Murli du jour du samedi 22 janvier 2022

22-01-2022 praatahmurli om shanti "baapdaada"' madhuban

“meethe bachche - kisi bhi prakaar ki habach (laalach) tum bachchon ko nahin rakhni hai, kisi se bhi kuchh maangana nahin hai, kyonki tum daata ke bachche dene vaale ho।''

prashn:- tum godly student ho, tumhaara lakshya kya hai, kya nahin?

uttar:- tumhaara lakshya hai - baap dvaara jo knowledge mil rahi hai, use dhaaran karna, paas with honour banna। baaki yeh chaahiye, yeh chaahiye… aisi ichchhaayen rakhna tumhaara lakshya nahin। tum kisi bhi manushya aatma se len-den karke hisaab-kitaab nahin banaao। baap ki yaad mein rah karmaateet banne ka purushaartha karo।

geet:- bachpan ke din bhula na dena...

om shanti। bachche jaante hain ki yeh hai roohaani baap aur bachchon ka sambandh। roohaani baap ab baithe hain aur bachche bhi baithe hain। sannyaasi aadi honge - apne aashram se kahaan jaayenge to kahenge phalaana sannyaasi phalaani jagah rahne vaala hai। geeta shaastra aadi sunaate hain। woh koi nai baat nahin। eeshvar sarvavyaapi kahne se saara gyaan hi khatma ho jaata hai। ab yeh to hai roohaani baap jisko sab roohen yaad karti hain। rooh hi kehti hai - O parampita paramatma। jab duhkh hota hai to laukik ko kuchh nahin kahenge। behad ke baap ko hi yaad karenge। sannyaasi honge to brahm tatva ko yaad karenge। woh hain hi brahm gyaani। baap ko hi yaad nahin karte। shivoham kehte hain, main aatma so paramatma hoon। phir brahm athva tatva to rahne ka sthaan hai। yeh baaten bilkul nai hain। yeh gyaan praayahlop ho jaata hai। yeh jo shaastra hain, unmein mera gyaan nahin hai। mera gyaan na hone kaaran tum jab kisko samjhaate ho to kehte hain yeh to nai baat hai। niraakaar paramatma gyaan dete hain, yeh unhon ki buddhi mein hi nahin aata hai। woh to samajhte hain krishna ne gyaan sunaaya hai to moonjh padte hain। baap to ek-ek baat siddha karke batlaate hain। bhakti maarga mein tum sab yaad karte ho। bhagat to sab bhagat hain। bhagwan to ek hona chaahiye। sarva mein bhagwan samajhne se sabhi ko poojne lag jaate hain। pahle avyabhichaari ek shiv ki bhakti hoti hai parantu gyaan nahin rehta ki woh kya karke gaye hain, kab aaye the, yeh nahin jaante hain। parantu woh hai satopradhaan bhakti। pooja uski hoti hai jisse sukh milta hai। lakshmi-naaraayan ke raajya mein bhi apaar sukh tha। woh svarga ke devtaayen the। lakshmi-naaraayan ko satayug ka pahla-pahla mahaaraaja-mahaaraani maante hain। parantu satayug ki aayu nahin jaante hain। baap har ek baat bachchon ko hi samjhaate hain। bachche hi brahman banenge। yeh nai rachna hai na। tum sabko samjha sakte ho ki parampita paramatma prajaapita brahma dvaara nai srishti rachte hain, yeh to sab samajhte hain। nahin to prajaapita kyon kehte hain? yeh baaten tum bachche hi jaante ho doosra koi nahin jaante। unhon ko yeh nai-nai baaten samajh mein nahin aati। jab sunte-sunte pakke ho jaate hain tab samajhte hain ham kitna ghor andhiyaare mein the। na bhagwan ko jaante the, na devtaaon ko jaante the। jo past ho jaate hain unhon ki hi bhakti ki jaati hai। phir poochho parampita paramatma jiski tum jayanti manaate ho uske saath tumhaara kya sambandh hai? woh kya karke gaye hain? kuchh bhi bata nahin sakenge। krishna ke liye sirf kehte hain makkhan churaaya, yeh kiya, gyaan diya। kitna ghotaala hai। daata to ek eeshvar hi hai। krishna ke liye to daata nahin kahenge। woh to moonjhe hue hain। yeh sab drama mein noondh hai। baap kitna achhi reeti samjhaate hain। nutshell mein thodi baaten bhi manushyon ki buddhi mein nahin baithti। agar ek-ek ke 84 janmon ka vritaanta baith nikaalen to pata nahin kitna ho jaae। baap kehte hain in sab baaton ko chhod maamekam yaad karo। thoda vistaar se kabhi samjhaaya jaata hai to manushyon ka sanshay mit jaae। baaki baat to thodi hai - mujhe yaad karo। jaise mantra dete hain eeshvar ko yaad karo। parantu woh aise nahin kahenge ki eeshvar ko yaad karne se tumhaare vikarma vinaash honge aur eeshvar ke paas jaayenge। yeh to baap hi samjhaate hain to ganga snaan se vikarma vinaash nahin honge। is samay har ek par vikarmon ka bojha bahut bhaari hai। sukarma thode hote hain baaki vikarma to janma-janmaantar ke bahut hain। kitna gyaan aur yog mein rehte hain to bhi itne vikarma hain jo chhootte hi nahi hain। jab karmaateet ban jaayenge phir to tumko naya janma nai duniya mein milega। agar kuchh vikarma rahe hue honge to puraani duniya mein hi doosra janma lena padega। gyaan to bachchon ko bahut achha mil raha hai। baap kehte hain aur kuchh nahin samajhte ho to baap ko yaad karo isse bhi second mein svarga ki baadshaahi mil jaayegi। ek kahaani bhi hai - khuda-dosta ki। ek roz ke liye baadshaahi dete the। ab tum jaante ho baba hi tvamev maataashcha pita, bandhu.... ho gaya, to khuda dosta hua na। allaah avaldeen, khuda dosta, yeh sab baaten is samay ki hain। baba tumhein ek second mein svarga ki baadshaahi dete hain। bachchiyaan jab dhyaan mein jaati thi to vahaan prince princess ban jaati thi, vahaan ke sab samaachaar aakar sunaati theen। tum baap ko ab jaante ho। sab kehte hain heavenly god father, zaroor nai duniya svarga hi rachenge। bhaarat hi golden ej tha। us samay aur koi dharma nahin tha। Christian bhi kehte hain - Christ se 3 hajaar varsha pahle bhaarat svarga tha। jahaan lakshmi-naaraayan raajya karte the isliye poochhte hain inhon ko yeh varsa kahaan se mila? bhaaratvaasiyon ka inse kya sambandh hai? svarga ke maalik pahle yeh the। ab to narka hai, yeh kahaan gaye। janma-maran ko to maante hain na। aatma janma-maran mein aati hai tab to 84 janma lenge। nahin to kaise lenge। duniya mein anek mat hain। koi punarjanma ko maante hain, koi nahin maante hain। poochhna chaahiye parampita paramatma shiv se tumhaara kya sambandh hai? yeh brahma vishnu shankar kaun hain? kahaan ke rahne vaale hain? tum kahenge sookshm vatan ke। aur to koi bata na sake। tumhaare liye to kitna sahaj hai। maataaon ko to koi naukri aadi ka phurna nahin hai। ghar mein rahne vaali hain। koi dhandhedhori ka hangaama nahin hai। baap se varsa lena hai। purushon ko to phurna hai। tumko to baba kehte hain tum apna martaba lo, vishwa ke maalik bano। saahookaaron ko to kitni chinta rehti hai। duniya mein rishvatkhori bhi bahut hai। tumko rishvat lene ki koi darkaar hi nahin। woh to vyaapaariyon ka kaam hai। tum inse chhoote hue ho। phir bhi maaya aisi hai jo choti se pakad leti hai isliye phir kuchh na kuchh habach (lobh-laalach) rehti hai to jigyaasuon se maangate rehte hain। baba kehte hain bachche kisi se bhi maango mat। tum daata ke bachche ho na। tumko dena hai na ki maangana hai। tumko jo kuchh chaahiye shivbaaba se mil sakta hai। aur koi se lenge to unki yaad rahegi। har ek cheez shivbaaba se lenge to shivbaaba tumko ghadi-ghadi yaad padega। shivbaaba kehte hain - tumhaare len-den ka hisaab mere saath hai। yeh brahma to beech mein dalaal hai। dene vaala main hoon। mere se tum connection rakho through brahma। koi bhi cheez auron se lenge to tumko unki yaad aayegi aur tum vyabhichaari ban jaayenge। shivbaaba ke bhandaare se tum cheez le lo aur kisi se maango mat। nahin to dene vaale ko nuksaan padta hai kyonki usne shivbaaba ki bhandaari mein nahin diya। dena chaahiye shivbaaba ki bhandaari mein। manushyon se len-den ka connection to bahut samay rakha, ab tumhaara connection direct shivbaaba se hai। lekin baba jaante hain bachchon mein lobh ka bhoot hai।

