Murli du jour du mercredi 9 février 2022

09-02-2022 praatahmurli om shanti "baapdaada"' madhuban

“meethe bachche - sab duhkhiyon ko sukhi banaana, yeh ek baap ka hi farja hai, vahi sarva ka sadgati daata hai''

prashn:- baap apne bachchon ko chadhti kala mein jaane ki kaun si yukti sunaate hain?

uttar:- baba kehte meethe bachche - main jo sunaata hoon, tum use hi suno। baaki jo kuchh suna hai use bhool jaao kyonki usse tum neeche utarte aaye ho।

prashn:- kaun sa guhya raaz tum bachche samajhte ho, jismen sabhi ved shaastron ka saar aa jaata hai?

uttar:- brahma so vishnu aur vishnu so brahma kaise banta, kaise donon ek do ki naabhi se nikalte hain, yeh guhya raaz tum bachche hi samajhte ho। yeh sabhi ved shaastron ka saar hai।

geet:- nain heen ko raah dikhaao…

om shanti। meethe-meethe ati pyaare sikeeldhe bachche arth to samajhte hain। yoon to baap ko saare srishti ke bachche pyaare zaroor hain। bachche jaante hain ki yeh jo bhi manushya maatra hain woh parampita paramatma ki santaan hain। eeshvareey family hain। family mein sabse jaasti pyaar baap se hota hai, jisne bachchon ko racha hai। behad ka baap kehte hain pyaare, meethe-meethe sikeeldhe bachche, 5 hajaar varsha ke baad phir se aakar mile ho। kab mile? is sangamayug par। jabki baap aakar sab bachchon ko ashaanti se shanti mein le jaate hain। shanti ke liye kitni conference aadi karte hain। aapas mein milte hain ki srishti mein maaraamaari banda ho jaae aur aapas mein shanti kaise ho। nahin to aapas mein ladkar vinaash kar denge। vinaash se darte hain। yeh bhool gaye hain ki baap hi aakarke sukhdhaam arthaat aadi sanaatan devi-devta dharma ki phir se sthaapna karte hain, jo ab ho rahi hai। tum sab baithe ho behad ke baap se behad sukh ka varsa lene। tum jaante ho barobar parampita paramatma aakar phir aasuri duniya ka vinaash karaate hain। vinaash to zaroor hona chaahiye na kyonki is samay sab duhkhi hain। yeh baap ka hi kalpa-kalpa ka pharz hai - jo bhi duhkhi hain un sabko sukhi banaana। baaki jo khud hi duhkhi patit hain, woh phir auron ko paavan sukhi kaise banaayenge। so bhi saari duniya ki baat hai। gaate bhi hain - sarva ka sadgati daata ek hai। he parampita paramatma aakar ham patiton ko paavan banaao। yeh to sab dharma vaale jaante hain ki bhaarat mein god goddess ka raajya tha। us samay ham log nahin the। praacheen bhaarat ki bahut mahima hai। bhagwan ne pahle-pahle svarga racha, uska maalik kaun tha? bhaarat। svarga mein sone heere ke mahal the। bhaarat bahut saahookaar tha। ab kaliyug ke ant mein anekaanek dharma hain। baaki ek devta dharma praayah lop hai। kangaal mahaan duhkhi ban pade hain। ab woh baap kehte hain yeh brahma daada to javaahri tha, yeh nahin kehte hain, niraakaar baap kehte hain is shareer dvaara ki yeh brahma bhi apne janmon ko nahin jaante hain। tum brahmaakumaar kumaariyaan bhi apne janmon ko nahin jaante the। main inmen pravesh karta hoon, yeh bhi drama mein tha। kaise pravesh hote hain, yeh savaal nahin hai। baap kehte hain mere ko apna shareer nahin hai। mai saadhaaran boodhe tan mein aakar pravesh karta hoon। aata bhi hoon bhaarat mein। yeh apne janmon ko nahin jaanta, main aakar inko samjhaata hoon। yeh sab bana banaaya behad ka bada drama hai। jo second paas hota hai woh phir repeat hoga। yeh behad drama ka raaz baap hi samjhaate hain।

