Murli du jour du mardi 29 mars 2022

29-03-2022 praatahmurli om shanti "baapdaada"' madhuban

“meethe bachche - jitna pyaar se yagya ki seva karo utna kamaai hai, seva karte-karte tum bandhanmukta ho jaayenge, kamaai jama ho jaayegi''

prashn:- apne ko sada khushi mein rakhne ki yukti kaun si apnaani hai?

uttar:- apne ko service mein busy rakho to sada khushi rahegi। kamaai hoti rahegi। service ke samay aaraam ka khyaal nahin aana chaahiye। jitni service mile utna khush hona chaahiye। honest ban pyaar se service karo। service ke saath-saath meetha bhi banna hai। koi bhi avgun tum bachchon mein nahin hona chaahiye।

geet:- yeh vakta ja raha hai…

om shanti। yeh kisne kaha? baap ne kaha bachchon ko। yeh hai behad ki baat। manushya jab boodha hota hai to samajhte hain - ab bahut gai baaki thoda samay hai, kuchh achha kaam kar len isliye vaanaprastha avastha mein satsang mein jaate hain। samajhte hain grihastha mein to bahut kuchh kiya। ab kuchh achha kaam bhi karen। vaanaprasthi maana hi vikaaron ko chhodna। gharbaar se sambandh chhod dena, isliye hi satsang mein jaate hain। satayug mein to aisi baaten hoti nahin। baaki thoda samay hai। janma janmaantar ke paapon ka bojha sir par hai। ab hi baap se varsa le lo। vo log saadhu sangat to karte hain, parantu koi lakshya nahin milta jo yog rakhen। baaki paap kam hote hain। bada paap to hota hai vikaaron ka। dhandhaadhori chhod dete hain। aajkal to tamopradhaan avastha hai to vikaar ko chhodte nahin। 70-80 varsha ke bhi bachche paida karte rehte hain। baap kehte hain abhi yeh raavanraajya khalaas hona hai। samay bahut thoda hai isliye baap se yog lagaate raho aur svadarshan chakra phiraate raho। vaapis chalne mein thode din hain। sir par paapon ka bojha bahut hai, isliye jitna ho sake time nikaal mujhe yaad karo। dhandha-dhori aadi karma to karna hi hai kyonki tum karmayogi ho। 8 ghanta ismen lagaana hai। woh bhi hoga pichhaadi mein। aise mat samjho ki sirf budhiyon ko hi yaad karna hai। nahin, sabka maut ab najdeek hai। yeh shiksha sabke liye hai। chhote bachchon ko bhi samjhaana hai। ham aatma hain, paramdham se aaye hain। bilkul sahaj hai। grihastha ka bhi paalan karna hai। grihastha vyavhaar mein rehte bhi shiksha leni hai। phir serviceable banne se bandhan aapehi chhoot jaayenge। ghar vaale aapehi kahenge - tum bhal service karo। ham bachchon ko sambhaal lenge ya maai (naukar) rakhenge। to usmein unko bhi phaayda hai। samjho ghar mein 5-6 bachche hain, stri chaahti hai ham eeshvareey seva karen aur achhi serviceable hai to bachchon ke liye maai rakh sakte hain kyonki usmein apna bhi kalyaan aur doosron ka bhi kalyaan hoga। donon bhi service mein lag sakte hain। service ke tareeke to bahut hain। subah aur shaam service ho sakti hai। din mein maataaon ka class hona zaroori hai। bi.ke. ko seva ke samay sona nahin hai। koi koi bachchiyaan time rakhti hain yukti se। samajhti hain din mein koi na aaye। vyaapaari log athva naukri karne vaale log din mein sote nahin hain। yahaan to jitna baba ke yagya ki seva karenge utna kamaai hi kamaai hai। bahut phaayda hai। saara din kaam mein busy rehna chaahiye। pradarshani mein bahut busy rehte hain। kehte hain baba bolte-bolte gala ghut jaata hai kyonki achaanak aakar service padti hai। hamesha itni service karne vaale hote to gala kharaab nahin hota। aadat pad jaane se phir thakaavat nahin hoti hai। phir ek jaise bhi sabhi nahin hain। koi to bahut honest hain, jitni service mile to unko khushi hoti hai kyonki evja bhi milta hai, jo achhi reeti service mein lage rehte hain। tumhein bahut meetha banna hai, avgun nikal jaane chaahiye। shreekrishna ki mahima gaai jaati hai sarvagun sampanna.... yahaan hain sabmen aasuri gun। koi bhi khaami na ho, aisa meetha banna hai। so tab banenge jab service karenge। kahaan bhi jaakar service karni hai। raavan ki janjeeron se sabko chhudaana hai। pahle to apni jeevan banaani hai। ham baith jaayen to ghaata hamko padega। pahle to yeh roohaani service hai। kiska bhala karen, kisko nirogi, dhanvaan, aayushvaan banaayen। saara din yeh khyaal chalna chaahiye। woh bachche hi dil par chadh sakte hain aur takhtansheen bhi hote hain। pahle baap ka parichay dena hai। baap svarga ka rachayita hai, usko jaante ho? parampita paramatma se tumhaara kya sambandh hai? pahchaan deni hai to baap se lav jute। baap kehte hain main kalpa ke sangamayug par aakar narka ko svarga banaata hoon। krishna to yeh kah na sake। woh to svarga ka prince hai। roop badalte jaate hain। jhaad par samjhaana hai, oopar patit duniya mein brahma khada hai। woh hai patit, neeche phir tapasya kar rahe hain। brahma ki vanshaavli bhi hai। parampita paramatma hi aakar patit se paavan banaate hain। patit so phir paavan bante hain। krishna ko bhi shyaam-sundar kehte hain। parantu arth nahin samajhte। tum samjha sakte ho - yeh patit hai। asul naam brahma nahin hai, jaise tum sabke naam badli hue hain। vaise baba ne inko bhi adopt kiya hai। nahin to shivbaaba ne brahma ko kahaan se laaya! stri to hai nahin। zaroor adopt kiya। baap kehte hain mujhe inmen hi pravesh karna hai। prajaapita oopar to ho na sake, yahaan chaahiye। pahle to yeh nishchay chaahiye। main saadhaaran tan mein aata hoon। gaooshaala naam hone kaaran bail aur gaayen bhi dikhaate hain। ab gau ko gyaan diya hai va gau charaai hai, yeh nahin likha hai। chitron mein shreekrishna ko gvaala bana diya hai। aisi-aisi baaten aur dharmo mein nahin hain। jitni is dharma mein hain। yeh sab bhakti maarga ki noondh hai। ab tum bachche jaante ho - puraani duniya ka vinaash, nai duniya ki sthaapna ho rahi hai। baba samjhaate hain - is srishti chakra ko jaanne se hi tum bhavishya prince princess banenge। amarlok mein oonch pad paayenge। tum jo kuchh padhte ho - bhavishya nai duniya ke liye। tum yeh puraana shareer chhod royal dhanvaan ghar mein janma lenge। pahle bachcha honge phir bade honge to first class mahal banaayenge। tatatvam। shivbaaba kehte hain jaise yeh mama baba achhi tarah padhte hain, tum bhi padho to oonch pad paayenge। raat ko jaago, vichaar saagar manthan karo to khushi mein aa jaayenge। us samay hi khushi ka paara chadhta hai। din mein dhandhe aadi ka bandhan hai। raat ko to koi bandhan nahin। raat ko baba ki yaad mein soyenge to subah ko baba aakar khatiya hilaayenge। aisa bhi bahut anubhav likhte hain। himmate bachche madde baap to hai hi। apne oopar bahut attention rakho। sannyaasiyon ka dharma alag hai। jis dharma ka jitna sijra hoga utna hi banega। jo aur dharmon mein convert ho gaye honge woh phir apne dharma mein aayenge। samjho sannyaas dharma ke ek ya do karod actors hain, utne hi phir honge। yeh drama bada accurate bana hua hai। koi kis dharma mein, koi kis dharma mein convert ho gaye hain। woh sab apne-apne dharma mein chale jaayenge। yeh knowledge buddhi mein baithni chaahiye।

