Murli du jour du dimanche 6 février 2022

06-02-22 praatahmurli om shanti ''avyakt-baapdaada'' revise 06-01-90 madhuban

holeehans ki paribhaasha

aaj gyaan-saagar baap holeehanson ka sangathan dekh rahe hain। holeehans arthaat svachchhata aur visheshta vaali aatmaaen। svachchhata arthaat man-vachan-karma, sambandh sarva mein pavitrata। pavitrata ki nishaani sada hi saphed rang dikhaate hain। aap holeehans bhi saphed vastradhaari, saaph dil arthaat svachchhata-swaroop ho। tan-man aur dil se sada bedaag arthaat svachchha ho। agar koi tan se arthaat baahar se kitna bhi svachchha ho, saaph ho lekin man se saaph na ho, svachchha na ho to kehte hain ki pahle man ko saaph rakho। saaph man va saaph dil par saaheb raazi hota hai। saath-saath saaph dil vaale ki sarva muraad arthaat kaamnaayen poori hoti hain। hans ki visheshta svachchhata arthaat saaph hai, isliye aap brahman aatmaon ko holeehans kaha jaata hai। check karo ki mujh holeehans aatma ki chaaron hi baaton mein arthaat tan-man-dil aur sambandh mein svachchhata hai? sampoorn svachchhata va pavitrata yahi is sangamayug mein sabka lakshya hai isliye hi aap brahman so devtaaon ko sampoorn pavitra gaaya jaata hai। sirf nirvikaari nahin kehte lekin sampoorn nirvikaari kaha jaata hai। 16 kala sampanna kaha jaata hai। sirf 16 kala nahin kehte lekin usmein sampanna। gaayan aapke hi devta roop ka hai lekin bane kab? brahman jeevan mein va devta jeevan mein? banne ka samay ab sangamayug hai isliye check karo ki kahaan tak arthaat kitne percent mein svachchhata arthaat pavitrata dhaaran ki hai?

tan ki svachchhata arthaat sada is tan ko aatma ka mandir samajh us smriti se svachchha rakhna। jitni moorti shreshtha hoti hai utna hi mandir bhi shreshtha hota hai। to aap shreshtha moortiya ho ya saadhaaran ho? brahman aatmaaen saare kalpa mein number one shreshtha aatmaayen! braahmanon ke aage devtaayen bhi sone tulya hain aur brahman heere tulya hain! to aap sabhi heere ki moortiyaan ho। kitni oonchi ho gai! itna apna svamaan jaan is shareer roopi mandir ko svachchha rakho। saada ho lekin svachchha ho। is vidhi se tan ki pavitrata sada roohaani khushbu ka anubhav karaayegi। aisi svachchhata, pavitrata kahaan tak dhaaran hui? dehbhaan mein svachchhata nahin hoti lekin aatma ka mandir samajhne se svachchha rakhte ho। aur yeh mandir bhi baap ne aapko sambhaalne aur chalaane ke liye diya hai। is mandir ka trustee banaaya hai। aapne to tan-man-dhan sab de diya na! abhi aapka to nahin hai। mera kahenge ya tera kahenge? to trasteepan svatah hi nashtomoha arthaat svachchhata aur pavitrata ko apne mein laata hai। moh se svachchhata nahin, lekin baap ne seva di hai - aise samajh tan ko svachchha, pavitra rakhte ho na va jaise aata hai vaise chalaate rehte ho? svachchhata bhi roohaaniyat ki nishaani hai।

aise hi man ki svachchhata ya pavitrata iski bhi percentage dekho। saare din mein kisi bhi prakaar ka ashuddha sankalp man mein chala to isko sampoorn svachchhata nahin kahenge। man ke prati baapdaada ka direction hai - man ko mere mein lagaao va vishwa-seva mein lagaao। manamnaabhav - is mantra ki sada smriti rahe। isko kehte hain man ki svachchhata va pavitrata। aur kisi taraph bhi man bhatakta hai to bhatakna arthaat asvachchhata। is vidhi se check karo ki kitni percent mein svachchhata dhaaran hui? vistaar to jaante ho na?

