Murli du jour du mercredi 26 janvier 2022

26-01-2022 praatahmurli om shanti "baapdaada"' madhuban

“meethe bachche - sangam par tumhein behad ka baap mila hai, tum aapas mein bhaai-behen ho, tumhein baap se varsa lena hai।''

prashn:- baap ki kis shreemat se har cheez ko patthar se paaras bana sakte ho?

uttar:- baap ki shreemat hai bachche, tumhaare paas jo kuchh bhi hai, use eeshvareey bank mein jama kar do to woh patthar se paaras ho jaayega। baba to dene vaala hai, woh tumse kuchh bhi leta nahin lekin tumhaare paas jo bhi extra hai usko saphal karo। kisi se karja aadi nahin lena hai। toone raat ganvaai soke…

om shanti। geet to suna hai। jo achhe-achhe geet hain, woh centres par hone chaahiye। yeh to baba ne banvaaye hain। tumhaari buddhi mein aur koi shaastra aadi nahin hain। tum sab kuchh padhe hue ho, jaante ho। parantu abhi woh kuchh bhi buddhi mein nahin hai। baap kehte hain padha hua sab bhool jaao, aap muye mar gai duniya। samajhna hai ham aatma hain, abhi ham jaate hain apne ghar। phir is shaastron ki padhaai aadi ko ham kya karenge! ved shaastra to saath nahin chalne hain। haan yeh padhaai saath chalti hai। yeh hai amarlok ke liye amraktha। hamaara baba bhi hai amarnaath। ham sab paarvatiyaan hain। amar katha sun rahi hain, shivbaaba dvaara। woh hai oonche te ooncha, woh amarnaath hai shivbaaba। amarnaath par barpha ka ling banaate hain, jiski pooja aadi karte hain। ab niraakaar ki pooja thode hi ho sakegi। aise nahin apne aap koi shivling ban jaata hai। khud banaate hain। phir jhoothi baaten bahut sunaate hain। amarnaath athva shankar paarvati vahaan kahaan se aaye। woh to koi maan-sarovar nahin। sachcha-sachcha maan-sarovar yeh (brahma) hai। niraakaar shivbaaba hai gyaan ka saagar, woh jab tak inmen na aaye tab tak maan-sarovar kaise ho! aatma mein gyaan hai parantu sunaave kaise? jab tak manushya tan na le। to tum sab ho gyaan maan-sarovar। parantu nambarvaar purushaartha anusaar hain। koi badi nadi hai, koi kainaal hai, koi tubka hai। yeh baba baith samjhaate hain। bachche jaante hain ham hain brahmaakumaar aur brahmaakumaari। brahma ka baap hai shiv। yeh to buddhi mein hai na - ham shivbaaba ke potre potriyaan hain। yoon to shivbaaba ke bachche hain lekin abhi shareer mein aaye hain। woh hai niraakaar isliye unke potre brahma ke bachche aur bachchiyaan hain। to ham bhaai-behen thahre। sabhi ko varsa milta hai daade se। tum yahaan baithe ho, jaante ho ham brahmaakumaar-kumaariyaan hain। shivbaaba hamaara daada hai। aise jo nishchay karte hain - unko kaha jaata hai eeshvareey aulaad। tum kehte ho ham eeshvareey kul ke hain। eeshvar se varsa pa rahe hain। bhaai-behen hone ke kaaran ham vikaar mein ja nahin sakte। nahin to woh criminal assault ho jaae। usko bahut kharaab kaha jaata hai isliye baba kehte hain bachche khabardaar rehna। bhaai-behen kahlaakar phir agar vikaar mein gaye to bahut kadi saza bhogni padegi। satguru baap ka nindak thaur na paaye। woh guru log to bahut hain। yeh to ek hi baar satguru milte hain। yeh hai behad ka baap। satayug mein phir daivi baabaayen milenge। ab sangam par tum ho eeshvareey baba ke bachche aur bachchiyaan। shivbaaba brahma dvaara padha rahe hain। kehte hain hamko god ne knowledge di। mama hai goddess oph knowledge। to zaroor children bhi kahenge - ham hain goddess aaph knowledge। maat-pita knowledge de rahe hain srishti chakra ki। god brahma ko nahin kahenge। god to ek hai, baaki rahe unke bachche - brahma aur brahmaakumaar kumaariyaan। abhi yeh (brahma) goddess to gupta hai aur mama goddess aaph knowledge to pratyaksha hai। vaastav mein bachche to tum brahma ke thahre na। unko kaha jaata hai god aaph knowledge। unko knowledge mili shiv se। phir bhi brahma ko god nahin kah sakte। god ek hai। tum jaante ho kalpa pahle bhi zaroor parampita paramatma ne brahma dvaara srishti rachi hogi to zaroor pahle-pahle brahman honge। doosre jo yagya hote hain, unmein koi aisa nahin hota jo varshon tak yagya chale। aksar karke 7 roz chalta hai। is yagya ko kaha jaata hai imperishebal (avinaashi) yagya arthaat bahut samay chalne vaala roodra gyaan yagya। kitna samay chalne vaala hai, yeh koi nahin jaante। ant tak chalna hi hai। is puraani duniya ki saamagri svaaha hone vaali hai aur koi aisa roodra gyaan yagya rach nahin sakta hai। bhakti maarga mein phir is naam se chhote-chhote yagya rachte hain। koi roodra yagya bhi kehte hain। roodra gyaan yagya rachenge to vahaan geeta sunaayenge ya ved aadi sunaayenge। roodra ne to geeta sunaai hai parantu phir bhool jaate hain। krishna ka naam kah dete hain। yeh nahin jaante roodra gyaan yagya se sooryavanshi, chandravanshi dynasty bani।

