Murli du jour du lundi 17 janvier 2022

17-01-2022 praatahmurli om shanti "baapdaada"' madhuban

“meethe bachche - pyaar se murli suno aur sunaao, gyaan ratnon se apni jholi bharpoor karo tab bhavishya mein raajya adhikaari banenge''

prashn:- shivbaaba ko bholaanaath kyon kaha gaya hai?

uttar:- kyonki shivbaaba sab bachchon ki bigdi ko ek second mein bana dete hain। kehte bhi hain raaja janak ko second mein jeevanmukti mili to ek janak ki baat nahin, tum sabko baap ek second mein jeevanmukti de dete hain। bhaarat ki bigdi ko bana dete hain। duhkhi bachchon ko sada ke liye sukhi bana dete hain, isliye unhein sab bholaanaath kahkar yaad karte hain। shankar ko bholaanaath nahin kahenge।

geet:- bholenaath se niraala…

om shanti। bholaanaath baap ka bachchon prati pahle-pahle direction hai ki bholaanaath ki yaad mein raho। manushya ko bhola nahin kaha jaata। bholaanaath shivbaaba ko hi kahenge। shankar ko bhi bholaanaath nahin kah sakte। jo bigdi ko banaane arthaat duhkhi ko sukhi banaane vaala hai, usko hi bholaanaath kaha jaata hai। bigdi bhi bhaaratvaasiyon ki hai to bhaarat ki bigdi ko banaane vaala bhi zaroor bhaarat mein hi aayega na। bigdi ko banaane ki yukti second mein batlaate hain। janak ko bhi yukti di thi। bigdi bhi koi ek ki nahin banti। agar janak ki bigdi banaai aur usne jeevanmukti paai to zaroor raajdhaani hogi। unke saath bahuton ko jeevanmukti mili hogi। bhaaratvaasi yeh bhi samajhte hain ki bhaarat jeevanmukta tha। jeevanmukta kaha jaata hai svarga ko। jeevanbandh kaha jaata hai narka ko। yeh hai raajayog। raajayog se hi raajaai ki sthaapna hoti hai। ek janak ki baat nahin। bhagwan ne raajayog sikhaaya to raajaai bhi di hai। barobar dekhte hain satayug ke lakshmi-naaraayan ne raajaai kaise paai। abhi to hai kaliyug। praja ka praja par raajya sthaapan ho chuka hai। yeh hai panchaayti raajya। iske baad hai satayug। tum jaante ho - lakshmi-naaraayan ne aage janma mein aisa kartavya kiya hai tab sooryavanshi raajaai paai hai। phir hai chandravanshi। woh to raajya ki transfer hoti hai। tum jaante ho geeta hai sarvottam dharma shaastra, jisse teen dharma sthaapan hote hain। aur har ek dharma ka shaastra ek hi hota hai। sangam ka bhi ek hi shaastra hai। mahima bhi geeta ki hi hai, jisse sabki sadgati hoti hai। to sadgati karne vaala ek hi hai। geeta mein barobar roodra gyaan yagya ka bhi varnan hai, jisse is puraane narka ka vinaash hota hai aur svarga ki sthaapna bhi hoti hai। ismen moonjhane ki to baat hi nahin। baba ne samjhaaya hai - pahle-pahle baap ka parichay dena hai ki vishwa mein svarga ki sthaapna karne vaala vishwa ka maalik thahra। woh hai sabka baap phir yeh lakshmi-naaraayan hain vishwa ke maalik। unhon ko zaroor shivbaaba ne raajya diya hoga। abhi to kaliyug hai। bhaarat kaudi jaisa hai, karz badhta ja raha hai isliye sona lene ka prabandha karte rehte hain। bhaarat phir heere jaisa kaise banega। lakshmi-naaraayan ko svarga ki raajaai mili hai na।

