Murli du jour du mardi 25 janvier 2022

25-01-2022 praatahmurli om shanti "baapdaada"' madhuban

“meethe bachche - yeh tumhaari vaanaprastha avastha hai isliye ek baap ko yaad karna hai, nirvaandhaam mein chalne ki taiyaari karni hai''

prashn:- baap ke paas kis baat ka bhed nahin hai?

uttar:- gareeb va saahookaar ka। har ek ko purushaartha se apna oonch pad paane ka adhikaar hai। aage chal sabko apne pad ka saakshaatkaar hoga। baba kehte hain main hoon gareeb nivaaz isliye abhi gareeb bachchon ki sab aashaayen poori hoti hain। yeh antim samay hai। kiski dabi rahegi dhool mein… jo baap ko insure karte hain, unka saphal hota hai।

geet:- aakhir woh din aaya aaj....

om shanti। iska arth to bilkul simple hai। har ek baat second mein samajhne ki hai। second mein baap se varsa lena hai। bachche jaante hain ki behad ka baap aa gaya hai। parantu yeh nishchay bhi koi-koi ko sthaai baithta nahin hai। jaise laukik sambandh mein maa ko bachcha paida hota hai to jhat samajh jaata hai ki yeh janma de aur paalna karne vaali hai। to yahaan bhi jhat samajhna chaahiye na। ab tum bachche jaante ho bhakti ke baad hi bhagwan aate hain। ab bhakti kitna samay chalti hai, kab shuru hoti hai, yeh duniya mein koi nahi jaante sivaae tum bachchon ke। tum bata sakte ho - bhakti kab se shuru hui! manushya to kahenge parampara se chali aati hai। gyaan aur bhakti do cheezen zaroor hain। kehte hain yeh anaadi chalti aati hain। parantu anaadi ka bhi arth nahin samajhte। yeh drama ka chakra anaadi kaal se phirta rehta hai। unka aadi ant nahin hai। manushya to gapode lagaate rehte hain। kabhi kehte itne varsha hue, kabhi kehte itne varsha। baap aakar sab siddha kar bataate hain। shaastra aadi padhne se koi baap ki praapti to nahin hogi। baap ki praapti to second mein hoti hai। second mein jeevanmukti... yeh bhi kisko pata nahin ki baap kab aate hain। kalpa ki aayu lambi kar di hai। ab baap to jaante hain aur bachche bhi sab kuchh jaante hain parantu wonder yeh hai jo 10-20 varsha mein bhi koi ko poora nishchay nahin hota hai। nishchay hone ke baad phir to kabhi kah na saken ki yeh hamaara baap nahin hai। hai bhi bahut sahaj। tumko to bachcha banne mein bhi bahut time laga hai। 10-20 varsha mein bhi poora nishchay nahin hua hai। ab tum kisko parichay dete ho to second mein nishchay ho jaata hai। janak ki baat bhi pichhaadi ki hai kyonki din-pratidin bahut sahaj hota jaata hai। aisi achhi-achhi points nikalti hain jo jhat kisko nishchay ho jaae।