baap kehte hain bachche jo kuchh tum daan punya aadi karte aaye ho, yeh sab hai bhakti maarga। inse kuchh bhi praapti nahin hai kyonki bhakti mein ab koi bhi saar nahin hai। itne yeh sab chitra aadi jo kuchh banaaye hain, inko gudiyon ki pooja kaha jaata hai। chitra banaaya, khilaaya, pilaaya, duboya - yeh sab besamjhi hui na। yagya jab rachte hain to mitti ka ek bada shivling aur chhote-chhote saaligraam banaate hain। yeh kiski pooja karte hain, yeh bhi samajhte nahin hain। baap aur bachchon ne service ki hai tab unki pooja hoti hai। shiv ka ling banaate hain। tum bachchon ke bhi saaligraam banaate hain। tum bachche ab barobar bhaarat ko pavitra banaane ki service kar rahe ho। tum ho khudaai khidmatgaar। tumhaari baap se preet hai। baap ki shreemat par chalte ho tab shreemat bhagvat geeta gaai hui hai। bhagwan koi shaastra nahin padhega। koi bhi dharma sthaapak kab shaastra nahin uthaate। woh aate hain dharma sthaapan karne। unke paas jo knowledge hai, vahi sunaayenge। aise nahin ki Christ ne aakar Bible padha। nahin, woh aaya dharma sthaapan karne। baap aakar shreemat dete hain। shri arthaat shreshtha mat। oonche te oonchi mat hai hi bhagwan ki। tum bachche ab shreemat par chalte ho। baap kehte hain bachche mujhe yaad karo। bas akshar hi do hain। bade pyaar se kehte hain bachche, to woh hai baap aur ham sab hain eeshvareey family ke members। yeh baat kiski buddhi mein nahin hogi, inke buddhi mein bhi nahin thi। ab baap baith in dvaara samjhaate hain ki yeh sab jo manushya aatmaayen hain, in sab aatmaon ko mujhe paavan banaae vaapis le jaana hai। main drama anusaar phir se aaya hoon tumko vaapis le jaane। yeh baba aatmaon se baat karte hain। inki aatma bhi sunti hai। barobar baba hamko knowledge de rahe hain, inko apna shareer to hai nahin। shreekrishna ka saadhaaran roop nahin kahenge। woh to svarga ka pahla prince tha। phir yeh sab kah dete shreekrishna bhagvaanuvaach। yeh to ho bhi nahin sakta। kitna farka hai। sangam par shreekrishna ho na sake। artificial krishna to bahut bante hain। baaki practical satayug mein hoga। krishna ke naam se doosra thode hi koi ho sakta hai। naam to bahut apne oopar rakhvaate hain। baap kehte hain bachche is antim janma mein pavitra bano to pavitra duniya ki sthaapna mein madad hogi। pavitrata to achhi hi hai। bahut bachchiyaan maar khaati hain। ablaaon par atyaachaar hote hain। likhte hain baba kya karen, hamko is bandhan se chhudaao। naatak mein dikhaate hain dropdi ko saadiyaan di। yeh ek kahaani bana di hai। baba kehte hain bachche, ab pavitra banne se 21 janma tum kabhi nangan nahin honge। vahaan hai hi raamraajya। mukhya vikaar hai ashuddha ahankaar, deh-abhimaan। deh se moh rehta hai। vahaan hain aatma-abhimaani। samajhte hain ham puraana shareer chhod doosra lete hain। usko aatma-abhimaani kaha jaata hai। baap kehte hain - tum sab aatma ho, shivbaaba ko yaad karte raho kyonki ab vaapis jaana hai। yeh hai aatmaon ki sachchi-sachchi roohaani yaatra। sabko supreme baap ke paas jaana hai। teertha yaatra par jaate hain to raaste mein raam-raam kehte jaate hain। baap kehte hain tum baap ko yaad karte chalo। ab saari duniya to raajayog nahin seekhegi। kalpa pahle vaale hi yahaan aayenge। abhi kalam lagna hai। jo devi devta dharma ka meetha jhaad tha so praayah lop ho gaya hai। baaki taal taaliyaan khadi hain। (banyan tree ka misaal) vaise hi is devi-devta dharma ka jo foundation hai, vo sad gaya hai। baaki nishaaniyaan (chitra) rahe hain। parantu woh kaun hain, yeh kisko pata nahin hai। na apne dharma ka pata hai isliye hindu dharma kah dete hain।