yeh bhi tum bachche jaante ho - gaaliyaan to khaana hi hai। bhaarat mein devtaayen bhi gaali khaate aaye hain aur desh vaale to bahut mahima karte hain, woh jaante hain ki yeh praacheen bhaarat ke maalik the। abhi tum bachche practical dekh rahe ho। tum bachchon mein jo vishaal buddhi hain unhon ko hi khushi hogi। vishaal-buddhi woh hain jo dhaaran kar aur phir doosron ko karaate hain। aise mat samjho vahaan satsangon aadi mein to 5-10 hajaar log roz jaate hain, yahaan to itne aate nahin hain। bhakti to vriddhi ko zaroor paati rahegi। unse yeh kalam lagta rahega। jinhonne kalpa pahle samjha hai vahi in baaton ko samajh sakte hain। log to katha sunaate hain aur sunne vaale sunkar ghar chale gaye bas। yahaan to kitni mehnat karni padti hai। pavitrata par kitne hangaamen hote hain। government bhi kuchh nahin kar sakti। yeh paandav government to gupta hai। underground sena ek naam hai। tum shakti sena gupta ho। tumko koi samajh na sake। tum ho nonviolence shakti sena, iska arth koi samajh na sake। geeta ke akshar ka bhi arth samajh na sake। baap khud bolte hain, yeh knowledge praayahlop ho jaati hai। lakshmi-naaraayan mein bhi yeh gyaan nahin rehta। main jo yeh gyaan sunaakar raajdhaani sthaapan karta hoon, woh koi ki buddhi mein nahin hai। yeh baba bhi geeta aadi padhte the। parantu yeh baaten thode hi buddhi mein thi। abhi dekho centres bhi kitne khulte jaate hain। pavitrata par vighna bhi pad rahe hain practical mein। aage bhi padte the। un geeta paathshaalaaon mein vighna ki baat nahin rehti। yahaan to tum brahmaakumaar kumaari bante ho। yeh akshar to geeta mein bhi nahin hain। yeh bhi samajh ki baat hai। prajaapita brahma ke bachche, brahmaakumaar kumaari to har ek manushya hai, na ki sirf bhaaratvaasi। parantu saari srishti ke manushya sab hain। sabhi prajaapita brahma ko Adam kehte hain। jaante hain woh manushya srishti ka pahla head hai। humanity sthaapan karne vaala hai। aise nahin ki srishti hoti hi nahin hai phir brahma paida hua, unke mukh se manushya rache jaate hain। nahin, agar koi bhi manushya na ho to phir mukh vanshaavli bhi paida ho na sake। na brahma mukh vanshaavli, na brahma kukh vanshaavli ho sake। srishti to saari hai, unki kalam lagaai jaati hai। yeh nai-nai baaten samajhne ki hain। kiski buddhi mein baithne mein time lagta hai। koi to ek maas mein bhi khade ho jaate hain। jaise dekho Bangalore ke angana bachche ko kitna nasha chadha hua tha। jo hamaare paas 20 varsha vaale ko bhi nasha nahin hai। khushi mein dance karta tha। bhagwan mil gaya, khushi ki baat hai na। bhagwan aakar raksha karte hain maaya se। phir svarga ki raajaai sthaapan karte hain। baba to bahut clear samjhaate hain। main is saadhaaran tan dvaara phir se tum bachchon ko vahi sahaj raajayog aur srishti chakra ke aadi-madhya-ant ka gyaan sikhlaata hoon। tum kah sakte ho aao to ham aapko satayug se lekar kaliyug ant tak ki history sunaayen ki ab phir se kaise satayug aane vaala hai। zaroor sikhaane vaala bhi hona chaahiye। hamko sikhlaate hain tab to ham samjha sakte hain na। baaki to jo geeta sunaane vaale hain, unse to tum logon ne bahut suna hai। bahut lectures hote rehte hain। parantu woh is dharma ke na hone kaaran is taraph kheenchate nahin hain। jab tumhaara prabhaav niklega phir vriddhi hogi। dheere-dheere vriddhi hoti rahegi। yeh to jaante hain - bhaarat kitna kangaal hai। manushya bhookh bahut marte hain। duhkhi hote hain। bhagwan ki bhakti karte hain ki aakar duhkh se chhudaao। tum bachche jaante ho sukhi srishti kab hoti hai। yahaan tum bachchon ki jholi bhar rahi hai in avinaashi gyaan ratnon se। aage to sab sunte-sunaate the parantu usmein jholi bharne ka prashn nahin। jholi abhi sirf tumhaari bhar rahi hai aur jo tape sunenge va murli padhege va sun rahe honge woh bhi jholi bhar rahe hain।

