Murli du jour du mercredi 23 février 2022

23-02-2022 praatahmurli om shanti "baapdaada"' madhuban

“meethe bachche - tum pyaar se kehte ho meethe baba, to mukh mein ras aa jaata, eeshvar va prabhu kahne se woh ras nahin aata''

prashn:- kaun sa dhandha sarvashaktimaan baap ka hai, manushyon ka nahin?

uttar:- patit aatmaon ko paavan banaana, saare vishwa ko naya banaana - yeh dhandha baap ka hai, baap hi paavan banne ki shakti dete hain। yeh dhandha manushya nahin kar sakte। manushya to samajhte hain bhagwan jo chaahe woh kar sakta hai, hamaari beemaari bhi theek kar sakta hai। baba kehte hain main aisi aasheervaad nahin karta। main to paavan banne ki yukti bataata hoon।

geet:- jaag sajniyaan jaag…

om shanti। behad ka baap bachchon ko jagaate hain। maat-pita jisse sukh milne ka hai woh aakar andhiyaari raat se jagaate hain। tum maat-pita ke bachche ho, jaante ho ham ghor andhiyaare mein the, ab jaag rahe hain। yoon to saari eeshvareey family hai। saari duniya ke jo manushya maatra aur yeh saari duniya hai, yeh hai god father ki family। maat-pita god father ko kaha jaata hai। ab god father bigar apni stri ke bachche kaise paida kare। khaas bhaaratvaasi kehte hain tum maat-pita to yeh ho gai family। woh to sirf gaate hain - tum yahaan practical mein ho aur god father apni family ko jaga rahe hain। jaago bachche aur bachchiyaan ab raat poori hoti hai। ab din aane vaala hai। gaate to hain gyaan soorya pragta... parantu arth kuchh samajhte nahin। bhal kitne bhi ved shaastra padhe hain, parantu samajhte nahin। jo samajhte hain - woh achhi kamaai karte hain। jo besmajh hote hain woh devaala maarte hain। baap kehte hain bachche maaya ne tumko kitna besmajh bana diya hai। ek taraph kehte ho O god father, doosre taraph kehte paramatma sarvavyaapi। ek taraph kehte ho sabhi manushya maatra bhaai-bhaai hain athva ham ek baap ke bachche hain। phir kah dete jidhar dekhta hoon, tu hi tu arthaat vi aar all fathers। ab baap kehte hain bachche, tum jaante ho ham aate hi hain paramdham se। sabhi dharma vaale kisi na kisi bhaasha mein kehte hain O god father। to father mother ki family hui na। baap kehte hain - jisko tum yaad karte ho uska occupation to jaanna chaahiye na। usne itni badi srishti rachi। baap mein saara gyaan hai, unko hi gyaan ka saagar, knowledgeful kaha jaata hai। kehte bhi hain woh satya hai। sach bolne vaala hai aur sadaiv amar hai। amraktha sunaate hain।

abhi tum jaante ho amarnaath shivbaaba hamko amraktha sunaakar amarlok ka maalik bana rahe hain। jo bhi padhne vaale bachche aur bachchiyaan honge, kiske bachche? maat-pita ke। tum sab paarvatiyaan ho। tumko amar katha suna rahe hain। aaj se 5 hajaar varsha pahle paradise tha। srishti ka yeh naatak phirta rehta hai। satayug, treta... naye ghar se puraana hota hai। svaastika ke bhi 4 bhaag banaaye hain। ab tumhaari chadhti kala hai। gaate hain chadhti kala tere bhaane.. sabhi manushya maatra tamopradhaan duhkh se chhoot satopradhaan ban jaate hain। srishti hi satopradhaan ban jaati hai, parampita paramatma va sirf eeshvar kahne se baba ka ras nahin milta, baba kahne se varse ki khushbu tab aati jab apne ko bachcha samajhte। ham baba ke bachche hain, yoon to sabhi aatmaayen bachche hain parantu abhi baap ne yeh rachna rachi hai। kehte hain patit-paavan seetaaraam। satayug mein lakshmi-naaraayan nahin kahenge ki patit-paavan aao kyonki woh paavan hai। saadhu santa sab gaate rehte hain। gaandhi ji bhi gaate the nai duniya, naye bhaarat mein naya raamraajya ho, haath mein geeta uthaate the kyonki jaante hain geeta se hi mahaavinaash hua aur nai duniya sthaapan hui। geeta hai sarvashaastramai shiromni, geeta maata। achha - maata ka pati kaun? bhagwan। vahi patiton ko paavan banaane vaala hai। bhagvaanuvaach... krishna ko patit-paavan nahin kahenge। manushya to kabhi patit se paavan bana na saken।

