Murli du jour du dimanche 23 janvier 2022

23-01-22 praatahmurli om shanti ''avyakt-baapdaada'' revise 29-12-89 madhuban

padhaai ka saar - “aana aur jaana''

aaj murleedhar baap apne master murleedhar bachchon ko dekh rahe hain। sabhi bachche murli aur milan ke chaatrak hain। aise chaatrak sivaae brahman-aatmaon ke aur koi ho nahin sakta। yeh gyaan-murli aur parmaatma milan nyaara aur pyaara hai। duniya ki anek aatmaayen parmaatma-milan ki pyaasi hain, intajaar mein hain। lekin aap brahman-aatmaayen duniya ke kone mein gupta roop mein apna shreshtha bhaagya praapta kar rahi ho kyonki divya baap ko jaanne athva dekhne ke liye divya buddhi aur divya drishti chaahiye jo baap ne aap vishesh aatmaon ko di hai isliye aap brahman hi jaan sakte aur milan mana sakte ho। duniya vaale to pukaarte rehte - “ek boond ke pyaase ham'' aur aap kya kehte ho? ham varse ke adhikaari hain, kitna antar hai - kahaan pyaasi aur kahaan adhikaari! abhi bhi sabhi adhikaari bankar adhikaar se aakar pahunche ho। dil mein yeh nasha hai ki ham apne baap ke ghar mein athva apne ghar mein aaye hain। aise nahin kahenge ki ham aashram mein aaye hain। apne ghar mein aaye hain - aise samajhte ho na? adhikaar ki nishaani hai apnaapan। apne baap ke paas aaye hain, apne parivaar mein aaye hain। mehmaan bankar ke nahin aate lekin bachche aaye hain apne ghar mein। chaahe chaar din ke liye aate ho lekin samajhte ho - madhuban apne sthaan par pahunche hain। to yeh aana aur jaana। aap braahmanon ki jo padhaai hai va murleedhar ki jo murli hai uska saar yeh do shabd hi hain - “aana aur jaana''। yaad ki yaatra ka abhyaas kya karte ho? karmayogi ka arth hi hai - main ashareeri aatma shareer ke bandhan se nyaari hoon, karma karne ke liye karma mein aati hoon aur karma samaapta kar karma-sambandh se nyaari ho jaati hoon, sambandh mein rehte hain, bandhan mein nahin rehte। to yeh kya hua? karma ke liye “aana'' aur phir nyaara ho jaana। karma ke bandhan-vash karma mein nahin aate ho lekin karmendriyon ko adheen kar adhikaar se karma karne ke liye karmayogi bante ho। indriyon ke karma ke vasheebhoot nahin ho। koi bhi kisi ke vash ho jaata to vash hui aatma majboor ho jaati hai aur maalik banne vaali aatma kabhi kisse majboor nahin hoti, apne svamaan mein majboot hoti hai। kai bachche abhi bhi kabhi-kabhi kisi-na-kisi karmendriy ke vash ho jaate hain, phir kehte hain - aaj aankh ne dhokha de diya, aaj mukh ne dhokha de diya, drishti ne dhokha de diya। parvash hona arthaat dhokha khaana aur dhokhe ki nishaani hai duhkh ki anubhooti hona। aur dhokha khaana chaahte nahin hain lekin na chaahte hue bhi kar lete hain, isko hi kaha jaata hai vasheebhoot hona। duniya vaale kehte hain - chakkar mein aa gaye…chaahte bhi nahin the lekin pata nahin kaise chakkar mein aa gaye। aap svadarshan chakradhaari aatma kisi dhokhe ke chakkar mein nahin aa sakti kyonki svadarshan chakra anek chakkar se chhudaane vaala hai। na sirf apne ko, lekin auron ko bhi chhudaane ke nimitta bante hain। anek prakaar ke duhkh ke chakkaron se bachne ke liye sochte hain - is srishti-chakra se nikal jaayen...। lekin srishti chakra ke andar part bajaate hue anek duhkh ke chakkaron se mukta ho jeevanmukta sthiti ko praapta kar sakte hain - yeh koi nahin jaanta hai। aap challenge karte ho ki ham aapko jeevan mein mukti double dila sakte hain - jeevan bhi ho aur mukti bhi ho aisi challenge ki hai na? nashe se kehte ho ki jeevanmukti aapka aur hamaara janma siddha adhikaar hai, to svadarshan chakradhaari arthaat duhkh ke chakkaron se mukta rahne vaale aur mukta karne vaale। vasheebhoot hone vaale nahin lekin adhikaari ban, maalik ban sarva karmendriyon se karma karaane vaale। dhokha khaane vaale nahin lekin auron ko bhi dhokhe se chhudaane vaale। yahi abhyaas karte ho na - karma mein aana aur phir nyaara ho jaana, to yaad ka abhyaas kya raha? aana aur jaana। aur padhaai arthaat gyaan ka saar kya hai? karmaateet ban ghar jaana hai aur phir raajya karne ka part bajaane apne raajya mein aana hai। yahi gyaan ka saar hai na। to “jaana'' aur “aana'' - yahi gyaan aur yog hai, isi abhyaas mein din-raat lage hue ho। buddhi mein ghar jaane ki aur phir raajya mein aane ki khushi hai। jaise madhuban apne ghar mein aate ho to kitni khushi rehti hai। jab se ticket book karaate ho tab se jaana hai, jaana hai - yeh buddhi mein yaad rehta hai na! to jab madhuban ghar ki khushi hai to aatma ke ghar jaane ki bhi khushi hai। lekin khushi se kaun jaayega? jitna sada yeh “aane'' aur “jaane'' ka abhyaas hoga। jab chaaho tab ashareeri sthiti mein sthit ho jaao aur jab chaaho tab karmaateet ban jaao - yeh abhyaas bahut pakka chaahiye। aise na ho ki aap ashareeri banne chaaho aur shareer ka bandhan, karma ka bandhan, vyaktiyon ka bandhan, vaibhvon ka bandhan, svabhaav-sanskaaron ka bandhan apni taraph aakarshit kare। koi bhi bandhan ashareeri banne nahin dega। jaise koi tight dress pahante hain to samay par second mein utaarne chaahen to utaar nahin sakenge, khinchaavat hoti hai kyonki shareer se chipka hua hai। aise koi bhi bandhan ka khinchaav apni taraph kheechega। bandhan aatma ko tight kar deta hai isliye baapdaada sadaiv yeh paath padhaate hain - nirlipta arthaat nyaare aur ati pyaare। yeh bahutkaal ka abhyaas chaahiye।

