Murli du jour du jeudi 23 décembre 2021

23-12-2021 praatahmurli om shanti "baapdaada"' madhuban

“meethe bachche - yeh suhaavna kalyaankaari sangamayug hai, jismen svayan baap aakar patit bhaarat ko paavan banaate hain''

prashn:- sangamayug par jab baap aate hain to unke aane se hi kaun sa ishaara mil jaata hai?

uttar:- is puraani duniya ke ant hone ka ishaara sabko mil jaata hai kyonki baap aate hi hain patit srishti ka ant karne, isliye vinaash ka saakshaatkaar bhi hota hai। abhi tumhein nai duniya ke jhaad saamne dikhaai de rahe hain।

geet:- tumhein paake hamne …

om shanti। vaastav mein kehna chaahiye roohaani bachchon prati roohaani baap ki good morning kyonki bachche jaante hain baap aate hi hain raat ko din banaane। yeh bhi hisaab kiya jaata hai। aakhreen mein bhi baba aate kis samay hai? tithi taareekh nahin। parantu kis samay mein aate hain, zaroor 12 bajkar ek minute hua hoga tab baba ne is shareer mein pravesh kiya hoga। yeh hai behad ki raat aur din। tithi taareekh nahin bataai ja sakti hai। apne bachchon se hi kehte hain ham aakar raat ko din, narka ko svarga banaate hain athva patit duniya ko paavan duniya banaate hain। samajh mein aata hai ki baba ka aana raatri ko hi kaha jaata hai। shivraatri kehte hain na। aate hi hain raat ko din banaane। unki koi janmapatri hai? krishnajayanti ki bhi tithi-taareekh kuchh nahin hai kyonki unko bahut door le gaye hain। yeh kisko pata nahin hai। krishna ka janma kab hua? sanvat tithi-taareekh kuchh nahin hai। baaki sirf raat ko manaate hain। vaastav mein shivbaaba hai hi raat ko aane vaala। tum bachche kahenge shivbaaba ki raatri। bhaarat mein manaate bhi hain shivraatri। shivjayanti bhi kehte hain parantu vaastav mein shiv jayanti kehna nahin chaahiye kyonki unki maranti nahin hai। manushya janmata hai phir marta bhi hai। woh to marta hi nahin isliye shiv-jayanti kehna bhi wrong hai। shivraatri kehna theek hai। yeh shivbaaba batlaate hain। doosra koi aise kah na sake। bhal kehte hain shivoham parantu bata na saken, main kab aata hoon? kya aakar karta hoon? shivbaaba to batlaate hain ki ab aadhaakalpa ki raatri poori ho din shuru hota hai। yeh geeta ka episode repeat ho raha hai। maut ka toofaan bhi saamne khada hai। patit duniya bhi barobar hai। kaliyug ka ant hai। museebten bhi saamne hain। samajhte hain yeh vahi mahaabhaarat ladaai hai, jiske liye shaastron mein gaayan hai natural calamities dvaara puraani duniya ka vinaash hona hai। to zaroor geeta ka bhagwan aaya hoga। aayega hi kaliyug ke ant mein। satayug ka first prince, woh phir dvaapar mein to ho na sake। manushya ko 84 shareer milte hain। har ek janma mein features badal jaate hain - ek na mile doosre se। bhal abhi krishna ka gaayan poojan hai parantu unke accurate features to ho na saken। unka photo bhi nikal na sake। aise hi mitti ka, kaagaj ka bana lete hain। accurate features to jab dhyaan mein jaao tab tum dekh sakte ho। photo nikaal nahin sakte। meera krishna se dance karti thi, bahut naameegraami hai। shiromni bhakton mein gaai jaati hai। krishna ko yaad karti thi to jhat unko saakshaatkaar hota tha। krishna se preet thi। saakshaatkaar mein dekhti thi, isliye pavitra rehna chaahti thi। jaante hain vahaan vikaar to hota nahin। krishna se preet lagi to pavitra zaroor banna pade। patit to krishna ke saath mil na saken। meera paavan rahi isliye unki mahima hai। yeh sab raaz baba hi samjhaate hain। bhakti maarga mein to unki alpakaal kshanbhangur ki bhaavna poori hui। saakshaatkaar hua, jo manokaamna rakhte hain, woh alpakaal ke liye poori ho jaati hai। anek prakaar ke devtaayen aadi hain। unka saakshaatkaar chaahte hain। to drama plan anusaar woh manokaamna poorn ho jaati hai। bhakti maarga ki bhi noondh hai। ved shaastra padhte, maatha maarte to bhi mukti-jeevanmukti mein ja nahin sakte। aage banaaras mein jaakar kaashi kalvat khaate the। samajhte the shivpuri arthaat mukti mein jaayen parantu ja nahin sakte। mukti mein le jaane vaala hai hi ek baap। unko hi mukti-jeevanmukti daata kaha jaata hai। doosra koi le ja nahin sakta। satayug mein lakshmi-naaraayan ka raajya tha to jeevanmukti thi, jeevanbandha nahin tha। bahut thode aadmi rehte the। is samay kitne karodon manushya hain। satayug mein itne the nahin। baaki us samay sab kahaan the? yeh bhi abhi tumko pata pada hai। srishti ke aadi madhya ant ki knowledge abhi tumko milti hai। rachayita aur rachna ke aadi madhya ant ko koi jaan nahin sakte। abhi tum jaante ho patit srishti ka ant hai। woh to samajhte hain kaliyug ajun 40 hajaar varsha chalna hai parantu tum jaante ho abhi kaliyug ka ant hona hai tab hi baap aakar saari knowledge sunaate hain। oonche te oonch hai hi bhagwan। unka janma bhi yahaan hota hai। aate bhi hain sangam par aur ant hone ka ishaara dete hain। vinaash ka saakshaatkaar bhi karaaya hai। arjun ke liye bhi dikhaaya hai na ki saakshaatkaar hua। tum bachchon mein bhi bahuton ne saakshaatkaar kiya hai। jitna-jitna najdeek aayenge to dekhne mein aayega। manushya jab ghar ke najdeek aate hain to sab baaten yaad aati hain na। tumko bhi bahut saakshaatkaar hote rahenge। muktidhaam mein jaakar phir jeevanmukti mein aana hai। tum jaante ho - barobar bhaarat vishwa ka maalik tha। baap kehte hain - main har 5 hajaar varsha ke baad aakar tumko raajayog sikhlaata hoon। yeh sthaapna ho rahi hai bhavishya nai duniya ke liye। sangam par sthaapna hoti hai। tum brahman ho hi sangamayug par। woh hain shoodra, tum ho brahman। woh devtaayen। yeh baaten koi shaastron mein nahin hain। manushya thode hi jaante hain ki sangam kisko kaha jaata hai! inko kalyaankaari suhaavna sangamayug kaha jaata hai। jahaan se patit bhaarat paavan banta hai। baap bhi kalyaankaari hai। aate bhi bhaarat mein hain। baap kehte hain - abhi tumhaare 84 janma poore hue, ab tum patit ho, ek bhi paavan nahin। sab bhrashtaachaari hain। vikaar se paida hote hain। tum shreshtha devi-devta the phir kshatriy, vaishya, shoodra banen। abhi brahman bane ho phir devta banenge। phir ant mein aakar prajaapita brahma mukh dvaara sthaapna karte hain। kiski? svarga ki। devi-devta dharma ki। tum yahaan aaye ho devi-devta banne, daiveegun dhaaran karne। yeh to tum bachchon ko maaloom hai ki koi bhi vikaari ko yahaan allow nahin kiya jaata hai। pahle-pahle pavitrata ki pratigya leni hoti hai। ek baar pratigya kar phir agar todte hain to ekdam rasaatal mein chale jaate hain, chandaal ka janma pa lete hain। yahaan baba ke aage patit koi aa nahin sakte। agar braahmani bhool se bhi le aati hai to un par bhi bada dosh aa jaata hai। donon chandaal ban padte hain। jo paavan nahin ban sakte unko yahaan aane ka hukm nahin hai। personal aakar samajh sakte hain parantu baba ki sabha mein nahin aa sakte। agar bhool se le aate hain to unko chot bahut lagti hai। aate to dher hain। sabko maaloom hai ki behad baap ke paas jaate hain, hamko pavitra zaroor banna hai। meera pavitra thi to unka kitna maan hai। ab tum gyaan amrit pilaate ho phir bhi woh kehte hain hamko jahar chaahiye। ablaaon par kitne atyaachaar karte hain vish ke liye। krishna ki to baat nahin। yeh to badi bhool hai jo bhagwan ke badle krishna ka naam daal diya hai।