teesri baat - dil ki svachchhata। isko bhi jaante ho ki sachchaai hi saphaai hai। apne sva-unnati arth jo bhi purushaartha hai jaisa bhi purushaartha hai, woh sachchaai se baap ke aage rakhna। to ek - svayan ke purushaartha ki svachchhata। doosra - seva karte sachchi dil se kahaan tak seva kar rahe hain, iski svachchhata। agar koi bhi svaartha se seva karte ho to usko sachchi seva nahin kahenge। to seva mein bhi sachchaai-saphaai kitni hai? koi-koi sochte hain ki seva to karni hi padegi। jaise laukik government ki duty hai, chaahe sachchi dil se karo, chaahe majboori se karo, chaahe albele banke karo, karni padti hai na। kaise bhi 8 ghante paas karne hi hain। aise is almighty government dvaara duty mili hui hai- aise samajh ke seva karna, isko sachchi seva nahin kaha jaata। duty sirf nahin hai lekin brahman-aatmaon ka nizi sanskaar hi seva hai। to sanskaar svatah hi sachchi seva ke bina rahne nahin dete। to aise check karo ki sachchi dil se arthaat brahman-jeevan ke svatah sanskaar se kitne percent ki seva ki? itne mele kar liye, itne course kara liye lekin svachchhata aur pavitrata ki percent kitni rahi? duty nahin hai lekin niji sanskaar hai, sva-dharma hai, sva-karma hai।

chauthi baat - sambandh mein svachchhata। iska saar roop mein vishesh yeh check karo ki santushtata roopi svachchhata kitne percent mein hai? saare din mein bhinna-bhinna variety aatmaon se sambandh hota hai। teen prakaar ke sambandh mein aate ho। ek - brahman parivaar ke, doosra - aaye hue jigyaasu aatmaon ke, teesra - laukik parivaar ke। teenon hi sambandh mein saare din mein svayan ki santushtata aur sambandh mein aane vaali doosri aatmaon ke santushtata ki percentage kitni rahi? santushtata ki nishaani svayan bhi man se halke aur khush rahenge aur doosre bhi khush honge। asantushtata ki nishaani - svayan bhi man se bhaari honge। agar sachche purushaarthi hain to baar-baar na chaahte bhi ye sankalp aata rahega ki aise nahin bolte, aise nahin karte to achha। yeh bolte the, yeh karte the - yeh aata rahega। albele purushaarthi ko yeh bhi nahin aayega। to yeh bojh khush rahne nahin dega, halka rahne nahin dega। sambandh ki svachchhata arthaat santushtata। yahi sambandh ki sachchaai aur saphaai hai isliye aap kehte ho - “sach to bitho nach'' arthaat sachcha sada khushi mein naachta rahega। to suna, holeehans ki paribhaasha? agar satyata ki svachchhata nahin hai to hans ho lekin holeehans nahin ho। to check karo - sampanna aur sampoorn ka jo gaayan hai, woh kahaan tak bane hain? agar drama anusaar aaj bhi is shareer ka hisaab samaapta ho jaae to kitni percentage mein paas honge? va drama ko kahenge - thoda samay thahro! yeh to sochkar nahin baithe ho ki chhote-chhote to jaane vaale hain hi nahin? ever ready ka arth kya hai? samay ka intajaar to nahin karte ki abhi 10-11 varsha to hain? bahut karke 2000 ka hisaab sochte hain! lekin srishti ke vinaash ki baat alag hai, apne ko ever ready rakhna alag baat hai, isliye yeh usse nahin milaana। bhinna-bhinna aatmaon ka bhinna-bhinna part hai isliye yeh nahin socho ki mera advance party mein to nahin hai ya mera to vinaash ke baad bhi part hai! koi aatmaon ka hai lekin main ever ready rahoon। nahin to albelepan ka ansh prakat ho jaayega। ever ready raho, phir chaahe 20 varsha jinda raho koi harja nahin। lekin aise aadhaar par nahin rehna। isko kehte hain holeehans। gyaan-saagar ke kanthe par aaye ho na। to aaj holeehans ki svachchhata sunaai phir visheshta sunaayenge।

