Murli du jour du jeudi 14 avril 2022

14-04-2022 praatahmurli om shanti "baapdaada"' madhuban

“meethe bachche - yogbal se ghaate ke khaate ko chuktu kar, sukh ka khaata jama karo, vyaapaari ban apna poora hisaab nikaalo''

prashn:- tum bachchon ne baap se kaun si pratigya ki hai, us pratigya ko nibhaane ka sahaj saadhan kya hai?

uttar:- tumne pratigya ki hai - mera to ek shivbaaba, doosra na koi… bhakti mein bhi kehte the - baba jab aap aayenge to ham aur sang tod ek aap se jodenge। ab baba kehte hain bachche deh sahit deh ke sab sambandhon ko buddhi se tyaagkar ek mujhe yaad karo। is puraane shareer se bhi dil hata do, parantu ismen mehnat hai। is pratigya ko nibhaane ke liye savere-savere uth apne aapse baaten karo va khyaal karo - ab yeh naatak poora hota hai।

geet:- chhod bhi de aakaash sinhaasan....

om shanti। bachche pukaarte hain ki paramdham se aao। yeh geet gaaya hua hai patit manushyon ka। woh khud inka arth nahin jaante। pukaarte bhi hain ki patiton ko paavan banaane aao kyonki is samay hai raavan raajya। yeh bhi bachche jaante hain ki bhaarat mein daivi shreshtaachaari raajya tha। abhi tum shreshtaachaari banne ka purushaartha kar rahe ho। baap kehte hain bachche abhi tumko vaapis chalna hai। puraana paap ka khaata chuktu karna hai। vyaapaari log 12-12 maas puraana khaata banda karte hain। ghaate va phaayde ka hisaab nikaalte hain। abhi tum bachche jaante ho bhaarat mein ham aadhaakalpa phaayde mein, aadhaakalpa ghaate mein rehte hain arthaat aadhaakalpa sukh, aadhaakalpa duhkh paate hain। usmein bhi duhkh bahut thoda paate hain, jabki tamopradhaan avastha hoti hai, vyabhichaari bhakti mein chale jaate hain। baap baith bachchon ko samjhaate hain। ab tumko phaayde mein jaana hai। ghaate ke khaate ko ab yogbal se chuktu karna hai। tumhaare paapon ka khaata ab katna chaahiye, phir sukh ka khaata jama hona chaahiye। jitna tum mujhe yaad karenge utna tumhaare paapon ka khaata bhasma hoga aur phir pavitra ban geeta ka gyaan dhaaran karna hai। yahaan koi geeta shaastra nahin sunaate hain। yeh geeta ka gyaan bhagwan ne diya hai। is samay manushyon ki buddhi tamopradhaan hone ke kaaran baap ko nahin jaante isliye inko orphans kaha jaata hai। tum samjhaate ho ki bhaarat punya aatma, shreshthaachaariyon ki duniya thi, jinhon ke chitra bhi hain। bhaarat satayug aadi mein bahut saahookaar tha aur jo islaami, bauddhi aadi dharma hain, aarambha mein hote hi thode hain। dharma sthaapak aaya phir jo bhi us dharma ki aatmaayen hain, woh aati jaati hain। woh koi raajaai mein nahin aate। apne dharma mein aate hain। jab laakhon karodon ki andaaj mein ho jaate hain tab raaja-raani aadi bante hain। yahaan tumhaari to shuru se lekar raajaai chalti hai। satayug aadi mein hi lakshmi-naaraayan ka raajya tha - bhaarat mahaan oonch tha jab shreshtaachaari tha। oonche te ooncha bhagwan gaaya jaata hai। unko hi truth kehte hain। woh aakar sachchi knowledge dete hain aur sabhi baap ke baare mein jhoothi hi knowledge dete hain। sabhi yaad karte hain O god father। parantu father ko koi bhi jaante nahin hain। kabhi tum poochho - laukik father ko jaante ho to yeh thode hi kahenge woh sarvavyaapi hai। father maana father। father se to varsa milta hai। baap samjhaate hain - main hoon behad ka rachayita। mujhe bulaate hi hain patit duniya mein। pralay to hoti nahin। yeh saari patit duniya hai। mujhe tum bachchon ke liye hi aana padta hai। tum bachchon ko hi samjhaata hoon। manushya guru aadi karte hain - shanti ke liye। parantu woh sab hain bhakti maarga ke liye, hathayog aadi sikhlaate hain। unse koi behad ka varsa mil nahin sakta। guru karte hain, unse alpakaal ke liye thoda sukh milta hai। woh sab hain had ka sukh dene vaale। behad ka baap hai behad ka sukh dene vaala। baap mukti-jeevanmukti ki saugaat le aate hain। satayug mein sirf ek hi dharma hota hai। yahaan to kitne anek dharma hain, vriddhi hoti hi rehti hai। ab phir itni sab aatmaaen vaapis jaayengi shantidham mein। yeh tum bachchon ko srishti ke aadi-madhya-ant ka gyaan mil raha hai। baap hai is manushya srishti ka beejroop, unke paas saari knowledge hai। sarvavyaapi kahne se gyaan va bhakti ki koi baat thaharti hi nahin hai। bhagwan sarvavyaapi hai to phir bhagwan ki bhakti karne ki kya darkaar hai! bhakti karte hain parantu samajhte nahin hain। patthar thikkar sabki bhakti karte rehte hain। ganga mein kitne snaan karne jaate hain। agar woh patit-paavni ho to phir sabko paavan hona chaahiye। mukti-jeevanmukti dhaam mein jaana chaahiye। lekin jaata koi nahin hai। ek guru vaapis jaaye to aur followers ko bhi le jaaye। lekin na khud jaate, na followers ko kuchh kah sakte hain। deh-abhimaan mein bahut hain। aise koi bhi nahin kah sakenge ki ham niraakaar parampita paramatma tum bachchon ka baap hoon। tumko saath le jaane aaya hoon। yeh baap ko hi hak hai। ab puraani duniya ko chhodna hai, isliye yogbal zaroor chaahiye। gaphlat karne se pad nahin paayenge।