baap samjhaate hain ki bhakta kehte hain bhakti ke baad bhagwan aate hain phal dene to bhakti nishphal hui na parantu kuchh bhi nahin samajhte hain। bhaarat hi golden aged tha, ab hai iron ej। kehte bhi hain patit-paavan aao to patit thahre na। parantu kisko kaho tum narkavaasi patit ho to samajhte nahin। baba ne jab samajhdaar banaaya tha to svarga tha, abhi besmajh hone se kangaal bane hain। jab devi-devtaaon ka raajya tha to bhaarat kitna oonch tha। kehte bhi hain svarga tha, lakshmi-naaraayan ka raajya tha phir shaastron mein aisi-aisi baaten likh di hain jo log samajhte hain vahaan bhi asur the। yeh shaastra koi sadgati ke liye nahin hain। woh to jab baap aaye tab sarva ki sadgati kare। yeh hai raavan raajya tab to chaahte hain raamraajya ho। yeh nahin jaante ki raavanraajya kab se shuru hua hai। gyaan saagar baap to sabko sadgati mein le jaate hain। yeh samajhne ki baaten hain। har ek aatma ko avinaashi part mila hua hai। aatma shantidham se aati hai is prithvi par part bajaane। aatma bhi avinaashi, drama bhi avinaashi। usmein aatma avinaashi actor hai। paramdham ki rahne vaali hai। 84 janma gaaye hue hain। woh to 84 laakh kah dete hain। paramatma ko patthar-bhittar mein kah dete to glaani hui na। baap bhaarat par upkaar kar svarga banaate hain। raavan aakar apkaar kar narka bana dete hain। yeh khel hai duhkh sukh ka। yeh hai kaanton ka jangal। baap aakar kaanton ko phool banaate hain। bade se bada kaanta hai kaam vikaar। abhi baap kehte hain - main paavan banaane aaya hoon। jo paavan banenge vahi paavan duniya ke maalik banenge। baap aaya hai sahaj yog sikhlaane। kehte hain mujh apne maashook ko yaad karo। sabhi aatmaayen ek maashook par aashik hain। woh aakar sabko le jaate hain muktidhaam, parantu baba kehte hain tum patit chal nahin sakenge। mujhe yaad karo to khaad nikal jaae।