teachers ko check karna aata hai na! teachers ko vishesh samarpit hone ka bhaagya mila hua hai। chaahe pravritti vaale bhi man se samarpit hain phir bhi teachers ka vishesh bhaagya hai। kaam hi yaad aur seva ka hai। chaahe khaana banaati ya kapde dhulaai karti - woh bhi yagya seva hai। woh bhi alaukik jeevan prati seva karti ho। pravritti vaalon ko donon taraph nibhaana padta hai। aapko to ek hi kaam hai na, double to nahin hai? jo sachchaai aur saphaai se baap aur seva mein sada lage rehte hain, unhein koi aur mehnat karne ki aavashyakta nahin padti hai। sunaaya tha ki yogya teacher ka bhandaara aur bhandaari sada bharpoor rahega। phikra nahin karna padega - agla maas kaise chalega, mela kaise hoga, seva ke saath-saath saadhan svatah praapta honge। roohaani aakarshan seva aur sevaakendra svatah hi badhaati rehti hai। jab jyaada sochte ho ki jigyaasu kyon nahin badhte, thaharte kyon nahin, chale kyon jaate… to jigyaasu nahin thaharte। yogayukta hokar roohaaniyat se aahvaan karte ho to jigyaasu svatah hi badhte hain। aise hota hai na? to man sada halka rakho, kisi prakaar ka bojh nahin rahe। kisi bhi prakaar ka bojh hai chaahe apna, chaahe seva ka, chaahe seva saathiyon ka to udne nahin dega - seva bhi oonchi nahin uthegi isliye sada dil saaph aur muraad haansil karte raho। praaptiyaan aapke saamne svatah hi aayengi। kya suna? sarva roohaani praaptiyaan hain hi braahmanon ke liye to kahaan jaayengi! adhikaar hi aap logon ka hai। adhikaar koi chheen nahin sakta। achha!

sarva holeehanson ko, chaaron or ke sachche saaheb ko raazi karne vaale sachchi dil vaali shreshtha aatmaon ko, sada svayan ko ever ready rakhne vaale number one bachchon ko, sada apne ko gaayan yogya sampoorn aur sampanna banaane vaale, baap ke sameep bachchon ko, sada apne ko amoolya heere tulya anubhav karne vaale anubhvi aatmaon ko baapdaada ka yaad-pyaar aur namaste।