tum bachche jaante ho baba hamko laayak bana rahe hain। bachche jo na-laayak ban jaate hain woh devaala maarte hain। kalpa-kalpa tumko 100 percent solvent banaata hoon। phir raavan tumko insolvent bana dete hain। samajhte bhi hain baat theek hai, ab barobar kaliyug ka ant hai, satayug aadi ka sangam hai। samjho makaan ki aayu 100 varsha hai। agar 25 varsha beet gaye to 1/4 puraana hua। 50 varsha honge to puraana naam rakh denge। yeh bhi 4 bhaag rakhe jaate hain। sato rajo tamo ab phir yeh puraani duniya se nai duniya hogi। goya saari duniya ko naya janma milna hai। yeh puraani duniya hai। baap kehte hain ab main naya janma de raha hoon। duniya puraane se nai ho rahi hai। tum aaye ho raajayog seekhne। tum bhi jaante ho is drama ke andar ham actor hain। ham aatmaayen bhi shareer lekar yahaan part bajaane aai hain। duniya mein yeh koi nahin jaanta। apne ko actor samjhen to creator, director ko bhi jaan jaayen। kahne maatra sirf kehte hain yeh karmakshetra hai। parantu kab se khel shuru hua, unka creator kaun hai, kuchh bhi nahin jaante। manushya ko hi jaanna chaahiye na। baaki yeh aapas mein ladna to orphans ka kaam hain। devtaaon ko orphans nahin kahenge। vahaan ladaai-jhagda hota hi nahin। yahaan to dekho bachche baap ko bhi maar dete hain। sabhi patit bhrashtaachaari hain isliye duhkh dete rehte hain। aadhaakalpa sampoorn nirvikaari devi-devtaaon ka raajya tha। abhi to ek bhi sampoorn nirvikaari nahin hai। abhi baap tumko shreemat dete hain। yeh puraani duniya khatma hone vaali hai। main aaya hoon nai duniya sthaapan karne। tum pratigya bhi karte ho baba aap aayenge to ham aur sang tod ek aapke sang jodenge। mera to ek baba doosra na koi। ab baba aaye hain kehte hain, bachche deh sahit deh ke sabhi sambandhon ka tyaag kar mujhe yaad karo। ismen hi mehnat hai, kehte hain - baba ham jaante hain yeh jo bhi mitra sambandhi aadi hain, yeh sab mare pade hain। yeh shareer bhi khatma ho jaayega, puraana hai। ab ham puraana shareer chhod naye mein jaayenge। puraane shareer se dil hat jaati hai। abhi ham gaye ki gaye। puraani duniya bhasma honi hai। baap samjhaate hain savere uthkar aise-aise khyaal karo। abhi naatak poora hota hai, hamko vaapis jaana hai। ab ek hi baap ki shreemat par chalna hai। abhi nai duniya mein jaana hai isliye jeete ji sabse buddhiyog tod ek se jodna pade, ismen bada abhyaas chaahiye। abhyaas ke liye hi baap kehte hain savere utho। din mein to shareer nirvaah arth karma karna hai। raat ka abhyaas vriddhi ko paata hai। jitna time mile baba ko yaad karo। baba ki yaad mein tum kitna bhi paidal karte jaao, kabhi thak nahin sakte। yogbal ki khushi rehti hai। yaad ka abhyaas hoga to kahaan bhi baithe yaad aa jaayegi। khaane par bhi yaad mein rehna hai। phaaltu vaartaalaap nahin chalna chaahiye। baap ki yaad se hi vikarma vinaash honge। phir ant mati so gati ho jaayegi। abhi vaapis jaana hai। sabhi ka sadgati daata, sabko shreshtaachaari banaane vaala, shaantidesh mein le jaane vaala ek hi baap hai। janma-janmaantar tumko baap teacher guru mile parantu woh sab hain jismaani। koi bhi dehi-abhimaani banna nahin sikhlaate hain। yeh to behad ka baap gyaan ka saagar hai। jo bhi aatmaayen hain unmein sanskaar bhare hue hain। phir shareer dhaaran karne se woh emerge hote hain। abhi tumko saare drama ki knowledge hai aur to sabhi manushya ghor andhiyaare mein hain। gaaya bhi hua hai gyaan anjan satguru diya। to gyaan anjan dene vaala gyaan soorya baap hai। satayug ko din, kaliyug ko raat kaha jaata hai। aatmaaen us niraakaari baap ko yaad karti hain। baap samjhaate hain main tum bachchon ko brahma mukh dvaara kalpa pahle muaaphik sab bhakti maarga ke shaastron ka raaz samjhaata hoon। yeh sab bhakti maarga ki saamagri hai, jo aadhaakalpa se chalti aati hai। manushya to kah dete yeh parampara se chalte aaye hain। raavan ko bhi parampara se jalaate aaye hain। tyohaar jo manaate hain woh sab kehte hain parampara se chal rahe hain। parampara ka arth kya hai? woh samajhte nahin। satayug ki aayu laakhon varsha likh di hai, to manushya ghor andhiyaare mein hain na। bhakti kab se shuru hui, paavan kab banen, kuchh bhi jaante nahin। bhagwan patiton ko paavan kab banaane aaye? kehte bhi hain Christ se 3 hajaar varsha pahle svarga tha, parantu phir bhi anek mat hain na। kitni maten duniya mein kaam kar rahi hain। baap aakar shreshtha mat dete hain। shreemat se tum shreshtha so devta bante ho। roodra maala bhi hai। roodra bhi niraakaar bhagwan hi thahre। woh hai shri shri। devtaaon ko kahenge shri arthaat shreshtha। abhi tum bachche jaante ho ki shri shri dvaara shreshtha duniya banti hai। baap shri shri hai shri banaane vaala। yeh sab baaten yaad karni hai। kalpa pahle vaale hi samjhenge। yeh gyaan sab dharma vaalon ke liye hai। sabko baap kehte hain - apne ko aatma samjho। behad ke baap se kitna sukh mil raha hai। behad ka baap aakar itne bachchon ko adopt karte hain। yeh mukh vanshaavli hain na। kitne dher bi.ke. hain, jo phir devta banne vaale hain। yeh hai eeshvareey kul। daada hai niraakaar। unke bachche ka naam hai prajaapita brahma, in dvaara adopt karte hain। tum brahman ho shivbaaba ki family, phir vriddhi hoti hai। abhi tumhaari number one biraadri hai। tum service karte ho, sabka kalyaan karte ho। tumhaara jad yaadgaar mandir accurate bana hua hai। yahaan tum chaitanya mein baithe ho। jaante ho ham phir se sthaapna karte hain। bhakti mein hamaare yaadgaar mandir banenge। shivbaaba na hota to tum kahaan hote। brahma vishnu shankar kahaan hain? abhi shivbaaba rachna rach rahe hain na। prajaapita brahma ka chitra alag hona chaahiye। trimoorti brahma kehte hain parantu unka to koi arth hi nahin।

