarasvati kehte hain। stri to hai nahin। yeh kisko bhi pata nahin hai। prajaapita brahma ke to hain hi mukh vanshaavli। stri ki baat hi nahin। inmen baap pravesh kar kehte hain tum hamaare bachche ho। mainne inka naam brahma rakha hai, jo bhi bachche banen sabke naam badli kiye hain। tum bachche abhi maaya par jeet paate ho, isko kaha hi jaata hai - haar aur jeet ka khel। baap kitna sasta sauda karaate hain। phir bhi maaya hara deti hai to bhaag jaate hain। 5 vikaaron roopi maaya haraati hai। jinmen 5 vikaar hain, unko hi aasuri sampradaay kaha jaata hai। mandir mein deviyon ke aage bhi jaakar mahima gaate hain - aap sarvagun sampanna...... baap tum bachchon ko samjhaate hain - tum hi poojya devta the phir 63 janma pujaari banen, ab phir poojya bante ho। baap poojya banaate hain, raavan pujaari banaate hain। yeh baaten koi shaastron mein nahin hain। baap koi shaastra thode hi padha hua hai। woh to hai hi gyaan ka saagar। world almighty authority hai। almighty yaani sarvashaktimaan। baap kehte hain sabhi vedon-shaastron aadi ko jaanta hoon। yeh sab hai bhakti maarga ki saamagri। main in sab baaton ko jaanta hoon। dvaapar se hi tum pujaari bante ho। satayug-treta mein to pooja hoti nahin। woh hai poojya gharaana। phir hota hai pujaari gharaana। is samay sab pujaari hain। yeh baaten koi ko maaloom nahin hain। baap hi aakar 84 janmon ki kahaani bataate hain। poojya pujaari yeh tumhaare oopar hi saara khel rehta hai। hindu dharma kah dete hain। vaastav mein to bhaarat mein aadi sanaatan devi-devta dharma tha, na ki hindu। kitni baaten samjhaani padti hain। yeh padhaai hai bhi second ki। phir bhi kitna samay lag jaata hai। kehte hain saagar ko syaahi banaao, saara jangal kalam banaao to bhi poora ho na sake। ant tak tumko gyaan sunaata rahoonga। tum inka kitaab kitna banaayenge। shuru mein bhi baba savere-savere uthkar likhte the, phir mama sunaati thi, tab se lekar chhapta hi aata hai। kitne kaagaz khalaas hue honge। geeta to ek hi itni chhoti hai। geeta ka locket bhi banaate hain। geeta ka bahut prabhaav hai, parantu geeta gyaan daata ko bhool gaye hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan talvaar se vikaaron ko jeetna hai। gyaan ke sanskaar bharne hain। puraani duniya aur puraane shareer ka sannyaas karna hai।

2) bhaagyavaan banne ki khushi mein rehna hai, kisi bhi baat ki chinta nahin karni hai। koi shareer chhod deta hai to bhi duhkh ke aansu nahin bahaane hain।

vardaan:- taaj aur takhta ko sada kaayam rakhne vaale nirantar svatahyogi bhav

vartamaan samay baap dvaara sabhi bachchon ko taaj aur takhta milta hai, abhi ka yeh taaj va takhta anek janmon ke liye taaj, takhta praapta karaata hai। vishwa kalyaan ki jimmevaari ka taaj aur baapdaada ka diltakhta sada kaayam rahe to nirantar svatahyogi ban jaayenge। unhein kisi bhi prakaar ki mehnat karne ki baat nahin kyonki ek to sambandh sameep ka hai doosra praapti akhut hai। jahaan praapta hoti hai vahaan svatahyaad hoti hai।

slogan:- plen buddhi se plan ko practical mein laao to saphalta samaai hui hai।