Murli du jour du jeudi 10 décembre 2020

10-12-2020 praatahmurli om shanti "baapdaada"' madhuban

“meethe bachche - avinaashi gyaan ratnon ka daan hi mahaadaan hai, is daan se hi raajaai praapta hoti hai isliye mahaadaani bano''

prashn:- jin bachchon ko service ka shauk hoga unki mukhya nishaaniyaan kya hogi?

uttar:- 1. unhein puraani duniya ka vaataavran bilkul achha nahin lagega, 2. unhein bahuton ki seva kar aap-samaan banaane mein hi khushi hogi, 3. unhein padhne aur padhaane mein hi aaraam aayega, 4. samjhaate-samjhaate gala bhi kharaab ho jaae to bhi khushi mein rahenge, 5. unhein kisi ki milkiyat nahin chaahiye। woh kisi ki property ke peechhe apna samay nahin ganvaayenge। 6. unki ragen sab taraph se tooti hui hongi. 7. woh baap samaan udaarchit honge। unhein seva ke sivaae aur kuchh bhi meetha nahin lagega।

geet:- om namo shivaae…

om shanti। roohaani baap jiski mahima suni woh baith bachchon ko paath padhaate hain, yeh paathshaala hai na। tum sab yahaan paath padh rahe ho teacher se। yeh hai supreme teacher, jisko parampita bhi kaha jaata hai। parampita roohaani baap ko hi kaha jaata hai। laukik baap ko kabhi parampita nahin kahenge। tum kahenge abhi ham paarlaukik baap ke paas baithe hain। koi baithe hain, koi mehmaan ban aate hain। tum samajhte ho ham behad ke baap paas baithe hain, varsa lene ke liye। to andar mein kitni khushi honi chaahiye। manushya to bichaare chillaate rehte hain। is samay duniya mein sab kehte hain duniya mein shanti ho। yeh to bichaaron ko pata nahin, shanti kya vastu hai। gyaan ka saagar, shanti ka saagar baap hi shanti sthaapan karne vaala hai। niraakaari duniya mein to shanti hi hai। yahaan chillaate hain ki duniya mein shanti kaise ho? ab nai duniya satayug mein to shanti thi jabki ek dharma tha। nai duniya ko kehte hain paradise, devtaaon ki duniya। shaastron mein jahaan-tahaan ashaanti ki baaten likh di hain। dikhaate hain dvaapar mein kans tha, phir hiranyakashyap ko satayug mein dikhaate hain, treta mein raavan ka hangaama.....। sab jagah ashaanti dikha di hai। manushya bichaare kitna ghor andhiyaare mein hain। pukaarte bhi hain behad ke baap ko। jab god father aaye tab vahi aakar shanti sthaapan kare। god ko bichaare jaante hi nahin। shanti hoti hi hai nai duniya mein। puraani duniya mein hoti nahin। nai duniya sthaapan karne vaala to baap hi hai। unko hi bulaate hain ki aakar pees sthaapan karo। aarya samaaji bhi gaate hain shanti deva।

baap kehte hain pahle hai pavitrata। abhi tum pavitra ban rahe ho। vahaan pavitrata bhi hai, pees bhi hai, health-wealth sab hai। dhan bigar to manushya udaas ho jaate hain। tum yahaan aate ho in lakshmi-naaraayan jaisa dhanvaan banne। yeh vishwa ke maalik the na। tum aaye ho vishwa ka maalik banne। parantu woh dimaag sabka nambarvaar hai। baba ne kaha tha - jab prabhaatpheri nikaalte ho to saath mein lakshmi-naaraayan ka chitra zaroor uthaao। aisi yukti racho। abhi bachchon ki buddhi paarasbuddhi banne ki hai। is samay ajun tamopradhaan se rajo tak gaye hain। abhi sato, satopradhaan tak jaana hai। woh taakat abhi nahin hai। yaad mein rehte nahin hain। yogbal ki bahut kami hai। phat se satopradhaan nahin ban sakte hain। yeh jo gaayan hai second mein jeevanmukti, woh to theek hai। tum brahman bane ho to jeevanmukta ban hi gaye, phir jeevan-mukti mein bhi sarvottam, madhyam, kanishta hote hain। jo baap ka bante hain to jeevanmukti milti zaroor hai। bhal baap ka ban phir baap ko chhod dete hain to bhi jeevanmukti zaroor milegi। svarga mein jhaadu lagaane vaala ban jaayenge। svarga mein to jaayenge। baaki pad kam mil jaata। baap avinaashi gyaan dete hain, uska kabhi vinaash nahin hota hai। bachchon ke andar mein khushi ke dhol bajne chaahiye। yeh haay-haay hone ke baad phir vaah-vaah honi hai।

