Murli du jour du lundi 11 avril 2022

11-04-2022 praatahmurli om shanti "baapdaada"' madhuban

“meethe bachche - tumhaari buddhi mein saara din service ke hi khyaalaat chalne chaahiye, tumhein sabka kalyaan karna hai kyonki tum ho andhon ki laathi''

prashn:- oonch pad paane ke liye mukhya kaun si dhaarna chaahiye?

uttar:- oonch pad tab milega jab apni karmendriyon par poora-poora control hoga। agar karmendriyaan vash nahin, chalan theek nahin, bahut adhik tamannaayen hain, habach (laalach) hai to oonch pad se vanchit ho jaayenge। oonch pad paana hai to maat-pita ko poora follow karo। karmendriy jeet bano।

geet:- nayan heen ko raah dikhaao prabhu…

om shanti। pradarshani ke liye yeh geet bahut achha hai, aise nahin pradarshani mein record nahin bajaaye ja sakte। is par bhi tum samjha sakte ho kyonki pukaarte to sab hain। parantu yeh nahin jaante hain ki jaana kahaan hai aur kaun le jaayega। jaise ki drama athva bhaavi vash bhakton ko bhakti karni hai। jab bhakti poori hoti hai tab hi baap aate hain। kitne dar-dar bhatakte hain। mele malaakhde lagte hain। din-pratidin vriddhi ko paate jaate hain, shraddha se teertho par jaana bhatakna chalta hi aata hai। bahut samay ho jaata hai to bhi government stamp aadi banaati rehti hai। saadhuon aadi ke bhi stamp banaati hai। birth de manaate hain। yeh sab hai raavan-raajya ka athva maaya ka bhabhka, unka bhi mela malaakhda chaahiye। aadhaakalpa se tum raavanraajya mein bhatakte rahe। ab baba aakar raavanraajya se chhudaae raamraajya mein le jaate hain। duniya yeh nahin jaanti ki aapehi poojya aapehi pujaari yeh mahima kiski hai। pahle 16 kala sampoorn, poojya rehte hain phir 2 kala kam ho jaati hai to unko semi kahenge। full poojya phir do kala kam hone se semi poojya kahenge। tum jaante ho pujaari se phir poojya ban rahe hain। phir semi poojya banenge। ab is kaliyug ke ant mein hamaara pujaari pane ka part khatma hota hai। poojya banaane liye baba ko aana padta hai। ab baba vishwa ka maalik banaate hain। vishwa to yeh bhi hai, woh bhi hogi। vahaan manushya bahut thode hote hain। ek dharma hota hai। anek dharma hone se bhi hangaama hota hai।

ab baba aaya hai laayak banaane। jitna baba ko yaad karenge utna apna bhi kalyaan karenge। dekhna hai ki kalyaan karne ka kitna shauk rehta hai! jaise artist hain unko khyaal rehta hai aise-aise chitra banaayen jisse manushya achhi reeti samajh jaayen। samjhenge ham behad ke baap ki service karte hain। bhaarat ko svarga banaana hai। pradarshani mein dekho kitne dher aate hain। to pradarshani ke aise chitra banaayen jo koi bhi samajh jaayen ki yeh chitra accurate raasta bataane vaale hain। mele malaakhde aadi jo hain woh to unke aage kuchh bhi nahin hain। artist jo is gyaan ko samajhte hain, unki buddhi mein rahega - aise-aise chitra banaayen jo bahuton ka kalyaan ho jaaye। raat-din buddhi is baat mein lagi rahe। in cheezon ka bahut shauk rehta hai। maut to achaanak aata hai। agar jutti aadi ki yaad mein rahe, maut aa gaya to jutti jaisa janma milega। yahaan to baap kehte hain deh sahit sabko bhoolna hai। yeh bhi tum samajhte ho ki baap kaun hai? koi se poochho aatmaon ke baap ko jaante ho? kehte hain nahin। yaad kitna karte hain, maangate rehte hain। deviyon se bhi jaakar maangate hain। devi ki pooja ki aur kuchh mil gaya to bas un par kurbaan ho jaate hain। phir pujaari ko bhi pakad lete hain, woh bhi aasheervaad aadi karte hain। kitni andhashraddha hai। to aise-aise geeton par pradarshani mein bhi samjha sakte ho। yeh pradarshani to gaanv-gaanv mein jaayegi। baap gareeb nivaaz hai। unhon ko jor se uthaana hai। saahookaar to koton mein koi niklega। praja to dher hai। yahaan to manushya se devta banna hai। baap se varsa milta hai। pahle-pahle to baap ko jaanna chaahiye ki woh hamko padhaate hain। is samay manushya kitne patthar buddhi hain। dekhte bhi hain itne centres par aate hain, sabko nishchay hai! baap teacher satguru hai, yeh bhi samajhte nahin hain।