baap kehte hain tumhaara bhaarat kitna sirtaaj tha। dharma ke liye hi kaha jaata hai religion is might। abhi to devta dharma hai nahin। phir woh dharma kaise sthaapan ho। baap hai sarvashaktimaan, varsa unse milta hai। taakat bhi unse milegi। baap hai srishti ka beejroop। ham unki family ho gaye। baap sat hai, chaitanya hai, gyaan ka saagar hai। sab kuchh aatma mein hai। aatma hi sunti hai, padhti hai। aatma mein hi achhe bure sanskaar hote hain। is samay sabki aatma tamopradhaan ho gai hai। sabse jaasti tamopradhaan buddhi bhaaratvaasi hi bane hain। shreshtha te shreshtha aatmaayen bhi bhaarat ki hi thi। vahi heaven ke maalik the। yeh naatak bana hua hai। sabko apna-apna part mila hua hai। aatmaayen sab ek jaisi hain, unmein koi pharka nahin hai। aise nahin hamaari aatma chhoti hai, baba bada hai। nahin, aatma chhoti badi nahin hoti। aatma 84 janmon ka part phir se repeat karti hai। unki kabhi end nahin hoti। ek aatma kitni service karti hogi। woh avinaashi part kabhi mitne vaala nahin hai। kya yeh baaten vidvaan, pandit, shaastron ki authority jaante hain? itni chhoti aatma mein kitna bhaari part hai। parampita paramatma bhi drama ke vash mein hai। part bajaane ke liye bandha hua hai, accurate time par hi aayega। unko bhi apna part time par bajaana hai, sabko sukhi banaana hai। khyaal karo aatma kya hai। baba ki aatma bhi itni chhoti bindi misal hai। itni chhoti cheez ki pooja to koi kar na sake। bhakti ke liye phir bada banaate hain, jiski pooja ho sake। jisko shiv athva roodra bhi kehte hain। hai bindi misal। tilak dete hain na। yahaan yeh badi samajhne ki baaten hain aur to koi samjha na sake। yeh baap baith samjhaate hain, bahut maheen baaten hain। baap samjhaate hain - bachche aatma dekho kitni chhoti hai। aatma ke organs dekho kitne bade hain। is samay sabki aatma aur shareer donon hi patit hain, ab phir paavan banna hai। tum avyabhichaari bano, ek se hi suno। ek ko hi yaad karo। oho! baba aap to badi kamaal karte ho। kaisa gyaan sunaate ho! aur kiski taakat nahin jo yeh knowledge de sake। tumhaari chadhti kala ab hi hoti hai jabki baap aakar padhaate hain। is samay sabhi manushya maatra patit hain, isliye baap kehte hain - main sabka uddhaar karne ke liye aata hoon। raat se din mein jaane ka raasta bataata hoon। gaate bhi hain nain heen ko... goya sabhi kehte hain ham nain heen hain, hamko raah bataao। kahaan ki raah? apne ghar ki। yahaan to bahut duhkh hain। baba ham andhon ki laathi to aap hi ho। baba akshar se varsa yaad aata hai। prabhu ya eeshvar kahne se varse ka nasha nahin hota, tvamev maata cha pita... yeh unki mahima hai। manushya kah dete hain yeh ved to anaadi hain। parantu poochho kab se padhte aaye ho? kya satayug se lekar? vahaan shaastra to hote hi nahin। yeh hai bhakti maarga ke। kuchh bhi jaante nahin। baap kehte hain abhi main aakar tumko sabka saar samjhaata hoon - brahma dvaara। brahma bachcha mera hai ya vishnu ki naabhi se nikla hai! brahma to shiv ka bachcha hua। vishnu ka bachcha to nahin hai। haan, brahma hi phir vishnu bante hain। phir vishnu 84 janma baad brahma bante hain, yeh bahut guhya raaz hai jo tum bachche hi samajhte ho। abhi brahma mukh dvaara tum brahman bachchon ka janma hua hai to kitna nasha aur khushi tum bachchon ko honi chaahiye। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sampoorn paavan banne ke liye avyabhichaari banna hai। ek baap se hi sunna hai, ek ko hi yaad karna hai।

2) khudaai khidmatgaar ban bhaarat ko paavan banaane ki seva karni hai। ek baap se preet buddhi rehna hai।

vardaan:- sva-sthiti dvaara har paristhiti ko paar karne vaale master trikaaldarshi bhav

jo bachche trikaaldarshi sthiti mein sthit rehte hain woh apni sva sthiti dvaara har paristhiti ko aise paar kar lete hain jaise ki kuchh tha hi nahin। knowledgeful, trikaaldarshi aatmaayen samay pramaan har shakti ko, har point ko, har gun ko order se chalaate hain। aise nahin ki samay aane par order karen sahanshakti ko aur kaarya poora ho jaae phir sahanshakti aaye। jis samay jo shakti, jis vidhi se chaahiye - us samay apna kaarya kare tab kahenge khajaane ke maalik, master trikaaldarshi।

slogan:- jo sada khush rehte hain aur sabko khushi baantate hain vahi sachche sevaadhaari hain।