kai bachche kehte hain hamne shivbaaba ko dekha nahin hai। are tum apne ko dekhte ho? tumko apni aatma ka saakshaatkaar hua hai, jo kehte ho hamko shivbaaba ka saakshaatkaar ho? tum jaante ho hamaari aatma bhrakuti ke beech mein rehti hai। shivbaaba bhi bhrakuti ke beech mein hi hoga। tum jaante ho aatma ek shareer chhod doosra leti hai। kis samay aatma ka saakshaatkaar ho bhi sakta hai। aatma star hai, saakshaatkaar bhi divya drishti se hi hoga। achha krishna ki tum bhakti karo, saakshaatkaar ho sakta hai phir phaayda kya? paramatma ka bhi saakshaatkaar hua phaayda kya? phir bhi tumko to padhna hai na। bhakti maarga mein saakshaatkaar hota hai to unka kitna gaayan karte hain। parantu milta kuchh bhi nahin hai। shivbaaba hai gyaan ka saagar। brahma ko to gyaan ka saagar nahin kahenge na। brahma ko bhi unse gyaan milta hai। aajkal shivling sabke aage rakh dete hain, samajhte kuchh bhi nahin। pooja karte hain parantu koi ki bhi biography bata na saken। in gyaan ratnon ko samajh na saken। ratna lete-lete kaeeyon ko maaya bandar bana deti hai। kehte hain hamko ratna nahin chaahiye। baba samjhaate hain phir bhi shivaalay mein to aayenge parantu praja pad। purushaartha kar oonch pad paana chaahiye। baap kehte hain main baikuntha ki baadshaahi dene aaya hoon, tum purushaartha kar aap samaan banaao। pujaariyon se bhi tum poochh sakte ho yeh kaun hain? kehte hain na - aaye aag lene aur baborchi (maalik) ban baithe। koi pujaariyon ki bhi buddhi mein achhi reeti baith jaata hai। ham bhi pujaari the, ab poojya bane hain। yeh lakshmi-naaraayan poojya kis purooshaartha se bane hain, tum samjha sakte ho। baba kehte hain - jahaan mere bhagat hain unko samjhaao। bhagat honge shiv ke mandir mein, lakshmi-naaraayan ke mandir mein, jagat amba ke mandir mein jaao। pujaariyon ko samjhaao - woh phir auron ko samjhaayen। pujaari baith kisko jagat amba ka occupation bataayen to sab khush ho jaaen। unko kehna chaahiye tum in sab baaton ko samjho। tum kisko baith in devtaaon ki jeevan kahaani bataayenge to tumko bahut paise milenge। yeh bhi samjha vahi sakta hai jo dehi-abhimaani hai। deh-abhimaani ko to saara din yeh chaahiye, yeh chaahiye, habach (laalach) rehti hai। student ko to knowledge ki habach honi chaahiye to main paas with honour ho jaaoon। yeh hai padhaai ka lakshya।