tum abhi eeshvareey santaan ho। phir banenge daivi santaan। is samay tumhaari yeh jeevan heere tulya hai। tum bhaarat ki service kar bhaarat ko peaceful banaate ho। vahaan pavitrata, sukh, shanti sab rehti hai। yeh jeevan tumhaara devtaaon se bhi oonch hai। abhi tum rachta baap ko aur srishti chakra ko jaante ho। kehte hain yeh tyohaar aadi jo bhi hain parampara se chale aate hain। parantu kab se? yeh koi nahin jaante। samajhte hain jabse srishti shuru hui, raavan ko jalaana aadi bhi parampara se chala aata hai। ab satayug mein to raavan hota nahin। vahaan koi bhi duhkhi nahin hai isliye god ko bhi yaad nahin karte। yahaan sab god ko yaad karte rehte। samajhte hain god hi vishwa mein shanti karenge, isliye kehte hain aakar raham karo। hamko duhkh se liberate karo। bachche hi baap ko bulaate hain kyonki bachchon ne hi sukh dekha hai। baap kehte hain - tumko pavitra banaakar saath le chalenge। jo pavitra nahin banenge woh to saza khaayenge। ismen mansa, vaacha, karmana pavitra rehna hai। mansa bhi badi achhi chaahiye। itni mehnat karni hai jo pichhaadi mein mansa mein koi vyartha khyaal na aaye। ek baap ke sivaae koi bhi yaad na aaye। baap samjhaate hain abhi mansa tak to aayenge jab tak karmaateet avastha ho। hanumaan misal adol bano, usmein hi to badi mehnat chaahiye। jo aagyaakaari, vaphaadaar, sapoot bachche hote hain baap ka pyaar bhi un par jaasti rehta hai। 5 vikaaron par jeet na paane vaale itne pyaare lag na saken। tum bachche jaante ho ham kalpa-kalpa baap se yeh varsa lete hain to kitna khushi ka paara chadhna chaahiye। yeh bhi jaante ho sthaapna to zaroor honi hai। yeh puraani duniya kabradaakhil honi hai zaroor। ham paristaan mein jaane liye kalpa pahle misal purooshaartha karte rehte hain। yeh to kabristaan hai na। puraani duniya aur nai duniya ki samjhaani seedhi mein hai। yeh seedhi kitni achhi hai to bhi manushya samajhte nahin hain। yahaan saagar ke kanthe par rahne vaale bhi poora samajhte nahin। tumhein gyaan dhan ka daan to zaroor karna chaahiye। dhan diye dhan na khute। daani, mahaadaani kehte hain na। jo hospital, dharmashaala aadi banaate hain, unko mahaadaani kehte hain। uska phal phir doosre janma mein alpakaal ke liye milta hai। samjho dharmashaala banaate hain to doosre janma mein makaan ka sukh milega। koi bahut-bahut dhan daan karte hain to raaja ke ghar mein va saahookaar ke ghar mein janma lete hain। woh daan se bante hain। tum padhaai se raajaai pad paate ho। padhaai bhi hai, daan bhi hai। yahaan hai direct, bhakti maarga mein hai indirect। shivbaaba tumko padhaai se aisa banaate hain। shiv-baba ke paas to hain hi avinaashi gyaan ratna। ek-ek ratna laakhon roopayon ke hain। bhakti ke liye aise nahin kaha jaata। gyaan isko kaha jaata hai। shaastron mein bhakti ka gyaan hai, bhakti kaise ki jaae uske liye shiksha milti hai। tum bachchon ko hai gyaan ka kaapaari nasha। tumhein bhakti ke baad gyaan milta hai। gyaan se vishwa ki baadshaahi ka kaapaari nasha chadhta hai। jo jaasti service karenge, unko nasha chadhega। pradarshani athva museum mein bhi achha bhaashan karne vaalon ko bulaate hain na। vahaan bhi zaroor nambarvaar honge। mahaarthi, ghodesvaar, pyaade hote hain। delvaada mandir mein bhi yaadgaar bana hua hai। tum kahenge yeh hai chaitanya delvaada, woh hai jad। tum ho gupta isliye tumko jaante nahin।