gyaan sunna-sunaana, seva karna yeh alag cheez hai lekin yeh abhyaas ati aavashyak hai। paas with honour banna hai to is abhyaas mein paas hona ati aavashyak hai। aur isi abhyaas par attention dene mein double underline karo, tab hi double light ban karmaateet sthiti ko praapta kar double taajdhaari banenge। brahman bane, baap ke varse ke adhikaari bane, godly student banen, gyaani tu aatma bane, vishwa sevaadhaari bane - yeh bhaagya to pa liya lekin ab paas with honour hone ke liye, karmaateet sthiti ke sameep jaane ke liye brahma baap samaan nyaare ashareeri banne ke abhyaas par vishesh attention। jaise brahma baap ne saakaar jeevan mein karmaateet hone ke pahle nyaare aur pyaare rahne ke abhyaas ka pratyaksha anubhav karaaya। jo sabhi bachche anubhav sunaate ho - sunte hue nyaare, kaarya karte hue nyaare, bolte hue nyaare rehte the। seva ko va koi karma ko chhoda nahin lekin nyaare ho last din bhi bachchon ki seva samaapta ki। nyaaraapan har karma mein saphalta sahaj anubhav karaata hai। karke dekho। ek ghanta kisko samjhaane ki bhi mehnat karke dekho aur uske antar mein 15 minute mein sunte hue, bolte hue nyaarepan ki sthiti mein sthit hoke doosri aatma ko bhi nyaarepan ki sthiti ka vibration dekar dekho। jo 15 minute mein saphalta hogi woh ek ghante mein nahin hogi। yahi practice brahma baap ne karke dikhaai। to samjha kya karna hai!