ek doosra geet bhi hai ki is paap ki duniya se..... woh bhi achha hai, yeh paap ki duniya to hai hi। bhagvaanuvaach - yeh aasuri sampradaay hai, main inko daivi sampradaay banaata hoon। phir manushyon ki committee aadi yeh kaarya kaise kar sakti। yahaan to saari baat hi buddhi ki hai। bhagwan kehte hain tum patit ho, tumko bhavishya ke liye paavan so devta banaata hoon। is samay sabhi patit hain। patit akshar hi vikaar par hai। satayug mein viceless world thi। yeh hai vicious world। krishna ko 16108 raaniyaan de di hain। yeh bhi drama mein noondh hai। jo bhi shaastra banaaye hue hain, unmein glaani kar di hai। baba jo svarga banaate hain unke liye bhi kya-kya kehte hain। abhi tum jaante ho baba hamko kitna oonch banaate hain। kitni achhi shiksha dete hain। sachcha-sachcha satsang yeh hai। baaki sab hain jhooth sang। aise ko phir parampita paramatma aakar vishwa ka maalik banaate hain। baap samjhaate hain bachche, tumko ab andhon ki laathi banna hai। jo khud hi sajje nahin hain woh phir auron ki laathi kya banenge! bhal karke gyaan ka vinaash nahin hota। ek baari maa baap kaha to kuchh na kuchh milna chaahiye। parantu nambarvaar pad to hai na। chalan se bhi kuchh maaloom pad jaata hai। phir bhi purushaartha karaaya jaata hai। aise nahin jo mila so theek। purushaartha se oonch praalabdha milni hai। bigar purushaartha to paani bhi na mile। isko karmakshetra kaha jaata hai, yahaan karma bigar manushya rah na sake। karma sannyaas akshar hi wrong hai। bahut hath karte hain। paani par, aag par chalna seekhte hain। parantu phaayda kya mila? muphta aayu ganvaate hain। bhakti ki jaati hai raavan ke duhkh se chhootne ke liye। chhootkar phir vaapis jaana hai isliye sab yaad karte hain, ham muktidhaam mein jaayen athva sukhdhaam mein jaayen। donon hi past ho gaye hain। bhaarat sukhdhaam tha, ab narka hai to narkavaasi kahenge na। tum khud kehte ho phalaana svargavaasi hua। achha tum to narka mein ho na। heaven ke against hell hai। baaki woh to hai shantidham। bade-bade log itna bhi samajhte nahin hai। apne ko aapehi siddha karte hain ham hell mein hain। badi yukti se siddha kar bataana hai। yeh pradarshani to bahut kaam kar dikhaayegi। is samay manushya kitne paap karte hain। svarga mein aisi baaten hoti nahin। vahaan to praalabdha hai। tum phir se ab svarga mein chalte ho, tum kahenge anek baar is vishwa ke maalik ham bane hain, phir ab ban rahe hain। duniya mein kisko bhi pata nahin। tumhaare mein bhi koi samajhte hain। is khel se koi chhoot nahin sakte। moksha bhi manushya tab chaahte hain, jab duhkhi hote hain। baba to kehte hain - achhi reeti purushaartha karo। maa baap ko follow kar achha pad pa lo, apni chalan ko sudhaaro। baap to raah bataate hain phir us par kyon nahin chalte ho। jaasti tamannaayen nahin rakhni chaahiye। yagya se jo mile so khaana hai। habach (laalach) hai, karmendriyaan vash mein nahin hai to pad bhi ooncha nahin pa sakte। to aise-aise geet pradarshani mein bajaae us par tum samjha sakte ho।

tum ho shivbaaba ke parivaar। shivbaaba ke oopar to koi hai nahin। aur sabke oopar to koi na koi niklenge। 84 janma mein daada, baba bhi 84 milte hain। shivbaaba hai rachta, ab nai rachna rach rahe hain arthaat puraani ko naya banaate hain। tum jaante ho ham saanvare se gore bante hain, svarga mein shreekrishna hai number one। phir last mein unka janma hai। phir yahi pahla number banta hai। poore-poore 84 janma shreekrishna ne liye hain। sooryavanshi daivi sampradaay ne poore 84 janma liye। baap kehte hain jo shreekrishna pahla number tha, unke hi antim janma mein pravesh kar phir unko shreekrishna banaata hoon। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi vinaashi tamannaayen nahin rakhni hai। apna aur sarva ka kalyaan karna hai।