baap kehte hain bachche ashareeri bhav। yeh jo anek deh ke dharma hain, unko chhodo। asul to ek dharma tha na। ek se hi vriddhi hogi na। yeh hai hi variety manushya srishti jhaad, manushyon ki baat hai। variety dharmon ke jhaad ko bhi jaanna pade। dharmon ki conference hoti hai। parantu unhon ko pata hi nahin ki pahle-pahle poojya dharma kaun sa hai! buddhi mein aana chaahiye। bhaarat praacheen dharma vaala hai to zaroor praacheen dharma parampita paramatma ne hi racha hoga। bhaarat mein gaaya bhi jaata hai shiv jayanti। mandir bhi hain dheron ke dher.. to sabse bade se bada mandir baap ka hai - nirvaandhaam। jahaan ham aatmaayen bhi baap ke saath rehti hain। mandir rahne ka sthaan hota hai na। to yeh mahtatva kitna bada mandir hai। tumhaari buddhi mein aana chaahiye ki brahm tatva jo sabse oonche te ooncha mandir hai, ham sab vahaan ke rahne vaale hain। vahaan soorya, chaand nahin hote kyonki raat-din nahin hota। asul hamaara roohaani mandir woh nirvaandhaam hai। vahi shivaalay hai, jahaan ham shivbaaba ke saath rehte hain। shivbaaba kehte hain main us shivaalay ka rahne vaala hoon। woh hai behad ka shivaalay। tum shiv ke bachche bhi vahaan rehte ho। woh hai incorporeal shivaalay। phir corporeal mein aate hain to yahaan rahne ka sthaan banega। abhi shivbaaba yahaan hai, is shareer mein baitha hua hai। yeh hai chaitanya shivaalay, jisse tum baatcheet kar sakte ho। woh nirvaandhaam bhi shivbaaba ka shivaalay hai, jahaan ham aatmaayen rehti hain। woh ghar sabko yaad padta hai। vahaan se ham aate hain part bajaane - sato rajo tamo mein, usmein har ek ko aana hi hai। yeh baat duniya mein kiski buddhi mein nahin hai, jo bhi aatmaayen hain un sabko apna-apna anaadi part mila hua hai, jiski na aadi hai, na ant hai। tum bachche jaante ho ham asul us shivaalay ke rahne vaale hain। shivbaaba jo svarga sthaapan karte hain unko bhi shivaalay kaha jaata hai। shivbaaba ka sthaapan kiya hua svarga। vahaan bhi bachche hi rehte hain। unhon ko yeh raajya bhaagya kaise mila! woh hai satayug ka aadi, abhi hai kaliyug ka ant। to satayug mein devi-devtaaon ko heaven ka maalik kisne banaaya। yahaan bhi kitne achhe-achhe khanda hain। America sabse first class khanda hai। bahut paise vaala aur taakat vaala bhi hai। is samay sabse highest hai। brahaspati ki dasha baithi hui hai। parantu unke saath-saath raahu ki dasha bhi baithi hui hai। is samay raahu ki dasha to sabke oopar baithi hui hai। vinaash to sabka hona hai। bhaarat jo sabse saahookaar tha, ab bhaarat gareeb hai। yeh sab kuchh maaya ka bhabhka hai। maaya ka full force hai isliye manushya inko svarga samajhte hain। America mein dekho kya laga pada hai। manushya aakarshit ho jaate hain। baambe bhi dekho kitna fashionable ho gaya hai। aage thode hi aisa tha। maaya ka poora pomp hai। kitne 8-10 manzil ke mahal banaate hain। svarga mein thode hi itni manjilen hoti hain। vahaan double stori bhi nahin hoti। yahaan hi banaate hain kyonki jameen nahin hai। jameen ka bahut bhaav badh gaya hai। to manushya samajhte hain yahi svarga hai। plan banaate rehte hain। parantu kehte hain nar chaahat kuchh aur... manushya kitni chinta mein rehte hain। maut to sabke liye hai। sabke gale mein maut ki phaansi hai। abhi tum bhi phaansi par ho। tumhaari buddhi vahaan nai duniya mein lagi hui hai। abhi sabki vaanaprastha avastha mein jaane ka samay hai isliye baap kehte hain ab mujhe yaad karo। main khud tumko direction deta hoon ki tum sabki vaanaprastha avastha hai, main sabko lene liye aaya hoon। machchharon sadrishya tum sabko jaana padega। 84 janmon ka chakra poora hua, ab mujhe jeete ji yaad karo। ham jeete ji svarga mein jaane ke liye taiyaar baithe hain। aur koi bhi svarga mein jaane ke liye taiyaari nahin karte। agar svarga jaane ki khushi ho to phir beemaari mein davaai aadi bhi na karen। tum jaante ho woh svarga mein to jaate nahin hain। ab ham sweet home mein ja rahe hain। woh hai god father ka hom athva roohaani shivaalay। phir satayug ko jismaani shivaalay kaha jaata hai। us svarga mein jaane ke liye ham purushaartha kar rahe hain। baba ne samjhaaya hai brahma ka din aur brahma ki raat mashhoor hai। jab raat poori hoti hai to main aata hoon। lakshmi-naaraayan ka din aur raat nahin kahenge। bhal hain vahi parantu brahma ko din aur raat ka gyaan hai। vahaan lakshmi-naaraayan ko yeh gyaan nahin isliye brahma aur brahman braahmaniyaan samajhte hain ki shiv ki raatri kab hoti hai। duniya to in baaton ko nahin jaanti। shiv hai niraakaar, woh kaise aaye - yeh bhi poochhna pade na। shiv jayanti par tum bahut service kar sakte ho। raajdhaani sthaapan ho rahi hai। abhi bahut chhota jhaad hai aur is jhaad ko toofaan aate hain, aur jhaadon ko itne