tum jaante ho - parampita paramatma brahma dvaara sthaapna karte hain। karnakraavanhaar shivbaaba hai। yeh sab baaten dhaaran karne ki hain। shivbaaba khud raajayog sikhla rahe hain। knowledge de rahe hain to woh dhaaran karni chaahiye, ismen purity first hai। himmat bhi dikhaani hai। grihastha vyavhaar mein rehte pavitra rah dikhaana hai। koi bachchi ko bachaane ke liye bhi svayanvar karte hain, jisko gandharvi vivaah kehte hain। phir usmein bhi koi fail ho jaate hain। koi-koi aise bhi hote hain, jo shaadi kar phir pavitra rehte hain। pavitra rah phir knowledge bhi leni hai। dhaaran kar auron ko bhi aap samaan banaakar dikhaaven tab oonch pad pa saken। is gyaan-yagya mein vighna bhi bahut padte hain। yeh to sab hoga। drama mein noondh hai। kai bachchiyaan kehti hain - humein saahookaari kya karni, isse to bartan maanj kar roti khaana achha hai, pavitra to rahengi। parantu himmat chaahiye bahut। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) bhojan karte samay yaad mein rehna hai, phaaltu vaartaalaap nahin karni hai। yaad se paapon ka khaata chuktu karna hai।

2) din mein shareer nirvaah arth karma kar, raat ko jaag apne aapse baaten karni hain। khyaal karna hai ki yeh naatak poora hua, ham ab vaapis jaate hain isliye jeete ji mamatva mitaana hai।

vardaan:- double nashe ki sthiti dvaara sada nirvighna banne aur banaane vaale vishwa parivartak bhav

“maalik so baalak hain'' - jab chaaho maalikpan ki sthiti mein sthit ho jaao aur jab chaaho baalakpan ki sthiti mein sthit ho jaao, yeh double nasha sada nirvighna banaane vaala hai। aisi aatmaon ka title hai vighna-vinaashak। lekin sirf apne liye vighna-vinaashak nahin, saare vishwa ke vighna-vinaashak, vishwa parivartak ho। jo svayan shaktishaali rehte hain unke saamne vighna svatah kamjor ban jaata hai।

slogan:- apne double light swaroop mein sthit raho to sab bojh samaapta ho jaayenge।