drama ke raaj ko bhi samajhna hai। drama koi lamba nahin hai। parantu shaastron mein inki aayu lambi likh di hai। to yeh sab buddhi mein aana chaahiye। service to bahut hai koi karke dikhaaye। baap se koi kripa thode hi maangi jaati hai। kehte hain bhagwan bachcha do to kul ki vriddhi hogi। are baap to apne kul ki vriddhi kar rahe hain। is samay phir devta kul ki vriddhi ho rahi hai। abhi eeshvareey kul ki vriddhi hoti hai। tum bhi eeshvareey santaan ho। to baap samjhaate hain yeh sab ichchhaayen chhod ek baap ko yaad karo। bandhan aadi hain, yeh sab karma ka hisaab hai। baba ko dekho kitna bandhan hai, kitne bachchon ke khyaalaat rehte hain, kitni khitpit hoti hai। kitni ninda karte hain। disservice karna sahaj hai, service karna bahut mushkil hai। ek kharaab hota hai to 10-20 ko kharaab kar dete hain। baaki paanch aath nikalte badi mehnat se hain। kai centres par aate bhi rehte hain phir kaala munh bhi karte rehte hain। aise bandar buddhi vaayumandal ko kharaab karte hain। aison ko tum bithaate kyon ho! kaala munh kiya to uska asar bahut samay chalta hai। register se maaloom chal jaata hai। chaar paanch varsha aakar phir aana banda kar diya। baba samjhaate hain aisa karne se tum raajaai pad pa nahin sakenge। indraprastha ki kahaani bhi hai, patthar ban gaye। tum bhi pattharbuddhi ban padenge। paaras ban nahin sakenge। phir bhi purooshaartha nahin karte, yeh bhi drama mein noondh hai। raajdhaani mein nambarvaar chaahiye। naukar, chandaal aadi sab chaahiye। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) laukik sab ichchhaayen chhod eeshvareey kul ki vriddhi karne mein madadgaar banna hai, koi bhi disservice ka kaam nahin karna hai।

2) len-den ka connection ek baap se rakhna hai, kisi dehdhaari se nahin।

vardaan:- chaaron or ki halchal ke samay avyakt sthiti va ashareeri banne ke abhyaas dvaara vijayi bhav

last samay mein chaaron or vyaktiyon ka, prakriti ka halchal aur aavaaj hoga। chillaane ka, hilaane ka vaayumandal hoga। aise samay par second mein avyakt pharishta so niraakaari ashareeri aatma hoon - yeh abhyaas hi vijayi banaayega isliye bahut samay ka abhyaas ho ki maalik ban jab chaahen mukh dvaara saaz bajaayen, chaahen to kaanon dvaara sunen, agar nahin chaahen to second mein stop - yahi abhyaas simarni arthaat vijay maala mein le aayega।

slogan:- purooshaartha ko teevra karna hai to albelepan ke loose screw ko tight karo।

lavleen sthiti ka anubhav karo

aadikaal, amritvele apne dil mein parmaatma pyaar ko sampoorn roop se dhaaran kar lo। agar dil mein parmaatma pyaar, parmaatma shaktiyaan, parmaatma gyaan full hoga to kabhi aur kisi bhi taraph lagaav ya sneh ja nahin sakta।