toofaan nahin aate। usmein to ek ke pichhaadi aur sab aate jaate hain। yahaan tumhaara naya janma hai। maaya ke toofaan bhi saamne khade hain aur kisko toofaan ka saamna nahin karna padta। yahaan dharma ki sthaapna mein maaya ke toofaan aate hain। bahut oonchi manzil hai। vishwa ka baadshaah banna, koi nai baat nahin hai। anek baar tumne is toofaan se paar hokar apna raajya bhaagya liya hai। jo jis reeti purushaartha karta hai, unka saakshaatkaar hota jaata hai। jitna aage chalenge tumko saakshaatkaar hoga ki yeh kaun sa pad paayenge। maaloom to padta hai na ki yeh kaisa purushaartha karta hai। gareeb athva saahookaar ki baat nahin hai। geet bhi suna ki aakhir woh din aaya... gareeb nivaaz baba aaya। baba kehte hain mujhe koi saahookaaron ko dhan nahin dena hai। woh to hain hi saahookaar। unhon ke liye to svarga yahaan hai। karodapti hain, aage karodapti koi mushkil hota tha। abhi to karod manushyon ke paas deevaaron mein chhipe pade hain। parantu yeh kiske kaam aane nahin hain। pet koi jyaada nahin khaata hai। thagi se paise ikatthe karne vaalon ko neend nahin aati hogi। pata nahin kahaan government chhaapa na maare। baap kehte hain - yaad rakhna - yeh antim samay hai। ab kiski dabi rahegi dhool mein... saphli hogi saai jo kharche naam dhani ke। dhani to ab svarga ka maalik banaate hain। ab tum baap ke paas apne ko insure karo। maut to saamne khada hai। sab aashaayen tumhaari ab poori hoti hai। baap gareebon ko uthaate hain। saahookaar ka ek hajaar, gareeb ka ek roopaya - ek samaan। aksar karke gareeb hi aate hain। kiska 100 paghaar, kiska 150.. duniya mein manushyon ke paas to karod hain, unhon ke liye yeh svarga hai। woh kabhi nahin aayenge। na baba ko darkaar hai। baba kahenge tum bhal apna makaan aadi banaao। centre kholo, ham paisa kya karenge। sannyaasi log to bahut flat aadi banaate hain, unke paas bahut milkiyat rehti hai। yeh rath bhi anubhvi hai। ab main aaya hoon gareebon ko saahookaar banaane, to ab himmat karo। karodapti jo hain unke paise koi kaam mein aane vaale nahin hain। yahaan paise aadi ki koi baat nahin। baap sirf kehte hain manamnaabhav। kharche ki baat nahin। yeh makaan banaaya hai, woh bhi bada simple so bhi ant samay tumhaare hi rahne ke liye hai। tumhaara yaadgaar yahaan khada hai। abhi phir chaitanya mein sthaapna kar rahe ho। phir yeh jad yaadgaar khalaas ho jaayenge। tumko yeh likhna chaahiye ki aabu mein aakar jisne ye mandir nahin dekha aur inhon ke occupation ko nahin jaana to kuchh nahin dekha.. tum kahenge ham vahi chaitanya mein ab baithe hain। in jad chitron ka raaz samjha sakte hain। kahenge yeh ham hain। hamaara jad yaadgaar bana hua hai। wonderful mandir yeh hai, wonder hai na! mama, baba aur bachche yahaan chaitanya mein baithe hain। vahaan jad chitra khade hain। mukhya hai yeh shiv। brahma, jagat amba aur lakshmi-naaraayan। kitna achhi reeti samjhaate hain। phir bhi baap ka ban aur baap ko phaarakti de dete hain। yeh bhi koi nai baat nahin। baap ka ban phir bhaaganti ho jaate hain। bhaagantiyon ka bhi ham chitra rakh sakte hain। agar pakka nishchay hai to apna raajaai ka chitra bana lo to smriti rahegi ham bhavishya mein double sirtaaj svarga ke maalik banenge। agar baap ko chhod diya to taaj gir padega। yeh badi wonderful baat samajhne ki hai। baap ko yaad karo। unse hi varsa milta hai। usko hi second mein jeevanmukti kaha jaata hai। bhavishya ke liye baba tumko laayak bana rahe hain। manushya daan-punya karte hain doosre janma ke liye। woh hai alpakaal ki praapti। tumhaari to is padhaai se bhavishya 21 janmon ke liye praalabdha banti hai। koi is maat-pita ki aagya par poora chale to ekdam tar jaayen। maat-pita bhi khush honge। amal mein nahin laate ho to pad bhi kam ho jaata hai। shivbaaba kehte hain main nishkaami hoon.. abhokta hoon ... main yeh toli aadi kuchh bhi nahin khaata hoon। vishwa ki baadshaahi bhi tumhaare liye hai। yeh khaan-paan bhi tumhaare liye hai, main to servant hoon। mere aane ka time bhi mukrar hai। kalpa-kalpa apne bachchon ko raajya-bhaagya dekar main nirvaandhaam mein baith jaata hoon। baap ko shal koi na bhoole। baap to tumko svarga ki baadshaahi dene aaye hain, to bhi tum unko bhool jaate ho! kisko baap ka parichay dene ka bhi bahut sahaj tareeka bataaya hai - poochho, parampita paramatma se aapka kya sambandh hai? prajaapita brahma se aapka kya sambandh hai? donon baap hai। woh niraakaar, yeh saakaar। baap ko sarvavyaapi kahne se varsa kaise milega। shreemat bhagwan ki milti hai। shreemat se hi tum shreshtha se shreshtha bante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ke toofaanon ko paar karte hue baap se poora-poora varsa lena hai। maat-pita ki aagyaaon ko amal mein laana hai।