pahle nimitta to teachers hain। follow father karengi na। seva ka vistaar bhal kitna bhi badhaao lekin vistaar mein jaate saar ki sthiti ka abhyaas kam na ho, vistaar mein saar bhool na jaaye। khaao-piyo, seva karo lekin nyaarepan ko nahin bhoolo। vaani dvaara bhi kahaan tak seva karenge, kitnon ki karenge! ab to roohaani vibration, ashreereepan ki sthiti ke vibration, nyaare aur pyaarepan ke shaktishaali vibration vaayumandal mein phailaao। seva ki teevragti ka saadhan bhi yahi hai। doosron ki seva karne ke pahle svayan is vidhi mein sampanna honge tab seva ki siddhi ko praapta karenge। ab vaani mein aana sahaj ho gaya hai aur dil se bhi karte ho kyonki abhyaas pakka ho gaya hai। aise yeh abhyaas bhi natural ho jaayega। is natural abhyaas se hi nature badli hogi। chaahe manushya aatmaon ki nature, chaahe prakriti (nature)। samjha? mushkil to nahin lagta hai na! bade te bade baap ke bachche hain aur bade-te-badi praapti ke adhikaari hain, to uske liye koi badi baat nahin। attention rakhna to aata hai na ki tension rakhna aata hai। niji sanskaar attention ke hain। jab tension rakhna aata hai to attention rakhna kya badi baat hai? tension rakhne mein to aadti ho gaye na। attention ka bhi tension nahin rakho lekin natural attention ho। kai aisa bhi karte hain - attention ko tension mein badal dete, lekin attention ko attention ke roop mein rakho, badli nahin karo। original abhyaas aatma ko nyaare hone ka hai। nyaari thi, nyaari hai, phir nyaari banegi। sirf attachment nyaara banne nahin deta hai। vaise aatma ki original nature shareer se nyaare rahne ki hai, alag hai। shareer aatma nahin, aatma shareer nahin। to nyaare hue na। sirf 63 janmon se attachment ki aadat pad gai hai। original to original hi hota hai। achha।

double videshi bhi bahut pahunch gaye hain - naya varsha manaane ke liye। mehmaan bankarke aaye ho ya bachche bankar aaye ho? apnaapan lagta hai na। baapdaada bhi bachchon ko apne ghar mein dekh harshit hote hain। bachche sadaiv ghar ka shrringaar hote hain। bachchon se madhuban saj jaata hai, isliye baapdaada apne ghar ke shrringaar ko dekh khush ho rahe hain। chaahe bhaaratvaasi, chaahe videshi - donon hi ghar ke shrringaar hain। baapdaada aane ki bhi mubaarak dete hain, jaane ki bhi mubaarak dete hain। yahaan aana bhi achha hai, jaana bhi achha hai। vidaai nahin hai, badhaaiyaan hi badhaaiyaan hain। jaayenge to seva ki badhaaiyaan aur yahaan aaye ho to milne ki badhaaiyaan। donon hi mubaarak hain na। achha।

sarva desh-videsh ke sada adhikaari bachchon ko, sada gyaan aur yaad ke saar mein rahne vaali shreshtha aatmaon ko, sada aana aur jaana is smriti se sampanna banne vaali aatmaon ko, sada brahma baap ko follow karne vaale, karmaateet sthiti ke sameep pahunchne vaale yogi aatmaon ko, sada apnepan ke anubhav aur adhikaar ki khushi mein rahne vaale khushmizaaj bachchon ko baapdaada ka yaadapyaar aur namaste।

doctors prati avyakt mahaavaakya - sabhi doctors ke dil mein kya hai? hospital to nahin hai? baap ko dil mein bithaana arthaat sada ke liye anekon ko shapha dena। aajkal to doctors bhi kehte hain ki davaai itna kaam nahin karegi jitna dua karegi। vo bhi davaaeeyon se dilshikasta ho gaye hain kyonki jaante hain na ki iski result kya hai aur kya niklegi! isliye abhi sabki nazar duaaon taraph ja rahi hai। abhi yog exercise ke roop mein chaaron or badhta ja raha hai। abhi yog tak aaye hain, sahjayog tak aa jaayenge। davaaeeyon ke bajaae doosri taraph abhi buddhi to gai hai na। aakhir thikaane par aa jaayenge to doctors yahi kaam karte ho na। sabki buddhi ko thikaane par lagaane vaale ho na? achha hai, himmat rakhne se baap ki madad svatah mil rahi hai, milti rahegi। jahaan himmat hai vahaan asambhav bhi sambhav ho jaayega। sabhi asambhav ko sambhav karne vaale ho। jo duniya vaale kehte hain man ko ekaagra karna bahut mushkil hai, asambhav bhi kah dete hain aur aap kya kehte ho? aapke liye to second ki baat hai na। bas baba kaha aur man thikaane par pahuncha। to aapke liye second ka kaam hai aur unhon ke liye asambhav hai। kitna antar aa gaya! time to nahin lagta hai? aise to nahin - geet baje, laal batti jale tab hi man tikega? mehnat to nahin karni padti? apna baap hai na। koi doosre ka baap to nahin hai। apna baap nahin ho aur koi kahe - yeh aapka baap hai, ise yaad karo to yaad nahin kar sakenge na! lekin yeh to apna hai। apni cheez ko yaad karna kabhi mushkil nahin hota। paraaye ko yaad karna mushkil hota hai। aap to adhikaar se yaad karte ho ya bhagwan hai, bahut bada hai, soorya samaan hai - aise yaad karte ho? sab kuchh mera hai - is adhikaar se yaad karo।

