Murli du jour du jeudi 3 mars 2022

03-03-2022 praatahmurli om shanti "baapdaada"' madhuban

“meethe bachche - baba aaye hain tumhein sachcha-sachcha vaishnav banaane, tum abhi transfer ho kaale se gore ban rahe ho''

prashn:- sarva ki kaamnaayen poorn karne vaale aap bachchon ka title kya hai? tumhein kaun si kaamna poorn karni hai?

uttar:- tum sarva ki manokaamnaayen poorn karne vaale jagat amba ke bachche kaamdhenu ho। sabhi ki kaamna hai - humein mukti jeevanmukti mile। to tum jagat amba, jagat pita ke bachche sabko mukti-jeevanmukti ka raasta bataate raho, yahi tumhaara dhandha hai।

geet:- ambe tu hai jagdambe…

om shanti। yeh hai mama ke liye bhakton ki mahima। kehte hain ki bhakton ki raksha karne vaale। ab yeh bhakti maarga ho gaya। mama ki mahima shivbaaba ke pichhaadi hai, jab parampita paramatma shiv aate hain tab aakar jagat amba ko rachte hain। rachne ka arth hi hai transfer karna। kaale ko gora banaate hain। is samay jagat amba to ek hi hai। jaise shiv ka chitra to ek hi hai phir uske bhinna-bhinna naam rakh, bhinna-bhinna mandir banaaye hain। anek prakaar se mahima bhi karte hain। parampita paramatma ek hi hai। vaise jagat amba bhi ek hi hai। do bhujaaon vaali hai। 8 bhujaaon vaale koi devi-devta hote nahin। prajaapita athva jagat amba bhi do bhuja vaali hai। jagat amba ki mahima jaasti kalkatte mein hai। mashhoor hai kaali kalkatte vaali। unka chitra bhi bahut bhayaanak banaaya hai। khappar ki maala bhi pahanti hai। yeh sab hai bhakti maarga। jagat amba to bali le nahin sakti। woh to jagat ko rachne vaali thahri। woh bali kaise le sakti athva woh maansaahaari kaise ho sakti। unke mandir na sirf kalkatte mein hain parantu bahut jagah hain। maata apne bachchon ki bali thode hi legi। bhakti kitni kadi hai। ab unhon ko koi baith samjhaave ki jagat amba ka aisa bhayaanak roop nahin hota hai। na aisi bali leti hai। unmein bhi ek hai vaishnav devi, doosri hai maansaahaari। ab jo maansaahaari hai woh vaishnav banti hai। bhal mama to kumaari hai, shaayad kuchh na bhi khaaya ho। jagat amba brahma ki beti kumaari thahri। ab kumaari ko phir amba kaise kaha jaata, yeh samajhne ki baat hai। kalkatte mein bahut pooja hoti hai। bahut bhayaanak shakla banaai hai, jagat amba ki to aisi shakla ho na sake। woh sabki manokaamnaayen poorn karne vaali hai। woh sachchi-sachchi vaishnav devi hai। uske pichhle janma mein zaroor maansaahaari hogi। phir vaishnav athva paavan daiveegun vaali ban rahi hai। hai saari sangamayug ki baat। to jagat amba ke mandir mein jaakar mahima karni chaahiye। pahle bataana hai niraakaar aatmaon ka baap bhi ek hai। phir saakaar prajaapita brahma bhi ek hai। brahma ki beti sarasvati bhi ek hai, woh kabhi bali aadi nahin leti। pahle sundar thi, ab saanvari hai, phir sundar banengi। to saara kutumba bhi sundar ban jaayega। bahut jagah amba ko do bhuja vaali hi dikhaate hain। samjhaane se koi to samajh bhi jaayenge, koi to jhagda bhi karenge। hangaama karne mein deri nahin karte। to samjhaane mein hoshiyaar chaahiye।