2) puraani duniya ko bhool nai duniya ko yaad karna hai। maut ke pahle baap ke paas svayan ko insure kar dena hai।

vardaan:- baalak so maalik ki seedhi chadhne aur utarne vaale bephikra, double light bhav

sada yeh smriti rahe ki maalik ke saath baalak bhi hain aur baalak ke saath maalik bhi hain। baalak banne se sada bephikra, double light rahenge aur maalik anubhav karne se maalikpan ka roohaani nasha rahega। raay dene ke samay maalik aur jab majority final karte hain to us samay baalak, yeh baalak aur maalik banne ki bhi ek seedhi hai। yeh seedhi kabhi chadho, kabhi utro, kabhi baalak ban jaao, kabhi maalik ban jaao to kisi bhi prakaar ka bojh nahin rahega।

slogan:- jo puroosh (aatma) samajh, rath (shareer) dvaara kaarya karaate hain vahi sachche purooshaarthi hain।

lavleen sthiti ka anubhav karo

seva va svany ki chadhti kala mein saphalta ka mukhya aadhaar hai - ek baap se atoot pyaar। baap ke sivaae aur kuchh dikhaai na de। sankalp mein bhi baba, bol mein bhi baba, karma mein bhi baap ka saath, aisi lavleen sthiti mein rah ek shabd bhi bolenge to woh sneh ke bol doosri aatma ko bhi sneh mein baandh denge। aisi lavleen aatma ka ek baba shabd hi jaadu mantra ka kaam karega।