abhi tum saamne baithe ho। zaroor shivbaaba, brahma baba yaad padega। woh brahman log to sirf kah dete hain ham brahma ki aulaad hain। devtaaon ki aulaad devta honge। kshatriy ki aulaad kshatriy honge। varna to hain na। inko koi jaante nahin। jab koi ko samjhaao to bolo tum bhi bi.ke. ho। prajaapita naam to hai na। jo past hua hai so phir zaroor present hoga na। gaaya hua hai parampita paramatma brahma mukh kamal se brahman aur sooryavanshi, chandravanshi dharma ki sthaapna karte hain। nahin to poochhna chaahiye prajaapita brahma jo the woh kahaan gaye? srishti rachi hogi to pahle-pahle brahma mukh vanshaavli brahman honge। tum jaante ho - ham brahma mukh vanshaavli brahman hain। mama baba kehte hain, patra likhte hain। board bhi likha hua hai। tum samjha sakte ho - yeh shivbaaba tumhaara kya lagta hai! sarvavyaapi to kah na saken। pita ko sarvavyaapi thode hi kahenge। achha bhala brahma tumhaara kya lagta hai? yeh zaroor hokar gaye hain tab to yaadgaar bana hua hai। ab phir rachna rach rahe hain। to hamaara baap brahma hai। parampita paramatma brahma mukh kamal dvaara padha rahe hain। ham un dvaara raajayog seekhte hain, tum bhi seekho to 21 janmon ke liye baap se varsa paayenge। nahin to nahin paayenge। koton mein koi aakar gyaan sunenge। jo brahma ki aulaad 5 hajaar varsha pahle bane honge। sooryavanshi, chandravanshi pad paaya hoga, vahi paayenge। abhi to nahin hai na। phir se banenge। baap aaye hain patit se paavan, manushya se devta banaane। phir bhi brahma hi chaahiye। ham bi.ke. ab eeshvareey aulaad hain। yagya racha hai, brahman zaroor banenge। braahmanon ki choti hai na। parantu tumne shaayad sada sukh ka varsa nahin liya hoga, tab maante nahin ho। itne sab dher bi.ke. hain, vriddhi hoti hi rahegi। abhi tum baapdaada ki yaad mein, parampita paramatma ke sammukh baithe ho। isko kaha jaata hai omni present। hajoor to abhi haazir hai na। kya karte hain? zaroor karma karte honge। karma, akarma, vikarma ka raaz samjha rahe hain, sammukh। paramatma hi manushya srishti ka beejroop hai, jismen saare srishti ke aadi-madhya-ant ka gyaan hai, woh knowledgeful hai। aise nahin ki har ek manushya ki buddhi mein kya hai, woh jaanenge, nahin। baap kehte hain main aakar tum bachchon ko raajayog aur gyaan sikhlaata hoon, jis yog lagaane se tum paavan ban jaayenge। aur is srishti chakra ko samajhne se purity ka taaj aur ratan jadit taaj aa jaayega, isko avinaashi gyaan ratna kehte hain। yog se health, gyaan se wealth milti hai। health wealth hai to happiness bhi hai। tumko health, wealth, happy sab kuchh milta hai। yog se vikarma vinaash ho aur light ka taaj aa jaayega। devtaayen ever healthy, wealthy rehte hain। svadarshan chakradhaari bante hain aur gyaan ratna dhaaran karte hain, jisse tum wealthy ban jaayenge। isko hi nature cure kaha jaata hai। aatma pavitra ho gai phir shareer bhi pavitra milega, unko kaha jaata hai devta। pavitra bhi hain to healthy, wealthy bhi hain। satayug mein bhaaratvaasiyon ki aayu 150 varsha thi। abhi to bhogi ban gaye hain, to akaale mrityu ho jaata hai, woh thi pavitra duniya। yeh hai apvitra duniya।