tum bachche ho kalyaankaari। mama bhal pahle kalkatte mein gai thi parantu aisi murli nahin chali thi। jagat amba hai ek। tum anekaanek bachchiyaan ho। naam to ek ka hoga na। ek ke hi anek mandir banaaye hain। ab kalkatte mein bhakton ko is pooja se chhudaayen kaise? unhon ko bhi poojya to banaana hai na! to vahaan jaakar koi samjhaave। is samay woh jagat amba sabki manokaamnaayen poorn karne vaali baithi hai। woh hai kaamdhenu। kis reeti woh kaamnaayen poori karti hai, yeh koi nahin jaante। tum ho kaamdhenu jagat amba ki bachchiyaan। sirf gau maata nahin, purush bhi hain। woh bhi bahuton ki kaamnaayen poorn karte hain। tumhaara dhandha hi hai sabki manokaamnaayen poorn karna। kahaan bhaai bhi centres chalaate hain। unhon ki buddhi mein aata hai ki ham bhi sabhi ki manokaamnaayen poorn karen arthaat mukti jeevanmukti ka raasta bataaven, svarga ka varsa den। jinhonne kalpa pahle liya hai, vahi lenge। haan, vahaan sab prakaar ke sukh milte hain। jagat pita, jagat amba in donon ka rachayita hai shivbaaba। in dvaara kitni manokaamnaayen poorn hoti hain। kalkatte mein bahut pooja hoti hai। koi kisko, koi kisko maanne vaala hoga। koi vaishnav devi ko bhi maanne vaale honge। woh tumhaari baaton se jhat raazi ho jaayenge। bolo, tumko raajya bhaagya mila hua tha is jagat amba se। jagat amba ko phir kahaan se mila? jagat pita se। unko kahaan se mila? shivbaaba se। jo saari srishti ka rachayita hai, tum achhi reeti samjha sakte ho। jagat amba ko sab maante hain। zaroor jagat amba aur jagat pita ko bhi varsa shivbaaba se milta hai phir unke dvaara bachchon ko milta hai। jagat amba ek hai, do bhujaaon vaali hai। bahut bhujaayen nahin hain। sarasvati brahma ki beti hai gyaan-gyaaneshvari। parantu unka roop to bhayaanak dikha diya hai। to us par samjhaana padta hai ki jagat amba ka aisa bhayaanak roop nahin hai। satopradhaan manushya se phir tamopradhaan bante hain। tamopradhaan manushya phir satopradhaan manushyon ko poojte hain। jagat amba manushya thahri kyonki jagat to yahaan hai। mool vatan, sookshm vatan ko jagat nahin kahenge। sookshm vatan mein devtaayen, mool vatan mein aatmaayen rehti hain। to yeh sab baaten samjhaane ki hain। baaki baap aur varse ko yaad karna hai। 84 janmon ki kahaani bhaaratvaasiyon ko hi sunaani pade। jo devta the, woh ab nahin hain। jo devi-devtaaon ke pujaari honge, vahi in sab baaton ko samjhenge। woh phir oonch pad praapta karne ke liye mehnat bhi karenge। kai bachche samajhte hain ham to baba ke bachche ban gaye, zaroor oonch pad paayenge। parantu vichaar karo pahle to zaroor achha padhenge tab to achha pad paayenge। padhenge nahin aur hi vikarma karte rahenge to ek to saja khaani padegi, doosra phir jaakar naukar chaakar daas daasiyaan banenge kyonki vikarmo ka bojha bahut hai। janma-janmaantar daasi bane, pichhaadi mein pad paaya to kya hua! isse to praja ko bahut dhan milta hai। woh kiske daas daasiyaan nahin bante। yeh sab samajhne ki baaten hain। baaki mool baat baap samjha rahe the to vaishnav devi hi lakshmi banti hai। lakshmi ka mandir bada ya vaishnav devi ka mandir bada? mahima kiski badi hai? woh hai gyaan gyaaneshvari। lakshmi ko gyaan gyaaneshvari nahin kahenge isliye mahima jagat amba ki hai। bada mela bhi unka lagta hai। lakshmi ko deep maala par bulaate hain। yeh hai aatmaon ka paramatma ke saath mela। in baaton ko koi manushya nahin samajhte। samjhaane vaala bada hoshiyaar chaahiye। jo yukti se pyaar se kaam chalaave। jo koi bhi samajh jaae to barobar yeh theek samjhaate hain। shri lakshmi kitni sundar thi! lakshmi-naaraayan ki jo itni pooja hai woh bhi pakke vaishnav hain। jagat amba bhi vaishnav hai। baap ne unhein raajayog sikhlaakar manushya se devta banaaya hai। tumhaari pooja abhi nahin ho sakti hai kyonki shareer to pavitra nahin hai। tum sampoorn ban jaate ho to tumhaara shareer badal jaata hai, tab tum pooja laayak bante ho। vaastav mein sannyaasiyon ko poojna nahin chaahiye। aajkal to shivoham kah baith pooja karaate hain। unhon mein bhi ek math hai jo apni pooja nahin karaate hain। ab shiv to hai niraakaar, woh apni pooja kaise karaave। dekho, shivbaaba ismen aate hain to apni pooja thode hi karaate hain। baap to aakar pujaari se poojya banaate hain। pooja karna kaise sikhlaayenge! shivbaaba kuchh bhi karne nahin dete। kehte hain raam-raam bhi mukh se nahin kaho। keval baap ko yaad karna hai। yaad karna koi jaap nahin hai। bachche baap se varsa lete hain। bachcha thode hi baap ka jaap japega! tumko bhi jaap nahin japna hai। jaap aur yaad mein raat din ka farka hai। points to dher nai-nai milti rehti hain samjhaane ke liye। yeh bhi zaroori baat hai ki yeh bhi baap hai। inse milta hai behad ka varsa aur laukik baap se milta hai had ka varsa। is paarlaukik baap ne kalpa pahle bhi varsa diya tha, ab phir dene aaye hain। buddhi mein saara gyaan phirna chaahiye, jisse manushya devta ban jaayen। dekho, gyaan maarga mein samjhaane ki badi mehnat chaahiye। jisse manushya ki jeevan heere jaisi ban jaaye। duhkhi to bahut hain, ek do mein ladte rehte hain। baap aakar eeshvareey sampradaay banaakar phir daivi sampradaay banaate hain, isliye ladaai jhagde ki baat hi nahin। eeshvareey darbaar mein koi aasuri rah na sake। moot paleeti kapdon ko yahaan baithne ka hukm nahin hai। baap samjhaate rehte hain bachche kabhi aapas mein ladna-jhagadna nahin। satguru ka nindak thaur na paaye, yaani satayug mein oonch pad nahin paaye। satguru jo svarga ka maalik banaate hain, unki ninda kare, to oonch pad pa na sake। yeh hai saari yahaan ki baat। parantu woh apne oopar le gaye hain aur manushyon ko daraate rehte hain। yahaan to poora pavitra banna hai। woh guru kar lete hain lekin pavitra nahin bante hain। grihasthi ko guru banaane se koi phaayda nahin। yeh hai praja ka raajya phir daivi raajya banaane vaala samartha chaahiye। baba aaya hai aasuri duniya ko daivi banaane। daivi dharma ki sthaapna ho jaayegi, baaki sab dharma vaale khatma ho jaayenge। kehte hain bhagwan aakar phal denge। isse siddha hota hai ki koi bhi nirvaandhaam mein ja nahin sakte। baap hi aakar raajayog sikhlaate hain। baap kehte hain main tumhaara parampita paramatma hoon। mere mein hi saara gyaan hai। mere ko hi patit-paavan kehte hain। main hi tumko raajayog sikhlaata hoon। tumko phir auron ko sikhlaana hai। samjhaane vaale sab ek jaise nahin hain। tumko note karna chaahiye। achha bhaashan karne vaalon ko bhi sab points us samay yaad nahin aati hain। baad mein khyaal aata hai - yeh sunaana chaahta tha। note zaroor karna hai। parantu aise bhi nahin note karke phir chhod den, padhe nahin। dhaarna tab hogi jab shreemat par chalenge। subah amritvele uthkar baba ko zaroor yaad karna hai। phir points repeat karen, auron ko sunaaven tab oonch pad paayen। raaja banna koi maasi ka ghar nahin hai। samjha। mehnat karni hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) poojya banne ka poora purushaartha karna hai। apni pooja nahin karaani hai। aatma aur shareer donon pavitra honge tab hi poojyaneey laayak banenge।