roohaani gulaab ban saara din khushbu phailaate raho। khushbu aisi cheez hoti hai jo door vaalon ko bhi aakarshit karti hai। door se hi sochenge - yeh khushbu kahaan se aa rahi hai। to aapki roohaaniyat vishwa ko aakarshit karegi। dekho, roohaaniyat ki khushbu ne desh se videsh ko bhi aakarshit kiya na! videsh tak khushbu pahunchi! koi bhi kaam karte shubh sankalp se yeh khushbu phailaate raho। koi bhi kaam karte check karo ki buddhi kitne taraph ja rahi hai? na chaahte bhi anek taraph jaati hai, ek taraph nahin hoti। to jab aur taraph ja sakti hai to seva bhi to kar sakte ho na, yaad bhi kar sakte ho। bahut thoda samay hota hai jo full buddhi us kaam mein rehti hai। jo aisa koi kaam hoga - jaise doctors operation karte hain, zaroori operation hai to full buddhi hogi। baaki davaai de rahe hain, dekh rahe hain to buddhi aur kaam bhi karti hai। jab woh kar sakti hai to yeh kyon nahin kar sakti। man aur buddhi ki aadat hai chakra lagaane ki। chaahe gyaan ka chakra chalaao aur chaahe vyartha chalaao lekin chakkar chalta zaroor hai। aap svadarshan-chakra chalaao to aur chakkar khatma ho jaayenge।

to sabhi seva mein sahayogi ho? jise samay nahin milta, circumstance hain - woh haath uthaao। mansa seva to sab kar sakte ho na? busy rahne ke liye seva bahut achha saadhan hai। jitna apne ko busy rakhenge utna safe rahenge। chaahe mansa karo, chaahe vaacha karo, chaahe karmana karo lekin buddhi se busy zaroor raho। haath-paanv se to rehte ho lekin buddhi se busy raho। apna time-table banaao। jitna bada aadmi utna time-table fix hota hai। to aap bade-te-bade aadmi ho na! saare kalpa mein dhoondhakar ke aao braahmanon se bada koi hai? devtaayen bhi nahin hain। chaahe aap hi devta banenge lekin is jeevan ke aage woh bhi kuchh nahin hai। jeevan hai to brahman jeevan ati shreshtha hai। achha।

vardaan:- avyakt paalna dvaara shaktishaali ban last so fast jaane vaale first number ke adhikaari bhav

avyakt part mein aane vaali aatmaon ko purooshaartha mein teevragti ka bhaagya sahaj mila hua hai। yeh avyakt paalna sahaj hi shaktishaali banaane vaali hai isliye jo jitna aage badhna chaahe badh sakte hain। is samay last so fast aur fast so first ka vardaan praapta hai। to is vardaan ko kaarya mein lagaao arthaat samay pramaan vardaan ko swaroop mein laao। jo mila hai use use karo to first number mein aane ka adhikaar praapta ho jaayega।

slogan:- svamaan ki seat par set raho to sarva ka maan svatah praapta hoga।

lavleen sthiti ka anubhav karo

baap se sachcha pyaar hai to pyaar ki nishaani hai - samaan, karmaateet bano। ‘karaavanhaar' hokar karma karo, karaao। karmendriyaan aapse nahin karaaven lekin aap karmendriyon se karaao। kabhi bhi man-buddhi va sanskaaron ke vash hokar koi bhi karma nahin karo।