drama anusaar jab time aata hai tab hi main aata hoon tum bachchon ko paavan banaane। yeh vahi mahaabhaarat ladaai hai। mrityulok mein yeh antim ladaai hai। amarlok mein ladaai hoti nahin। vahaan hai hi raamraajya। vahaan rehte hain dharmaatmaayen। yahaan hain paap aatmaayen। paap karte rehte hain। punya aatmaon ki duniya ko svarga kaha jaata hai। baap kehte hain - main ek second mein tumko chadhti kala mein le jaata hoon। ismen sirf yeh ek hi antim janma lagta hai aur utarti kala mein 84 janma lagte hain। to baap kehte hain uthte baithte mujhe yaad karo। in saadhuon ka bhi uddhaar karne mujhe aana padta hai। tamopradhaan buddhi manushya jo kuchh sunte hain woh sat-sat karte rehte hain। andha-shraddhaalu hain na। isko kaha jaata hai blind faith, gudiyon ki pooja karte rehte hain। biography ko jaante nahin। ab baap aakar in sabka gyaan dete hain, isko roohaani spiritual knowledge kaha jaata hai। woh hai shaastron ki philosophy। yeh bhi baap hi aakar bachchon ko samjhaate hain। duniya mein to ek bhi manushya nahin, jo parampita paramatma ko yathaartha reeti jaante hon। manushya hokar aur baap ko na jaane to jaanvar se bhi badtar thahre। devtaaon ke aage jaakar mahima gaate hain - aap sarvagun sampanna hain... hain to donon manushya na parantu yeh hai saara kaanton ka jangal। baba tumko kaanton se phool banaate hain। bhaarat sachkhanda tha phir raavan aakar jhoothkhanda banaate hain। sachkhanda banaane vaala hai parampita paramatma। baap hi aakar parichay dete hain, so bhi brahman bachchon ko। phir yeh gyaan rahega nahin। tum bachche yogbal se vishwa ke maalik bante ho। baahubal se kab kisko vishwa ki baadshaahi nahin mil sakti hai। bhaarat jo vishwa ka maalik tha, so ab kangaal bana hai। manushyon ki buddhi aisi hai jo baahar mein board dekhte bhi hain, likha hua hai prajaapita brahmaakumaar kumaariyaan... to bhi nahin samajhte ki yeh ek eeshvareey family hai। itne dher bi.ke. hain, ismen andhashraddha ki to baat ho na sake। yeh hai eeshvareey parivaar। samajhte hain yeh bhi koi institution hai। are, yeh to family hai na। kumaar, kumaariyaan... yeh to ghar hua na। itni pradarshani karte ho, samjhaate ho phir bhi samajhte thode hi hain। 7 din ka jab course le achhi reeti samjhen tab buddhi mein baithe ki baap phir se behad ka varsa dene aaye hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chadhti kala mein jaane ke liye uthte-baithte ek baap ki yaad mein rehna hai। baap samaan sabhi par upkaar karna hai।

2) gyaan amrit peena aur pilaana hai। kaanton ko phool banaane ki seva karni hai।

vardaan:- marjeeva sthiti dvaara himmat aur hullaas ki avinaashi stamp lagaane vaale praapti sampanna bhav

jo praaptiyon se sampanna hote hain unke har chalan, nain chain se umang-utsaah dikhaai deta hai। lekin himmat aur hullaas ki avinaashi stamp lagaane ke liye apne past ke va eeshvareey maryaadaaon ke vipreet jo sanskaar, svabhaav, sankalp va karma hote hain unse marjeeva bano। pratigya roopi switch ko set kar practical mein pratigya pramaan chalte raho। himmat ke saath hullaas ho to praapti ki jhalak door se hi dikhaai degi।

slogan:- mele va jhamele mein double light rahne vaala hi dhaarnaamoorta hai।