tum ho raajarishi, woh hain hathayog rishi। abhi tum gyaan gyaaneshvari ho। gyaan saagar tumko gyaan dete hain। tum avinaashi surgeon ke bachche ho। surgeon hi nabja dekhega। jo apni nabja ko hi nahin jaante to doosre ko phir kaise jaanenge। tum avinaashi surgeon ke bachche ho na। gyaan anjan satguru diya... yeh gyaan injection hai na। aatma ko injection lagta hai na। yeh mahima bhi abhi ki hai। satguru ki hi mahima hai। gurooon ko bhi gyaan injection satguru hi denge। tum avinaashi surgeon ke bachche ho to tumhaara dhandha hi hai gyaan injection lagaana। doctor mein bhi koi maas mein laakh, koi 500 bhi mushkil kamaayenge। nambarvaar ek-do ke paas jaate hain na। haaeekorta, supreemkorta mein judgement milti hai - phaansi par chadhna hai। phir president paas apeel karte hain to woh maaph bhi kar dete hain।

tum bachchon ko to nasha rehna chaahiye, udaarchit hona chaahiye। is bhaageerath mein baap pravesh hua to inko baap ne udaarchit banaaya na। khud to kuchh bhi kar sakte hain na। woh ismen aakar maalik ban baitha। chalo yeh sab bhaarat ke kalyaan ke liye lagaana hai। tum dhan lagaate ho, bhaarat ke hi kalyaan ke liye। koi poochhe kharcha kahaan se laate ho? bolo, ham apne hi tan-man-dhan se service karte hain। ham raajya karenge to paisa bhi ham lagaayenge। ham apna hi kharcha karte hain। ham brahman shreemat par raajya sthaapan karte hain। jo brahman banenge vahi kharcha karenge। shudra se brahman banen phir devta banna hai। baba to kehte hain sab chitra aise translight ke banaao jo manushyon ko kashish ho। koi ko jhat se teer lag jaae। koi jaadu ke dar se aayenge nahin। manushya se devta banaana - yeh jaadu hai na। bhagvaanuvaach, main tumko raajayog sikhaata hoon। hathayogi kabhi raajayog sikhla na sake। yeh baaten abhi tum samajhte ho। tum mandir laayak ban rahe ho। is samay yeh saari vishwa behad ki lanka hai। saare vishwa mein raavan ka raajya hai। baaki satayug-treta mein yeh raavan aadi ho kaise sakte।