2) hoshiyaari se samajhdaar ban kalyaan ki bhaavna rakh seva karni hai। daiveegunon vaala sachcha vaishnav banna hai।

vardaan:- parmaatma pyaar mein dharti ki aakarshan se oopar udne vaale maayaaprooph bhav

parmaatma pyaar dharni ki aakarshan se oopar udne ka saadhan hai। jo dharni arthaat deh-abhimaan ki aakarshan se oopar rehte hain unhein maaya apni or kheench nahin sakti। kitna bhi koi aakarshit roop ho lekin maaya ki aakarshan aap udti kala vaalon ke paas pahunch nahin sakti। jaise rocket dharni ki aakarshan se pare ho jaata hai। aise aap bhi pare ho jaao, iski vidhi hai nyaara banna va ek baap ke pyaar mein samaaye rehna - isse maayaaprooph ban jaayenge।

slogan:- sva sthiti ko aisa shaktishaali banaao jo paristhitiyaan use neeche oopar na kar saken।

anmol gyaan ratna - (daadiyon ki puraani diary se)

gyaan hi khushi ka foundation athva thur hai, jis foundation par hi saare jeevan roopi jhaad ka madaar hai। agar foundation pakka nahin hai to woh khushi alpakaal ke liye ho jaati hai। jaise maayaavi manushya kehte hain ki ham khushi mein hain kyonki hamaare paas sab dhan padaartha maujood hain। parantu ham jaante hain ki unhein sarvada ke liye sthaai khushi nahin rah sakti kyoki unhon ke paas gyaan ka foundation hi nahin hai। yeh to aise hi hua jaise koi saahookaar kisi phal ka maal nikaal aapehi kha leve aur uska chhilka phenk deve, jise koi gareeb utha le aur use dekh khush ho jaae ki hamaare paas bhi maal hai, parantu vaastav mein maal maalik kha jaata hai। vaise ham in alpakaal maayaavi sukhon ko tuchchha samajh, is avinaashi gyaan se eeshvareey sthaai atindriy sukh ko praapta kar rahe hain aur ve phir alpakaal kshanbhangur sukh dene vaali maaya ko, jismen vaastav mein koi sukh nahin hai uske pichhaadi chatak, uski rasna le, usmein hi sukh samajh baithe hain aur is hi ghamanda mein rehte hain ki hamaare paas bhi koi maal hai। achha - om shanti।