ab ham kehte hain ham aatma hain, shivbaaba ki santaan hain। yeh saari vishwa meri hai। ham rachayita shivbaaba ke bachche bane hain। ham vishwa ke maalik hain। yeh buddhi mein aana chaahiye tab athaah khushi rahegi। doosron ko bhi khushi deni hai, raasta bataana hai। merciful banna hai। jis gaanv mein rehte ho vahaan bhi service karni chaahiye। sabko nimantran dena hai, baap ki pahchaan deni hai। agar jyaada samajhne chaahte ho to bolo yeh srishti chakra kaise phirta hai, yeh bhi tumko samjhaate hain। service to bahut hai। parantu achhe-achhe bachchon par bhi kabhi-kabhi grahchaari aa jaati hai, samjhaane ka shauk nahin rehta। nahin to baba ko likhna chaahiye - baba service ki, uski result yeh nikli, aise aise samjhaaya। to baba bhi khush ho jaae। samjhe to inko service ka shauk hai। kabhi mandir mein, kabhi shamshaan mein, kabhi church mein ghus jaana chaahiye। poochhna chaahiye god father se tumhaara kya sambandh hai? jab father hai to mukh se kehna chaahiye - ham bachche hain। heavenly god father kehte hain to zaroor heaven rachega। kitna sahaj hai। aage chalkar bahut aaphten aane vaali hain। manushyon ko vairaagya aayega। shamshaan mein manushyon ko vairaagya aata hai। bas duniya ki yeh haalat ho jaayegi! isse to kyon nahin bhagwan ko paane ka raasta pakden। phir guru aadi se jaakar poochhte hain to in bandhanon se chhootne ka raasta bataao।