2) deh sahit sab kuchh bhool vaapas ghar chalna hai - isliye check karna hai ki buddhi kahin par bhi atki hui na ho।

vardaan:- “natural attention'' ko apni nature (aadat) banaane vaale smriti swaroop bhav

sena mein jo sainik hote hain woh kabhi bhi albele nahin rehte, sada attention mein alert rehte hain। aap bhi paandav sena ho ismen jara bhi abelaapan na ho। attention ek natural vidhi ban jaae। kai attention ka bhi tension rakhte hain। lekin tension ki life sada nahin chal sakti, isliye natural attention apni nature banaao। attention rakhne se svatah smriti swaroop ban jaayenge, vismriti ki aadat chhoot jaayegi।

slogan:- svayan ke svayan teacher bano to sarva kamjoriyaan svatah samaapta ho jaayengi।

maateshvari ji ke anmol mahaavaakya

1) yaad ka tailuk (sambandh) hai gyaan se, gyaan ke bina yaad yathaartha nahin rah sakti

pahle-pahle manushya ko apni sukhi jeevan banaane ke liye kaunsi mukhya point buddhi mein rakhni hai? pahle to yeh mukhya baat samajhni hai ki jis paramatma baap ki ham santaan hain, us baap ki yaad mein har samay shvaanso shvaans upasthit rahen, us abhyaas mein rahne ki poorn reeti se koshish karni hai। ab shvaanson shvaans ka matlab hai lagaataar buddhiyog laga rahe, jisko nirantar yog, atoot ajpaajaap yaad kaha jaata hai, yeh koi mukh se japne vaali yaad nahin hai aur na koi moorti saamne rakh uska dhyaan karna hai। parantu yeh buddhiyog dvaara yaad rakhni hai, ab vo yaad bhi nirantar tab rah sakegi jab paramatma ka poora parichay ho, tab hi dhyaan poorn lag sakega। parantu paramatma to geeta mein saaph kehte hain, na main dhyaan se, na jap se milta hoon aur na meri soorat ko saamne rakh unka dhyaan karna hai parantu gyaan yog dvaara paramatma ko paana hai isliye pahle chaahiye gyaan, gyaan bigar yaad kaayam rah nahin sakegi। yaad ka tailuk hai hi gyaan se। ab gyaan se, chaahe man se kalpana karen va baithkar darshan karen agar us dekhi hui cheez ka bhi pahle gyaan hoga tab hi yog aur dhyaan theek lag sakta hai isliye paramatma kehte hain main kaun hoon, mere saath kaise yog lagaana hai, uska bhi gyaan chaahiye। gyaan ke liye phir pahle sang chaahiye, ab yeh sab gyaan ki point buddhi mein rakhni hai tab hi yog theek lag sakega।

2) “srishti ki aadi kaise hogi?''

manushya poochhte hain ki paramatma ne srishti kaise rachi? aadi mein kaunsa manushya racha, ab uska naam roop samajhna chaahte hain। ab us par unhon ko samjhaaya jaata hai ki paramatma ne srishti ki aadi brahma tan se ki hai, pahla aadmi brahma racha hai। to jis paramatma ne srishti ki aadi ki hai, to avashya paramatma ne bhi is srishti mein apna part bajaaya hai। ab paramatma ne kaise part bajaaya? pahle to paramatma ne srishti ko racha, usmein bhi pahle brahma ko racha, to goya pahle brahma ki aatma pavitra hui, vahi jaakar shreekrishna bani, usi tan dvaara phir devi devtaaon ke srishti ki sthaapna ki। to daivi srishti ki rachna brahma tan dvaara karaai, to devi devtaayen ka aadi pita thahra brahma, brahma so shreekrishna banta hai, vahi shreekrishna ka phir ant ka janma brahma hai। ab aise hi srishti ka niyam chalta aata hai। ab vahi aatma sukh ka part poora kar duhkh ke part mein aati hai, to rajo tamo avastha paas kar phir shoodra se brahman banti hai। to ham hain brahmaavanshi so shivvanshi sachche brahman। ab brahmaavanshi usko kehte hain - jo brahma ke dvaara avinaashi gyaan lekar pavitra bante hain।

3) om shabd ka yathaartha arth

jab ham om shanti shabd kehte hain to pahle pahle om shabd ke arth ko poorn reeti se samajhna hai। agar koi se poochha jaae om ka arth kya hai? to vo log om ka arth bahut hi lamba chauda sunaate hain। om ka arth onkaar bade aavaaz se sunaate hain, is om par phir lamba chauda shaastra bana dete hain, parantu vaastav mein om ka arth koi lamba chauda nahin hai। apne ko to svayan paramatma om ka arth bahut hi saral aur sahaj samjhaate hain। om ka arth hai main aatma hoon, mera asli dharma shant swaroop hai। ab is om ke arth mein upasthit rehna hai, to om ka arth main aatma paramatma ki santaan hoon। mukhya baat yeh hui ki om ke arth mein sirf tikna hai, baaki mukh se om ka uchchaaran karne ki jaroorat nahin hai। yeh to buddhi mein nishchay rakhkar chalna hai। om ka jo arth hai us swaroop mein sthit rehna hai। baaki woh log bhal om ka arth sunaate hain magar us swaroop mein sthit nahin rehte। ham to om ka swaroop jaante hain, tab hi us swaroop mein sthit hote hain। ham yeh bhi jaante hain ki paramatma beejrup hai aur us beejroop paramatma ne is saare jhaad ko kaise racha hua hai, uski saari knowledge humein abhi mil rahi hai। achha - om shanti।