baap kehte hain jab dharma glaani hoti hai to main aata hoon। apne badon ko gaali dena - yeh bhaarat mein hi hota hai। yada-yadaahi dharmasya... yahaan ki baat hai। baap baith samjhaate hain ki maaya ne bilkul hi kapoot bana diya hai। kapoot bhrashtaachaari ko kaha jaata hai। phir shreshthaachaari kaun banaayega? nai duniya shreshthaachaari hai। nai so puraani zaroor banti hai। puraani jad-jadeebhoot zaroor hoti hai। har cheez aise hoti hai। sab kuchh khatma hona hi hai। is shareer ki bhi tumko paalna karni hai aur saath-saath yeh padhaai bhi karni hai। aise bahut bachche hain jo grihastha vyavhaar mein rehte, naukri aadi karte hain phir oonch pad paane ke liye shreemat par bhi poora chalte hain। baba ko maaloom hoga to raay denge - is haalat mein aise karo। bataayenge - baba hamaare paas yeh yeh hai। baba kahenge achha bhal makaan banaao। bachche aadi nahin hain to makaan kislie! kahenge achha centre khol do। bahuton ka kalyaan ho jaayega। ek kamra gyaan dene ke liye rakho। property tumhaari hi rahegi। sirf service arth inhon ko de do। bhal kiraaya bhi le lo। kiraayedaar ko kabhi dhani (maalik) dakhlandaazi (interfere) nahin karte। aise centre kholte jaao। pahle to centre ki poori sambhaal karo। phir kuchh bachat hai to baap ko madad karni chaahiye। hai to bhal de sakte ho। centre par madad dene se bhi tumhaara bhavishya banta hai। extra hai to unko saphal karna hai। nahin to khatma ho jaayega। manushya daan karte hain to doosre janma mein uska phal milta hai। yeh bhi karte ho seva arth, to inka bhavishya 21 janma liye milta hai। baaki bachchon ko kabhi kiska karja nahin rakhna hai। karz hai merge। karji ko bahut phurna rehta hai। karz na de to ijjat chali jaaye। manushya to bahut karja uthaate hain। shaadiyon par, teerthon par bahut kharcha karte hain। baaki pet athva roti par koi jyaada kharcha nahin hota hai। phajool kharcha bahut karte hain। shaadi to barbaadi ho jaati hai। gareeb thode paise se hi kaam chalaate hain। tum bhi baap ki raay lete chalo। koi bhi kharaab aadat; bahut chaay peena, cigarette peena, yeh koi aadat nahin honi chaahiye। shreemat par chalna chaahiye। manushya paisa ikattha karte hain। tumhaari yeh hai number one bank। ismen 4 aana daalo to bhavishya mein heera ban jaayega। patthar se sona ban jaata hai। tumhaari har cheez ko paaras bana dete hain। shivbaaba ka bhandaara sadaiv bharpoor hai। dher bachche hain। bhandaara kaise khutega, impossible hai। phaaltu to koi se lena nahin hai। mahal thode hi banaane hain। baba hai dene vaala। kaam mein aana hoga to lenge। nahin to kyon lenge, jo phir dena pade। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi kharaab aadat nahin rakhni hai। shreemat par apna ek-ek paisa saphal kar bhavishya ke liye jama karna hai।

2) eeshvareey kul ka ban koi bhi aasuri kaarya nahin karna hai। satguru ke nindak kabhi nahin banna hai।

vardaan:- mere ko tere mein parivartan kar sarva aakarshan mukta banne vaale double light bhav

laukik sambandhon mein seva karte hue sada yahi smriti rahe ki ye mere nahin hain, sabhi baap ke bachche hain। baap ne inki seva arth humein nimitta banaaya hai। ghar mein nahin rehte lekin seva-sthaan par rehte hain। mera sab tera ho gaya। shareer bhi mera nahin। mere mein hi aakarshan hoti hai। jab mera samaapta ho jaata hai tab man buddhi ko koi bhi apni taraph kheench nahin sakta। brahman jeevan mein mere ko tere mein badalne vaale hi double light rah sakte hain।

slogan:- vighna proof banne ke liye duaaon ka khajaana jama karo।

lavleen sthiti ka anubhav karo

kisi bhi baat ke vistaar mein na jaakar, vistaar ko bindi lagaae bindi mein sama do, bindi ban jaao, bindi laga do, bindi mein sama jaao to saara vistaar, saari jaal second mein sama jaayegi aur samay bach jaayega, mehnat se chhoot jaayenge। bindi ban bindi mein lavleen ho jaayenge। koi bhi kaarya karte baap ki yaad mein lavleen raho।