ab tum meethe-meethe bachche kehte ho aatma paramatma alag rahe... kehte hain mahaan aatma, punya aatma... aise to nahin kehte mahaan paramatma। phir apne ko shivoham paramatma aadi kyon kehte hain। punya aatma, paap aatma kehte hain phir nirlep kyon kehte hain। tum braahmanon ne 84 janma liye hain। bhaarat par hi saara khel hai। yeh shivbaaba hi samjhaate hain, brahma nahin। brahma ko to bail (nandi) bana diya hai। phir bhrakuti mein shiv dikhaaya hai। shiv ki savaari bhrakuti mein rehti hai। koi pitra aadi khilaate hain। aatma ko bulaate hain, woh bhi aakar baaju mein baithti hai। aatma ek star hai। kehte hain bhrakuti ke beech chamakta hai... ab tum jaante ho yeh behad ka bada khel hai। second-second jo paas hota hai woh manushya drama ke aadhaar par act karta hai। manushya 84 janma kaise lete hain, sabhi 84 janma nahin lete। koi to abhi bhi oopar se aate rehte hain। ab baba kehte hain jaag sajniyaan... kanya jab shaadi karti hai to unke sir par matki rakh usmein deeva jagaate hain। baap kehte hain tumhaari aatma ki jyoti ka ghrit ab khatma ho gaya hai। ab mujhe yaad karo to ghrit bharte-bharte deeva jag jaayega, phir tum mere paas aa jaayenge। woh niraakaar baap hi creator, director aur mukhya actor hai। yaad kisko karte hain? kya brahma ko? vishnu ko? nahin। duhkh mein sab yaad karte hain god father ko। yeh duhkh-sukh, haar-jeet ka khel hai। maaya haar khilaati hai, baap jeet pahnaate hain। kehte hain sarvashaktimaan main hoon na। aise nahin ki main beemaar hoon, bhagwan aasheervaad kare to main theek ho jaaoon... main koi yeh dhandha karne nahin aaya hoon। main aaya hoon patiton ko paavan banaane, shreemat dene। shreshtha te shreshtha hai shivbaaba phir nambarvaar hain। maala bhi hai na। ab tum jaan gaye ho ki ham eeshvareey family hain। jaise shivbaaba ki mahima aparmaapaar hai vaise rachna ki mahima bhi aparmaapaar hai, vaise bhaarat ki mahima bhi aparmaapaar hai। bhaarat mein heere javaahron ke mahal the। god creator hai to mother bhi chaahiye। jab tum yahaan baithe ho to pahle baap ki yaad aani chaahiye। phir brahma vishnu shankar sookshm vatan vaasi ki। brahma dvaara sthaapna ho rahi hai। is samay tum eeshvareey family ke ho phir daivi family banenge। so bhi sangamayug par। sooryavanshi, chandravanshi viraat roop ka chitra bhi hai। sirf choti nahin dikhaaya hai। devta, kshatriy... parantu devtaaon ke pahle kya tha? ab behad ka baap kehte hain manamnaabhav। mere saath buddhi ka yog lagaao aur behad ka varsa le lo। janma janmaantar liya hai। satayug, treta tak 21 janma behad ka varsa liya tha। ab to kuchh nahin hai, phir baap se lena hai। woh to kehte paramatma naam roop se nyaara hai, woh kaise yahaan aayega। are geeta mein hai shreemat bhagvat geeta। bhagvaanuvaach - krishna ko bhagwan nahin maanenge। yeh sab drama mein noondh hai। bhagwan hai niraakaar gyaan ka saagar। phir peechhe jo raajya karte hain unki mahima alag hai। sarvagun sampanna, 16 kala sampoorn... is samay hain sab hinsak kaam kataari chalaane vaale। lakshmi-naaraayan ke liye aise nahin kahenge। woh to sampoorn shreshthaachaari the। to baap ki mahima alag hai। har ek manushya maatra ka alag-alag part hai। kitni chhoti aatma unmein saara part bhara hua hai। hoon main bhi aatma parantu mujhe supreme kehte hain। bhakti maarga mein bada-bada ling banaate hain। woh bhi wrong hai। aatma to sabki ek jaisi star hai। gyaan soorya, gyaan chandrama, gyaan sitaare bhi hain। drama mein itne paartadhaari hain। har ek ka apna-apna part hai। kaise yeh drama bana hua hai, isko kaha jaata hai kudarti naatak। baaki woh naatak to common hai। 4 ghante ka reel hoga। inka reel to 5 hajaar varsha ka hai। vo log phir kahenge kaliyug ki aayu 4 laakh 32 hajaar varsha hai। kitne gapode hain। maut saamne khada hai। to bhi ghor andhiyaare mein pade hain।