baap kehte hain abhi main jo sunaata hoon, woh suno। in aankhon se kuchh dekho nahin। yeh puraani duniya hi vinaash honi hai, isliye ham apne shantidham-sukhdhaam ko hi yaad karte hain। abhi tum pujaari se poojya ban rahe ho। yeh number one pujaari the, naaraayan ki bahut pooja karte the। ab phir poojya naaraayan ban rahe hain। tum bhi purushaartha kar ban sakte ho। raajdhaani to chalti hai na। jaise king Edward di first, second, third chalta hai। baap kehte hain tum sarvavyaapi kahkar hamaara tiraskaar karte aaye ho। phir bhi ham tumhaara upkaar karta hoon। yeh khel hi aisa wonderful bana hua hai। purushaartha zaroor karna hai। kalpa pahle jo purushaartha kiya hai, vahi drama anusaar karenge। jis bachche ko service ka shauk rehta hai, usko raat-din yahi chintan rehta hai। tum bachchon ko baap se raasta mila hai, to tum bachchon ko service bigar aur kuchh achha nahin lagta hai। duniyaavi vaataavran achha nahin lagta hai। service vaalon ko to service bigar aaraam nahin। teacher ko padhaane mein maja aata hai। ab tum bane ho bahut oonch teacher। tumhaara dhandha hi yeh hai, jitna achha teacher bahuton ko aapasmaan banaayenge, unko itna izaapha milta hai। unko padhaane bigar aaraam nahin aayega। pradarshani aadi mein raat ko 12 bhi baj jaate hain to bhi khushi hoti hai। thakaavat hoti hai, gala kharaab ho jaata hai to bhi khushi mein rehte hain। eeshvareey service hai na। yeh bahut oonch service hai, unko phir kuchh bhi meetha nahin lagta hai। kahenge ham yeh makaan aadi lekar bhi kya karenge, hamko to padhaana hai। yahi service karni hai। milkiyat aadi mein khitpit dekhenge to kahenge yeh sona hi kis kaam ka jo kaan katen। service se to beda paar hona hai। baba kah dete hain, makaan bhi bhal unke naam par ho। bi0 ke0 ko to service karni hai। is service mein koi baahar ka bandhan achha nahin lagta hai। koi ki to rag jaati hai। koi ki rag tooti hui rehti hai। baba kehte hain manamnaabhav to tumhaare vikarma vinaash honge। bahut madad mil jaati hai। is service mein to lag jaana chaahiye। ismen aamadni hai bahut। makaan aadi ki baat nahin। makaan de aur bandhan daale to aise lenge nahin। jo service nahin jaante woh to apne kaam ke nahin। teacher aapasmaan banaayenge। nahin bante to woh kya kaam ke। hands ki bahut jaroorat rehti hai na। ismen bhi kanyaaon, maataaon ki jaasti jaroorat rehti hai। bachche samajhte hain - baap teacher hai, bachche bhi teacher chaahiye। aise nahin ki teacher aur koi kaam nahin kar sakte hain। sab kaam karna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) din-raat service ke chintan mein rehna hai aur sab ragen tod deni hain। service ke bigar aaraam nahin, service kar aapasmaan banaana hai।

2) baap samaan udaarchit banna hai। sabki nabja dekh seva karni hai। apna tan-man-dhan bhaarat ke kalyaan mein lagaana hai। achal-adol banne ke liye aagyaakaari vaphaadaar banna hai।

vardaan:- antarmukhta ki gupha mein rahne vaale deh se nyaare dehi bhav

jo paandavon ki guphaayen dikhaate hain - woh yahi antarmukhta ki guphaayen hain, jitna deh se nyaare, dehi roop mein sthit hone ki gupha mein rehte ho utna duniya ke vaataavran se pare ho jaate ho, vaataavran ke prabhaav mein nahin aate। jaise gupha ke andar rahne se baahar ke vaataavran se pare ho jaate hain aise yeh antarmukhta ki gupha bhi sabse nyaara bana aur baap ka pyaara bana deti hai। aur jo baap ka pyaara hai woh svatah sabse nyaara ho jaata hai।

slogan:- saadhna beej hai aur saadhan uska vistaar hai। vistaar mein saadhna ko chhipa nahin dena।