tumhein apne bachchon aadi ki paalna bhi karni hai aur service bhi karni hai। mama baba ko dekho kitne bachche hain। woh hai had ka grihastha vyavhaar, yeh baba to behad ka maalik hai। behad ke bhaai-bahinon ko samjhaate hain। yeh sabka antim janma hai। baap heere jaisa banaane aaye hain। phir tum kaudiyon ke pichhaadi kyon padte ho! subah aur shaam heere jaisa banne ki service karo। din mein kaudiyon ka dhandha karo। jo service par hir jaayenge unko ghadi-ghadi baba buddhi mein yaad aata rahega, practice pad jaayegi। jinke paas kaam karenge, unko bhi lakshya dete rahenge। parantu niklenge to koton mein koi। aaj nahin to kal yaad karenge to phalaane dosta ne hamko yeh baat kahi thi। agar pad paana hai to himmat chaahiye। bhaarat ka sahaj yog aur gyaan to mashhoor hai। parantu kya tha, kaisa tha woh nahin jaante। yeh tyohaar aadi sab sangamayug ke hain। satayug mein to hai hi raajaai। history saari hai sangam ki। satayugi devtaaon ko raajaai kahaan se mili, yeh bhi abhi hi maaloom pada hai। tum jaante ho ham hi raajaai lete hain aur ham hi ganvaate hain, jo jitni service karenge। ab to pradarshani ki service badhti jaati hai। projector bhi gaanv-gaanv mein jaayega। yeh service bahut vistaar ko paayegi। bachche bhi vriddhi ko paate rahenge। phir in bhakti maarga ki value nahin rahegi। yeh drama mein tha। aise nahin ki yeh kyon hua! aise na karte to aise hota tha! yeh bhi nahin kah sakte। past jo hua so theek, aage ke liye khabardaar। maaya koi vikarma na karaaye। mansa toofaan to aayenge, parantu karmendriyon se koi vikarma nahin karna। phaaltu sankalp to bahut aayenge, phir bhi purushaartha kar shivbaaba ko yaad karte raho। heartfail nahin hona hai। kai bachche likhte hain - baba 15-20 varsha se beemaari ke kaaran pavitra rehte hain phir bhi mansa bahut kharaab rehti hai। baba likhte hain toofaan to bahut aayenge, maaya hairaan karegi, par vikaar mein nahin jaana। yeh tumhaare hi vikarmo ka hisaab-kitaab hai। yogbal se hi khatma hoga, darna nahin hai। maaya badi balvaan hai। koi ko bhi chhodti nahin hai। service to athaah hai, jitna bhi koi kare। achha!

meethe-meethe serviceable sikeeldhe bachchon prati nambarvaar purooshaartha anusaar maat-pita baapdaada ka yaadapyaar aur good-morning। roohaani baap ki roohaani bachchon ko namaste।

dhaarna ke liye mukhya saar:-

1) din mein shareer nirvaah arth karma aur subah-shaam jeevan ko heere jaisa banaane ki roohaani seva zaroor karni hai। sabko raavan ki janjeeron se chhudaana hai।

2) maaya koi bhi vikarma na kara de ismen bahut-bahut khabardaar rehna hai। karmendriyon se kabhi koi vikarma nahin karna hai। aasuri avgun nikaal dene hain।

vardaan:- dil ki tapasya dvaara santushtata ka certificate praapta karne vaale sarva ki duaaon ke adhikaari bhav

tapasya ke chart mein apne ko certificate dene vaale to bahut hain lekin sarva ki santushtata ka certificate tabhi praapta hota hai jab dil ki tapasya ho, sarva ke prati dil ka pyaar ho, nimitta bhaav aur shubh bhaav ho। aise bachche sarva ki duaaon ke adhikaari ban jaate hain। kam se kam 95 percent aatmaayen santushtata ka certificate den, sabke mukh se nikle ki haan yeh number one hai, aisa sabke dil se duaaon ka certificate praapta karne vaale hi baap samaan bante hain।

slogan:- samay ko amoolya samajhkar saphal karo to samay par dhokha nahin khaayenge।