baap kehte hain ab jaago, tum bhagat bhagwan ko yaad karte aaye ho। ab baap kehte hain bhakti maarga khatma hota hai। main aaya hoon gyaan se sojhra karne। is samay manushyon mein dekho krodh kitna hai। ladaai hi seekhte rehte hain। jab raavan raajya shuru hota hai tab yeh sab shuru hota hai। satayug mein to hai hi raamraajya। ab baap kehte hain main tum bachchon ko raajaaon ka raaja banaata hoon। phir tum jab girte ho to paavan raajaayen phir patit ban jaate hain। abhi to woh bhi nahin hain। baap kehte hain bachche tum hamesha samjho ki shivbaaba is dvaara suna raha hai। jo sunkar yeh mahaaraaja mahaaraani bane the, vahi ab patit bane hain। yeh hai aasuri srishti। woh hai eeshvareey srishti। raam aur raavan naam mashhoor hai। raavan ka arth koi bhi samajhte nahin। nar aur naari donon mein 5 vikaar hain, tab 10 sheesh dikhaate hain, isliye inko raavanraajya kaha jaata hai। deepmaala mein pooja karte hain। mahaalakshmi ko 4 bhujaayen dete hain। do lakshmi ki, do naaraayan ki। baaki vishnu koi aur cheez nahin hai। ab tum raajaaon ka raaja banenge, double sirtaaj। is samay tum svadarshan chakradhaari bante ho। tum jaante ho ham 84 janma lete hain। behad ke baap se behad ka sukh, had ke baap se had ka sukh milta hai। satayug hai brahma ka din, kaliyug hai brahma ki raat। prajaapita bhi zaroor yahaan hoga। shiv-baba ki santaan to sab hain। phir brahma dvaara brahman aur braahmaniyaan rachte hain। nahin to itne bachche kaise adopt honge। shivbaaba brahma dvaara adopt karte hain। baap kehte hain mere to tum hi ho। ab tumko naya janma milta hai। daade ki property tumko milti hai, vishwa ki raajaai milegi brahma dvaara। brahma ko sookshm vatan mein dikhaaya hai। parantu vahaan kaise milenge। baba ko zaroor rath chaahiye murli chalaane ke liye। geeta hai bhaarat ka number one shaastra। baaki sab shaastra hain bachche। pahle hai devtaaon ki biraadri phir kshatriyon ki... jo bhi dharma sthaapan karte hain woh pahle sato phir rajo tamo mein aate hain। jaise Christ aaya woh pahle pavitra tha। jab tak koi vikarma na ho to danda mil na sake। satayug mein pavitra aatma aayegi। vahaan maaya hi nahin to duhkh bhi nahin। hamaare vikarma tab shuru hote hain jab vaam maarga mein jaate hain। yeh samajhne ki baaten hain। vikarmaajeet sanvat bhi hai phir hai vikarmi sanvat। kathaayen to bahut hain। moh jeet raaja ki katha, moh jeet hain lakshmi-naaraayan। woh hai raamraajya। abhi hai raavanraajya। raavan ko jalaate hain। aadhaakalpa raamraajya phir aadhaakalpa ke baad raavan raajya hota hai। is svadarshan chakra ko tum jaante ho। tum sab god fatherly children ho। direct baap ne brahma dvaara adopt kiya hai isliye tumko sikeeldhe bachche kehte hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aatma roopi deepak ko sada jaagrat rakhne ke liye yaad ka ghrit daalte rehna hai। yaad se aatma ko satopradhaan banaana hai।

2) sada gyaan sojhre mein rehna hai। behad naatak (drama) ko buddhi mein rakh svadarshan chakradhaari banna hai।

vardaan:- vyartha sankalpon ke tej bahaav ko second mein stop kar nirvikalp sthiti banaane vaale shreshtha bhaagyavaan bhav

yadi koi bhi galti ho jaati hai to galti hone ke baad kyon, kya, kaise, aise nahin vaise...yeh sochne mein samay nahin ganvaao। jitna samay sochne swaroop bante ho utna daag ke oopar daag lagaate ho, paper ka time kam hota hai lekin vyartha sochne ka sanskaar paper ke time ko badha deta hai isliye vyartha sankalpon ke tej bahaav ko parivartan shakti dvaara second mein stop kar do to nirvikalp sthiti ban jaayegi। jab yeh sanskaar emerge ho tab kahenge bhaagyavaan aatma।

slogan:- khushi ke khajaane se sampanna bano to doosre sab khajaane svatah aa jaayenge।