tum ho shiv shakti sena, bhaarat ki jholi bharne vaale। bhaarat bahut saahookaar ho jaayega। parantu jo jholi bharte hain, raajya to sirf vahi karenge na। bhaarat sone ki chidiya thi phir ban jaayegi। sabhi sukhi honge। parantu bhaarat mein kitne karod hain, itne sab to vahaan nahin honge। jo jholi bharte hain, raajya bhaagya to vahi lenge। ismen moonjhane ki baat hi nahin ki kaise honge। are in lakshmi-naaraayan ko dekho na। yeh satayug ke maalik hain na। svarga ka rachayita hai shivbaaba aur yeh lakshmi-naaraayan satayug ke maalik hain। zaroor aage janma mein purooshaartha kiya hai। aage vaala janma hoga sangam par। sangam kalyaankaari hai na kyonki sangamayug par hi duniya badalti hai to zaroor kaliyug aur satayug ke beech mein gyaan diya hoga। so ab phir se de rahe hain। phir koi kahe ki niraakaar paramatma kaise aakar raajayog sikhlaayenge। to tum trimoorti dikhaao। brahma dvaara sthaapna... to jo sthaapna karenge vahi paalna bhi karenge। jaise Christ ne sthaapna ki phir paalna ke liye pope bhi zaroor unko banna pade। vaapis to koi ja na sake। paalna zaroor karni hai। punarjanma lena hi hai, nahin to srishti badhe kaise। jabki satayug treta mein pahle devtaaon ka raajya tha to sabse jaasti aadamshumaari zaroor inhon ki honi chaahiye। phir christians ki jaasti kyon hai? phir laakhon varsha ki bhi koi baat nahin hai। yeh sab baaten samjhenge vahi jo apne gharaane ke honge। auron ko teer lagega nahin। yeh gyaan ka teer hai na। baba kehte hain bhale kisko bhi le aao to gyaan baan lagaayen। hoga brahman kul ka to teer lagega। shaastron mein dikhaate hain - ladaai mein yaadav kaurav maare gaye। paandav 5 the। phir himaalay par jaakar gal mare। ab aise to ho nahin sakta। gaaya bhi jaata hai jeev ghaati mahaapaapi। aatma ka kabhi ghaat nahin hota hai। aatma khud jaakar shareer ka ghaat athva vinaash karti hai। ab paandav jinhon ko shreemat dene vaala paramatma tha, woh jaakar pahaadon par gale, yeh to ho nahin sakta। achha woh to 5 paandav the। baaki aur paandav kahaan gaye? sena to dikhaai nahin hai। tum jaante ho vinaash kaise hoga। tum dekhenge bhi। tum bachchon ko saakshaatkaar bhi bahut honge। shuru mein tumko bahut saakshaatkaar hote the। kabhi lakshmi ko, kabhi naaraayan ko invite karte the। kitne saakshaatkaar hote the phir pichhaadi ke time jab haahaakaar hoga tab phir tumko saakshaatkaar honge। hangaamen honge to tum bachche aakar yahaan ikatthe honge isliye madhuban mein jaasti makaan banaate rehte hain। phir tum bachchon ko in saakshaatkaar se khushi mein laate rahenge, parantu maasi ka ghar nahin hai jo sab yahaan aa jaayen। jo sapoot bachche baba ke madadgaar honge, wahin aayenge। agar paandavon ke galne ki baat hoti to phir makaan hi kyon banaate! koi bhi baat mein moonjhate ho to ananya bachchon se poochh sakte ho। nahin to yeh brahma baba baitha hai। yeh nahi bata sakta to bada baba (shivbaaba) baitha hai। yeh to samjhaaya hai ki abhi bahut kuchh samajhne ka baaki hai। saare chakra ka raaz baba samjhaate rehte hain। kitni points nikalti rehti hain। ajun time pada hai to zaroor aur bhi samjhaana hoga। parantu pahle mool baat yeh zaroor likhaana hai, ekdam blood se likhvaana hai ki hamko nishchay hai ki barobar parampita paramatma padhaate hain। aise nahin sirf likhne se hi badal jaate hain। kehte hain hamne to aise hi likh diya। jaasti koi se maatha nahin maarna hai। bolo bhagvaanuvaach - bhagwan ham shivbaaba ko maante hain। vo gyaan ka saagar satchit hai। unko apna shareer to hai nahin। to zaroor saadhaaran tan ka aadhaar lenge na। to pahle-pahle baap kehte hain maamekam yaad karo। deh ke sab dharma chhod mujhe yaad karo to vikarma vinaash honge aur mere paas chale aayenge, aur chakra ko yaad karne se tum chakravarti raaja banenge। baba kitna meetha hai aur banaate bhi dekho kitna meetha hain। satayug ki nishaaniyaan hain woh phir repeat zaroor hongi। kaliyug bhi hai। abhi tum raajayog seekh rahe ho, vinaash saamne khada hai aur kya saboot deven। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan banna hai। bhagwan aakar maaya se hamaari raksha karte hain, is khushi mein rehna hai।

2) kisi bhi baat mein moojhna nahin hai, sapoot bachcha ban baap ka poora-poora madadgaar banna hai।

vardaan:- brahma baap ke sanskaaron ko svayan mein dhaaran karne vaale sva parivartak so vishwa parivartak bhav

jaise brahma baap ne jo apne sanskaar banaaye, woh sabhi bachchon ko ant samay mein yaad dilaaye - niraakaari, nirvikaari aur niranhakaari - to yeh brahma baap ke sanskaar hi braahmanon ke sanskaar natural hon। sada inheen shreshtha sanskaaron ko saamne rakho। saare din mein har karma ke samay check karo ki teenon hi sanskaar emerge roop mein hain। inheen sanskaaron ko dhaaran karne se sva parivartak so vishwa parivartak ban jaayenge।

slogan:- avyakt sthiti banaani hai to chitra (deh) ko na dekh chaitanya aur charitra ko dekho।

lavleen sthiti ka anubhav karo

baap ka aap bachchon se itna pyaar hai jo jeevan ke sukh-shanti ki sab kaamnaayen poorn kar dete hain। baap sukh hi nahin dete lekin sukh ke bhandaar ka maalik bana dete hain। saath-saath shreshtha bhaagya ki lakeer kheenchane ka kalam bhi dete hain, jitna chaahe utna bhaagya bana sakte ho - yahi parmaatma pyaar hai। isi pyaar mein samaaye raho।