mahaaraashtra group se avyakt baapdaada ki mulaakaat :- sada khushhaal rehte ho? khushhaal arthaat bharpoor, sampanna। khushhaali svayan ko bhi priy auron ko bhi priy lagti hai। jahaan khushhaali nahin hoti, use kaanton ka jangal kehte hain। to aap sabki jeevan khushhaal ban gai hai। aur chaal kaun si ho gai? udti kala vaali pharishton ki chaal ho gai। to haal bhi achha aur chaal bhi achhi। duniya vaale milte hain to haal-chaal poochhte hain na! to aapka kya haalchaal hai? haal hai khushhaal aur chaal hai pharishton ki chaal। donon hi achhe hain na? khushhaali mein koi kaante nahin aayenge। pahle kaanton ke jangal mein jeevan thi, abhi badal gai। abhi phoolon ki khushhaali mein aa gaye। sada jeevan mein divyagunon ke phoolon ki phulvaadi lagi hui hai। divyagunon ke guldaste ka chitra banaate hain na, woh divyagunon ka guldasta kaun sa hai? aap ho na ya doosre koi hain? kaanton ka kabhi guldasta nahin banta, phoolon ka guldasta banta hai। sirf patte hi honge to bhi kahenge - guldasta theek nahin hai। to aap svayan divyagunon ka guldasta arthaat khushhaal ho gaye। jo bhi aapke samparka mein aayega use divyagunon ke phoolon ki khushbu aati rahegi aur khushhaali dekh karke khush honge। shakti ka bhi anubhav karenge isliye aajkal doctors bhi kehte hain - bageeche mein jaakar paidal karo। to khushhaali auron ko bhi shaktishaali banaati hai aur khushi mein bhi laati hai isliye aap log kehte ho ki ham ever happy hain। challenge bhi karte ho ki agar kisi ko ever happy banna ho to hamaare paas aaye। aap sabhi ko baap ki smriti dilaayenge। to ever healthy, ever wealthy aur ever happy - yeh aapka janmasiddha adhikaar hai। yeh adhikaar aapko to mil gaya na? sabhi ko kehte ho ki janma-siddha adhikaar hai। chaahe shareer beemaar bhi ho to bhi man tandaroosta hai na। man khush to jahaan khush aur man beemaar to shareer peela ho jaata hai। man theek hoga to shareer ka rog bhi mahsoos nahin hoga। aise hota hai na! kyonki aapke paas khushi ki khuraak bahut badhiya hai। davaai achhi hoti hai to beemaari bhaag jaati hai। aapke paas jo khushi ki khuraak hai woh beemaari ko bhaga deti hai, bhula deti hai। to man khush, jahaan khush, jeevan khush isliye ever healthy bhi ho, wealthy bhi ho aur happy bhi ho। jab svayan ho tab doosre ko challenge kar sakte ho। nahin to challenge nahin kar sakte। apne ko dekhkar auron ke oopar raham aata hai kyonki apna parivaar hai na! chaahe kaisi bhi aatmaayen hain lekin hain to ek hi parivaar ke। jisko bhi dekhenge to mahsoos karenge ki yeh hamaara hi bhaai hai, hamaare hi parivaar ka hai। parivaar mein bhi koi najdeek ke hote hain, koi door ke hote hain, lekin kahenge to parivaar ke na?

jaise baap merciful hai। baap se yahi maangate hain ki kripa karo, raham karo! to aap bhi kripa karenge, raham karenge na kyonki baap samaan nimitta bane hue ho। brahman aatma ko kabhi bhi kisi aatma ke prati ghrina nahin aa sakti। raham aayega, ghrina nahin aa sakti। kyonki jaante hain ki chaahe kans ho, chaahe jaraasandhi ho, chaahe raavan ho - koi bhi ho lekin phir bhi merciful baap ke bachche ghrina nahin karenge। parivartan ki bhaavna rakhenge, kalyaan ki bhaavna rakhenge। phir bhi apna parivaar hai, parvash hai। parvash ke oopar kabhi ghrina nahin aati। sabhi maaya ke vash hai। to parvash ke oopar daya aati hai, raham aata hai। jahaan ghrina nahin aayegi vahaan krodh bhi nahin aayega। jab ghrina aati hai to josh aata hai, krodh aata hai, jahaan raham hota hai vahaan shanti ka daan denge। daata ke bachche ho na! to shanti denge na! achha!

vardaan:- gyaan khajaane dvaara mukti-jeevanmukti ka anubhav karne vaale sarva bandhanmukta bhav

gyaan ratnon ka khajaana sabse shreshtha khajaana hai, is khajaane dvaara is samay hi mukti-jeevanmukti ki anubhooti kar sakte ho। gyaani tu aatma woh hai jo duhkh aur ashaanti ke sab kaaran samaapta kar, anekaanek bandhanon ki rassiyon ko kaatkar mukti va jeevanmukti ka anubhav kare। anek vyartha sankalpon se, vikalpon se aur vikarmo se sada mukta rehna - yahi mukta aur jeevanmukta avastha hai।

slogan:- vishwa parivartak woh hai jo apni shaktishaali vrittiyon se vaayumandal ko parivartan kar de।